Sundoga ang Pagkamapailobon ni Jehova

“Si Jehova dili langaylangayan mahitungod sa iyang saad, . . . kondili siya mapailobon.”—2 PEDRO 3:9.

1. Unsang walay-ikatandi nga gasa ang gitanyag ni Jehova sa mga tawo?

 SI Jehova nagtanyag kanato ug usa ka butang nga dili ikatanyag ni bisan kinsa. Kini usa ka butang nga makapadani ug bililhon kaayo, apan kini dili mapalit ni maangkon pinaagi sa paghago. Ang iyang gitanyag mao ang gasa nga walay kataposang kinabuhi—alang sa kadaghanan kanato, kinabuhing dayon sa paraisong yuta. (Juan 3:16) Pagkamakalilipay unya niana! Mawala na ang mga butang nga nagpahinabog dako kaayong kagul-anan—panagbangi, kapintasan, kakabos, krimen, sakit, ug bisan kamatayon. Ang mga tawo magkinabuhi diha sa hingpit nga pakigdait ug panaghiusa ilalom sa mahigugmaong pagmando sa Gingharian sa Diyos. Gitinguha gayod nato kanang maong Paraiso!—Isaias 9:6, 7; Pinadayag 21:4, 5.

2. Nganong wala pa man paphaa ni Jehova ang sistema sa mga butang ni Satanas?

² Si Jehova nagpaabot usab sa panahon sa dihang iya nang himoong Paraiso ang yuta. Buhaton kana ni Jehova tungod kay siya mahigugmaon sa pagkamatarong ug hustisya. (Salmo 33:5) Dili siya malipay nga magtan-aw sa kalibotan nga walay pagtagad o masinupakon sa iyang matarong nga mga prinsipyo, usa ka kalibotan nga nagtamay sa iyang awtoridad ug naglutos sa iyang katawhan. Bisan pa niana, dunay maayong mga katarongan kon nganong wala pa siya molihok sa pagpapha sa daotang sistema sa mga butang ni Satanas. Ang maong mga rason adunay kalabotan sa moral nga mga isyu nga naglangkit sa iyang pagkasoberano. Sa paghusay niining maong mga isyu, si Jehova nagpasundayag ug makapadani kaayong hiyas, usa ka hiyas nga wala mabatoni sa kadaghanan karon—ang pagkamapailobon.

3. (a) Unsay kahulogan sa Grego ug Hebreohanon nga mga pulong nga gihubad ug “pagkamapailobon” diha sa Bibliya? (b) Unsang mga pangutana ang atong konsiderahon karon?

³ Adunay Gregong pulong nga sa Bag-ong Kalibotang Hubad katulo nga gihubad ingong “pagkamapailobon.” Kini sa literal nagpasabot ug “pagkataas sa espiritu” ug busa subsob nga gihubad ug “hataas-nga-pailob” ug kas-a ingong “pagpasundayag ug pagkamapailobon.” Nalakip diha sa Grego ug Hebreohanon nga mga pulong alang sa “pagkamapailobon” ang ideya sa pagkamainantoson ug pagkahinay sa kasuko. Sa unsang paagi kita nakabenepisyo sa pagkamapailobon ni Jehova? Unsang mga leksiyon ang atong makat-onan gikan sa pagkamapailobon ug pagkamainantoson ni Jehova ug sa iyang matinumanong mga alagad? Giunsa nato pagkahibalo nga ang pagkamapailobon ni Jehova adunay kinutoban? Tan-awon nato.

Hunahunaa ang Pagkamapailobon ni Jehova

4. Mahitungod sa pagkamapailobon ni Jehova, unsay gisulat ni apostol Pedro?

⁴ Mahitungod sa pagkamapailobon ni Jehova, si apostol Pedro misulat: “Matikdi ninyo kining butanga, mga hinigugma, nga ang usa ka adlaw kang Jehova ingon sa usa ka libo ka tuig ug ang usa ka libo ka tuig ingon sa usa ka adlaw. Si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:8, 9) Palihog matikdi ang duha ka punto nga gipahayag dinhi nga makatabang kanato sa pagsabot sa pagkamapailobon ni Jehova.

5. Sa unsang paagi ang panglantaw ni Jehova sa panahon makaapektar sa iyang ginabuhat?

⁵ Ang unang punto mao nga ang panglantaw ni Jehova sa panahon dili sama sa atoa. Sa Usa nga buhi sa walay kataposan, ang usa ka libo ka tuig maoy sama sa usa ka adlaw. Siya wala mapugngi o mapit-osi sa panahon, apan siya dili hinayang molihok. Kay nakabaton ug walay-kinutobang kaalam, si Jehova nahibalo gayod sa kinamaayohang panahon  nga molihok alang sa kaayohan sa tanan nga nalangkit, ug siya mapailobong nagpaabot nianang panahona. Apan, dili kita angayng mohinapos nga si Jehova wala magtagad sa bisan unsang pag-antos nga mahimong maagoman sa iyang mga alagad samtang Siya nagpaabot. Siya mao ang Diyos sa “malumong kaluoy,” ang personipikasyon sa gugma. (Lucas 1:78; 1 Juan 4:8) Siya makahimo sa pagwagtang, sa bug-os ug sa dayon, sa bisan unsang kadaot nga lagmit ipahinabo niining temporaryong pagtugot sa pag-antos.—Salmo 37:10.

6. Unsay dili nato angayng hunahunaon bahin sa Diyos, ug ngano?

⁶ Siyempre, dili sayon nga magpaabot sa usa ka butang nga gipangandoy sa usa. (Proverbio 13:12) Busa, sa dihang ang mga tawo dili dayon motuman sa ilang mga saad, ang uban maghunahuna nga sila walay plano nga tumanon kana. Pagkadili-maalamon nga maghunahuna ug ingon niana bahin sa Diyos! Kon masaypan nato ang pagkamapailobon sa Diyos ingong pagkahinayan, ang paglabay sa panahon dali rang magpaduhaduha o magpahigawad kanato, ug kita mameligrong magduka sa espirituwal. Mas grabe pa, basin mapahisalaag kita niadtong giingon ni Pedro nga atong likayan—ang mga mabiaybiayon, kadtong walay pagtuo. Ang maong mga tawo magbugalbugal: “Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.”—2 Pedro 3:4.

7. Sa unsang paagi ang pagkamapailobon ni Jehova nalangkit sa iyang tinguha nga ang mga tawo maghinulsol?

⁷ Ang ikaduhang punto nga atong makat-onan gikan sa mga pulong ni Pedro mao nga si Jehova mapailobon tungod kay buot niya nga ang tanan makadangat sa paghinulsol. Kadtong modumili gayod sa pagbiya sa ilang daotang mga dalan pagalaglagon ni Jehova. Apan, dili malipay ang Diyos sa kamatayon sa usa nga daotan. Hinunoa, siya malipay nga makita ang mga tawo nga maghinulsol, mobiya sa ilang daotang mga dalan, ug mabuhi. (Ezequiel 33:11) Mao nga siya nagpasundayag ug pagkamapailobon ug iyang gipamantala ang maayong balita sa tibuok yuta aron ang mga tawo makabaton ug kahigayonan nga mabuhi.

8. Sa unsang paagi ang pagkamapailobon sa Diyos makita diha sa iyang mga pakiglabot sa nasod sa Israel?

⁸ Ang pagkamapailobon sa Diyos makita usab diha sa iyang mga pakiglabot sa karaang nasod sa Israel. Sulod sa daghang siglo, iyang giantos ang ilang pagkamasinupakon. Pinaagi sa iyang mga manalagna, makadaghan niyang giawhag sila: “Talikod kamo gikan sa inyong daotang mga dalan ug tumana ang akong mga sugo, ang akong mga lagda, sumala sa tanang balaod nga akong gisugo sa inyong mga katigulangan ug nga akong gipadala kaninyo pinaagi sa akong mga alagad nga mga manalagna.” Unsay resulta? Ikasubo, ang mga tawo “wala magpatalinghog.”—2 Hari 17:13, 14.

9. Sa unsang paagi ang pagkamapailobon ni Jesus nagsumbalik-silaw nianang sa iyang Amahan?

 ⁹ Sa kataposan, gipadala ni Jehova ang iyang Anak, kinsa padayong naghangyo sa mga Hudiyo nga unta sila mapasig-uli ngadto sa Diyos. Ang pagkamapailobon ni Jesus hingpit nga nagsumbalik-silaw nianang sa iyang Amahan. Kay nahibalo gayod nga siya hapit nang patyon, si Jesus mituaw: “Jerusalem, Jerusalem, ang nagapatay sa mga manalagna ug ang nagabato niadtong mga gipadala kaniya,—pagkasubsob nga buot kong tigomon ang imong mga anak, sa paagi nga ang usa ka himungaan magatigom sa iyang mga piso ilalom sa iyang mga pako! Apan dili kamo buot niini.” (Mateo 23:37) Kining makapatandog nga mga pulong dili iya sa dili-maluluy-ong huwes nga naghinamhinam sa pagsilot sa usa ka tawo kondili iya sa usa ka mahigugmaong higala nga mapailobon sa mga tawo. Si Jesus, sama sa iyang Amahan sa langit, nagtinguha nga ang mga tawo maghinulsol ug makalikay sa grabeng paghukom. Dihay nagpatalinghog sa mga pasidaan ni Jesus ug nakalikay sa makalilisang nga paghukom nga nahitabo sa Jerusalem niadtong 70 K.P.—Lucas 21:20-22.

10. Sa unsang paagi ang pagkamapailobon sa Diyos nakabenepisyo kanato?

¹⁰ Dili ba kahibulongan ang pagkamapailobon sa Diyos? Bisan pag hilabihan ka masinupakon ang katawhan, gihatagan ni Jehova ang matag usa kanato, maingon man ang milyonmilyon pang mga tawo, ug kahigayonan nga makaila kaniya ug makadawat sa paglaom sa kaluwasan. “Isipa ang pailob sa atong Ginoo ingong kaluwasan,” misulat si Pedro sa mga isigka-Kristohanon. (2 Pedro 3:15) Dili ba kita mapasalamaton nga ang pagkamapailobon ni Jehova naghatag kanatog kahigayonan nga maluwas? Wala ba kita mag-ampo nga hinaot unta nga si Jehova magmapailobon kanato samtang kita nag-alagad kaniya sa adlaw-adlaw?—Mateo 6:12.

11. Ang pagkasabot nato sa pagkamapailobon ni Jehova magtukmod kanato sa pagbuhat sa unsa?

¹¹ Kon atong masabtan kon nganong mapailobon si Jehova, kita matabangan sa pagpaabot nga mapailobon sa kaluwasan nga iyang ipahinabo, nga dili gayod mohinapos nga siya hinayan sa pagtuman sa iyang mga saad. (Lamentaciones 3:26) Samtang kita nagpadayon sa pag-ampo nga moabot ang Gingharian sa Diyos, kita nagasalig nga ang Diyos nahibalo kon kanus-a labing maayong tubagon ang maong pag-ampo. Dugang pa, kita matukmod sa pagsundog kang Jehova pinaagi sa pagpakita ug diyosnong pagkamapailobon diha sa atong mga pakiglabot sa atong mga igsoon ug niadtong atong gisangyawan. Kita usab wala magtinguha nga adunay malaglag kondili buot nato nga makita sila nga maghinulsol ug makabaton usab sa atong paglaom nga mabuhing walay kataposan.—1 Timoteo 2:3, 4.

Tagda ang Pagkamapailobon sa mga Manalagna

12, 13. Sumala sa Santiago 5:10, sa unsang paagi ang manalagnang si Isaias malamposong nakapasundayag ug pagkamapailobon?

¹² Pinaagi sa pagtagad sa pagkamapailobon ni Jehova, kita matabangan sa pagpabili ug pag-ugmad nianang hiyasa. Dili sayon alang sa dili-hingpit nga mga tawo ang pag-ugmad sa pagkamapailobon, apan mahimo kana. Kita makakat-on gikan sa mga alagad sa Diyos kaniadto. Ang disipulo nga si Santiago misulat: “Mga igsoon, himoa ninyong sumbanan sa pag-antos sa daotan ug sa pagkamapailobon ang mga manalagna, nga nagsulti sa ngalan ni Jehova.” (Santiago 5:10) Makapahupay ug makapadasig ang pagkahibalo nga ang uban nakabuntog sa mga suliran nga susama sa atong ginasagubang.

¹³ Pananglitan, ang manalagnang si Isaias kinahanglan gayong magmapailobon diha sa iyang asaynment. Gipaila kana ni Jehova kaniya pinaagi sa pag-ingon: “Lakaw, ug ikaw magaingon niini nga katawhan, ‘Maminaw kamo nga sublisubli, Oh mga tawo, apan dili kamo makasabot; ug motan-aw nga sublisubli, apan dili makabaton ug kahibalo.’ Himoa nga dili-madinawaton ang kasingkasing niini nga katawhan, ug himoa nga dili makadungog ang ilang mga dalunggan, ug mapiyong ang ilang mga mata, aron sila dili makakita pinaagi sa ilang mga mata ug pinaagi sa ilang mga dalunggan sila dili makadungog, ug aron ang ilang kaugalingong kasingkasing dili makasabot ug aron sila gayod dili mobalik ug makabaton ug pagkaayo alang sa ilang kaugalingon.” (Isaias 6:9, 10) Bisan wala mosanong ang mga tawo, si Isaias mapailobong nagmantala sa mga pasidaan ni Jehova sulod sa labing menos 46 ka tuig! Sa samang paagi, ang pagkamapailobon motabang kanato sa paglahutay diha sa atong buluhaton nga pagsangyaw sa maayong balita, bisan pag daghan ang dili madinawaton.

14, 15. Unsay nakatabang kang Jeremias sa pagsagubang sa mga kalisdanan ug kahigawad?

 ¹⁴ Siyempre, samtang ang mga manalagna nagtuman sa ilang ministeryo, dili lang ang pagkadili-masanongon sa mga tawo ang kinahanglang sagubangon nila; sila nag-antos sa daotan. Si Jeremias gibutang sa sepohan, gibilanggo diha sa “talikalaanan,” ug gihulog sa atabay. (Jeremias 20:2; 37:15; 38:6) Siya nakaagom niining maong paglutos diha sa mga kamot sa katawhan nga gusto niyang tabangan. Bisan pa niana, si Jeremias wala mayugot, ni siya mibalos. Siya mapailobong milahutay sulod sa daghang katuigan.

¹⁵ Ang paglutos ug pagbiaybiay wala makapahilom kang Jeremias, ug kana wala makapahilom kanato karon. Siyempre, usahay kita mobati tingalig kahigawad. Si Jeremias mibatig kahigawad. “Ang pulong ni Jehova nahimong hinungdan sa kaulawan ug sa pagyagayaga kanako sa tibuok adlaw,” siya misulat. “Ug ako miingon: ‘Dili na ako maghisgot kaniya, ug dili na ako mosulti diha sa iyang ngalan.’” Unsay nahitabo niadtong tungora? Mihunong ba si Jeremias sa pagsangyaw? Siya mipadayon sa pag-ingon: “Sa akong kasingkasing [ang pulong sa Diyos] nahisama sa nagdilaab nga kalayo nga natakpan sulod sa akong kabukogan; ug ako gikapoyan sa pagpinugong, ug wala ko na kini maagwanta.” (Jeremias 20:8, 9) Matikdi nga sa dihang iyang gisentro ang iyang pagtagad sa pagbiaybiay sa mga tawo, nawala ang iyang kalipay. Sa dihang giliso niya ang iyang pagtagad ngadto sa kaanindot ug kahinungdanon sa mensahe mismo, napasig-uli ang iyang kalipay. Dugang pa, si Jehova nag-uban kang Jeremias “sama sa usa nga makalilisang ang pagkagamhanan,” nga nagpalig-on kaniya sa pagmantala sa pulong sa Diyos nga masiboton ug maisogon.—Jeremias 20:11.

16. Sa unsang paagi mahuptan nato ang kalipay diha sa atong buluhatong pagwali sa maayong balita?

¹⁶ Nakakaplag ba si Jeremias ug kalipay diha sa iyang buluhaton? Oo! Siya miingon kang Jehova: “Ang imong mga pulong nakaplagan, ug akong gikaon kini; ug kanako ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova.” (Jeremias 15:16) Si Jeremias nagmaya sa iyang pribilehiyo nga maghawas sa matuod nga Diyos ug magsangyaw sa iyang pulong. Kita usab mahimong magmaya. Dugang pa, kita nagmaya, sama sa mga manulonda sa langit, nga sa tibuok kalibotan daghan kaayo ang midawat sa mensahe sa Gingharian, naghinulsol, ug nagsubay sa dalan paingon sa kinabuhing walay kataposan.—Lucas 15:10.

Ang “Pagkamainantoson ni Job”

17, 18. Sa unsang paagi si Job nagmainantoson, ug unsay sangpotanan?

¹⁷ Human mokomento bahin sa mga manalagna sa kakaraanan, ang disipulo nga si Santiago misulat: “Nakadungog kamo bahin sa pagkamainantoson ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.” (Santiago 5:11) Ang Gregong pulong nga gihubad dinhi ug “pagkamainantoson” adunay kahulogan nga susama sa pulong nga gigamit ni Santiago sa nag-unang bersikulo alang sa “pagkamapailobon.” Nagpunting sa kalainan tali sa duha ka pulong, ang usa ka eskolar misulat: “Ang nahauna maoy pagpakitag pailob sa dihang ang mga tawo molutos kanato, ang naulahi maoy pagpakita ug maisogong paglahutay bisan pa sa mga butang nga nakapaguol kanato.”

¹⁸ Si Job nakasinati ug hilabihang kaguol. Siya nakaagom sa kalisod sa panalapi, pagkamatay sa  iyang mga anak, ug sa grabeng sakit. Siya nakigbisog usab sa bakak nga mga akusasyon nga si Jehova nagsilot kaniya. Si Job wala mag-antos sa hilom; siya mituaw bahin sa iyang situwasyon ug gipasumbingay pa gani niya nga siya mas matarong pa kay sa Diyos. (Job 35:2) Apan, wala gayod siya mawad-ig pagtuo, ni mihuyang ang iyang integridad. Wala niya tungloha ang Diyos sumala sa giingon ni Satanas nga iyang buhaton. (Job 1:11, 21) Ang sangpotanan? “Gipanalanginan [ni Jehova] ang kaulahian ni Job labaw pa kay sa iyang sinugdan.” (Job 42:12) Giayo ni Jehova ang sakit ni Job, gidoble ang iyang bahandi, ug gigantihan siya ug tugob, malipayon nga kinabuhi uban sa iyang mga minahal. Ang matinumanong paglahutay ni Job nakapaarang usab kaniya sa pagkasabot sa mga hiyas ni Jehova sa mas bug-os pa.

19. Unsay atong makat-onan gikan sa mapailobong pagkamainantoson ni Job?

¹⁹ Unsay atong makat-onan gikan sa mapailobong pagkamainantoson ni Job? Sama kang Job, kita tingali nag-antos sa sakit o sa ubang mga kalisdanan. Tingali wala nato masabti sa bug-os kon nganong gitugot ni Jehova nga kita makaagom sa usa ka pagsulay. Bisan pa niana, makaseguro kita niini: Kon kita magpabiling matinumanon, kita iyang panalanginan. Sa walay pakyas si Jehova magaganti niadtong matinuorong nagapangita kaniya. (Hebreohanon 11:6) Si Jesus miingon: “Siya nga nakalahutay hangtod sa kataposan mao ang maluwas.”—Mateo 10:22; 24:13.

“Ang Adlaw ni Jehova Moabot”

20. Nganong makaseguro kita nga ang adlaw ni Jehova moabot?

²⁰ Bisan tuod si Jehova mapailobon, siya matarong usab ug dili motugot nga magpadayon hangtod sa hangtod ang pagkadaotan. Adunay kinutoban ang iyang pagpailob. Misulat si Pedro: “[Ang Diyos] wala magpugong sa pagsilot sa usa ka karaang kalibotan.” Samtang si Noe ug ang iyang pamilya naluwas, ang maong dili-diyosnon nga kalibotan gilunopan. Si Jehova nagpahamtang usab ug paghukom sa Sodoma ug Gomora, nga nag-ut-ot niana. Kining maong mga paghukom “naghatag ug sumbanan alang sa mga tawong dili-diyosnon labot sa mga butang nga moabot.” Makaseguro kita niini: “Ang adlaw ni Jehova moabot.”—2 Pedro 2:5, 6; 3:10.

21. Sa unsang paagi atong mapasundayag ang atong pagkamapailobon ug pagkamainantoson, ug unsay atong hisgotan sa sunod nga artikulo?

²¹ Nan, sundogon nato ang pagkamapailobon ni Jehova pinaagi sa pagtabang sa uban sa pagkadangat sa paghinulsol aron sila maluwas. Sundogon usab nato ang mga manalagna pinaagi sa mapailobong pagmantala sa maayong balita bisan pag dili mosanong ang atong gisangyawan. Dugang pa, kita makaseguro nga si Jehova dagayang magapanalangin kanato kon, sama kang Job, antoson nato ang mga pagsulay ug huptan nato ang atong integridad. Aduna gayoy katarongan nga magmaya diha sa atong ministeryo sa dihang atong maamgohan kon unsa ka dagaya nga si Jehova nagapanalangin sa mga paningkamot sa iyang katawhan sa pagsangyaw sa maayong balita sa tibuok yuta. Ato kining mahibaloan sa sunod nga artikulo.

Nahinumdom Ka Ba?

• Nganong si Jehova nagpakita ug pagkamapailobon?

• Unsay atong makat-onan gikan sa pagkamapailobon sa mga manalagna?

• Sa unsang paagi gipasundayag ni Job ang pagkamainantoson, ug unsay sangpotanan niana?

• Giunsa nato pagkahibalo nga ang pagkamapailobon ni Jehova adunay kinutoban?

[Mga Pangutana sa Pagtuon]

[Hulagway sa panid 18]

Ang pagkamapailobon ni Jesus hingpit nga nagsumbalik-silaw nianang sa iyang Amahan

[Mga hulagway sa panid 20]

Sa unsang paagi gigantihan ni Jehova ang pagkamapailobon ni Jeremias?

[Mga hulagway sa panid 21]

Sa unsang paagi gigantihan ni Jehova ang pagkamainantoson ni Job?