Gilipay Nila ang Kasingkasing sa Ilang mga Ginikanan
Gilipay Nila ang Kasingkasing sa Ilang mga Ginikanan
“ANAK ko, kon ang imong kasingkasing nahimong maalamon, ang ako gayong kasingkasing magamaya.” (Proverbio 23:15) Sa pagkatinuod, ang Kristohanong mga ginikanan malipay sa dihang ang ilang mga anak magbatog diyosnong kaalam. Sa Sabado, Septiyembre 10, 2005, usa ka grupo sa 6,859 ka tawo gikan sa lainlaing nasod ang mitambong sa graduwasyon sa ika-119 nga klase sa Watchtower Bible School of Gilead. Dako kaayong kalipay ang gibati sa tanan, ilabina ang mga ginikanan sa 56 ka graduwado.
Si David Walker, usa ka dugay nang membro sa pamilyang Bethel sa Tinipong Bansa, nagbukas sa programa uban ang kinasingkasing nga pag-ampo. Unya ang tsirman, si David Splane sa Nagamandong Lawas sa mga Saksi ni Jehova, nagsugod sa programa pinaagi sa pagsulti ngadto sa mga amahan ug inahan sa mga estudyante: “Kamo takos sa among mainitong pagdayeg. Ang mga hiyas nga inyong gisilsil sa inyong mga anak maoy nagpalihok kanila nga mosulod sa misyonaryong pag-alagad.” Ang mga ginikanan nabalaka tingali, tungod kay sa dili madugay ang ilang mga anak ipadala na ngadto sa halayong mga asaynment. Apan, sila gipasaligan ni Brader Splane: “Ayawg kabalaka sa inyong mga anak. Si Jehova makaatiman kanila labaw pa sa inyong mahimo.” Dayon siya miingon: “Hunahunaa ang maayong butang nga malampos sa inyong mga anak. Ang mga tawong nag-antos makabaton ug tinuod nga kahupayan sa unang higayon sa ilang kinabuhi.”
Kon Unsaon nga Padayong Makadalag Kalipay sa Uban
Gipailaila sa tsirman ang upat ka mamumulong. Una, si Ralph Walls, nga membro sa Komite sa Sanga sa Tinipong Bansa, nagpahayag sa temang “Buksi Kanunay ang Inyong mga Mata.” Gipasiugda niya nga ang espirituwal nga pagkabuta mas grabe pa kay sa pisikal nga pagkabuta. Ang unang-siglong kongregasyon sa Laodicea nabuta sa espirituwal. Ang mga Kristohanon nianang kongregasyona gitabangan, apan mas maayo pang likayan ang maong pagkabuta pinaagi sa pagbukas kanunay sa atong espirituwal nga mga mata. (Pinadayag 3:14-18) Ang mamumulong miingon: “Buksi kanunay ang inyong mga mata, ug lantawa ang responsableng mga lalaki sama sa paglantaw ni Jehova kanila.” Ang mga graduwado dili angay nga sobrang mabalaka kon adunay mga problema diha sa kongregasyon. Ang Ginoong Jesu-Kristo nahibalo nianang tanan. Siya molihok sa pagsulbad sa maong mga problema sa hustong panahon.
Human niana, Si Samuel Herd sa Nagamandong Lawas mitubag sa pangutanang “Andam Ka na Ba?” Sama nga ang magpapanaw magdalag mga besti nga iyang gikinahanglan, ang mga graduwado usab kinahanglang magsul-ob kanunay sa mga hiyas sa bag-ong personalidad. Kinahanglan nilang isul-ob ang pagkamabination sama ni Jesus. Sa dihang ang usa ka sanlahon miingon kaniya: “Kon buot mo lamang, ikaw makahinlo kanako,” si Jesus mitubag: “Buot ko. Mamahinlo ka.” (Marcos 1:40-42) Ang mamumulong nagpadayon sa pag-ingon: “Kon buot gayod ninyong motabang sa mga tawo, kamo mangitag paagi sa paghimo niana.” Ang Filipos 2:3 nagdasig sa mga Kristohanon nga isipon ‘ang uban nga labaw.’ Si Brader Herd nag-ingon: “Ang pagkamapaubsanon mas hinungdanon kay sa pagbaton ug kahibalo. Ang mga tawo nga inyong mahibalag sa ministeryo ug ang mga igsoon diha sa kongregasyon makabenepisyo lamang sa inyong kahibalo kon kamo mapaubsanon.” Siya mihinapos pinaagi sa pag-ingon nga kon ang mga graduwado magpadayon sa pagsul-ob sa Kristohanong gugma, sila andam na sa pag-adto sa ilang mga asaynment, uban ang seguradong kalamposan sa unahan.—Colosas 3:14.
Si Mark Noumair, usa sa mga instruktor sa Gilead, nagpukaw sa interes sa mga mamiminaw uban sa ulohan sa iyang pakigpulong nga, “Makamentinar Ka ba Niini?” Ang pulong “niini” nagtumong sa atong pagkamapasalamaton sa pagkamaayo ni Jehova. Ang Salmo 103:2 nag-ingon: “Dayega si Jehova, Oh kalag ko, ug ayaw kalimti ang tanan niyang mga buhat.” Ang mga Israelinhon wala magmapasalamaton sa mana nga nakatabang kanila aron magpadayong buhi, nga nagtawag niini ingong “dulumtanang tinapay.” (Numeros 21:5) Paglabay sa panahon, ang kabililhon sa mana wala mausab apan ang ilang pagkamapasalamaton alang niini nahanaw. Ang instruktor miingon: “Kon inyong kalimtan ang mga buhat ni Jehova ug tugotan nga ang inyong pag-alagad sa langyawng dapit mahimong naandan na lamang, kana makapausab sa inyong panglantaw sa buluhaton nga gihatag ni Jehova kaninyo.” Ang Salmo 103:4 nag-ingon nga si Jehova ‘nagpurongpurong kaninyo sa mahigugmaong-kalulot.’ Matagamtam sa mga graduwado ang mahigugmaong-kalulot ni Jehova diha sa ilang bag-ong mga kongregasyon.
Ang lain pang instruktor sa Gilead, si Lawrence Bowen, mipakigpulong sa ulohang “Ang mga Panalangin ba Modangat Kaninyo?” Siya nag-ingon nga ang mga membro sa ika-119 nga klase sa Gilead gibansayg maayo aron mahimong malamposong mga misyonaryo. Apan karon sila kinahanglang magmaunongon kang Jehova ug sa buluhaton nga iyang gitahas kanila. Sa Pinadayag 14:1-4, ang 144,000 gihubit nga “nagpadayon pagsunod sa Kordero bisan asa siya moadto.” Ang tanan sa maong grupo nagmaunongon kang Jehova ug kang Jesus bisan pa sa mga pagsulay nga ilang naatubang, ug ilang nakab-ot ang ilang tumong. “Bisag unsa pay mahitabo, kita usab magmaunongon kang Jehova ug sa buluhaton nga iyang gitahas kanato,” matod pa sa mamumulong. Sa pagbuhat niana, makita sa mga graduwado nga ang mga panalangin ni Jehova “modangat” kanila.—Deuteronomio 28:2.
Pagpatunghag mga Bunga sa Ilang Pag-alagad
Kada hinapos sa semana human sa klase, ang mga estudyante nakigbahin sa pagsangyaw sa kanataran. Si Wallace Liverance, nga tigrehistro sa tunghaan, nakighinabi kanila panahon sa programa ug masabtan nga sila nagmalamposon niining bahina. Sila nakasangyaw sa maayong balita sa labing menos napulo ka pinulongan ug nakasugod ug daghang pagtuon sa Bibliya. Ang usa ka magtiayon sa klase nakasugod ug pagtuon sa Bibliya uban sa usa ka lalaking Insek. Human sa duha ka pagduaw, gipangutana nila siya kon unsay iyang gibati bahin sa pagkaila kang Jehova. Gibuksan niya ang iyang Bibliya ug gipabasa kanila ang Juan 17:3. Siya nagtuo nga siya karon nagsubay na sa dalan sa kinabuhi.
Dayon, si Anthony Morris sa Nagamandong Lawas nag-interbiyo sa tulo ka igsoon nga nag-alagad ingong mga Komite sa Sanga sa Côte d’Ivoire, Dominican Republic, ug Ecuador. Kining mga igsoona nagpasalig sa mga graduwado nga ang mga Komite sa Sanga mahinamong nagapaabot sa ilang pag-abot ug motabang kanila aron sila makapasibo sa ilang bag-ong mga teritoryo.
Sunod, si Leonard Pearson sa pamilyang Bethel sa Tinipong Bansa nag-interbiyo sa tulo ka membro sa Komite sa Sanga, gikan sa Demokratikanhong Republika sa Congo, Papua New Guinea, ug Uganda. Kining mga igsoona nagdasig sa mga graduwado sa pagkugig maayo diha sa ministeryo sa kanataran. Usa ka misyonaryong magtiayon nga nakagugol ug kapin sa 21 ka tuig sa Congo nakatabang nag 60 ka tawo aron magpahinungod ug magpabawtismo. Sa pagkakaron, ang maong magtiayon nagdumalag 30 ka pagtuon sa Bibliya, ug 22 niadtong ilang gitun-an tigtambongan na sa mga tigom sa kongregasyon. Tungod nianang dakong espirituwal nga pagpangani, karon mao ang kinamaayohang panahon sa pag-alagad ingong misyonaryo.
Pagpamatuod Uban ang Espiritu sa Pagkadinalian
Si Gerrit Lösch sa Nagamandong Lawas naghatag sa kataposang pakigpulong. Ang iyang tema maoy “Pagsulti Bahin sa Diyos ug Pagpamatuod Bahin Kang Jesus sa Adlaw sa Ginoo.” Ang mga pulong “saksi,” “mga saksi,” ug “pagpamatuod” mitungha 19 ka beses diha sa basahon sa Pinadayag. Busa, kini tin-awng nagpasabot sa buluhaton nga buot ni Jehova nga tumanon sa iyang katawhan. Kanus-a kita magpamatuod? Panahon “sa adlaw sa Ginoo.” (Pinadayag ) Kanang adlawa nagsugod niadtong 1914, nagapadayon hangtod sa atong adlaw, ug molugway pa sa unahan. Sumala pa sa 1:9,10Pinadayag 14:6, 7, ang buluhaton sa pagsulti bahin sa Diyos gipaluyohan sa mga manulonda. Gipakita sa Pinadayag 22:17 nga ang responsibilidad sa pagdumala sa buluhaton sa pagpamatuod bahin kang Jesus gipiyal sa nanghibilin nga dinihogang mga Kristohanon. Apan kitang tanan kinahanglang magpahimulos sa maong pribilehiyo karon. Sa bersikulo 20, si Jesus nag-ingon: “Ako moabot sa madali.” Si Brader Lösch nag-awhag sa tanan: “Tawga ang mga tawo, ‘Umari kamo, inom sa tubig sa kinabuhi nga walay bayad.’ Si Jesus moabot sa madali. Andam na ba kita?”
Si Fred Rusk, nga nag-alagad ingong instruktor sa Tunghaang Gilead sulod sa 11 ka tuig, nagtapos sa programa uban sa pag-ampo sa pagpasalamat kang Jehova nga nakatandog sa mga kasingkasing sa tanang tumatambong. Kadto maoy haom nga konklusyon sa usa ka okasyon nga puno sa kalipay.
[Kahon sa panid 13]
ESTADISTIKA SA KLASE
Gidaghanon sa mga nasod nga gihawasan: 10
Gidaghanon sa mga nasod nga gipadalhan: 25
Gidaghanon sa mga estudyante: 56
Aberids nga edad: 32.5
Aberids nga katuigan sa kamatuoran: 16.4
Aberids nga katuigan sa bug-os-panahong ministeryo: 12.1
[Hulagway sa panid 15]
Ika-119 nga Migraduwar nga Klase sa Watchtower Bible School of Gilead
Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista sa wala ngadto sa tuo sa matag laray.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.