Mga Pangutana Gikan sa mga Magbabasa

Duha ba lang ka papan nga bato ang sulod sa arka sa pakigsaad, o may sulod pang ubang butang?

Panahon sa pagpahinungod sa templo ni Solomon niadtong 1026 W.K.P., “walay bisan unsa sa sulod sa Arka gawas sa duha ka papan nga gihatag ni Moises sa Horeb, sa dihang si Jehova naghimog pakigsaad uban sa mga anak sa Israel samtang sila nanggula gikan sa Ehipto.” (2 Cronicas 5:10) Apan dili kanunay nga kadto ang kahimtang.

“Sa ikatulong bulan human makagula ang mga anak sa Israel sa yuta sa Ehipto,” sila misulod sa kamingawan sa Sinai. (Exodo 19:1, 2) Human niadto si Moises mitungas ngadto sa Bukid sa Sinai ug nakadawat sa duha ka papan nga bato sa Balaod. Siya misaysay: “Unya milakaw ako ug milugsong gikan sa bukid ug gisulod ko ang mga papan didto sa arka nga akong gibuhat, aron kini magpabilin didto, sumala sa gisugo ni Jehova kanako.” (Deuteronomio 10:5) Kadto maoy temporaryong arka o sudlanan nga gipabuhat ni Jehova kang Moises aron masudlan sa mga papan sa Balaod. (Deuteronomio 10:1) Ang arka sa pakigsaad andam nang gamiton sa pagkatapos lamang sa 1513 W.K.P.

Wala madugay sa pagkaluwas nila gikan sa Ehipto, ang mga Israelinhon misugod sa pagbagulbol bahin sa pagkaon. Busa sila gihatagan ni Jehova ug mana. (Exodo 12:17, 18; 16:1-5) Niadtong panahona, si Moises nagsugo kang Aaron: “Pagkuhag usa ka tibod ug isulod niini ang usa ka omer nga mana ug ibutang kini sa atubangan ni Jehova aron pagatipigan latas sa tanan ninyong mga kaliwatan.” Ang asoy nag-ingon: “Sumala sa gisugo ni Jehova kang Moises, gibutang kini ni Aaron sa atubangan sa Pagpamatuod [usa ka tipiganan ug hinungdanong mga dokumento] aron pagatipigan.” (Exodo 16:33, 34) Bisag si Aaron sa walay duhaduha namunit ug mana ug kadto gisulod sa usa ka tibod, ang pagbutang niadto atubangan sa Pagpamatuod kinahanglang maghulat hangtod nga nakabuhat na si Moises sa Arka ug gisulod didto ang mga papan.

Sumala sa nahisgotan na, ang arka sa pakigsaad gibuhat sa hinapos nga bahin sa 1513 W.K.P. Ang sungkod ni Aaron gisulod sa maong Arka sa ulahi na kaayong panahon, human sa pagrebelde ni Kore ug sa uban pa. Si apostol Pablo naghisgot sa “arka sa pakigsaad . . . , diin didto ang tibod nga bulawan nga may mana ug ang sungkod ni Aaron nga nanalingsing ug ang mga papan sa pakigsaad.”—Hebreohanon 9:4.

Ang mana maoy usa ka tagana nga gihimo sa Diyos panahon sa 40-ka-tuig nga pagpuyo sa mga Israelinhon sa kamingawan. Wala na kadto itagana sa dihang “nangaon sila sa pipila sa mga abot sa yuta” nga gisaad. (Josue 5:11, 12) Ang sungkod ni Aaron gisulod sa arka sa pakigsaad tungod sa usa ka katuyoan—aron magsilbing ilhanan o pamatuod batok sa masuklanong kaliwatan. Nagpasabot kini nga ang sungkod nagpabilin diha niana sa panahon lamang sa pagpuyo sa kamingawan. Nan, daw makataronganon ang paghinapos nga tali sa panahon sa pagsulod sa Israel sa Yutang Saad ug sa wala pa ipahinungod ang templo ni Solomon, ang sungkod ni Aaron ug ang tibod nga bulawan nga may mana gikuha na gikan sa arka sa pakigsaad.