Ang Pagpangita sa Pagkamatarong Manalipod Kanato

“Nan, magpadayon sa pagpangita pag-una . . . sa pagkamatarong [sa Diyos].”—MATEO 6:33.

1, 2. Unsang desisyon ang gihimo sa usa ka batan-ong Kristohanon, ug nganong gihimo man niya kana?

 USA ka batan-ong Kristohanong babaye sa Asia ang nagtrabaho ingong sekretarya sa usa ka buhatan sa gobyerno. Siya kugihan, sayong mosulod sa trabaho ug dili maglangaylangay sa iyang trabaho. Apan, tungod kay ang iyang posisyon dili man permanente, nahisgotan kini panahon sa ebalwasyon. Giingnan sa labaw sa maong departamento ang batan-ong babaye nga mapermanente siya sa trabaho ug hatagan siyag mas taas nga posisyon, kon siya makigsekso kaniya. Dihadiha, gibalibaran kini sa sister, bisan tuod magpasabot kana nga mapapha siya sa trabaho.

² Makataronganon ba ang gihimo nianang Kristohanong babaye? Oo, tungod kay iyang gisunod ang mga pulong ni Jesus: “Nan, magpadayon sa pagpangita pag-una . . . sa pagkamatarong [sa Diyos]. (Mateo 6:33) Alang kaniya, ang pagsunod sa matarong nga mga prinsipyo mas hinungdanon pa kay sa benepisyo nga makuha pinaagi sa paghimog seksuwal nga imoralidad.—1 Corinto 6:18.

Ang Pagkahinungdanon sa Pagkamatarong

3. Unsa ang pagkamatarong?

³ Ang “pagkamatarong” nagpasabot ug usa ka kahimtang sa moral nga integridad ug pagkamatinud-anon. Sa Bibliya, ang Grego ug Hebreohanong mga pulong para sa pagkamatarong adunay ideya sa “pagkahusto” o “pagkatul-id.” Kini dili pagpakamatarong sa kaugalingon, nga maghukom sa kaugalingon pinaagi sa kaugalingong mga sukdanan. (Lucas 16:15) Kana maoy pagkatul-id sumala sa mga sukdanan ni Jehova. Kana iya sa Diyos nga pagkamatarong.—Roma 1:17; 3:21.

4. Nganong ang pagkamatarong hinungdanon sa usa ka Kristohanon?

⁴ Nganong hinungdanon ang pagkamatarong? Tungod kay si Jehova, ang “matarong nga Diyos,” nagauyon sa iyang katawhan sa dihang batasanon nila ang pagkamatarong. (Salmo 4:1; Proverbio 2:20-22; Habacuc 1:13) Si bisan kinsa nga mohimog pagkadili-matarong dili makabaton ug suod nga relasyon uban kaniya. (Proverbio 15:8) Mao nga giawhag ni apostol Pablo si Timoteo: “Kalagiw gikan sa mga tinguha nga iya sa pagkabatan-on, apan tinguhaa ang pagkamatarong,” apil na ang ubang hinungdanong mga hiyas. (2 Timoteo 2:22) Mao usab kanay hinungdan nga gilakip ni Pablo ang “panagang sa dughan sa pagkamatarong” sa dihang iyang gilista ang lainlaing bahin sa atong espirituwal nga armadura.—Efeso 6:14.

5. Sa unsang paagi ang dili-hingpit nga mga linalang makapangita sa pagkamatarong?

⁵ Siyempre, walay tawo nga matarong sa bug-os nga diwa. Ang tanan nakapanunod ug pagkadili-hingpit gikan kang Adan, ug ang tanan makasasala, dili-matarong, sukad sa ilang pagkatawo. Bisan pa niana, si Jesus miingon nga kinahanglang pangitaon nato ang pagkamatarong. Sa unsang paagi posible kana? Kana posible tungod kay gihatag ni Jesus ang iyang hingpit nga kinabuhi ingong lukat alang kanato, ug kon kita magpasundayag ug pagtuo sa maong halad, si Jehova andam nga mopasaylo sa atong mga sala. (Mateo 20:28; Juan 3:16; Roma 5:8, 9, 12, 18) Pinasukad niana, samtang atong makat-onan ang matarong nga mga sukdanan ni Jehova ug buhaton ang atong maarangan sa pagsunod niana—nga mag-ampo alang sa tabang nga mabuntog ang atong mga kahuyangon—dawaton ni Jehova ang atong pagsimba. (Salmo 1:6; Roma 7:19-25; Pinadayag 7:9, 14) Pagkamakapahupay niana!

 Pagkamatarong Diha sa Dili-Matarong nga Kalibotan

6. Nganong ang kalibotan usa ka peligrosong dapit alang sa unang mga Kristohanon?

⁶ Sa dihang nadawat sa mga tinun-an ni Jesus ang sugo nga mahimong iyang mga saksi “hangtod sa kinalay-ang dapit sa yuta,” ilang giatubang ang malisod nga kahimtang. (Buhat 1:8) Ang tanang teritoryo nga giasayn kanila “nailalom sa gahom sa usa nga daotan,” si Satanas. (1 Juan 5:19) Ang kalibotan naapektohan sa daotang espiritu nga iyang gipasiugda, ug ang mga Kristohanon maladlad sa makapahugaw nga impluwensiya niana. (Efeso 2:2) Alang kanila, ang kalibotan maoy peligrosong dapit. Pinaagi lamang sa pagpangita pag-una sa pagkamatarong sa Diyos nga sila makalahutay ug makahupot sa ilang integridad. Kadaghanan kanila nakalahutay, apan ang pipila nahitipas gikan sa “dalan sa pagkamatarong.”—Proverbio 12:28; 2 Timoteo 4:10.

7. Unsang mga responsibilidad ang nagkinahanglan nga pakigbisogan sa usa ka Kristohanon ang makadaot nga mga impluwensiya?

⁷ Luwas ba alang sa mga Kristohanon ang kalibotan karon? Dili gayod! Mas daotan pa gani kini kay sa unang siglo. Gawas pa, si Satanas gitambog na dinhi sa yuta ug mapintasong nakiggubat sa dinihogang mga Kristohanon, ang “mga nahibilin sa binhi [sa babaye], nga nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:12, 17) Atakehon usab ni Satanas si bisan kinsa nga mopaluyo sa maong “binhi.” Apan, ang mga Kristohanon dili makaeskapar gikan sa kalibotan. Bisan tuod sila dili bahin niana, sila kinahanglang magkinabuhi diha niana. (Juan 17:15, 16) Ug sila kinahanglang mosangyaw diha niana aron sa pagpangita sa mga tawo nga nakiling sa pagkamatarong ug tudloan sila nga mahimong mga tinun-an ni Kristo. (Mateo 24:14; 28:19, 20) Busa, kay dili man makalikay sa bug-os ang mga Kristohanon sa makadaot nga mga impluwensiya niining kalibotana, kinahanglang pakigbisogan nila kana. Hisgotan nato ang upat nianang maong mga impluwensiya.

Ang Lit-ag sa Imoralidad

8. Nganong misimba man ang mga Israelinhon sa mga diyos sa mga Moabihanon?

⁸ Sa naghinapos na ang ilang 40-ka-tuig nga panaw sa kamingawan, daghang Israelinhon ang mitipas gikan sa dalan sa pagkamatarong. Ila nang nasaksihan ang daghang buhat sa pagluwas ni Jehova, ug sa dili madugay sila mosulod na sa Yutang Saad. Bisan pa niana, sa maong hinungdanong yugto, sila misugod pagsimba sa mga diyos sa mga Moabihanon. Ngano? Sila nagpadala sa “tinguha sa unod.” (1 Juan 2:16) Ang asoy nag-ingon: “Ang katawhan misugod sa pagpakighilawas uban sa mga anak nga babaye sa Moab.”—Numeros 25:1.

9, 10. Tungod sa unsang situwasyon karon nga nahimong hinungdanon nga hinumdoman kanunay ang makadaot nga impluwensiya sa sayop nga mga tinguha sa unod?

⁹ Ang maong hitabo nagpasundayag kon sa unsang paagi ang sayop nga unodnong mga tinguha makadaot niadtong dili magbantay. Angay kitang makakat-on gikan niana, ilabina kay ang imoralidad giisip sa kadaghanan ingong dalawatong estilo sa kinabuhi. (1 Corinto 10:6, 8) Usa ka taho gikan sa Tinipong Bansa nag-ingon: “Sa wala pa ang tuig 1970, ang pagpuyopuyo [ang batasan sa dili-minyong mga magtiayon nga mag-ipon pagpuyo] giisip nga ilegal sa tanang estado sa Amerika. Karon, kini komon na kaayo. Kapin sa katunga sa tanang unang mga kaminyoon gisugdan sa pagpuyopuyo.” Kana ug ang susamang imoral nga mga buhat wala lamang mahitabo sa usa ka nasod. Nahitabo kini sa tibuok kalibotan, ug ikasubo, ang pipila ka Kristohanon misunod niining maong uso—nga nawad-an pa gani sa ilang  maayong baroganan diha sa Kristohanong kongregasyon.—1 Corinto 5:11.

¹⁰ Dugang pa, ang mga propaganda nga nagpasiugda sa imoralidad daw anaa bisag asa. Ang mga salida sa sine ug mga programa sa telebisyon nagpaila nga dalawaton ra nga ang mga batan-on makigsekso sa dili pa maminyo. Ang homoseksuwal nga mga relasyon gipakita ingong normal. Ug daghang salida ang nagpakita ug mas klaro ug detalyado nga mga buhat sa sekso. Ang mga hulagway sa klaro ug detalyado nga buhat sa sekso dali ra usab nga makita diha sa Internet. Pananglitan, usa ka magsusulat sa mantalaan ang nagtaho nga pagpauli sa iyang siyete-anyos nga anak nga lalaki gikan sa eskuylahan mahinamon kining nag-estorya sa iyang amahan nga ang usa niya ka higala sa eskuylahan nakabukas ug usa ka site sa Internet nga nagpakita ug hubo nga mga babaye nga nakigsekso. Nakurat ang amahan, apan pila ba ka bata ang nakakita sa maong site nga wala motug-an sa ilang mga ginikanan? Gawas pa, pila ka ginikanan ang nahibalo sa unod sa mga dula sa video nga ginadula sa ilang mga anak? Daghang popular nga mga dula ang naghulagway sa grabeng imoralidad, maingon man sa demonismo ug kapintasan.

11. Sa unsang paagi ang pamilya mapanalipdan batok sa imoralidad sa kalibotan?

¹¹ Sa unsang paagi ang usa ka pamilya makalikay nianang makauulaw nga “kalingawan”? Pinaagi sa pagpangita pag-una sa pagkamatarong, nga maglikay nga malangkit sa bisan unsang imoral nga buhat. (2 Corinto 6:14; Efeso 5:3) Ang mga ginikanan nga sa hustong paagi nagbantay sa kalihokan sa ilang mga anak ug nagtisok diha sa ilang mga anak ug gugma kang Jehova ug sa iyang matarong nga mga balaod magpalig-on kanila batok sa pornograpiya, pornograpikong mga dula sa video, imoral nga mga salida sa sine, ug ubang mga tentasyon sa pagbuhat ug dili matarong.—Deuteronomio 6:4-9. a

Ang Kapeligrohan sa Pagpit-os sa Komunidad

12. Unsang problema ang mitungha sa unang siglo?

¹² Sa dihang si Pablo didto sa Listra sa Asia Minor, sa milagrosong paagi iyang giayo ang usa ka tawo. Ang asoy nag-ingon: “Ang mga panon sa katawhan, sa pagkakita sa gibuhat ni Pablo, mipatugbaw sa ilang mga tingog, nga nag-ingon sa pinulongang Licaonianhon: ‘Ang mga diyos nahimong sama sa mga tawo ug nanaog nganhi kanato!’ Ug ilang gitawag si Bernabe nga Zeus, apan si Pablo Hermes, sanglit siya man ang nanguna sa pagsulti.” (Buhat 14:11, 12) Sa ulahi, ang mao gihapong panon sa katawhan buot mopatay kang Pablo ug Bernabe. (Buhat 14:19) Klaro nga kadtong mga tawhana dali kaayong nadala sa pagpit-os sa komunidad. Sa dihang ang pipila ka tawo gikan nianang dapita nahimong mga Kristohanon, morag wala gihapon mawala ang ilang pagkamatuotuohon. Sa iyang sulat ngadto sa mga Kristohanon sa Colosas, si Pablo nagpasidaan batok sa “pagsimba sa mga manulonda.”—Colosas 2:18.

13. Unsa ang pipila ka kostumbre nga kinahanglang likayan sa usa ka Kristohanon, ug sa unsang paagi siya makabaton ug kalig-on sa paglikay niana?

¹³ Karon, ang matuod nga mga Kristohanon kinahanglan usab nga maglikay sa gidawat sa kadaghanan nga mga kostumbre nga gipasukad sa bakak nga relihiyosong mga ideya ug supak sa Kristohanong mga prinsipyo. Pananglitan, diha sa pipila ka kayutaan daghang naandan nga mga seremonyas nga gihimo panahon sa pagkatawo ug pagkamatay sa usa  ang gipasukad sa bakak nga kita adunay espiritu nga magpabiling buhi inigkamatay. (Ecclesiastes 9:5, 10) Maoy kostumbre sa pipila ka kayutaan nga ipailalom ang mga batang babaye sa female genital mutilation o pag-abis sa kinatawo sa babaye. b Kini maoy usa ka linuog, wala-kinahanglana nga batasan nga dili kaharmonya sa mahigugmaong pag-atiman nga angayng ipakita sa Kristohanong mga ginikanan sa ilang mga anak. (Deuteronomio 6:6, 7; Efeso 6:4) Sa unsang paagi masuklan sa mga Kristohanon ang maong mga pagpit-os sa komunidad ug talikdan ang maong mga batasan? Pinaagi sa bug-os nga pagsalig kang Jehova. (Salmo 31:6) Ang matarong nga Diyos magpalig-on ug mag-atiman niadtong kinasingkasing nga moingon kaniya: “Ikaw mao ang akong dalangpanan ug akong salipdanan, akong Diyos, kang kinsa mosalig ako.”—Salmo 91:2; Proverbio 29:25.

Ayawg Kalimti si Jehova

14. Unsang pasidaan ang gihatag ni Jehova sa mga Israelinhon sa hapit na silang mosulod sa Yutang Saad?

¹⁴ Sa hapit nang mosulod ang mga Israelinhon sa Yutang Saad, gipasidan-an sila ni Jehova nga dili siya kalimtan. Siya miingon: “Magmatngon ka nga dili ka mahikalimot kang Jehova nga imong Diyos sa dili pagtuman sa iyang mga sugo ug sa iyang hudisyal nga mga hukom ug sa iyang mga lagda nga akong gisugo kanimo niining adlawa; kay basin ikaw mokaon ug mabusog, ug ikaw magtukod ug maanindot nga mga balay ug mopuyo diha niana, ug ang imong panon sa mga baka ug ang imong panon sa mga karnero modaghan, ug ang imong plata ug ang imong bulawan modaghan, ug ang tanan nga imo modaghan; ug ang imong kasingkasing magmapahitas-on ug ikaw mahikalimot kang Jehova nga imong Diyos.”—Deuteronomio 8:11-14.

15. Sa unsang paagi kita makaseguro nga kita wala malimot kang Jehova?

¹⁵ Mahitabo ba ang susama niana sa atong adlaw? Oo, kon sayop ang atong mga prioridad. Apan, kon pangitaon nato pag-una ang pagkamatarong sa Diyos, ang putli nga pagsimba mahimong labing hinungdanong butang sa atong kinabuhi. Atong ‘paliton ang nahiangay nga panahon’ ug bation ang pagkadinalian sa atong ministeryo, sumala sa gidasig ni Pablo nga atong buhaton. (Colosas 4:5; 2 Timoteo 4:2) Apan, kon ang pagtambong sa tigom ug pagsangyaw sa kanataran dili kaayo hinungdanon kanato kon itandi sa paglulinghayaw o sa pagpangitag paagi nga maglingawlingaw, mahimong makalimtan nato si Jehova sa diwa nga giisip siya ingong ikaduha lamang sa atong kinabuhi. Si Pablo miingon nga sa kataposang mga adlaw, ang mga tawo “mga mahigugmaon sa kalipayan inay nga mga mahigugmaon sa Diyos.” (2 Timoteo 3:4) Ang sinserong mga Kristohanon magsusi kanunay sa ilang kaugalingon aron sa pagseguro nga sila wala maimpluwensiyahi nianang matanga sa panghunahuna.—2 Corinto 13:5.

Magbantay sa Independenteng Espiritu

16. Unsang sayop nga espiritu ang gipasundayag ni Eva ug sa pipila ka Kristohanon sa adlaw ni Pablo?

¹⁶ Sa Eden, si Satanas milampos sa pagpukaw diha kang Eva ug hakog nga tinguha nga mag-independente. Buot ni Eva nga mohimo sa iyang kaugalingong mga desisyon bahin sa kon unsay husto ug sayop. (Genesis 3:1-6) Sa unang siglo, ang pipila diha sa kongregasyon sa Corinto adunay susamang independenteng espiritu. Sila naghunahuna nga mas daghan silag nahibaloan kay kang Pablo, ug makantalitahon niyang gitawag sila ug maayong-laki nga mga apostoles.—2 Corinto 11:3-5; 1 Timoteo 6:3-5.

17. Sa unsang paagi malikayan nato nga maugmad ang independenteng espiritu?

 ¹⁷ Sa kalibotan karon, daghan ang “gahig-ulo, nangburot sa garbo,” ug ang pipila ka Kristohanon naimpluwensiyahan nianang paagiha sa paghunahuna. Ang uban nahimo ganing mga magsusupak sa kamatuoran. (2 Timoteo 3:4; Filipos 3:18) Maylabot sa putli nga pagsimba, hinungdanon nga kita mangayo sa pagtultol ni Jehova ug makigtambayayong sa “matinumanon ug maalamong ulipon” ug sa mga ansiyano sa kongregasyon. Kana maoy usa ka paagi sa pagpangita sa pagkamatarong, ug kana manalipod kanato batok sa pag-ugmad ug independenteng espiritu. (Mateo 24:45-47; Salmo 25:9, 10; Isaias 30:21) Ang kongregasyon sa mga dinihogan maoy “haligi ug tukod sa kamatuoran.” Gitagana kana ni Jehova aron sa pagpanalipod ug paggiya kanato. (1 Timoteo 3:15) Ang pag-ila sa hinungdanong papel niana motabang kanato sa ‘dili pagbuhat ug bisan unsa tungod sa pagpaimportante sa kaugalingon’ samtang kita mapainubsanong nagpasakop sa matarong nga kabubut-on ni Jehova.—Filipos 2:2-4; Proverbio 3:4-6.

Mahimong mga Tigsundog ni Jesus

18. Kita gidasig sa pagsundog kang Jesus sa unsang mga paagi?

¹⁸ Bahin kang Jesus, ang Bibliya matagnaong nag-ingon: “Gihigugma mo ang pagkamatarong ug gidumtan mo ang pagkadaotan.” (Salmo 45:7; Hebreohanon 1:9) Pagkamaayong tinamdan nga sundogon! (1 Corinto 11:1) Si Jesus wala lamang mahibalo sa matarong nga mga sukdanan ni Jehova; iya kanang gihigugma. Busa sa dihang gitental siya ni Satanas sa kamingawan, si Jesus wala magpanuko kondili hugot nga midumili sa pagtipas gikan sa “dalan sa pagkamatarong.”—Proverbio 8:20; Mateo 4:3-11.

19, 20. Unsa ang maayong mga resulta sa pagpangita sa pagkamatarong?

¹⁹ Tinuod, ang dili-matarong nga mga tinguha sa unod kusganon tingali. (Roma 7:19, 20) Apan, kon ang pagkamatarong bililhon para kanato, kini magpalig-on kanato batok sa pagkadaotan. (Salmo 119:165) Ang halalom nga gugma sa pagkamatarong manalipod kanato sa dihang kita tentalon sa pagbuhat ug daotan. (Proverbio 4:4-6) Hinumdomi, kon kita magpadala sa tentasyon, atong gihatag kang Satanas ang kadaogan. Pagkalabing maayo nga suklan siya ug ihatag ang kadaogan kang Jehova!—Proverbio 27:11; Santiago 4:7, 8.

²⁰ Tungod kay sila nangita sa kamatuoran, ang matuod nga mga Kristohanon ‘napuno sa matarong nga bunga, nga maoy pinaagi kang Jesu-Kristo, alang sa himaya ug kadayeganan sa Diyos.’ (Filipos 1:10, 11) Ilang gisul-ob ang “bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” (Efeso 4:24) Sila iya ni Jehova ug nagkinabuhi aron sa pag-alagad kaniya, dili sa pagpahimuot sa ilang kaugalingon. (Roma 14:8; 1 Pedro 4:2) Mao kana ang naggahom sa ilang mga hunahuna ug mga lihok. Makapalipay gayod kana sa kasingkasing sa ilang langitnong Amahan!—Proverbio 23:24.

[Mga footnote]

Makapatin-aw Ka Ba?

• Nganong hinungdanon nga pangitaon ang pagkamatarong?

• Sa unsang paagi ang dili-hingpit nga Kristohanon makapangita sa pagkamatarong?

• Unsa ang pipila ka butang sa kalibotan nga kinahanglang likayan sa usa ka Kristohanon?

• Sa unsang paagi ang pagpangita sa pagkamatarong manalipod kanato?

[Mga Pangutana sa Pagtuon]

[Hulagway sa panid 26]

Alang sa mga sumusunod ni Jesus, ang kalibotan maoy usa ka peligrosong dapit

[Hulagway sa panid 27]

Ang mga bata nga natudloan sa paghigugma kang Jehova mapanalipdan batok sa imoralidad

[Hulagway sa panid 28]

Ang ubang mga Israelinhon nakalimot kang Jehova sa dihang maayo na ang ilang pagkabutang sa Yutang Saad

[Hulagway sa panid 29]

Sama kang Jesus, ang mga Kristohanon nagdumot sa pagkadili-matarong