Nagkinahanglan ba Kitag Usa ka Mesiyas?

TINGALI nakapangutana ka, “Nagkinahanglan ba kitag usa ka Mesiyas?” Oo, makataronganon ang pagpangutana kon aduna ba gayoy kaayohan nga ikahatag ang Mesiyas kanimo.

Ang opinyon sa pipila ka tawo nga tingali imong tuohan magpasalig kanimo nga ang tubag maoy tin-aw ug segurado: Nagkinahanglan ka gayod ug usa ka Mesiyas, sama sa uban. Usa ka eksperto sa Hudiyohanong balaod sa unang siglo misulat bahin sa Mesiyas: “Bisag unsa pa ka daghan ang mga saad sa Diyos, sila nahimong Oo pinaagi kaniya.” Busa iyang gipasiugda ang hinungdanong papel sa Mesiyas diha sa katuyoan sa atong Maglalalang sa pagpanalangin sa tanang nasod sa yuta. (2 Corinto 1:20) Hinungdanon kaayo ang papel sa Mesiyas nga ang iyang pag-abot ug pagkinabuhi dinhi sa yuta mao ang sentro sa tagna sa Bibliya. Diha sa iyang basahon nga gigamit sa minilyong tawo sa miaging 70 ka tuig, si Henry H. Halley miingon: “Ang Daang Tugon gisulat aron ang mga tawo mahinam, ug modawat, sa Pag-abot [sa Mesiyas].” Apan kinahanglan ba siyang moabot? Nganong angay kang mainteres?

Ang “Mesiyas” sa pagkatinuod nagkahulogang “Usa nga Dinihogan” ug katumbas sa iladong termino nga “Kristo.” Siya, nga gitumong sa Encyclopædia Britannica, 1970 nga Edisyon, ingong “ang labing dakong manunubos,” kinahanglang moabot tungod sa tampalasang mga buhat sa unang tawhanong magtiayon, si Adan ug Eva. Sila gilalang nga hingpit, nga may malipayong paglaom nga mabuhing walay kataposan sa Paraiso, apan ilang giwala kana. Ang usa ka rebelyosong manulonda, nga sa ulahi nailhang Satanas nga Yawa, nag-ingon nga ang ilang Maglalalang estrikto ra kaayo ug mas moarang-arang ang ilang kahimtang kon sila na mismo ang mohukom kon unsay maayo ug daotan.—Genesis 3:1-5.

Nalimbongan si Eva ug mituo sa maong bakak. Si Adan, nga dayag nga mas nagpabili sa iyang asawa kay sa iyang pagkamaunongon sa Diyos, nahimong kunsabo sa maong rebelyon nga gisibahan sa Yawa. (Genesis 3:6; 1 Timoteo 2:14) Pinaagi sa ilang mga lihok, ila gayong gisalikway ang ilang paglaom nga mabuhing walay kataposan diha sa paraisonhong mga kahimtang. Ila pa gayong gipasa sa ilang wala-pa-matawong mga kaliwat ang sala ug ang linugdangan niini nga mao ang kamatayon.—Roma 5:12.

Ang atong Maglalalang, si Jehova, naghimo ug paagi aron mawala ang daotang mga epekto sa sunodsunod nga mga panghitabo tungod sa maong pagrebelde. Siya naghimog paagi aron mapasig-uli kaniya ang katawhan nga nahimo sa ulahi nga legal nga prinsipyo diha sa Moisesnong Balaod—bara-i-bara. (Deuteronomio 19:21; 1 Juan 3:8) Kinahanglang makab-ot kining maong legal nga prinsipyo aron ang alaot nga mga kaliwat ni Adan ug Eva makabaton ug kinabuhing walay kataposan sa usa ka paraisong yuta, sumala sa katuyoan sa Maglalalang alang sa  tawhanong pamilya. Tungod niini nagkinahanglan kitag Mesiyas.

Sa dihang gihukman ang Yawa, si Jehova nga Diyos miingon diha sa unang tagna sa Bibliya: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:15) Usa ka eskolar sa Bibliya miingon nga “ang asoy sa mesiyanikong mga saad sumala sa pagpresentar niini sa Kasulatan, nagsugod pinaagi [niining] mga pulonga.” Ang laing eskolar miingon nga ang Mesiyas mao ang gamiton sa Diyos sa “pagbalit-ad sa tanang kadaot nga gipahinabo sa sala sa unang mga tawo,” nga sa samang panahon magdalag mga panalangin sa katawhan.—Hebreohanon 2:14, 15.

Apan, tingali nakamatikod ka nga ang katawhan sa pagkakaron wala gayod mapanalangini. Hinunoa, ang tawhanong rasa nag-antos sa pagkawalay paglaom. Busa, ang The World Book Encyclopedia nag-ingon nga “daghang Hudiyo ang nagpaabot gihapon sa pag-abot sa usa ka Mesiyas” ug nga iyang “tul-iron ang mga sayop ug pukanon ang mga kaaway sa katawhan.” Apan, ang Bibliya nag-ingon nga ang Mesiyas miabot na. Aduna bay basehanan sa pagtuo sa giingon sa Bibliya? Tubagon kini sa sunod nga artikulo.