Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Nganong ang unang sala—ang pagsupak ni Adan—mahimong ipakasama sa napanunod nga sakit?

Kini nahisamag sakit tungod kay gipasa ni Adan ang sala ngadto sa iyang mga kaliwat. Busa atong napanunod ang depekto sa sala, maingon nga ang pipila ka anak makapanunod ug sakit gikan sa ilang mga ginikanan.—8/15, panid 5.

• Unsay pangunang mga hinungdan sa nag-uswag nga kapintasan karon?

Gipaningkamotan ni Satanas nga mapahilayo ang mga tawo gikan kang Jehova pinaagi sa pagtisok sa espiritu sa kapintasan diha sa mga kasingkasing, pinaagi sa mga salida, musika, ug mga dula sa kompiyuter nga mag-aghat sa mga magdudula sa pagsundog sa kabangis ug pagpamatay. Ang kapintasan nga makita diha sa media nakaamot usab sa daghang mapintas nga mga buhat.—9/1, panid 29.

• Kinsa si Poncio Pilato?

Siya maoy usa ka Romano nga sakop sa ubos nga hamiling matang nga lagmit nagsundalo. Ang Romanong Emperador nga si Tiberio nagtudlo kang Pilato ingong gobernador sa probinsiya sa Judea niadtong 26 K.P. Sa dihang gihusay si Jesus, nadungog ni Pilato ang mga sumbong nga gipasaka sa Hudiyohanong mga lider. Aron mapahimut-an ang mga tawo, siya miuyon sa pagpapatay kang Jesus.—9/15, mga panid 10-12.

• Unsa “ang ilhanan” nga gihisgotan sa Mateo 24:3?

Kini nga ilhanan adunay daghang bahin nga nagtimaan sa linangkob nga ilhanan. Ang maong ilhanan naglakip sa gubat, kagutom, kamatay, ug mga linog, ug pinaagi niini mailhan sa mga sumusunod ni Jesus ang iyang “presensiya” ug “ang kataposan sa sistema sa mga butang.”—10/1, mga panid 4-5.

• Unsa ang Diaspora, ug unsang mga dapita ang nasakop niini?

Kining terminoha mapadapat sa mga Hudiyo nga nagpuyo gawas sa Palestina. Sa unang siglo, ang kinadaghanang mga Hudiyo nagpuyo didto sa Sirya, Asia Minor, Babilonya, ug Ehipto, ug dihay gagmayng mga komunidad sa Uropa nga bahin sa Imperyo sa Roma.—10/15, panid 12.

• Makahupot ba ang usa ka Kristohanon ug maayong tanlag kon siya modawat ug trabaho nga kinahanglang magdalag armas?

Ang pagdawat ug sekular nga trabaho nga kinahanglang magdalag armas maoy personal nga desisyon. Apan kini magladlad sa usa ka tawo sa posibilidad nga masad-an sa dugo kon kinahanglan niyang gamiton ang maong hinagiban ug magpameligro usab kaniya nga masamdan o mamatay kon atakehon o balosan. Ang usa ka Kristohanon nga magdalag armas dili takos hatagan ug linaing mga pribilehiyo diha sa kongregasyon. (1 Timoteo 3:3, 10)—11/1, panid 31.

• Sanglit ang pulong “Armagedon” gikuha man gikan sa ekspresyon nga “Bukid sa Megido,” sangkaon ba ang gubat sa Armagedon diha sa usa ka bukid sa Tungang Sidlakan?

Dili. Wala gayoy naglungtad nga Bukid sa Megido, duna lay bungdo nga mituybo duol sa sikbit nga patag sa walog sa Israel. Kanang lugara gamay lang kaayo aron magtigom ang tanang “hari sa yuta ug ang ilang kasundalohan.” Ang dakong gubat sa Diyos sangkaon sa tibuok kalibotan, ug taposon niini ang tanang gubat. (Pinadayag 16:14, 16; 19:19; Salmo 46:8, 9)—12/1, mga panid 4-7.