Mga Pangutana Gikan sa mga Magbabasa

Si Jose, nga usa ka matinumanong alagad ni Jehova, migamit ba ug linaing kopa nga plata sa pagbasa ug mga tilimad-on, nga morag maoy gipaila sa Genesis 44:5?

Walay ebidensiya ang pagtuo nga si Jose nagbuhat gayod ug bisan unsang matang sa pagpanag-an.

Ang Bibliya nagbutyag sa tinuod nga pagsabot ni Jose maylabot sa paggamit ug salamangka aron masayran ang umaabot. Sayosayo niini, sa dihang gipahubad kaniya ang mga damgo ni Paraon, sublisubling miinsistir si Jose nga ang Diyos lamang ang makahimo sa ‘pagpahibalo’ sa umaabot nga mga panghitabo. Tungod niini, si Paraon mituo nga ang Diyos nga gisimba ni Jose—ang matuod nga Diyos, dili ang mga gahom sa okulto—maoy mitabang kang Jose sa pagkahibalo sa mga detalye bahin sa umaabot. (Genesis 41:16, 25, 28, 32, 39) Sa Balaod nga gihatag kang Moises sa ulahi, si Jehova nagdili sa paggamit ug salamangka o pagpanag-an, nga nagpamatuod nga Siya lamang ang makatag-an sa umaabot.—Deuteronomio 18:10-12.

Nan, nganong gipaila man ni Jose pinaagi sa iyang alagad nga siya naggamit ug kopa nga plata aron “batid nga makabasa ug mga tilimad-on”? a (Genesis 44:5) Kinahanglan natong tagdon ang mga kahimtang diin gibase kining mga pulonga.

Tungod sa grabeng kagutom, ang mga igsoon ni Jose mipanaw paingon sa Ehipto aron makakuhag pagkaon. Mga tuig una pa niini, ang maong mga igsoon ni Jose nagbaligya kaniya sa pagkaulipon. Karon, nga wala nila masayri, sila nangayog tabang sa ila mismong igsoon, kinsa nahimo nang administrador sa pagkaon sa Ehipto. Si Jose wala magpaila kanila. Hinuon, siya nakahukom nga sulayan sila. Sa pagkahaom, buot ni Jose nga matino kon tiunay ba ang ilang paghinulsol. Gusto usab niyang mahibaloan kon sila ba nahigugma ug kon unsa ka lalom ang ilang gugma sa ilang igsoon nga si Benjamin ug sa ilang amahan nga si Jacob kinsa nagpangga pag-ayo kang Benjamin. Busa, gilansisan sila ni Jose.—Genesis 41:55–44:3.

Gisugo ni Jose ang usa sa iyang mga sulugoon nga pun-on ug pagkaon ang mga sako sa iyang mga igsoon, ibalik ang ilang salapi diha sa baba sa matag usa nila ka sako, ug ibutang ang kopa nga plata ni Jose diha sa baba sa sako ni Benjamin. Niining tanan, si Jose milihok gayod ingong usa ka administrador sa paganong nasod. Ang iyang panagway, mga lihok, ug iyang pinulongan maoy susama nianang matanga sa administrador, ingon sa naobserbahan sa iyang wala-magsuspetsa nga mga igsoon.

Sa dihang gisukmatan ni Jose ang iyang mga igsoon, siya nagpadayon sa iyang lansis, nga nangutana kanila: “Wala ba kamo masayod nga ang tawong ingon kanako batid nga makabasa ug mga tilimad-on?” (Genesis 44:15) Busa, ang kopa dayag nga usa lang ka bahin sa lansis. Si Jose wala gayod mogamit ug kopa sa pagbasa ug mga tilimad-on, maingon nga wala gayod kawata ni Benjamin ang maong kopa.

[Footnote]