Sukli ang Yawa, ug Siya Mokalagiw!

“Magpasakop kamo sa Diyos; apan sukli ang Yawa, ug siya mokalagiw gikan kaninyo.”—SANTIAGO 4:7.

1, 2. (a) Unsang kinaiya sa Yawa ang gipadayag diha sa mga pulong nga natala sa Isaias kapitulo 14? (b) Unsang mga pangutana ang atong pagahisgotan?

 ANG Yawa maoy kahugpongan sa pagkahambog. Gipadayag ang iyang garbo diha sa mga pulong nga gitala sa manalagna sa Diyos nga si Isaias. Kapig usa ka siglo sa wala pa magamhanan sa kalibotan ang Babilonya, nadayag nga kini gipahayag sa katawhan ni Jehova batok sa “hari sa Babilonya”: “Ikaw miingon diha sa imong kasingkasing, ‘Ngadto sa langit ako mosaka. Ibabaw sa mga bituon sa Diyos [mga hari sa harianong banay ni David] akong ituboy ang akong trono . . . akong himoon ang akong kaugalingon nga sama sa Labing Hataas.’” (Isaias 14:3, 4, 12-15; Numeros 24:17) Ang garbo sa “hari sa Babilonya” kaamgid sa espiritu o tinamdan ni Satanas, “ang diyos niining sistema sa mga butang.” (2 Corinto 4:4) Apan ang pagkahambog ni Satanas mosangko sa katalagman, sama rang ang dinastiya sa Babilonya nahidangat sa makauulawng kataposan.

² Apan samtang naglungtad pa ang Yawa, basin kita maikag sa mga pangutanang sama niini: Angay ba kitang mahadlok kang Satanas? Nganong nagdasig siya sa mga tawo sa paglutos sa mga Kristohanon? Sa unsang paagi makalikay kita nga madaog sa Yawa?

Angay ba Kitang Mahadlok sa Yawa?

3, 4. Nganong ang dinihogang mga Kristohanon ug ang ilang mga kauban dili mahadlok sa Yawa?

³ Makapalig-on kaayo sa dinihogang mga Kristohanon kining mga pulonga ni Jesu-Kristo: “Ayaw kahadlok sa mga butang nga hapit na nimong antoson. Tan-awa! Ang Yawa padayong magabalhog sa pipila kaninyo sa bilanggoan aron kamo bug-os mabutang sa pagsulay, ug aron kamo makaagom ug kasakitan sulod sa napulo ka adlaw. Pamatud-i ang imong kaugalingon nga matinumanon bisan hangtod sa kamatayon, ug igahatag ko kanimo ang purongpurong sa kinabuhi.” (Pinadayag 2:10) Ang mga dinihogan ug ilang mga kaubang may yutan-ong paglaom dili mahadlok sa Yawa. Ang ilang pagkadili-mahadlokon wala magagikan sa kaisog nga kinaiyanhon nilang naangkon. Sila dili mahadlok kay sila adunay masimbahong kahadlok sa Diyos ug sila ‘midangop sa landong sa iyang mga pako.’—Salmo 34:9; 36:7.

⁴ Ang dili-mahadlokon nga unang mga tinun-an ni Jesu-Kristo nagmatinumanon hangtod sa kamatayon bisan pa sa mga butang nga ilang giantos. Sila wala magpadaog sa kahadlok sa kon unsay mahimo sa Yawa, kay sila nahibalo nga si Jehova dili gayod mobiya niadtong nagmaunongon Kaniya. Sa samang paagi, bisan pa sa grabeng paglutos karong panahona, ang dinihogang  mga Kristohanon ug ang ilang dedikadong mga kauban determinadong magmaunongaon sa Diyos. Apan, gipasabot ni apostol Pablo nga ang Yawa makapahinabog kamatayon. Dili ba kita angayng mahadlok niana?

5. Unsay atong makat-onan gikan sa Hebreohanon 2:14, 15?

⁵ Si Pablo miingon nga si Jesus ‘miambit sa dugo ug unod’ aron nga “pinaagi sa iyang kamatayon mawagtang niya ang usa nga may gahom sa pagpahinabog kamatayon, nga mao, ang Yawa; ug nga iyang mapagawas ang tanan nga tungod sa kahadlok sa kamatayon nailalom sa pagkaulipon sa tibuok nilang kinabuhi.” (Hebreohanon 2:14, 15) Ingong “ang usa nga may gahom sa pagpahinabog kamatayon,” nagamhan ni Satanas si Judas Iskariote ug unya iyang gigamit ang Hudiyong mga lider ug mga Romano sa pagpapatay kang Jesus. (Lucas 22:3; Juan 13:26, 27) Ugaling lang, pinaagi sa iyang haladnong kamatayon, gipagawas ni Jesus ang makasasalang katawhan gikan sa gahom ni Satanas ug gihatagan kitag kahigayonan nga makabaton ug kinabuhing walay kataposan.—Juan 3:16.

6, 7. Asa kutob makapahinabog kamatayon si Satanas?

⁶ Asa kutob makapahinabog kamatayon ang Yawa? Buweno, sukad sa pagsugod sa daotang mga buhat ni Satanas, ang iyang kabakakan ug mga paggiya nagpahinabog kamatayon taliwala sa mga tawo. Tungod kana kay si Adan nakasala ug busa iyang gipasa ang sala ug kamatayon sa tawhanong pamilya. (Roma 5:12) Dugang pa, ang yutan-ong mga alagad ni Satanas naglutos sa mga magsisimba ni Jehova, usahay hangtod pa sa kamatayon, sama sa ilang gibuhat sa kahimtang ni Jesu-Kristo.

⁷ Bisan pa niana, dili angay natong hunahunaon nga ang Yawa makapahinabo sa kamatayon ni bisan kinsang buot niyang ipapatay. Panalipdan sa Diyos kadtong Iyaha ug dili gayod niya itugot nga laglagon ni Satanas ang tanang matuod nga mga magsisimba sa yuta. (Roma 14:8) Tinuod, itugot ni Jehova nga pagalutoson ang tanan niyang katawhan, ug itugot niyang ang kamatayon modangat sa pipila kanato tungod sa mga pag-atake sa Yawa. Bisan pa niana, gipadayag sa Kasulatan ang kahibulongang paglaom nga pagabanhawon kadtong anaa sa “basahon sa handomanan” sa Diyos—ug ang Yawa bug-os nga walay mahimo aron pugngan ang pagkabanhaw!—Malaquias 3:16; Juan 5:28, 29; Buhat 24:15.

Nganong Ginalutos Kita ni Satanas?

8. Nganong gipahinabo sa Yawa nga pagalutoson ang mga alagad sa Diyos?

⁸ Kon kita maunongong mga alagad sa Diyos, adunay pangunang hinungdan nga ipahinabo sa Yawa nga pagalutoson kita. Iyang tumong nga atong ikompromiso ang atong pagtuo. Atong nabatonan ang bililhong relasyon uban sa atong langitnong Amahan, ug nagtinguha si Satanas sa pagdaot niini. Dili kita angayng matingala niini. Sa Eden, gitagna ni Jehova nga adunay panag-away tali sa iyang simbolikong “babaye” ug sa “halas” ug tali sa ilang tinagsa ka ‘mga binhi.’ (Genesis 3:14, 15) Ang Kasulatan nagapaila sa Yawa  ingong “ang orihinal nga halas” ug nagpadayag nga ang iyang panahon maoy hamubo na lamang ug grabe gayod ang iyang kasuko. (Pinadayag 12:9, 12) Samtang nagpadayon ang panag-away tali sa duha ka ‘mga binhi,’ kadtong matinumanon nga nagaalagad kang Jehova makadahom nga pagalutoson. (2 Timoteo 3:12) Nahibalo ka ba sa nagpahiping hinungdan sa maong paglutos ni Satanas?

9, 10. Unsang isyu ang gipatungha sa Yawa, ug sa unsang paagi ang panggawi sa mga tawo nalangkit niini?

⁹ Gipatungha sa Yawa ang isyu bahin sa pagkasoberano sa uniberso. May kalangkitan nianang isyuha, iyang gilalis ang integridad sa mga tawo ngadto sa ilang Maglalalang. Gipadangat ni Satanas ang paglutos diha sa matul-id nga tawong si Job. Ngano? Aron bungkagon ang integridad ni Job kang Jehova. Ang asawa ni Job ug ang iyang tulo ka “samokan nga mga tighupay” nagsilbi sa katuyoan sa Yawa niadtong higayona. Sumala sa gipakita diha sa basahong Job, ang Diyos giakusahan sa Yawa, nga miingon nga ang tawo dili makapabiling matinumanon Kaniya kon tugotan si Satanas sa pagsulay sa maong tawo. Apan nahuptang lig-on ni Job ang iyang integridad, busa napamatud-ang bakakon si Satanas. (Job 1:8–2:9; 16:2; 27:5; 31:6) Ang Yawa naglutos sa mga Saksi ni Jehova karon sa pagsingkamot nga bungkagon ang ilang integridad ug pamatud-an ang iyang akusasyon.

¹⁰ Ang pagkahibalo nga ang Yawa magpahamtang kanato ug paglutos kay buot niyang bungkagon ang atong integridad ngadto sa Diyos makatabang kanato nga magmaisogon ug magmalig-on. (Deuteronomio 31:6) Ang atong Diyos mao ang Soberano sa Uniberso, ug siya motabang kanato sa paghupot sa atong integridad. Hinaot kita kanunayng magtinguha sa paglipay sa kasingkasing ni Jehova pinaagi sa paghupot sa atong integridad, aron siya makatubag sa dakong tigtamay, si Satanas nga Yawa.—Proverbio 27:11.

“Luwasa Kami Gikan sa Usa nga Daotan”

11. Unsay gipasabot sa hangyo, “Ayaw kami dad-a ngadto sa tentasyon”?

¹¹ Dili yano nga butang ang paghupot sa integridad; kini nagkinahanglag tim-os nga pag-ampo. Ilabinang makatabang ang mga pulong sa sulondang pag-ampo. Sa bahin, si Jesus miingon: “Ayaw kami dad-a ngadto sa tentasyon, apan luwasa kami gikan sa usa nga daotan.” (Mateo 6:13) Si Jehova dili magtental kanato aron makasala kita. (Santiago 1:13) Hinunoa, ang Kasulatan usahay maghisgot nga iyang ginahimo o gipahinabo ang mga butang, sa dihang siya, sa pagkatinuod, nagtugot lamang niana. (Ruth 1:20, 21) Nan, pinaagi sa pag-ampo sumala sa gipahayag ni Jesus, hangyoon nato si Jehova nga dili niya itugot nga madaog kita sa tentasyon. Ug dili niya kana itugot, kay kita gipasaligan niini diha sa Kasulatan: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.”—1 Corinto 10:13.

12. Nganong mag-ampo kita: “Luwasa kami gikan sa usa nga daotan”?

¹² Human sa paghisgot sa tentasyon diha sa sulondang pag-ampo, si Jesus haom nga miingon: “Luwasa kami gikan sa usa nga daotan.” Ang pipila ka hubad sa Bibliya mabasa: “Luwasa kami gikan sa daotan” (King James Version; Revised Standard Version) o “Panalipdi kami gikan sa daotan.” (Contemporary English Version) Hinuon, sa Kasulatan ang mga pulong ‘luwasa gikan’ gigamit ilabina may kalabotan sa mga tawo, ug ang Ebanghelyo ni Mateo nagtumong sa Yawa ingong “ang Maninental,” nga usa ka persona. (Mateo 4:3, 11) Busa hinungdanon ang pag-ampo alang sa kaluwasan gikan sa “usa nga daotan,” si Satanas nga Yawa. Mosulay siya sa pagmaneobra kanato aron makasala kita batok sa Diyos. (1 Tesalonica 3:5) Sa dihang mohangyo kita, “Luwasa kami gikan sa usa nga daotan,” atong gihangyo ang atong langitnong Amahan nga giyahan ug tabangan kita aron dili kita madaog sa Yawa.

 Ayaw Pagpalupig sa Yawa

13, 14. Nganong kinahanglang bag-ohon sa mga taga-Corinto ang ilang paagi sa pagtagad sa usa ka tawo diha sa kongregasyon nga nahimong imoral?

¹³ Sa dihang si Pablo miawhag sa mga Kristohanon sa Corinto nga magmapinasayloon, siya misulat: “Bisan unsa nga inyong malulotong ipasaylo kang bisan kinsa, pasayloon ko usab. Sa pagkatinuod, alang kanako, bisan unsa nga akong malulotong gipasaylo, kon may bisan unsa man nga maluloton nakong gipasaylo, kini tungod kaninyo sa atubangan ni Kristo; aron kita dili malupigan ni Satanas, kay kita dili kay walay alamag sa iyang mga laraw.” (2 Corinto 2:10, 11) Ang Yawa makalupig kanato sa nagkalainlaing paagi, apan nganong si Pablo nagpahayag sumala sa bag-o pang gikutlong teksto?

¹⁴ Gibadlong ni Pablo ang mga taga-Corinto tungod kay ang usa ka tawong imoral gitugotan nilang magpabilin sa kongregasyon. Kadto nakapalipay kaayo kang Satanas, kay ang kongregasyon gibadlong man tungod sa pagtugot ‘sa maong pakighilawas nga wala gani buhata bisan taliwala sa mga nasod.’ Sa ngadtongadto ang makihilawason gipalagpot ra. (1 Corinto 5:1-5, 11-13) Kadtong tawhana naghinulsol sa ulahi. Kon ang mga taga-Corinto modumili sa pagpasaylo ug pagpasig-uli sa maong tawo, malupigan sila sa Yawa sa laing paagi. Sa unsang paagi? Sila mahimong mapig-oton ug dili-maluluy-on, sama kang Satanas mismo. Kon ang naghinulsol nga tawo ‘lamyon sa iyang tumang kasubo’ ug bug-os mohunong sa pagsimba sa Diyos, ang mga ansiyano ilabina ang manubag niana sa atubangan sa maluluy-ong Diyos, si Jehova. (2 Corinto 2:7; Santiago 2:13; 3:1) Siyempre, walay matuod nga Kristohanon ang buot mosundog kang Satanas pinaagi sa pagkahimong mapintas, mapig-oton, ug dili-maluluy-on.

Gipanalipdan sa Armadura Gikan sa Diyos

15. Unsang pagpakiggubat ang atong gibugno, ug sa unsa nagdepende ang kadaogan?

¹⁵ Aron maluwas kita gikan sa Yawa, kinahanglan kitang makigbugno sa espirituwal nga pagpakiggubat batok sa daotang mga puwersa nga espirituhanon. Ang kadaogan batok sa maong mga puwersa nagdepende sa atong pagsul-ob sa “kompletong armadura gikan sa Diyos.” (Efeso 6:11-18) Ang maong armadura naglakip sa “panagang sa dughan sa pagkamatarong.” (Efeso 6:14) Si Haring Saul sa karaang Israel wala magmasinugtanon sa Diyos ug nawad-an sa balaang espiritu. (1 Samuel 15:22, 23) Apan kon atong buhaton ang pagkamatarong ug magsul-ob sa kompletong espirituwal nga armadura, atong madawat ang balaang espiritu sa Diyos ug ang gikinahanglang panalipod batok kang Satanas ug sa iyang daotang mga manulonda, ang mga demonyo.—Proverbio 18:10.

16. Sa unsang paagi atong mabatonan ang padayong panalipod batok sa daotang mga puwersa nga espirituhanon?

¹⁶ Aron mabatonan ang padayong panalipod batok sa daotang mga puwersa nga espirituhanon, lakip sa ubang mga butang, kinahanglang regular kitang magbasa ug magtuon sa Pulong sa Diyos, nga gamiton sa bug-os ang mga basahong gitagana sa “matinumanong piniyalan.” (Lucas 12:42) Sa maong paagi, ang atong hunahuna mapunog makapahimsog nga espirituwal nga mga butang, nga nahiuyon sa tambag ni Pablo: “Mga igsoon, bisan unsang butang matuod, bisan unsang butang nga maugdang, bisan unsang butang matarong, bisan unsang butang maputli, bisan unsang butang hiligugmaon, bisan unsang butang dungganon, kon aduna may pagkahamili ug kon aduna may butang nga dalayegon, magpadayon sa pagpalandong niining mga butanga.”—Filipos 4:8.

17. Unsay makatabang kanato aron mahimong epektibong mga magmamantala sa maayong balita?

 ¹⁷ Si Jehova naghatag kanatog katakos aron ang atong ‘mga tiil masul-oban sa kasangkapan sa maayong balita sa pakigdait.’ (Efeso 6:15) Ang regular nga pagpakig-ambit sa Kristohanong mga tigom magsangkap kanato sa pagmantala sa maayong balita sa Gingharian sa Diyos. Dako gayong kalipay ang atong bation tungod sa pagtabang sa uban nga makakat-on sa kamatuoran sa Diyos ug makasinatig espirituwal nga kagawasan! (Juan 8:32) “Ang espada sa espiritu, nga mao, ang pulong sa Diyos,” kinahanglanon kaayo sa pagpanalipod kanato batok sa bakak nga mga pagtulon-an ug “pagpukan sa lig-ong pagkatarok nga mga butang.” (Efeso 6:17; 2 Corinto 10:4, 5) Ang mahanasong paggamit sa sinulat nga Pulong sa Diyos, ang Bibliya, makatabang kanato sa pagtudlo sa kamatuoran ug magapanalipod kanato aron dili kita madaog sa mga panglingla sa Yawa.

18. Sa unsang paagi kita “makabarog nga malig-on batok sa mga malipatlipatong kaugdahan sa Yawa”?

¹⁸ Gibuksan ni Pablo ang iyang paghisgot bahin sa atong espirituwal nga armadura pinaagi sa pag-ingon: “Magpadayon sa pagbaton ug gahom diha sa Ginoo ug diha sa pagkagamhanan sa iyang kusog. Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.” (Efeso 6:10, 11) Ang Gregong pulong nga gihubad “makabarog nga malig-on” nalangkit sa pagpabilin sa usa ka sundalo sa iyang posisyon. Magpabilin kitang malig-on sa espirituwal nga pagpakiggubat, bisan pag mogamit si Satanas ug nagkalainlaing mga panglingla sa iyang pagsingkamot nga bungkagon ang atong panaghiusa, tuison ang atong mga pagtulon-an, o bungkagon ang atong integridad ngadto sa Diyos. Apan ang mga pag-atake sa Yawa wala magmalamposon hangtod karon—ug dili gayod kana magmalamposon! a

Sukli ang Yawa, ug Siya Mokalagiw

19. Unsay usa ka paagi sa pagdasdas diha sa pagsukol sa Yawa?

¹⁹ Mahimo kitang malamposon sa atong espirituwal nga pagpakiggubat batok sa Yawa ug sa daotang mga puwersa nga espirituhanon nga iyang gigamhan. Walay katarongan nga kita mahadlok kang Satanas, kay ang tinun-ang si Santiago misulat: “Magpasakop kamo sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Ang usa ka paagi sa padayong pagdasdas diha sa pagsukol kang Satanas ug sa daotang espirituhanong mga linalang nga iyang mga kaabin mao ang dili pagpakiglangkit sa okulto o mga madyik ug sa mga nagbuhat niini. Ang Kasulatan tin-awng nagpakita nga ang mga alagad ni Jehova kinahanglang modumili sa pagpangitag mga tilimad-on o pagkonsultag astrolohiya, pagpatag-an, ug pagbuhat sa espiritismo. Kon kita aktibo ug malig-on sa espirituwal, dili gayod kita mahadlok nga adunay manglamat o manglumay kanato.—Numeros 23:23; Deuteronomio 18:10-12; Isaias 47:12-15; Buhat 19:18-20.

20. Sa unsang paagi makasukol kita sa Yawa?

²⁰ ‘Masuklan nato ang Yawa’ pinaagi sa pagsunod sa mga sukdanan ug mga kamatuoran sa Bibliya ug sa pagbarog nga malig-on batok kaniya. Ang kalibotan kaharmonya ni Satanas tungod kay siya mao ang diyos niini. (2 Corinto 4:4) Busa, atong isalikway ang mga kinaiya sa kalibotan, sama sa garbo, kahakog, imoralidad, kapintasan, ug materyalismo. Nahibalo kita nga ang Yawa mikalagiw sa dihang gisuklan ni Jesus ang iyang pag-atake pinaagi sa paggamit sa Kasulatan sa dihang siya gitental sa kamingawan. (Mateo 4:4, 7, 10, 11) Sa susamang paagi, si Satanas ‘mokalagiw gikan kanato’ nga mapildi kon kita bug-os magapasakop kang Jehova ug mainampoong mosalig Kaniya. (Efeso 6:18) Tungod sa pagsuportar ni Jehova nga Diyos ug sa iyang minahal nga Anak, walay makadaot nga permanente kanato—wala, bisan pa ang Yawa!—Salmo 91:9-11.

[Footnote]

Unsay Imong Tubag?

• Angay ba kitang mahadlok kang Satanas nga Yawa?

• Nganong si Satanas nagpahinabog paglutos diha sa mga Kristohanon?

• Nganong mag-ampo kita nga luwason gikan sa “usa nga daotan”?

• Sa unsang paagi magmalamposon kita sa pagpakigbugno sa espirituwal nga pagpakiggubat?

[Mga Pangutana sa Pagtuon]

[Hulagway sa panid 26]

Ang dili-mahadlokon nga unang mga sumusunod ni Kristo nagmatinumanon hangtod sa kamatayon

[Hulagway sa panid 27]

Ang Yawa dili makapugong sa pagkabanhaw niadtong anaa sa panumdoman ni Jehova

[Hulagway sa panid 28]

Nag-ampo ka ba aron maluwas gikan sa “usa nga daotan”?

[Hulagway sa panid 29]

Nagasul-ob ka ba sa “kompletong armadura gikan sa Diyos”?