‘Usa ka Pagpamatuod Ngadto sa Tanang Kanasoran’
‘Usa ka Pagpamatuod Ngadto sa Tanang Kanasoran’
“Kamo mahimong akong mga Saksi . . . hangtod sa kinalay-ang dapit sa yuta.”—BUHAT 1:8.
1. Kanus-a ug diin unang nadungog sa mga tinun-an ang tagna nga nasulat sa Mateo 24:14?
KITA pamilyar kaayo sa mga pulong ni Jesus nga nasulat sa Mateo 24:14 nga daghan kanato ang nakasag-ulo niana. Ug pagkatalagsaong tagna kana! Handurawa kon unsa kahay gihunahuna sa mga tinun-an sa dihang una nilang nadungog kana! Ang tuig maoy 33 K.P. Ang mga tinun-an kauban-uban ni Jesus sulod na sa mga tulo ka tuig, ug nianang tungora sila mikuyog kaniya sa Jerusalem. Sila nakakita sa iyang mga milagro ug nakadungog sa iyang mga pagtulon-an. Bisan tuod nalipay sila sa bililhong mga kamatuoran nga gitudlo ni Jesus kanila, sila nahibalo gayod nga dili tanan ang nalipay. Si Jesus may mga kaaway nga gamhanan ug impluwensiyal.
2. Unsang mga kapeligrohan ug mga suliran ang sagubangon sa mga tinun-an?
2 Sa Bukid sa mga Olibo, upat sa mga tinun-an ang nanglingkod kauban ni Jesus, nga namati pag-ayo samtang siya naghisgot bahin sa umaabot nga mga kapeligrohan ug mga suliran nga ilang sagubangon. Una pa niana, giingnan sila ni Jesus nga siya pagapatyon. (Mateo 16:21) Karon giklaro niya nga sila usab makaagom sa mabangis nga pagsupak. “Itugyan kamo sa mga tawo ngadto sa kasakitan ug pagapatyon kamo,” matod pa niya. “Ug kamo pagadumtan sa tanang kanasoran tungod sa akong ngalan.” Dili lang kay kana ra. Ang mini nga mga manalagna magpahisalaag sa daghan. Ang uban mangapandol ug magbudhiay sa usag usa ug magdumtanay sa usag usa. Tugotan gani sa uban, sa pagkatinuod sa “kadaghanan,” nga mobugnaw ang ilang gugma sa Diyos ug sa iyang Pulong.—Mateo 24:9-12.
3. Nganong ang mga pulong ni Jesus nga makita sa Mateo 24:14 makapahingangha gayod?
3 Gihisgotan ni Jesus kanang negatibong mga butang sa wala pa niya isulti ang usa ka butang nga lagmit gayong nakapahibulong sa mga tinun-an. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Oo, ang buluhaton nga gisugdan ni Jesus sa Israel—ang ‘pagpamatuod sa kamatuoran’—magpadayon ug mokaylap sa tibuok yuta. (Juan 18:37) Makapahingangha gayod kanang tagnaa! Ang pagpakaylap nianang buluhatona ngadto sa “tanang kanasoran” malisod; ang pagbuhat niana samtang ‘gidumtan sa tanang kanasoran’ katingalahan gayod. Ang kalamposan niining dakong buluhaton magabayaw dili lamang sa pagkasoberano ug gahom ni Jehova kondili usab sa iyang gugma, kaluoy, ug pagkamapailobon. Dugang pa, kini maghatag sa iyang mga alagad ug kahigayonan nga ipakita ang ilang pagtuo ug debosyon.
4. Kinsa ang giingnan nga mohimo sa buluhatong pagpamatuod, ug unsang kahupayan ang gihatag ni Jesus?
4 Giklaro ni Jesus sa iyang mga tinun-an nga sila adunay hinungdanon kaayong buluhaton. Sa wala pa siya mosaka sa langit, si Jesus nagpakita kanila ug miingon: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi sa Jerusalem ug sa tibuok Judea ug Samaria ug hangtod sa kinalay-ang dapit sa yuta.” (Buhat 1:8) Siyempre, ang uban moduyog kanila sa dili madugay. Bisan pa niana, diyutay ra ang mga tinun-an. Seguradong nahupayan sila sa pagkahibalo nga ang gamhanang balaang espiritu sa Diyos magpalig-on kanila sa pagtuman niining buluhaton nga gipabuhat sa Diyos!
5. Unsay wala mahibaloi sa mga tinun-an bahin sa buluhatong pagpamatuod?
5 Nahibalo ang mga tinun-an nga sila gisugo sa pagwali sa maayong balita ug “paghimog mga tinun-an sa katawhan sa tanang kanasoran.” (Mateo 28:19, 20) Apan wala sila mahibalo kon sa unsang paagi himoon ang bug-os nga pagpamatuod, ug wala sila mahibalo kon kanus-a moabot ang kataposan. Mao man usab kita. Si Jehova lamang ang magtino niining mga butanga. (Mateo 24:36) Sa dihang matagbaw na si Jehova sa gilapdon sa gihimo nga pagpamatuod, iyang taposon kining daotang sistema sa mga butang. Nianang panahona lamang nga masabtan sa mga Kristohanon nga ang buluhatong pagsangyaw natuman na sa gilapdon nga gusto ni Jehova. Kadtong unang mga tinun-an dili makahanduraw sa gilapdon sa pagpamatuod nga pagahimoon niining panahon sa kataposan.
Ang Pagpamatuod nga Gihimo sa Unang Siglo
6. Unsay nahitabo sa Pentekostes 33 K.P. ug wala madugay human niana?
6 Sa unang siglo, ang buluhaton nga pagwali sa Gingharian ug paghimog mga tinun-an nagpatunghag makapahinganghang mga resulta. Sa adlaw sa Pentekostes 33 K.P., mga 120 ka tinun-an ang didto sa itaas nga lawak sa Jerusalem. Ang balaang espiritu sa Diyos gibubo kanila, si apostol Pedro mihatag ug makapatandog nga pakigpulong nga nagpatin-aw sa kahulogan niining maong milagro, ug mga 3,000 ang nahimong mga magtutuo ug nabawtismohan. Kadto mao lamang ang sinugdanan. Bisan pa sa pagpaningkamot pag-ayo sa relihiyosong mga lider sa pagpahunong sa pagwali sa maayong balita, “sa adlaw-adlaw padayong gitipon ni Jehova ngadto [sa mga tinun-an] ang mga ginaluwas.” Sa wala madugay, “ang gidaghanon sa mga tawo miabot ug mga lima ka libo.” Human niana, “ang mga magtutuo sa Ginoo padayon nga nadugangan, mga panon sa mga lalaki ug mga babaye.”—Buhat 2:1-4, 8, 14, 41, 47; 4:4; 5:14.
7. Nganong ang pagkakabig ni Cornelio usa ka hinungdanong kaugmaran?
7 Sa tuig 36 K.P. dihay laing hinungdanong hitabo—ang pagkakabig ug pagpabawtismo ni Cornelio nga usa ka Hentil. Sa pagtultol kang apostol Pedro ngadto niining mahinadlokon-sa-Diyos nga tawo, gipaila ni Jehova nga ang sugo ni Jesus sa “paghimog mga tinun-an sa katawhan sa tanang kanasoran” dili lamang himoon ngadto sa mga Hudiyo sa lainlaing kayutaan. (Buhat 10:44, 45) Unsay reaksiyon niadtong nagapanguna? Sa dihang ang mga apostoles ug ang mga ansiyano sa Judea nakasabot nga ang maayong balita pagadad-on usab ngadto sa mga tawo sa kanasoran—sa mga dili-Hudiyo—ilang gihimaya ang Diyos. (Buhat 11:1, 18) Sa kasamtangan, ang buluhatong pagsangyaw nagpadayon sa pagpamunga taliwala sa mga Hudiyo. Pipila ka tuig sa ulahi, lagmit sa 58 K.P., ‘libolibo ka magtutuong Hudiyo’ ang nadugang ngadto sa Hentil nga mga magtutuo.—Buhat 21:20.
8. Sa unsang paagi ang maayong balita nakaapektar sa mga indibiduwal?
8 Bisan tuod makapahingangha ang pag-uswag sa gidaghanon sa unang-siglong mga Kristohanon, dili gayod nato kalimtan ang mga indibiduwal nga gihawasan niana. Ang mensahe sa Bibliya nga ilang nadungog gamhanan. (Hebreohanon 4:12) Kini nakapausab gayod sa kinabuhi niadtong misagop niana. Ang maong mga indibiduwal naghinlo sa ilang kinabuhi, nagsul-ob sa bag-ong pagkatawo, ug napasig-uli ngadto sa Diyos. (Efeso 4:22, 23) Mao man usab karon. Ug kadtong tanan nga midawat sa maayong balita adunay kahibulongang palaaboton nga mabuhi sa walay kataposan.—Juan 3:16.
Mga Isigkamagbubuhat sa Diyos
9. Unsang pribilehiyo ug responsibilidad ang giila sa unang mga Kristohanon nga ilang nabatonan?
9 Ang unang mga Kristohanon wala mangangkon nga ang kalamposan ilang nakab-ot tungod sa ilang kaugalingong paningkamot. Ilang giila nga ang ilang buluhaton ingong mga ministro gipaluyohan sa “gahom sa balaang espiritu.” (Roma 15:13, 19) Si Jehova lamang ang responsable sa espirituwal nga pag-uswag. Sa samang higayon, ang maong mga Kristohanon nahibalo nga sila may pribilehiyo ug responsibilidad nga mahimong “mga isigkamagbubuhat sa Diyos.” (1 Corinto 3:6-9) Busa, kaharmonya sa tambag ni Jesus, sila nanglimbasog pag-ayo diha sa buluhaton nga gipabuhat kanila.—Lucas 13:24.
10. Unsang mga paningkamot ang gihimo sa unang mga Kristohanon sa pagpamatuod ngadto sa tanang kanasoran?
10 Ingong “apostol alang sa kanasoran,” si Pablo mipanaw ug libolibong kilometros diha sa yuta ug dagat, nga nagtukod ug daghang kongregasyon diha sa Romanhong probinsiya sa Asia ug Gresya. (Roma 11:13) Miadto usab siya sa Roma ug posible bisan sa Espanya. Kasamtangan, si apostol Pedro, nga gipiyalan sa “maayong balita . . . alang sa mga tinuli,” mipanaw sa laing direksiyon aron mag-alagad sa Babilonya, usa ka hinungdanong sentro sa Hudaismo nianang panahona. (Galacia 2:7-9; 1 Pedro 5:13) Nalakip sa daghan pa nga naghago diha sa buluhaton sa Ginoo mao ang mga babaye nga sama nila Trifena ug Trifosa. Laing babaye, nga ginganlag Persida, giingon nga “mihimog daghang paghago diha sa Ginoo.”—Roma 16:12.
11. Sa unsang paagi gipanalanginan ni Jehova ang mga paningkamot sa mga tinun-an?
11 Si Jehova dagayang nagpanalangin sa mga paningkamot niadtong nahisgotan na ug sa uban pang masibotong mga magbubuhat. Duolan sa 30 ka tuig human gitagna ni Jesus nga adunay pagpamatuod ngadto sa tanang kanasoran, si Pablo misulat nga ang “maayong balita” ‘giwali na sa tibuok kalalangan ilalom sa langit.’ (Colosas 1:23) Nan miabot ba ang kataposan? Sa usa ka diwa, oo. Kini miabot diha sa Hudiyong sistema sa mga butang sa tuig 70 K.P. sa dihang ang Romanong kasundalohan naglaglag sa Jerusalem ug sa templo niini. Bisan pa niana, gitino ni Jehova nga ang mas dakong pagpamatuod pagahimoon sa dili pa niya taposon ang tibuok-yutang sistema sa mga butang ni Satanas.
Ang Pagpamatuod nga Gihimo Karon
12. Sa unsang paagi gisabot sa unang mga Estudyante sa Bibliya ang sugo nga magwali?
12 Sa ulahing bahin sa ika-19ng siglo, human sa dugayng panahon nga mikaylap ang relihiyosong apostasya, ang putli nga pagsimba natukod pag-usab. Ang mga Estudyante sa Bibliya, nga maoy pagtawag kaniadto sa mga Saksi ni Jehova, nakasabot gayod sa sugo nga maghimog mga tinun-an sa tibuok yuta. (Mateo 28:19, 20) Pagkatuig 1914, dihay mga 5,100 nga aktibong nakigbahin sa buluhatong pagwali, ug ang maayong balita nakaabot sa 68 ka kayutaan. Apan, kadtong unang mga Estudyante sa Bibliya wala makasabot sa bug-os nga kahulogan sa Mateo 24:14. Sa hinapos nga bahin sa ika-19ng siglo, ang Bibliya, nga naundan sa maayong balita, o ebanghelyo, gihubad ug gipatik sa mga sosyedad sa Bibliya diha sa daghang pinulongan ug gipanagtag sa tibuok kalibotan. Busa, sulod sa pipila ka dekada, ang mga Estudyante sa Bibliya nakahinapos nga nahimo na ang pagpamatuod ngadto sa kanasoran.
13, 14. Unsang mas tin-aw nga pagsabot bahin sa kabubut-on ug katuyoan sa Diyos ang gipresentar diha sa usa ka 1928 nga gula sa The Watch Tower?
13 Sa hinayhinay, gihatag ni Jehova sa iyang katawhan ang mas tin-aw nga pagsabot sa iyang kabubut-on ug katuyoan. (Proverbio 4:18) Ang The Watch Tower sa Disyembre 1, 1928, nag-ingon: “Makaingon ba kita nga [ang] pagpanagtag ug Bibliya nagtuman sa gitagna nga pagwali sa ebanghelyo sa gingharian? Dili gayod! Bisan pa niining gihimo nga pagpanagtag ug Bibliya gikinahanglan gihapon nga ang gamayng grupo sa mga saksi sa Diyos dinhi sa yuta magpatik ug literatura nga magpatin-aw [sa katuyoan] sa Diyos ug moduaw sa kabalayan diin kining maong mga Bibliya napahimutang. Kay kondili, ang mga tawo dili mahibalo bahin sa pagkatukod sa Mesiyanikong kagamhanan sa atong adlaw.”
14 Ang maong gula sa The Watch Tower nagpadayon sa pag-ingon: “Sa 1920, . . . ang mga Estudyante sa Bibliya nakadangat sa hustong pagsabot sa tagna sa atong Ginoo nga anaa sa Mateo 24:14. Ilang naamgohan niadtong tungora nga ‘kining ebanghelyo’ nga igawali sa tibuok kalibotan ingong pagpamatuod ngadto sa mga Hentil o sa tanang kanasoran, dili ebanghelyo sa usa ka gingharian nga umaabot pa kondili maoy ebanghelyo nga nagpahayag nga ang Mesiyanikong Hari nagsugod na sa pagmando ibabaw sa yuta.”
15. Sa unsang paagi ang buluhatong pagpamatuod mikaylap sukad sa katuigan sa 1920?
15 Kanang “gamayng grupo sa mga saksi” sa katuigan sa 1920 wala magpabiling gamay. Sa nagsunod nga mga dekada, “usa ka dakong panon” sa “ubang mga karnero” ang naila ug gisugdan pagtigom. (Pinadayag 7:9; Juan 10:16) Karon, adunay mga 6,613,829 ka magmamantala sa maayong balita diha sa 235 ka kayutaan. Pagkakahibulongang katumanan sa tagna! Wala pa mahitabo sukad nga “kining maayong balita sa gingharian” giwali sa ingon nianang gilapdon. Wala pa mahitabo sukad nga adunay daghan kaayong matinumanong alagad ni Jehova sa yuta.
16. Unsay nahimo sa miaging tuig sa pag-alagad? (Tan-awa ang tsart sa mga panid 27-30.)
16 Kining dakong panon sa mga Saksi puliki sa 2005 nga tuig sa pag-alagad. Kapin sa usa ka bilyong oras ang nagugol sa pagmantala sa maayong balita diha sa 235 ka kayutaan. Milyonmilyong balik-duaw ang nahimo, ug milyonmilyong panagtuon sa Bibliya ang nadumala. Kining buluhatona nahimo sa mga Saksi ni Jehova, nga madagayaong naggamit sa ilang panahon ug mga kahinguhaan aron ipaambit ang Pulong sa Diyos ngadto sa uban. (Mateo 10:8) Pinaagi sa iyang gamhanan nga balaang espiritu, si Jehova nagpadayon sa pagpalig-on sa iyang mga alagad sa pagtuman sa iyang kabubut-on.—Zacarias 4:6.
Pagkugi sa Pagpamatuod
17. Sa unsang paagi ang katawhan ni Jehova misanong sa mga pulong ni Jesus bahin sa pagwali sa maayong balita?
17 Bisan tuod duolan na sa 2,000 ka libo ka tuig ang milabay sukad miingon si Jesus nga ang maayong balita igawali, ang kasibot sa katawhan sa Diyos alang sa buluhaton wala mobugnaw. Kita nahibalo nga pinaagi sa atong paglahutay sa pagbuhat kon unsay maayo, atong gisumbalik-silaw ang mga hiyas ni Jehova nga gugma, kaluoy, ug pagkamapailobon. Sama kaniya, kita wala magtinguha nga adunay malaglag kondili nagtinguha nga ang mga tawo maghinulsol ug mapasig-uli kang Jehova. (2 Corinto 5:18-20; 2 Pedro 3:9) Nagmainiton sa espiritu sa Diyos, ang mga Saksi ni Jehova masibotong nagpadayon sa pagmantala sa maayong balita ngadto sa mga kinatumyan sa yuta. (Roma 12:11) Ingong resulta, ang mga tawo bisan asa nagadawat sa kamatuoran ug nagasunod sa mahigugmaong pagtultol ni Jehova. Tagda ang pipila ka pananglitan.
18, 19. Unsang mga eksperyensiya ang imong ikaasoy bahin sa pipila nga nagpatalinghog sa maayong balita?
18 Si Charles usa ka mag-uuma sa kasadpang Kenya. Sa 1998 siya nakabaligya ug 8,000 kilos nga tabako ug gihatagag sertipiko nga nagtawag kaniyang Kinamaayohang Tigtanom ug Tabako. Nianang panahona, siya nagsugod pagtuon sa Bibliya. Sa wala madugay iyang naamgohan nga ang usa ka tawo nga nananom ug tabako naglapas sa sugo ni Jesus nga higugmaon ang silingan. (Mateo 22:39) Sa dihang nakahinapos siya nga ‘ang kinamaayohang tigtanom ug tabako’ sa pagkatinuod mao diay ‘ang kinagrabehang mamumuno,’ giesprihan ni Charles ug hilo ang iyang mga tabako aron kini mamatay. Siya miuswag ngadto sa pagpahinungod ug bawtismo ug karon usa na ka regular payunir ug ministeryal nga alagad.
19 Walay duhaduha nga giuyog ni Jehova ang kanasoran pinaagi sa gihimo nga tibuok-yutang pagpamatuod, ug ang tilinguhaong mga butang—ang mga tawo—nanagpanulod. (Haggeo 2:7) Si Pedro nga nagpuyo sa Portugal, misulod sa seminaryo sa dihang siya 13 anyos. Ang iyang tumong mao ang pagkahimong misyonaryo ug pagtudlo bahin sa Bibliya. Apan, sa wala madugay siya mibiya sa seminaryo tungod kay ang Bibliya wala kaayo hisgoti diha sa ilang mga klase. Unom ka tuig sa ulahi, siya nagtuon ug sikolohiya diha sa usa ka unibersidad sa Lisbon. Siya nagsaka sa balay sa iyang iyaan, usa sa mga Saksi ni Jehova, kinsa nagdasig kaniya sa pagtuon sa Bibliya. Nianang tungora, si Pedro wala makaseguro nga naglungtad ang Diyos, ni makahukom kon magtuon ba siya ug Bibliya o dili. Nakigsulti siya sa iyang propesor sa sikolohiya bahin sa pagkadili-makadesisyon. Ang propesor miingon nga ang sikolohiya nagtudlo nga ang mga tawo nga dili makahimog mga desisyon may kiling nga daoton ang kaugalingon. Tungod niana, si Pedro nakahukom nga magtuon sa Bibliya. Siya di pa dugayng nabawtismohan ug karon nagdumala na ug mga panagtuon sa Bibliya.
20. Nganong kita magmaya nga gihimo ang pagpamatuod ngadto sa kanasoran sa ingon nianang gilapdon?
20 Wala pa kita mahibalo kon sa unsang gilapdon nga ang pagpamatuod pagahimoon ngadto sa kanasoran, ni kita nahibalo sa adlaw ug takna nga moabot ang kataposan. Ato lamang nahibaloan nga kini hapit nang moabot. Kita nagmaya nga ang pagwali sa maayong balita sa ingon niana nga gilapdon maoy usa lamang sa daghang timailhan nga haduol na ang panahon nga pulihan sa Gingharian sa Diyos ang tawhanong mga kagamhanan. (Daniel 2:44) Kada tuig, milyonmilyon ang gihatagan ug kahigayonan nga magpatalinghog sa maayong balita, ug kini naghimaya sa atong Diyos, si Jehova. Hinaot nga magmadeterminado kita nga magpabiling matinumanon ug duyog sa atong mga igsoon sa tibuok kalibotan magmapuliki diha sa buluhaton nga pagpamatuod ngadto sa tanang kanasoran. Sa pagbuhat niana, pagaluwason nato ang atong kaugalingon ug kadtong mamati kanato.—1 Timoteo 4:16.
Nahinumdom Ka Ba?
• Nganong ang Mateo 24:14 usa ka talagsaong tagna?
• Unsang mga paningkamot ang gihimo sa unang mga Kristohanon sa pagwali, ug unsay mga resulta?
• Sa unsang paagi ang mga Estudyante sa Bibliya nakasabot sa panginahanglan nga magpamatuod ngadto sa tanang kanasoran?
• Sa pagkonsiderar sa kalihokan sa katawhan ni Jehova sa miaging tuig sa pag-alagad, unsay nakapadasig kanimo?
[Mga Pangutana sa Pagtuon]
[Chart sa panid 27-30]
2005 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN
(Tan-awa ang bound volume)
[Mapa/Mga hulagway sa panid 25]
Si Pablo mipanaw ug libolibong kilometros diha sa yuta ug dagat aron sa pagwali sa maayong balita
[Hulagway sa panid 24]
Gitultolan ni Jehova si Pedro sa pagpamatuod ngadto kang Cornelio ug sa iyang pamilya