Panahon sa Pasko—Unsa ba Gayod ang Gipasiugda Niini?

ALANG sa milyonmilyong mga tawo ang panahon sa pangilin maoy panahon sa pag-ubanay sa pamilya ug sa mga higala, panahon sa pagpalig-on sa mga bugkos sa pagminahalay. Ang uban nag-isip niini ingon nga panahon sa pagpamalandong bahin sa pagkatawo ni Jesu-Kristo ug sa iyang papel diha sa pagluwas sa katawhan. Sa Rusya, nga lahi sa ubang mga nasod, may panahong ang katawhan gidid-an sa pagsaulog ug Pasko. Bisan pag ang mga sakop sa Rusong Ortodoksong Iglesya sa dayag nagsaulog nag Pasko sulod sa kasiglohan, wala sila tugoti sa pagsaulog niana sa dakong bahin sa ika-20ng siglo. Unsay hinungdan sa kausaban?

Pagkahuman gayod sa Bolshevik nga Komunistang rebolusyon niadtong 1917, ang Sobyet nga mga awtoridad agresibong nagsunod sa polisa sa ateyismo sa tibuok estado. Gisupak ang bug-os nga panahon sa Pasko ug ang relihiyosong kahulogan niana. Gisugdan sa Estado ang kampanya kontra sa pagsaulog sa Pasko ug Bag-ong Tuig. Gisaway pa gani sa dayag ang lokal nga mga simbolo nianang panahona—ang Christmas tree ug ang Ded Moroz, o Grandfather Frost, ang Ruso nga katumbas sa Santa Claus.

Niadtong 1935, nahitabo ang kausaban nga nakapausab ug dako sa pagsaulog sa mga Ruso sa panahon sa Pasko. Gipasig-uli sa mga Sobyet ang Grandfather Frost, ang Christmas tree, ug ang pagsaulog sa Bag-ong Tuig—apan may dako nang kalainan. Si Grandfather Frost, magdala kono ug mga regalo, dili sa Pasko, kondili sa Bag-ong Tuig. Sa susama, wala nay Christmas tree. Giilisan na kini ug New Year’s tree! Busa, may dakong kausaban kon unsay gipasiugda sa Unyon Sobyet. Sa pagkatinuod, ang selebrasyon sa Bag-ong Tuig mao ang mipuli sa Pasko.

Ang panahon sa Pasko nahimong bug-os sekular nga panahon sa kasadya, nga wala nay relihiyosong kahulogan. Ang New Year’s tree gidayandayanan, dili uban sa relihiyosong mga dayandayan, kondili uban sa sekular nga mga dayandayan nga nagpadayag sa pag-uswag sa Unyon Sobyet. Ang Rusong magasin nga Vokrug Sveta (Tibuok Kalibotan) nagsaysay: “Masubay ang kasaysayan sa pagkatukod sa Komunistang katilingban pinaagi sa mga dayandayan sa New Year’s tree sa nagkadaiyang mga tuig sa Sobyet nga panahon. Uban sa ordinaryong gagmay pang mga koneho, icicle, ug linginong mga tinapay, gihimo ang mga dayandayan nga pormag sanggot, martilyo, ug traktora. Sa ulahi kini gipulihan ug mga pigurin sa minero ug kosmonot, mga barina sa aseite, mga misil, ug mga behikulo nga gigamit didto sa bulan.”

Komosta ang Adlaw sa Pasko mismo? Kana wala na ilha. Gihimo hinuon kana sa Sobyet nga awtoridad nga ordinaryong adlaw sa trabaho. Kadtong gusto nga mosaulog sa Pasko sa relihiyosong paagi mahimong magsaulog niana uban ang dakong pag-amping, nga may kapeligrohan nga supakon sa Estado ug may daotang mga sangpotanan. Oo, didto sa Rusya sa ika-20ng siglo, nausab ang gipasiugda sa panahon sa pangilin, gikan sa relihiyosong saulog ngadto sa sekular nga kasaulogan.

Mas Bag-ong Kausaban

Niadtong 1991, ang Unyon Sobyet nabungkag ug nabatonan sa katawhan ang mas daghang kagawasan. Wala na ang polisa sa ateyismo sa Estado. Ang lainlaing mga  estado nga bag-ong naporma sagad sekular, nga adunay panagbulag tali sa Iglesya ug sa Estado. Ang daghan nga hilig sa relihiyon mibati nga sa maong panahon sila makatuman na sa ilang relihiyosong mga tinuohan. Nangatarongan sila nga ang usa ka paagi sa paghimo niana mao ang pagsaulog sa relihiyosong pangilin sa Pasko. Ugaling lang, ang maong mga tawo mibatig dakong kahiubos. Ngano?

Paglabay sa matag tuig, nahimong mas dakong negosyo ang panahon sa pangilin. Oo, sama didto sa Kasadpan, ang panahon sa Pasko nahimong usa sa labing maayong mga paagi aron makasapi ang mga tigpabrika, mga tigbaligyag bulto, ug mga negosyante. Ang mga dayandayan sa Pasko gipasundayag sa atubangan sa mga tindahan. Ang estilo-sa-Kasadpan nga musika ug mga panaygon sa Pasko, nga sa nangagi dili sinati sa Rusya, madungog gikan sa mga tindahan. Ang mga ahente nga nagbitbit ug dagkong mga bag nga napunog mga tinda sa Pasko mamaligya sa ilang mga manggad diha sa mga tren ug sa ubang publikong mga sakyanan. Mao kini ang kahimtang karon sa Rusya.

Bisan kadtong nagdawat niining sobrang negosyo madisturbo sa lain nga makatugawng bahin sa panahon sa pangilin—ang sobrang pag-inom ug isog nga ilimnon uban ang tanang daotang sangpotanan niini. Ang usa ka doktor sa emerhensiyang lawak sa usa ka ospital sa Moscow misaysay: “Gidawat na sa mga doktor nga sa pagsaulog sa Bag-ong Tuig mahitabo ang daghang kadaot gikan sa mga panghuboy ug mga pangos ngadto sa mga samad sa dinunggaban ug pinusilan, nga ang kadaghanan gipahinabo sa kapintasan sulod sa pamilya, mga away tungod sa kahubog, ug mga aksidente sa sakyanan.” Matod sa usa ka siyentipikong senyor nga kawani sa usa ka sanga sa Russian Academy of Sciences: “Nagsulbong ang gidaghanon sa mga namatay nga nalangkit sa alkoholikong ilimnon. Ilabinang daghan niadtong tuig 2000. Midaghan usab ang mga paghikog ug mga pagbuno.”

Ikasubo hinuon nga ang maong panggawi sa panahon sa pangilin sa Rusya nahimong mas grabe pa tungod sa laing hinungdan. Ubos sa pangunang-ulohang “Ang mga Ruso Kaduha Magsaulog ug Pasko,” ang mantalaang Izvestiya nagtaho: “Halos 1 sa 10 ka Ruso ang kaduha magsaulog ug Pasko. Sumala sa gipamatud-an sa surbi sa tigsurbi nga ROMIR, 8 ka porsiyento sa mga gisurbi miangkon nga sila nagsaulog sa Pasko sa Disyembre 25, sumala sa Katolikong kalendaryo sa Pasko, ug sa Enero 7, sumala sa Ortodoksong Iglesya . . . Alang sa pipila, dayag nga ang relihiyosong kahulogan sa Pasko dili mao ang hinungdanon, kondili ang kahigayonan nga makasaulog niana.” a

 Ang Matang sa Selebrasyon Karon Nagpasidungog ba Gayod Kang Kristo?

Tin-aw nga ang panahon sa pangilin giduyogan ug daghang dili-diyosnong panggawi. Bisan pag makapatugaw kini, ang pipila mahimong mobati nga angay silang magsaulog niana isip pagtahod sa Diyos ug kang Kristo. Dalayegon ang tinguha sa pagpahimuot sa Diyos. Apan ang Diyos ug si Kristo tinuod bang mahimuot sa panahon sa Pasko? Tagda ang sinugdanan niini.

Pananglitan, bisan kon unsay tinamdan sa usa ka tawo bahin sa Sobyet nga baroganan sa Pasko, lisod masupak ang mosunod nga mga kamatuoran sa kasaysayan nga gipahayag diha sa Great Soviet Encyclopedia: “Ang Pasko . . . gihulaman gikan sa una-Kristohanong pagsimba sa mga diyos nga ‘nangamatay ug nangabanhaw gikan sa mga patay,’ nga kaylap ilabina sa mag-uuma nga mga katawhan si kinsa, sa yugto nga sagad gigahin alang sa winter solstice gikan sa Disyembre 21-25, sa matag tuig nagsaulog sa ‘pagkatawo’ sa Diyos-Manluluwas, kinsa magpasig-uli sa kinabuhi sa kinaiyahan.”

Mahimong isipon nimong makahuloganon kon unsay tukmang gipunting sa maong ensiklopedia: “Ang Kristiyanidad sa unang mga siglo wala mahibalo sa selebrasyon sa Pasko. . . . Sukad sa tungatunga sa ikaupat nga siglo, gisagop sa Kristiyanidad ang batasan sa selebrasyon sa winter solstice gikan sa pagsimba kang Mithra o adlaw-diyos, nga nag-usab niana nga selebrasyon sa Pasko. Ang unang nagselebrar ug Pasko mao ang relihiyosong mga katawhan sa Roma. Sa ikanapulo ka siglo, ang Pasko, duyog sa Kristiyanidad, mikaylap ngadto sa Rusya, diin kadto gikombinar sa selebrasyon sa winter solstice sa karaang mga Slav, nga nagpasidungog sa mga espiritu sa mga katigulangan.”

‘Unsay giingon sa Pulong sa Diyos, ang Bibliya, bahin sa pagkatawo ni Jesus sa Disyembre 25?’ mahimong mangutana ka. Sa pagkatinuod, ang Bibliya walay gipadayag nga tinong petsa alang sa pagkatawo ni Jesus, ug walay talaan nga si Jesus naghisgot niana, labi pang wala magsugo nga kana saulogon. Ang Bibliya motabang hinuon kanato sa pagtino sa petsa sa pagkatawo ni Jesus.

Sumala sa Ebanghelyo ni Mateo, mga kapitulo 26 ug 27, si Jesus gipatay sa Nisan 14, sa kahaponon sa adlaw sa Hudiyohanong Paskuwa nga nagsugod sa Marso 31, 33 K.P. Atong nahibaloan gikan sa Ebanghelyo ni Lucas nga si Jesus mga 30 anyos sa dihang siya gibawtismohan ug misugod sa iyang ministeryo. (Lucas 3:21-23) Gidangtag tulo ka tuig ug tunga ang maong ministeryo. Busa, si Jesus maoy mga 33 1⁄2 anyos sa iyang pagkamatay. Mag-34 anyos na unta siya pagka-Oktubre 1, 33 K.P. Si Lucas nagtaho nga sa panahon sa pagkatawo ni Jesus, ang mga magbalantay sa karnero “nagpuyo sa gawas ug nagpadayon sa pagbantay sa ilang mga panon sa kahayopan sa kagabhion.” (Lucas 2:8) Dili mahimong tua sa gawas ang mga magbalantay uban sa ilang mga panon sa kahayopan panahon sa tugnawng Disyembre, sa dihang basin may niyebe pa sa dapit sa Betlehem. Apan mahimong sila didto sa gawas uban sa ilang mga panon sa kahayopan sa mga Oktubre 1, nga sumala sa ebidensiya mao ang panahon sa pagkatawo ni Jesus.

Komosta man diay ang selebrasyon sa Bag-ong Tuig? Sumala sa atong nasabtan, gitiman-an kinig mapatuyangong panggawi. Bisan pa sa mga paningkamot nga kini mahimong sekular o dili-relihiyosong  saulog, kini usab adunay kaduhaduhaang sinugdanan.

Tin-aw nga tungod sa mga ebidensiya may kalabotan sa panahon sa pangilin, ang mga eslogan sama sa, Si Jesus ang pasidunggan panahon sa Pasko walay kahulogan. Kon ikaw napikal sa komersiyalismo ug makapatugaw nga panggawi nga nalangkit sa panahon sa Pasko, ingon man ang dili-makapahimuot nga paganong sinugdanan niini, ayaw pagkaluya. Adunay haom nga paagi nga kita makapakitag nahiangayng pagtahod sa Diyos ug pasidungog kang Kristo, ug sa samang panahon makapalig-on sa bugkos sa pamilya.

 Mas Maayong Paagi sa Pagpasidungog sa Diyos ug Kang Kristo

Ang Bibliya nagtug-an kanato nga si Jesu-Kristo mianhi “sa paghatag sa iyang kalag nga usa ka lukat baylo sa daghan.” (Mateo 20:28) Iyang gitugot nga siya pagapatyon, nga andam mamatay alang sa atong mga sala. Basin gusto sa pipila nga pasidunggan si Kristo, nga mibati nga sila makapasidungog kaniya sa panahon sa Pasko. Apan sumala sa ato nang nasabtan, si Kristo adunay gamay rang kalangkitan sa Pasko ug sa Bag-ong Tuig ug ang maong mga saulog gipasukad sa paganong mga selebrasyon. Gawas pa, bisan pag ang panahon sa Pasko madanihon alang sa pipila, kini gitiman-an ug sobrang komersiyalismo. Dugang pa, pagaangkonon gayod nga ang panahon sa Pasko nalangkit sa makauulawng panggawi nga dili makapahimuot sa Diyos ug kang Kristo.

Unsay angay nga reaksiyon sa usa nga nagtinguha sa pagpahimuot sa Diyos? Inay mosunod sa tawhanong mga tradisyon nga mahimong makapahupay sa pagbati sa pagkarelihiyoso apan supak sa Kasulatan, ang sinserong tawo mangita sa matuod nga paagi sa pagpasidungog sa Diyos ug kang Kristo. Unsa ba ang maong matuod nga paagi, ug unsay angay natong buhaton?

Si Kristo mismo nagasulti kanato: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, ang sinsero gayong tawo magtinguha sa pagkuha ug tukma nga kahibalo kon unsaon pagpasidungog sa Diyos ug kang Kristo. Unya iyang ipadapat ang maong kahibalo dili lang sa usa ka panahon sa tuig kondili sa matag adlaw nga pagkinabuhi. Ang Diyos mahimuot gayod sa maong sinserong mga paningkamot, nga mahimong motultol sa kinabuhing walay kataposan.

Gusto mo bang ang imong pamilya mahiapil niadtong tinuod nga nagpasidungog sa Diyos ug kang Kristo nga nahiuyon sa Kasulatan? Ang mga Saksi ni Jehova nakatabang na ug minilyong pamilya sa tibuok kalibotan sa pagkuha ug bililhong kahibalo gikan sa Bibliya. Mainiton ka namong gidapit sa pagkontak sa mga Saksi ni Jehova diha sa inyong dapit o pagsulat kanila diha sa nahiangayng adres nga makita sa panid 2 niining magasina.

[Footnote]

[Kahon/Hulagway sa panid 7]

Sinugdanan sa Selebrasyon sa Bag-ong Tuig

Usa ka Ortodoksong Monghe nga Taga-Georgia Nagpahayag nga Maisogon sa Iyang Opinyon

“Ang saulog sa Bag-ong Tuig naggikan sa ubay-ubay nga paganong mga saulog gikan sa karaang Roma. Ang Enero 1 maoy usa ka saulog nga gipahinungod sa paganong diyos nga si Janus, ug ang ngalan sa bulan gisunod sa iyang ngalan. Ang mga hulagway ni Janus adunay duha ka nawong sa kaatbang nga mga kiliran, nga nagpasabot nga siya nakakita sa kagahapon ug karon. Dihay usa ka panultihon nga si bisan kinsa nga nagsugat sa Enero 1 uban ang kasadya, katawa, ug dagayang pagkaon ug ilimnon mahimong magkinabuhi sa tibuok tuig uban ang kalipay ug maayong kahimtang. Ang samang patuotuo nagauban sa pagsaulog sa bag-ong tuig alang sa daghan natong isigkalungsoranon . . . Panahon sa pipila ka paganong mga pangilin, ang katawhan direktang magdalag mga halad ngadto sa usa ka idolo. Ang pipila ka pangilin nabaniog nga adunay daotang mga pagpatuyang, pagpanapaw, ug pagpakighilawas. Sa ubang mga okasyon, pananglitan panahon sa saulog alang kang Janus, dihay sobrang pagpangaon ug pag-inom, paghuboghubog, ug tanang matang sa kahugawan nga nagauban niana. Kon mahinumdom kita kon giunsa nato sa nangaging mga panahon pagsaulog ang Bag-ong Tuig, nan angkonon gayod nato nga kitang tanan nakasalmot sa maong paganong selebrasyon.”—Usa ka mantalaan sa Georgia.

[Hulagway sa panid 7]

Ang mga magbalantay wala sa gawas uban sa ilang mga panon sa kahayopan panahon sa tugnawng Disyembre