Ikaw ba Sama sa Kahoyng Kabalyero?

SA USA ka hilit nga balangay sa Port Moresby, Papua New Guinea, duha ka ministro ang taliuli na gikan sa ilang buluhatong pagsangyaw. Samtang sila naglakaw, sila nakakitag nindot nga kahoy. “Oy, lagani auna kana!” matod pa sa gulang-gulang nga lalaki, sumala sa pagtawag niana sa ilang dapit. Milingi sa bata-bata nga lalaki, siya miingon: “Kanang ngalana nagkahulogang ‘tinuig nga kahoy.’ Dili sama sa kadaghanang kahoy sa tropiko, kada tuig ang mga dahon niini mangalarag ug kini morag patay tan-awon. Apan, kon ting-ulan na, kini manalingsing na usab, mamulak, ug magpasundayag sa katahom niini.”

Aduna kitay makat-onang leksiyon gikan sa lagani auna o kahoyng kabalyero nga maoy komon nga pagtawag niini. Sumala pa sa pipila ka eksperto, apil kini sa lima ka kinanindotang mamulak nga mga kahoy sa kalibotan. Bisan pag mangalarag ang mga bulak ug dahon niini panahon sa ting-init, ang kahoy mopondo ug tubig. Ang mga gamot niini lig-on ug mokulapot sa mga bato ilalom sa yuta. Tungod niini, kini makasugakod batok sa kusog kaayong hangin. Sa laktod, kini mabuhi pinaagi sa pagpahiangay sa malisod nga mga panahon.

Kita makasugamak tingali ug mga kahimtang nga magsulay sa kalidad sa atong pagtuo. Unsay motabang kanato sa paglahutay? Sama sa kahoyng kabalyero, kita makainom ug makapondo ug nagahatag-kinabuhi nga tubig sa Pulong sa Diyos. Kita kinahanglang mangupot usab pag-ayo sa ‘atong bato,’ si Jehova, ingon man sa iyang organisasyon. (2 Samuel 22:3) Sa pagkatinuod, ang kahoyng kabalyero maoy maayong pahinumdom nga bisan diha sa dili-maayong kahimtang, atong mahuptan ang atong espirituwal nga kalig-on ug katahom kon atong pahimuslan ang mga tabang nga gitagana ni Jehova. Sa pagbuhat niana, kita ‘makapanunod sa mga saad’ nga iyang gipasalig kanato, nga naglakip sa saad nga mabuhing walay kataposan.—Hebreohanon 6:12; Pinadayag 21:4.