“Ang Usa ka Pulong sa Hustong Panahon Oh Pagkamaayo!”

PANAHON sa usa ka adlaw nga asembliya sa mga Saksi ni Jehova, si Kim naningkamot pag-ayo nga makapaminaw ug makakuhag mga nota samtang nagbantay sa iyang dos-anyos-ug-tunga nga batang babaye aron kini maglingkod nga hilom tupad kaniya. Pagkahuman sa programa, usa ka Kristohanong sister nga naglingkod ubay sa ilang gilingkoran miduol kang Kim ug sinserong nagdayeg kaniya ug sa iyang bana tungod sa ilang paagi sa pag-atiman sa ilang anak panahon sa asembliya. Ang maong komendasyon gipabilhan pag-ayo ni Kim nga bisan karon, mga katuigan na ang milabay, siya nag-ingon: “Sa dihang bation nako ang kakapoy panahon sa mga tigom, hunahunaon nako ang giingon sa maong sister. Ang iyang malulotong mga pulong nagdasig gihapon kanako sa pagpadayon sa pagbansay sa among anak.” Sa pagkatinuod, ang tukma-sa-panahong mga pulong makapadasig sa usa ka tawo. Ang Bibliya nag-ingon: “Ang usa ka pulong sa hustong panahon Oh pagkamaayo!”—Proverbio 15:23.

Apan, ang pipila kanato malisdan tingali sa paghatag ug komendasyon sa uban. Usahay, tungod sa atong mga kahuyangan, malisdan kita sa paghimo niana. Matod pa sa usa ka Kristohanon: “Ako morag nagtindog sa huyonghuyong. Sa matag higayon nga dayegon nako ang uban, bation ko nga inanay akong miunlod.” Ang pagkamaulawon, kawalay-pagsalig sa kaugalingon, o ang kahadlok nga masaypan pagsabot lagmit makapalisod usab sa paghatag ug komendasyon. Gawas pa niana, kon kita talagsa ra o wala gayod makadawat ug komendasyon samtang nagdako, kita malisdan usab tingali sa paghatag ug komendasyon sa uban.

Bisan pa niana, ang pagkahibalo nga ang komendasyon adunay maayong epekto sa naghatag ug sa gihatagan niini lagmit magpalihok kanato nga maningkamot pag-ayo sa pagbungat ug mga pulong sa pagdayeg sa hustong panahon. (Proverbio 3:27) Nan, unsang positibong mga epekto ang moresulta sa pagbuhat niana? Hisgotan nato makadiyot ang pipila niini.

Positibong mga Epekto

Ang nahiangayng komendasyon makapalig-on sa pagsalig sa usa nga gihatagan niana. “Sa dihang dayegon ako sa mga tawo, bation nako nga sila adunay pagsalig kanako, nga sila nagtuo kanako,” nag-ingon si Elaine, usa ka Kristohanong asawa. Oo, ang pagdayeg nato sa usa nga kulang ug pagsalig sa kaugalingon makahatag nianang tawhana ug kaisog sa pag-atubang sa mga suliran, ug ingong resulta, siya magmalipayon. Ang mga batan-on ilabinang makabenepisyo sa nahiangayng komendasyon nga ilang madawat. Usa ka tin-edyer nga mibatig kaluya tungod sa iyang negatibong panghunahuna nag-ingon: “Naningkamot ako kanunay nga pahimut-an si Jehova kutob sa akong maarangan, apan usahay mobati ako nga bisan unsa pay akong buhaton, kini dili pa igo. Sa dihang may modayeg kanako, mobati akog dakong kalipay.” Tinuod gayod ang giingon sa usa ka proverbio sa Bibliya: “Ang usa ka pulong nga gisulti sa hustong panahon maoy sama sa mansanas nga bulawan diha sa linilok nga plata.”—Proverbio 25:11.

Ang paghatag ug komendasyon makapalihok ug makapadasig sa usa ka tawo. Usa ka bug-os-panahong ministro nag-ingon, “Tungod sa komendasyon, ako nadasig sa pagkugi pag-ayo ug sa pagpauswag sa kalidad sa akong ministeryo.” Ang usa ka inahan nga may duha ka anak nakamatikod nga sa dihang ang iyang mga anak komendahan sa ubang membro sa kongregasyon tungod sa pagkomento panahon sa mga tigom, sila ganahan nga magsige pag komento. Oo, ang paghatag ug komendasyon makadasig sa mga bata nga mouswag diha sa Kristohanong pagkinabuhi. Sa pagkatinuod, kitang tanan nagkinahanglan ug pasalig nga kita gipabilhan ug gimahal. Tungod sa kalibotan nga puno sa kapit-os,  kita tingali mobatig kaluya ug kahigawad. Ang usa ka Kristohanong ansiyano nag-ingon, “Sa dihang ako mahigawad usahay, ang pagkadawat ug komendasyon morag maoy tubag sa akong mga pag-ampo.” Sa susama, si Elaine nag-ingon, “Usahay ako nagtuo nga giuyonan ako ni Jehova sa dihang dayegon ako sa uban.”

Ang pagkadawat ug komendasyon makapabati sa usa nga dinawat sa pundok. Ang paghatag ug sinserong komendasyon maoy pagpakitag pagkamahunahunaon ug kini makapatunghag mainiton, may-pagsalig, ug may-pagtahod nga relasyon. Kini nagpamatuod nga kita tinuod nga nahigugma sa atong isigka-Kristohanon ug nagpabili kanila. Si Josie nga usa ka inahan miingon: “Sa miagi, ako kinahanglang mobarog nga malig-on dapig sa kamatuoran diha sa usa ka panimalay nga nabahin sa relihiyon. Nianang panahona, ang pagkadawat ug komendasyon gikan sa mga indibiduwal nga hamtong sa espirituwal nagpalig-on sa akong determinasyon nga dili mohunong.” Sa pagkatinuod, “kita mga sangkap nga iya sa usag usa.”—Efeso 4:25.

Ang tinguha nga mohatag ug komendasyon motabang kanato nga makita ang maayong mga hiyas sa uban. Kita maglantaw sa maayong mga hiyas sa uban, dili sa ilang mga kahuyangon. Ang usa ka Kristohanong ansiyano nga ginganlag David nag-ingon, “Kon kita mapabilhon sa nahimo sa uban, kini makatabang kanato sa pagdayeg kanunay kanila. Ang paghunahuna kon unsa ka madagayaon si Jehova ug ang iyang Anak sa paghatag ug komendasyon sa dili-hingpit nga mga tawo magtukmod kanato nga magmadagayaon usab niining bahina.—Mateo 25:21-23; 1 Corinto 4:5.

Takos nga Hatagan ug Komendasyon

Si Jehova nga Diyos maoy panguna niadtong takos dayegon tungod kay siya mao ang Maglalalang. (Pinadayag 4:11) Bisan tuod siya wala magkinahanglan kanato aron sa pagpalig-on sa iyang  pagsalig sa kaugalingon o sa pagdasig kaniya, sa dihang atong dayegon si Jehova tungod sa iyang pagkakatingalahan ug sa iyang mahigugmaong-kalulot, siya makigsuod kanato ug kita makaugmad ug relasyon uban kaniya. Ang pagdayeg sa Diyos makatabang usab kanato sa pag-ugmad ug maayo ug makasaranganon nga panglantaw sa atong mga kalamposan ug magtukmod kanato sa pagpasidungog kang Jehova tungod sa atong kalamposan. (Jeremias 9:23, 24) Gitanyag ni Jehova ang paglaom nga kinabuhing walay kataposan ngadto sa tanang tawo nga takos niana, ug kana maoy lain pang rason nga magtukmod kanato sa pagdayeg kaniya. (Pinadayag 21:3, 4) Si Haring David sa kakaraanan maikagon sa ‘pagdayeg sa ngalan sa Diyos’ ug ‘pagpadako kaniya uban ang pagpasalamat.’ (Salmo 69:30) Hinaot nga ingon usab niana ang atong tinguha.

Ang atong isigkamagsisimba takos sa nahiangayng komendasyon. Kon ato silang dayegon, kita nagalihok nga kaharmonya sa sugo sa Diyos nga ‘magmahunahunaon sa usag usa aron sa pagdasig ngadto sa paghigugma ug sa maayong mga buhat.’ (Hebreohanon 10:24) Si apostol Pablo maoy maayong panig-ingnan niining bahina. Siya misulat ngadto sa kongregasyon sa Roma: “Una sa tanan, ako nagpasalamat sa akong Diyos pinaagi ni Jesu-Kristo mahitungod kaninyong tanan, tungod kay ang inyong pagtuo gihisgotan lukop sa tibuok kalibotan.” (Roma 1:8) Sa susama, si apostol Juan nagdayeg sa iyang isigka-Kristohanon nga si Gayo tungod sa iyang maayo kaayong panig-ingnan sa “paglakaw diha sa kamatuoran.”—3 Juan 1-4.

Sa pagkakaron, sa dihang ang usa ka isigka-Kristohanon magpasundayag ug samag-Kristo nga hiyas sa sulondang paagi, maghatag ug maayong-pagkaandam nga bahin diha sa tigom, o kinasingkasing nga mokomento panahon sa tigom, kita adunay maayong kahigayonan nga pasalamatan ang maong indibiduwal. O mahimo usab natong komendahan ang usa ka bata nga naningkamot sa pagpangita sa mga teksto panahon sa mga tigom sa kongregasyon. Si Elaine nga gihisgotan ganiha, nag-ingon: “Kita lainlaig katakos. Pinaagi sa paghatag ug komendasyon sa nahimo sa uban, atong gipadayag ang atong apresasyon sa nagkadaiyang katakos nga nabatonan sa katawhan sa Diyos.”

 Sulod sa Pamilya

Komosta ang pagpahayag ug apresasyon sa mga membro sa atong pamilya? Ang bana ug asawa nagkinahanglan ug dakong panahon, paningkamot, ug mahigugmaong pagtagad aron makatagana sa espirituwal, emosyonal, ug materyal nga mga panginahanglan sa ilang pamilya. Tungod niini, sila takos nga makadungog ug mga pulong sa pagdayeg gikan sa matag usa kanila ug gikan sa ilang mga anak. (Efeso 5:33) Pananglitan, mahitungod sa takos nga asawa, ang Pulong sa Diyos nag-ingon: “Ang iyang mga anak mobangon ug magpahayag kaniya nga malipayon; ang iyang tag-iya mobangon, ug siya magdayeg kaniya.”—Proverbio 31:10, 28.

Ang mga bata takos usab nga komendahan. Ikasubo, ang pipila ka ginikanan dali rang mobaod sa ilang mga anak kon unsay ilang gikinahanglan kanila, apan talagsa rang modayeg kanila sa ilang paningkamot nga magmatinahoron ug magmasinugtanon. (Lucas 3:22) Kon sugdan sila pagdayeg samtang bata pa sila, kini sagad makatabang kanila nga mobating gikinahanglan ug may pagsalig sa kaugalingon.

Tinuod nga ang paghatag ug komendasyon sa uban nagkinahanglag paningkamot, apan kita moani ug daghang kaayohan sa paghimo niana. Sa pagkatinuod, kon kita mas makugihon sa paghatag ug komendasyon niadtong takos niini, mas dako usab ang kalipay nga atong bation.—Buhat 20:35.

Pagdawat ug Paghatag ug Komendasyon Uban ang Hustong Tinamdan

Sa laing bahin, ang pagkadawat ug komendasyon maoy usa ka pagsulay alang sa uban. (Proverbio 27:21) Pananglitan, kini makapahunahuna sa usa ka tawo, ilabina niadtong mapahitas-on, nga siya labaw sa uban. (Proverbio 16:18) Busa, kinahanglang magbantay. Si apostol Pablo naghatag niining praktikal nga tambag: “Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon; kondili maghunahuna sa paagi nga makabaton sa maayong panghunahuna, ang matag usa sumala sa gihatag sa Diyos kaniya nga sukod sa pagtuo.” (Roma 12:3) Sa pagtabang sa uban nga dili malit-agan sa sobrang paghunahuna sa ilang kaugalingon, maalamon tingali nga dili isentro ang pagtagad sa ilang pagkautokan o sa ilang pisikal nga katahom. Hinunoa, kita angayng magdayeg sa uban tungod sa ilang maayong mga binuhatan.

Kon ang pagdayeg ihatag ug dawaton uban ang hustong tinamdan, kini makahatag kanato ug mga kaayohan. Kita lagmit matukmod sa pag-ila sa atong pagkautangan kang Jehova sa bisan unsang maayong buhat nga atong nahimo. Ang komendasyon magdasig usab kanato nga magpadayon sa maayong panggawi.

Ang sinsero ug nahiangayng komendasyon maoy usa ka gasa nga maarangan natong tanan sa paghatag. Kon sa kamahunahunaon atong ihatag kini ngadto sa usa ka tawo, wala kita masayod kon unsa ka dako ang epekto niini ngadto kaniya.

[Kahon/Hulagway sa panid 18]

Usa ka Sulat nga Nakatandog sa Iyang Kasingkasing

Ang usa ka nagapanawng magtatan-aw tin-aw pang nahinumdom sa usa ka higayon diin siya ug ang iyang asawa mipauli sa ilang gipuy-an panahon sa kamig kaayo nga adlaw diha sa kanataran. Siya miingon: “Ang akong asawa gitugnaw ug naluya, ug iya kong giingnan nga morag dili na siya makapadayon pa. ‘Mas maayo pang mag-alagad nga bug-os-panahon diha sa ministeryo uban sa usa ka kongregasyon, magpuyo sa usa ka dapit, ug magdumala ug kaugalingong mga pagtuon sa Bibliya,’ matod pa sa iyang asawa. Wala dayon ako modesisyon nga moundang. Ako siyang giingnan nga humanon una namo ang tibuok semana ug unya tan-awon namo kon unsay iyang bation nianang panahona. Kon kaundangon gihapon siya, akong hatagag konsiderasyon ang iyang gibati. Nianang adlawa, kami mihapit sa buhatan sa koreyo ug nakadawat ug usa ka sulat gikan sa sangang buhatan nga giadres mismo kaniya. Ang sulat nagpahayag ug mainitong komendasyon alang sa akong asawa tungod sa iyang mga paningkamot diha sa ministeryo ug sa iyang pagkamalahutayon, nga nag-ila kon unsa ka lisod nga matulog sa lainlaing balay kada semana. Natandog siya pag-ayo sa maong komendasyon nga wala na gayod siya maghisgot pa sa pagbiya sa nagapanawng buluhaton. Sa pagkatinuod, sa makadaghan siya na hinuoy nagdasig kanako nga mopadayon sa dihang maghunahuna ko nga moundang.” Kining magtiayona nagpabilin sa nagapanawng buluhaton sulod sa mga 40 ka tuig.

[Hulagway sa panid 17]

Kinsa diha sa inyong kongregasyon ang angayng komendahan?

[Hulagway sa panid 19]

Ang mga bata molampos kon hatagan ug mahigugmaong pagtagad ug komendasyon