Pagtabang sa mga Insek sa Mexico

“NAPULO ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: ‘Mouban kami kaninyo, kay kami nakadungog nga ang Diyos nagauban kaninyo.’” (Zacarias 8:23) Karon, kining matahom nga tagna nagakatuman sa tibuok kalibotan. Ang mga tawo “gikan sa tanang pinulongan sa mga nasod” miduyog sa espirituwal nga mga Israelinhon aron sa pagsimba kang Jehova nga Diyos. Interesado gayod ang mga Saksi ni Jehova sa katumanan niining tagnaa. Daghan kanila ang nagtuon ug laing pinulongan aron makigbahin sa tibuok-kalibotang buluhaton sa pagsangyaw.

Lakip kanila ang mga Saksi ni Jehova sa Mexico. Gibanabana nga dunay mga 30,000 ka Insek ang nagpuyo sa Mexico. Sa 2003, dunay 15 nga mitambong sa Memoryal sa kamatayon ni Kristo nga gihimo sa Mexico City. Busa naamgohan sa mga Saksi sa Mexico nga adunay potensiyal nga espirituwal nga pag-uswag taliwala sa mga Insek sa Mexico. Aron adunay mas daghang magwawali nga makaatiman niining mga tawhana, gitukod ang tulo-ka-bulan nga kurso sa pagtudlo sa Mexicanong mga Saksi ug yanong mga presentasyon diha sa Mandarin nga Ininsek. Tanantanan, 25 ka Saksi ang nagpaenrol sa maong kurso. Pagkahuman niini, usa ka opisyal gikan sa nagsultig-Mandarin nga komunidad sa Mexico City ang mitambong sa graduwasyon, nga nagpakita sa dakong epekto sa maong klase ngadto sa mga Insek. Usa ka lokal nga institusyon sa mga Insek mitanyag sa tulo ka estudyante ug libreng mga pagtuon sa gawas sa nasod aron pauswagon ang ilang pagsultig Ininsek.

Ang maong kurso sa pinulongan naglakip sa praktikal nga pagbansay. Human makat-oni ang pipila ka paninugdang mga pulong, ang mga estudyante misangyaw gilayon nga nag-Ininsek diha sa mga negosyohanan sa Mexico City. Ang masibotong mga estudyante nakasugod ug 21 ka pagtuon sa Bibliya. Dakog gikatabang ang Ininsek nga brosyur nga Unsay Gikinahanglan sa Diyos Kanato? nga gihubad ginamit ang Romanong alpabeto nga gitawag ug Pinyin.

Sa unsang paagi ang mga Saksi nga mao pay pagtuon ug Ininsek nakadumalag mga pagtuon sa Bibliya? Sa sinugdan, moingon lang sila ug, “Qing Du [Palihog basaha]” ug itudlo ang usa ka parapo ug dayon ang pangutana. Human mabasa ug matubag sa maong tawo diha sa Ininsek, sila moingon, “Shei shei [Salamat]” ug, “Hen Hao [Maayo kaayo].”

Usa sa maong mga pagtuon sa Bibliya nasugdan uban sa usa ka babayeng Kristiyano. Human sa ikatulong pagtuon, naghunahuna ang Saksi kon nasabtan ba gyod kaha sa maong babaye ang gitun-an. Busa gipauban sa sister ang usa ka Insek nga brader. Sa dihang gipangutana sa brader ang  babaye kon duna ba siyay mga pangutana, ang babaye misukna: “Aron mabawtismohan, kinahanglan ba kong makahibalong molangoy?”

Sa wala madugay, usa ka Pagtuon sa Libro sa Kongregasyon ang natukod nga may aberids nga tumatambong nga 9 ka Insek ug 23 ka lokal nga Mexicanong mga Saksi. Lakip sa mga nanambong mao ang usa ka Insek nga doktor, nga nakadawat ug Kinatsilang mga magasing Bantayanang Torre ug Pagmata! gikan sa usa sa iyang mga pasyente. Tungod kay dili man lagi siya makabasag Kinatsila, iya lang ipahubad ang pipila ka tudling pulong. Kay nakaamgo nga ang maong mga magasin naghisgot bahin sa Bibliya, gipangutana niya ang pasyente kon makakuha ba siyag Ininsek nga mga magasin. Nakakuha ang maong babaye, ug pinaagi sa sangang buhatan sa mga Saksi ni Jehova sa Mexico, gihimo ang mga kahikayan nga duawon ang maong doktor sa mga Saksing nagsultig Ininsek. Ang iyang inahan didto sa Tsina adunay Bibliya, ug nalingaw ang doktor sa pagbasa niana. Sa dihang nakahukom siya sa pag-adto sa Mexico, giingnan siya sa iyang inahan nga dili mohunong sa pagbasa sa Bibliya. Busa dugay na siyang nag-ampo nga duna untay makatabang kaniya nga makakat-on pag dugang bahin sa Diyos sa Bibliya. Siya miingon: “Gidungog sa Diyos ang akong pag-ampo!”

Mitambong usab sa pagtuon sa libro mao ang usa ka Insek nga pamilya nga nag-abang ug mga kuwarto sa usa ka Mexicana nga nagtuon sa Bibliya uban sa mga Saksi ni Jehova. Bisan pag kining pamilyaha dili kaayo makasabot ug Kinatsila, moduyog gihapon sila sa pagtuon sa Bibliya. Sa ngadtongadto, ang maong pamilya nangutana sa Saksi nga nagdumala sa pagtuon kon duna ba siyay Ininsek nga mga basahon. Sa wala madugay usa ka pagtuon sa Bibliya diha sa Ininsek ang gidumala uban kanila. Gipahayag sa maong pamilya ang ilang tinguha sa pagsangyaw sa ilang mga paisano ug sa pagpahinungod sa ilang mga kinabuhi ngadto kang Jehova.

Tinuod nga lisod tun-an ang Ininsek nga pinulongan. Apan, sumala sa bag-o pang gihisgotang mga kasinatian, sa tabang ni Jehova ang mga tawo sa daghang pinulongan, apil ang mga Insek, nakakat-on sa kabubut-on sa Diyos didto sa Mexico, maingon man sa ubang mga bahin sa yuta.

[Hulagway sa panid 17]

Usa ka klase nga nagtuon ug Ininsek sa Mexico City

[Hulagway sa panid 18]

Usa ka Mexicanang Saksi nagdumalag Ininsek nga pagtuon sa Bibliya

[Hulagway sa panid 18]

Pagpamalaybalay nga nag-Ininsek, Mexico City