Sugilanon sa Kinabuhi

Gitabangan Ako ni Jehova nga Makaplagan Siya

SUMALA SA GIASOY NI FLORENCE CLARK

Akong gikuptan ang kamot sa akong masakiton kaayong bana. Ingong Anglikano, ako nag-ampo sa Diyos nga maulian unta ang akong bana, ug ako nagsaad nga kon dili mamatay ang akong bana, akong pangitaon ang Diyos hangtod nga makaplagan nako siya. Unya maiya na ako.

AKO natawo ingong Florence Chulung sa Septiyembre 18, 1937, sa Aboriginal Oombulgurri Community sa hilit nga Kimberley Plateau nga rehiyon sa Kasadpang Australia.

Ako pang mahinumdoman ang malipayong mga adlaw sa akong pagkabata. Sa simbahan, akong nakat-onan ang pipila ka sukaranang mga butang bahin sa Diyos ug sa Bibliya, apan ang akong inahan maoy nagtudlo kanako ug Kristohanong mga prinsipyo. Kanunay niya akong basahan sa Bibliya, ug sukad sa akong pagkabatan-on, akong naugmad ang gugma alang sa espirituwal nga mga butang. Nakadayeg usab ako sa usa sa akong mga iyaan, nga usa ka misyonarya sa iyang simbahan. Sa akong kasingkasing ako nahibalo nga gusto nakong mosunod sa iyang mga tunob.

Ang among komunidad, nga nailhan kanhi ingong Forrest River Mission, may eskuylahan alang sa primero grado hangtod sa kinto grado. Ang among klase duha lamang ka oras kada buntag. Kini nagpasabot nga ang akong pormal nga edukasyon limitado kaayo, usa ka butang nga nakapabalaka sa akong amahan. Gusto niya nga ang iyang mga anak makabaton ug maarang-arang nga edukasyon, busa nakahukom siya sa pagbiya sa Oombulgurri ug pagbalhin sa pamilya ngadto sa lungsod sa Wyndham. Ako naguol sa adlaw nga kami milarga, apan sa Wyndham, ako nakahimo sa pag-eskuyla ug bug-os-panahon sulod sa misunod nga upat ka tuig, gikan sa 1949 hangtod  sa 1952. Ako mapasalamaton kaayo nga gipaposible sa akong amahan nga akong mabatonan ang maong edukasyon.

Si Mama nagtrabaho alang sa lokal nga doktor, ug pagkahuman nakog tungha sa edad nga 15 anyos, kining maong doktor nagtanyag kanako ug trabaho ingong nars sa ospital sa Wyndham. Ako dayon kining gidawat, kay niadtong panahona lisod mangitag trabaho.

Pipila ka tuig sa ulahi akong nahimamat si Alec, usa ka puting lalaki nga nagtrabaho sa ranso. Kami naminyo sa 1964 sa lungsod sa Derby, diin ako regular nga nagtambongan sa Anglikanong Simbahan. Usa ka adlaw niana, miduaw ang mga Saksi ni Jehova sa akong balay. Ako silang giingnan nga dili gayod ako interesado ug gihangyo nga dili na nila ako duawon pag-usab. Bisan pa niana, diha silay gisulti nga nakapaikag kanako—ang Diyos may personal nga ngalan, si Jehova.

“Dili Ka ba Makamaong Moampo?”

Sa 1965 nagkalisodlisod mi. Ang akong bana katulo makaagom ug grabeng aksidente—kaduha sa iyang kabayo ug ang usa sa iyang awto. Maayo na lang nga siya naulian niining maong mga samad ug nakabalik pagtrabaho. Apan, wala madugay naaksidente na usab siya sa iyang kabayo. Nianang panahona, grabe ang iyang mga samad sa ulo. Pag-abot nako sa ospital, giingnan ko sa doktor nga ang akong bana hapit nang mamatay. Ako nahugno. Gihangyo sa nars ang usa ka lokal nga pari nga makigkita kanako, apan ang pari miingon: “Dili pa ko kalugar karon. Ugma na lang ko moanha!”

Gusto nako nga ang pari anha sa akong tupad aron moampo uban nako ug ako kining gisulti ngadto sa madre. Siya miingon: “Naunsa god ka? Dili ka ba makamaong moampo?” Busa misugod ako pag-ampo sa mga estatwa sa simbahan aron mangayog tabang—apan kawang lang kadto. Ang akong bana daw himalatyon na. Ako naghunahuna, ‘Mag-unsa na lang ko kon mamatay ang akong bana?’ Nabalaka usab ako sa akong tulo ka anak—si Christine, Nanette, ug Geoffrey. Unsa man unyay ilang dangatan kon wala na ang ilang amahan? Maayo na lang nga tulo ka adlaw sa ulahi ang akong bana naulian ra sa panimuot, ug siya gipagawas sa ospital sa Disyembre 6, 1966.

Bisan tuod naulian ang akong bana, dihay kadaot sa iyang utok. Siya nahimong limtanon ug dali nang manapat ug mag-usab-usab ang buot. Nalisdan siya sa pagpakiglabot sa mga bata ug masuko pag-ayo kon ang mga bata dili mosanong nga sama sa mga hamtong. Lisod ang pag-atiman kaniya. Halos tanan akong buhaton alang kaniya. Gitudloan gani nako siya sa pagbasa ug pagsulat pag-usab. Ako nabug-atan pag-ayo sa pag-atiman kaniya samtang nag-atiman sa akong ubang mga buluhaton sa panimalay, mao nga ako nakaagom sa nervous breakdown. Pito ka tuig human maaksidente ang akong bana, nagkasabot mi nga magbulag una aron maulian ako sa akong panglawas.

Akong gidala ang mga bata ug namalhin mi sa habagatang bahin, didto sa siyudad sa Perth. Sa wala pa kami mamalhin, ang akong manghod nga babaye nagsugod na pagtuon sa Bibliya uban sa mga Saksi ni Jehova sa Kununurra, usa ka gamayng lungsod sa Kasadpang Australia. Gipakita niya kanako ang usa ka larawan diha sa librong Ang Kamatuoran nga Motultol sa Kinabuhing Dayon, a nga naghulagway sa saad sa Bibliya sa usa ka paraisong yuta. Niining libroha, iyang gipakita kanako nga ang Diyos adunay ngalan, si Jehova, ug ako naikag niini. Tungod kay wala pa gayod ako kasultii niining mga butanga sa akong simbahan, ako nakahukom sa pagtelepono sa mga Saksi ni Jehova sa dihang makabalhin na ko sa Perth.

Apan, medyo nagpanuko ako sa pagkontak kanila. Unya usa ka gabii niana, mibagting ang timbre sa pultahan. Ang akong anak nga lalaki miadto sa pultahan ug nagdali pagbalik nako, nga nag-ingon, “Ma, ang mga tawo nga imong giingon nga imong teleponohan ania na.” Medyo natingala ko ug miingon, “Ingna sila nga wala ko dinhi!” Apan, siya mitubag, “Nahibalo ka nga dili maayong mamakak ko, Ma.” Kay nabadlongan, ako miadto sa pultahan. Sa dihang gitimbaya nako ang mga bisita, akong namatikdan nga nahibulong sila. Sila miduaw aron makigkita sa nag-abang kaniadto sa among gipuy-an. Ako silang gipadayon ug unya nagpusotpusot ang akong  mga pangutana ug nakadawat ako ug makapatagbawng mga tubag gikan sa Bibliya.

Pagkasunod semana, ako nagsugod pagtuon sa Bibliya nga regular uban sa mga Saksi, ginamit ang librong Ang Kamatuoran nga Motultol sa Kinabuhing Dayon. Ang maong pagtuon nagpukaw pag-usab sa akong gugma alang sa espirituwal nga mga butang. Duha ka semana sa ulahi ako mitambong sa Memoryal sa kamatayon ni Kristo Jesus. Ako nagsugod pagtambong ug mga tigom kada Dominggo, ug wala madugay ako nagtambongan na usab sa mga tigom sa tunga-tunga sa semana. Misugod usab ako sa pagpaambit ngadto sa uban sa akong nakat-onan. Akong nadiskobrehan nga ang pagtabang sa uban nga makakat-on sa mga kamatuoran sa Bibliya nagpauswag sa akong mental ug emosyonal nga kahimsog. Unom ka bulan sa ulahi ako nabawtismohan panahon sa usa ka distritong kombensiyon sa Perth.

Samtang ako miuswag sa espirituwal, akong nasabtan ang panglantaw ni Jehova sa pagkasagrado sa kaminyoon, lakip na ang prinsipyo sa Bibliya nga makita diha sa 1 Corinto 7:13, nga nag-ingon: “Ang usa ka babaye nga may bana nga dili-magtutuo, apan uyon siya nga makigpuyo uban kaniya, ayaw siya pabiyaa sa iyang bana.” Kining tekstoha nagtukmod kanako nga mobalik kang Alec.

Pagbalik sa Derby

Ako nakabalik sa Derby sa Hunyo 21, 1979, human mahimulag sa akong bana sulod sa kapin sa lima ka tuig. Siyempre, nagsagol ang akong gibati ug naghunahuna ko kon unsa kahay iyang reaksiyon sa akong pagbalik. Sa akong katingala, siya nalipay nga ako mibalik kaniya, apan nahigawad siya nga ako nahimo nang usa sa mga Saksi ni Jehova. Misugyot dayon siya nga ako motambong sa iyang simbahan, ang akong gitambongan sa wala pa ko moadto sa Perth. Akong gisaysay nga dili nako kana mahimo. Naningkamot ko pag-ayo sa pagtahod sa iyang pagkaulo ug gihimo ang akong kinamaayohan ingong Kristohanong asawa. Ako misulay sa pagpakigsulti kaniya bahin kang Jehova ug sa Iyang maanindot nga mga saad sa umaabot, apan dili siya interesado.

Apan, sa ngadtongadto, wala lamang dawata ni Alec ang akong bag-ong paagi sa pagkinabuhi kondili misugod usab siya pag-abag kanako sa pinansiyal nga paagi aron ako makatambong sa mga kombensiyon ug mga asembliya, maingon man sa senemanang mga tigom. Ako mapasalamaton sa dihang siya mipalit ug awto—usa ka bililhong kabtangan niining hilit nga bahin sa Australia—aron akong magamit sa Kristohanong ministeryo. Ang mga igsoon lakip na ang magtatan-aw sa sirkito, subsob nga moestar ug pipila ka gabii sa among balay. Tungod niini nakaila ni Alec ang lainlaing mga Saksi, ug morag nakaangay siya kanila.

Ako Mibating Sama Kang Ezequiel

Malipay ko inigduaw sa mga igsoon, apan ako may suliran. Ako lang ang Saksi sa lungsod sa Derby. Ang kinadul-ang kongregasyon atua sa Broome, 220 kilometros ang gilay-on. Busa nakahukom ko sa paghimo sa akong labing maarangan sa pagsangyaw sa maayong balita. Sa tabang ni Jehova, akong naorganisar ang akong eskedyul ug ako nagsugod pagpamalaybalay. Nalisdan ko niining buluhatona, apan kanunay nakong pahinumdoman ang akong kaugalingon sa gisulti ni apostol Pablo: “Sa tanang butang ako adunay kusog pinaagi kaniya nga naghatag ug gahom kanako.”—Filipos 4:13.

Ang lokal nga klero wala malipay sa akong kalihokan, ilabina sa akong pagsangyaw taliwala sa mga isigka-Aborigine. Misulay sila sa paghulga kanako ug sa pagpahunong sa akong pagsangyaw. Ang ilang pagsupak nakapahimo hinuon kanako nga mas determinado nga mopadayon, ug ako regular nga mag-ampo kang Jehova nga tabangan niya ako. Subsob nakong mahinumdoman ang mga pulong sa pagdasig nga gihatag kang Ezequiel: “Tan-awa! Gihimo ko ang imong nawong  nga ingon kagahi sa ilang mga nawong ug ang imong agtang nga ingon kagahi sa ilang mga agtang. Gihimo ko ang imong agtang nga sama sa usa ka diamante, nga magahi pa kay sa santik. Ayaw kahadlok kanila, ug ayaw kalisang sa ilang mga nawong.”—Ezequiel 3:8, 9.

Sa ubay-ubayng higayon, duha ka lalaki gikan sa usa ka relihiyon ang miduol kanako samtang ako namalit. Dagko ang ilang tingog nga nagbugalbugal kanako, nga naningkamot sa pagdani sa pagtagad sa ubang mamalitay. Wala nako sila panumbalinga. Kas-a, samtang ako nagbalik-duaw sa usa ka interesado, miabot ang ministro sa lokal nga simbahan ug miingon nga dili kono ko motuo kang Jesus. Iyang gisakmit ang Bibliya gikan sa akong kamot, giwarawara kana atubangan sa akong nawong, ug gipansak kana pagbalik sa akong kamot. Ako siyang gitutokan, ug sa malumo apan puwersado nga paagi akong gikutlo ang Juan 3:16 ug giingnan siya nga ako nagtuo kang Jesus. Natingala siya sa akong makapakombinsir nga tubag ug milakaw nga walay tingog-tingog.

Malipay kong mosangyaw sa mga Aborigine sa Derby. Usa ka lokal nga pari ang mipugong kanako sa pagduaw sa mga tawo sa usa ka komunidad, apan siya gibalhin sa laing dapit. Busa, nakahimo ako sa pagdala kanila sa mensahe sa Bibliya. Sukad pa kaniadto gusto gayod nakong mahimong misyonarya sama sa akong iyaan, ug karon ako naghimo sa misyonaryong buluhaton nga nagtabang sa uban nga makakat-on bahin sa Pulong sa Diyos. Daghan sa mga Aborigine ang namati sa akong pagsangyaw, ug ako nakasugod ug ubay-ubayng mga panagtuon sa Bibliya.

Mahunahunaon sa Akong Espirituwal nga Panginahanglan

Sulod sa lima ka tuig, ako lang ang Saksi ni Jehova sa Derby. Nalisdan ako sa pagpabiling lig-on sa espirituwal nga wala ang pagdasig gikan sa regular nga mga tigom ug sa mga isigkamagsisimba. Sa usa ka higayon, naluya pag-ayo ang akong buot busa nagsuroysuroy una ko. Pag-uli nako sa hapon, usa  ka sister ug iyang pito ka anak ang naghulat kanako. Nagdala sila ug suplay sa literatura alang kanako gikan sa kongregasyon sa Broome, daghang kilometros ang gilay-on sa amoa. Sukad niadto, kining maong sister, si Betty Butterfield, nag-eskedyul nga moanhi sa Derby kas-a sa usa ka bulan ug moestar uban kanako sulod sa usa ka hinapos sa semana. Magkuyog mi pagsangyaw ug dayon magdungan pagtuon sa Ang Bantayanang Torre dinhi sa akong balay. Sa baylo, ako moadto sa Broome kas-a sa usa ka bulan.

Ang mga igsoon sa Broome matinabangon kaayo ug matag karon ug unya sila mobiyahe paingon sa Derby aron sa pagtabang kanako sa pagsangyaw sa kanataran. Ilang giawhag ang si bisan kinsang igsoon gikan sa ubang mga lungsod nga moagi sa Derby nga duawon ako ug moduyog kanako sa pagsangyaw. Dad-an usab ako niining maong mga biyahedor ug mga teyp sa mga pakigpulong publiko. Ang uban moduyog kanako sa pagtuon sa Ang Bantayanang Torre. Kining daklit nga mga pagduaw makapalig-on kaayo.

Miabot ang Dugang Tabang

Sulod sa pipila ka tuig, ako nakadawat ug dugang pagdasig sa dihang si Arthur ug Mary Willis, usa ka retiradong magtiayon gikan sa habagatang bahin sa Kasadpang Australia, miabot aron sa pagtabang kanako sulod sa tulo ka bulan sa panahon nga medyo bugnaw ang klima. Si Brader Willis maoy nagdumala sa kadaghanan sa mga tigom ug nanguna sa pagsangyaw sa kanataran. Magkauban kaming mobiyahe paingon sa mas hilit nga mga dapit sa Kimberley Plateau, nga moduaw sa mga ranso niining lagyong mga dapit. Matag higayon nga mogikan sila si Brader ug Sister Willis, bation nako ang dakong kahaw-ang.

Sa kataposan, sa hinapos sa 1983, akong nadawat ang makapalipayng balita nga usa ka pamilya—sila si Danny ug Denise Sturgeon ug ang ilang upat ka anak—mopuyo sa Derby. Sa dinhi na sila, kami nakapahigayon ug regular nga senemanang mga tigom ug nagkauban sa pagsangyaw sa kanataran. Sa 2001 natukod ang usa ka kongregasyon. Karon, ang Derby adunay lig-on nga kongregasyon sa 24 ka magmamantala sa Gingharian, diin duha ka ansiyano ug usa ka ministeryal nga alagad ang nag-atiman kanamo sa espirituwal. Usahay, duolan sa 30 ang manambong sa among mga tigom.

Sa dihang handomon nako ang nangaging katuigan, malipay ako sa paghunahuna kon sa unsang paagi gitabangan ako ni Jehova sa pag-alagad kaniya. Bisan tuod ang akong bana wala pa moduyog kanako sa akong pagtuo, siya padayon nga nagpaluyo kanako sa ubang mga paagi. Lima ka membro sa akong suod nga kabanay ang nahimong bawtismadong mga Saksi—akong duha ka anak nga babaye, duha ka apo nga babaye, ug usa ka pag-umangkon nga babaye. Gawas pa, ubay-ubay sa akong mga paryente ang nagtuon sa Bibliya uban sa katawhan ni Jehova.

Ako mapasalamaton gayod nga gitabangan ako ni Jehova sa pagkakaplag kaniya. Ako determinado nga maiyaha hangtod sa kahangtoran.—Salmo 65:2.

[Footnote]

[Mapa/Mga hulagway sa panid 15]

(Alang sa aktuwal nga pagkahan-ay, tan-awa ang publikasyon)

AUSTRALIA

Wyndham

Kimberley Plateau

Derby

Broome

Perth

[Credit Lines]

Kangaroo and lyrebird: Lydekker; koala: Meyers

[Hulagway sa panid 14]

Nagtrabaho ingong nars sa ospital sa Wyndham, 1953

[Hulagway sa panid 15]

Kongregasyon sa Derby, 2005