Paglakaw Diha sa Dalan sa Nagakasanag nga Kahayag
Paglakaw Diha sa Dalan sa Nagakasanag nga Kahayag
“Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.”—PROVERBIO 4:18.
1, 2. Unsay nasinati sa katawhan sa Diyos tungod sa nagakasanag nga espirituwal nga kahayag gikan kang Jehova?
KINSAY mas maayong makahubit sa epekto sa nagsubang nga adlaw diha sa kangitngit sa kagabhion kay sa mismong Tuboran sa kahayag, si Jehova nga Diyos? (Salmo 36:9) Ang Diyos nag-ingon: ‘Sa dihang ang kahayag sa kabuntagon molukop hangtod sa kinatumyan sa yuta, ang yuta mahisama sa yutang-kulonon ilalom sa usa ka igtitimbre, ug ang mga butang napahiluna nga ingon sa usa ka besti.’ (Job 38:12-14) Sa dihang mag-anam ka sanag ang adlaw, ang dagway sa yuta makita na ug mas maklaro, maingon nga ang humok nga yutang-kulonon mausab sa dihang mamarkahan na sa igtitimbre.
2 Si Jehova mao usab ang Tuboran sa espirituwal nga kahayag. (Salmo 43:3) Samtang ang kalibotan anaa sa mabagang kangitngit, ang matuod nga Diyos nagpadayon sa pagpasidlak ug kahayag nganha sa iyang katawhan. Uban sa unsang resulta? Ang Bibliya nagtubag: “Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.” (Proverbio 4:18) Ang nagakasanag nga kahayag gikan kang Jehova padayong naglamdag sa dalan sa iyang katawhan. Kini nagdalisay kanila may kalabotan sa organisasyon, doktrina, ug moralidad.
Ang Kalamdagan Mitultol sa Pagdalisay sa Organisasyon
3. Unsay gisaad diha sa Isaias 60:17?
3 Pinaagi kang manalagnang Isaias, si Jehova nagtagna: “Inay tumbaga ako magdalag bulawan, ug inay puthaw ako magdalag plata, ug inay kahoy, tumbaga, ug inay mga bato, puthaw.” (Isaias 60:17) Maingon nga ang pag-ilis ug mas maayong matang sa ubos ug matang nga materyal nagpasabot ug kauswagan, ang mga Saksi ni Jehova nakasinati ug mga kauswagan diha sa ilang organisasyonal nga mga kahikayan sulod “sa kataposan sa sistema sa mga butang,” o “sa kataposang mga adlaw.”—Mateo 24:3; 2 Timoteo 3:1.
4. Unsang kahikayan ang gipatuman niadtong 1919, ug sa unsang paagi kana mapuslanon?
4 Sa unang bahin sa kataposang mga adlaw, ang mga kongregasyon sa mga Estudyante sa Bibliya, nga maoy pagtawag kaniadto sa mga Saksi ni Jehova, nagpili sa ilang mga ansiyano ug mga diakono sa demokratikanhong paagi. Apan, ang ubang mga ansiyano wala makabaton ug tinuod nga espiritu sa pag-ebanghelyo. Ang uban wala lamang magpanuko sa pagpakig-ambit sa buluhatong pagsangyaw kondili nagpaluya usab sa uban aron dili makig-ambit niana. Busa sa 1919 usa ka bag-ong responsibilidad ang gisugdan diha sa matag kongregasyon—kanang sa direktor sa pag-alagad. Ang direktor sa pag-alagad wala pilia sa kongregasyon kondili gitudlo sa teokratikanhong paagi sa iyang katungdanan sa sangang buhatan sa katawhan sa Diyos. Ang mga responsibilidad sa tinudlo nga direktor naglakip sa pag-organisar sa buluhatong pagsangyaw, pag-asayn ug mga teritoryo, ug pagdasig sa pagpakig-ambit diha sa ministeryo sa kanataran. Sa misunod nga katuigan, gidasig pag-ayo ang pagpakig-ambit sa buluhatong pagsangyaw sa Gingharian.
5. Unsang pagdalisay ang nahitabo sa katuigan sa 1920?
5 Ang tanan diha sa kongregasyon mas nadasig pa tungod sa awhag nga “Imantala, imantala, imantala, ang Hari ug ang iyang gingharian,” nga gipahayag niadtong 1922 sa kombensiyon sa mga Estudyante sa Bibliya sa Cedar Point, Ohio, T.B.A. Pagka 1927 ang pag-alagad sa kanataran giorganisar sa punto nga ang Dominggo mao ang giisip ingong kinamaayohang adlaw sa pagpakig-ambit sa balay-balay nga buluhatong pagsangyaw. Nganong kana mang adlawa? Tungod kay ang Dominggo mao ang adlaw sa dihang ang kadaghanang tawo walay trabaho. Ang mga Saksi ni Jehova karon nagpasundayag sa samang espiritu pinaagi sa pagpaningkamot sa pagduaw sa mga tawo sa mga panahon nga sila lagmit gayong anaa sa balay, sama sa mga hinapos sa semana ug sa gabii.
6. Sa 1931, unsang resolusyon ang gisagop, ug sa unsang paagi nakaapektar kana sa buluhatong pagmantala sa Gingharian?
6 Ang dakong pagdasig sa buluhatong pagmantala sa Gingharian nahitabo sa Dominggo sa hapon, Hulyo 26, 1931, sa dihang usa ka resolusyon ang gisagop, una diha sa usa ka kombensiyon sa Columbus, Ohio, T.B.A. ug human niana sa tibuok kalibotan. Sa bahin, ang resolusyon nag-ingon: “Kita mga alagad ni Jehova nga Diyos nga gisugo sa paghimo ug usa ka buluhaton sa iyang ngalan ug, isip pagsugot sa iyang sugo, sa pagpamatuod bahin kang Jesu-Kristo, ug pagpahibalo sa katawhan nga si Jehova mao ang matuod ug Labing Gamhanan nga Diyos; busa kita malipayong misagop ug midawat sa ngalan nga gisulti sa Ginoong Diyos, ug kita nagtinguha nga mailhan ug tawgon sa ngalan nga mga Saksi ni Jehova.” (Isaias 43:10) Ang bag-ong ngalan klaro gayong naghubit sa pangunang kalihokan sa tanan nga nagdala nianang ngalana! Oo, si Jehova adunay buluhaton nga angayng pakig-ambitan sa tanan niyang mga alagad. Sa katibuk-an madasigon gayod ang pagsanong sa mamiminaw!
7. Unsang kausaban ang gisugdan niadtong 1932, ug ngano?
7 Daghang ansiyano ang mapainubsanong nakigbahin sa buluhatong pagsangyaw. Apan, diha sa pipila ka dapit ang piniling mga ansiyano misupak sa ideya nga ang tanan diha sa kongregasyon angayng makig-ambit sa publikong ministeryo. Apan, hapit nang mahitabo ang dugang pagdalisay. Sa 1932 ang mga kongregasyon nakadawat ug instruksiyon pinaagi sa The Watchtower nga hunongon na ang pagpili sa mga ansiyano ug diakono pinaagi sa botasyon. Hinunoa, magpili sila ug komite sa pag-alagad nga gilangkoban sa espirituwal nga mga lalaki nga nakig-ambit sa publikong buluhaton nga pagsangyaw. Busa ang pagdumala gipiyal niadtong aktibong nakigbahin sa ministeryo, ug ang buluhaton nagpadayon.
Ang Nagakasanag nga Kahayag Nagpasabot ug Dugang Pagdalisay
8. Unsang pagdalisay ang nahitabo niadtong 1938?
8 Ang kahayag “nagaanam kadan-ag.” Sa 1938 ang pagpili pinaagi sa botasyon gihunong na sa bug-os. Ang tanang alagad sa kongregasyon kinahanglang itudlo sa teokratikanhong paagi ilalom sa pagdumala sa “matinumanon ug maalamong ulipon.” (Mateo 24:45-47) Ang kausaban gidawat dayon halos sa tanang kongregasyon sa mga Saksi ni Jehova, ug ang buluhaton sa pagpamatuod nagpadayon sa pagpamunga.
9. Sa 1972, unsang kahikayan ang gisugdan, ug nganong usa kana ka pagdalisay?
9 Sa Oktubre 1, 1972, laing kausaban sa pagdumala sa kongregasyon ang gisugdan. Ang kahikayan sa pagdumala pinaagi sa usa ka lawas sa mga ansiyano gisugdan diha sa mga kongregasyon sa mga Saksi ni Jehova sa tibuok kalibotan, nga nagpuli sa pagdumala pinaagi sa usa lamang ka alagad, o magtatan-aw, sa kongregasyon. Kining bag-ong kahikayan nakadasig pag-ayo sa hamtong nga mga lalaki sa pagpaningkamot nga mahimong kuwalipikado nga manguna sa kongregasyon. (1 Timoteo 3:1-7) Tungod niini, mas daghang igsoong lalaki ang nahimong eksperyensiyado sa pag-atiman sa mga responsibilidad sa kongregasyon. Mapuslanon gayod sila diha sa pag-atiman sa daghang bag-ohan nga midawat sa kamatuoran sa Bibliya!
10. Unsang kahikayan ang gipatuman niadtong 1976?
10 Ang mga membro sa Nagamandong Lawas giorganisar ngadto sa unom ka komite, ug sugod sa Enero 1, 1976, ang tanang kalihokan sa organisasyon ug sa mga kongregasyon sa tibuok yuta gidumala niining maong mga komite. Pagkadakong panalangin nga ang tanang bahin sa buluhaton sa Gingharian gidumala sa usa ka “panon sa mga magtatambag”!—Proverbio 15:22; 24:6.
11. Unsang pagdalisay ang gisugdan niadtong 1992, ug ngano?
11 Sa tuig 1992, dihay lain pang pagdalisay, kanang susama sa nahitabo human ang mga Israelinhon ug ang uban pa namalik ngadto sa Jerusalem gikan sa pagkadestiyero sa Babilonya. Niadtong panahona, kulang ang gidaghanon sa mga Levihanon nga mag-alagad sa templo. Busa ang dili-Israelinhong mga Netinim gihatagan ug dugang buluhaton sa pagtabang sa mga Levihanon. Sa susama, aron sa pag-abag sa matinumanon ug maalamong ulipon nga matang sa pag-atiman sa nagkadaghang intereses niini sa yuta, sa 1992 ang pipila sa “ubang mga karnero” nakadawat ug dugang mga responsibilidad. Sila gitudlo ingong mga magtatabang sa mga komite sa Nagamandong Lawas.—Juan 10:16.
12. Sa unsang paagi gitudlo ni Jehova ang pakigdait ingong atong mga magtatan-aw?
12 Unsay miresulta gumikan niining tanang pagdalisay? “Igatudlo ko ang pakigdait ingong imong mga magtatan-aw ug ang pagkamatarong ingong imong mga tighatag ug buluhaton,” miingon si Jehova. (Isaias 60:17) Adunay “pakigdait” taliwala sa mga alagad ni Jehova karon, ug ang gugma sa “pagkamatarong” nahimong ilang “tighatag ug buluhaton”—ang puwersa nga nagtukmod kanila sa pag-alagad sa Diyos. Sila maayong pagkaorganisar sa pagtuman sa buluhaton nga pagwali sa Gingharian ug paghimog mga tinun-an.—Mateo 24:14; 28:19, 20.
Si Jehova Nagahatag ug Kalamdagan Maylabot sa Doktrina
13. Sa katuigan sa 1920, sa unsang paagi gilamdagan ni Jehova ang dalan sa iyang katawhan maylabot sa doktrina sa katuigan sa 1920?
13 Si Jehova padayon usab nga nagahatag ug kalamdagan sa iyang katawhan maylabot sa doktrina. Ang Pinadayag 12:1-9 naghatag ug usa ka pananglitan. Ang asoy naghisgot bahin sa tulo ka simbolikong mga karakter—“usa ka babaye” nga mabdos ug nanganak, usa ka “dragon,” ug “usa ka anak, usa ka lalaki.” Nahibalo ka ba kon kinsay gihawasan sa matag karakter? Kini gipaila diha sa usa ka artikulo nga nag-ulohang “Birth of the Nation,” nga makita diha sa Marso 1, 1925, nga gula sa The Watch Tower. Pinaagi sa maong artikulo, ang katawhan sa Diyos mas nakasabot sa mga tagna bahin sa pagkatukod sa Gingharian, pagsabot nga nagpatin-aw nga adunay duha ka lahi nga organisasyon—kang Jehova ug kang Satanas. Unya sa 1927/28, ang katawhan sa Diyos nakaamgo nga ang Pasko ug ang pagsaulog sa adlawng natawhan dili kasulatanhon, ug wala na sila magsaulog niana.
14. Unsang doktrinal nga mga kamatuoran ang gipatin-aw sa katuigan sa 1930?
14 Sa katuigan sa 1930, dihay dugang kahayag bahin sa tulo ka doktrinal nga mga kamatuoran. Sulod sa daghang katuigan, ang mga Estudyante sa Bibliya nahibalo nga ang dakong pundok, o ang “dakong panon,” nga gihisgotan sa Pinadayag 7:9-17 lahi sa 144,000, kinsa magmando uban kang Kristo ingong mga hari ug mga saserdote. (Pinadayag 5:9, 10; 14:1-5) Apan, dili pa tin-aw kon kinsa ang dakong pundok. Maingon nga ang nagakasanag nga kahayag sa kabuntagon makapaklaro sa mga butang nga dili klaro, sa 1935 ang dakong pundok nailhan ingong kadtong makalabang-buhi sa “dakong kasakitan,” nga may paglaom nga mabuhi sa walay kataposan sa yuta. Sa ulahing bahin nianang tuiga dihay pagpatin-aw nga nag-apektar sa nagtungha nga mga anak sa mga Saksi ni Jehova diha sa daghang nasod. Samtang ang patriotikong kadasig mainiton kaayo sa tibuok kalibotan, giila sa mga Saksi nga ang pagsaludar sa bandera dili kay pormalismo lamang. Pagkasunod tuig, gipatin-aw ang laing doktrinal nga kamatuoran, nga si Kristo namatay sa estaka, dili sa krus.—Buhat 10:39.
15. Kanus-a ug sa unsang paagi ang pagkabalaan sa dugo gipasiugda?
15 Human sa Gubat sa Kalibotan II, diin naandan na ang pagtambal sa samdan nga mga sundalo pinaagi sa pag-abono ug dugo, dihay dugang kahayag bahin sa pagkabalaan sa dugo. Ang Hulyo 1, 1945, nga gula sa The Watchtower nagdasig sa “tanang magsisimba ni Jehova nga nangitag kinabuhing dayon sa iyang bag-ong kalibotan sa pagkamatarong nga motahod sa pagkabalaan sa dugo ug magpahiuyon sa matarong nga mga sugo sa Diyos maylabot niining hinungdanong butang.”
16. Kanus-a giluwatan ang New World Translation of the Holy Scriptures, ug unsa ang duha ka talagsaong kinaiyahan niini?
16 Sa 1946 nadayag nga gikinahanglan ang usa ka bag-ong hubad sa Bibliya nga giniyahan sa kinaulahiang kahibalo ug wala mamansahi sa mga doktrina nga gipasukad sa mga tradisyon sa Kakristiyanohan. Ang paghimo sa maong hubad nagsugod sa Disyembre 1947. Sa 1950 ang New World Translation of the Christian Greek Scriptures giluwatan sa Iningles. Ang Hebreohanong Kasulatan sa Iningles gipatik sa lima ka tomo, nga anam-anam nga giluwatan sugod sa 1953. Ang kataposang tomo giluwatan sa 1960, kapin ug diyutay sa 12 ka tuig human sugdi ang maong proyekto sa paghubad. Ang kompletong New World Translation of the Holy Scriptures sa usa ka tomo giluwatan sa 1961. Karon mabatonan na diha sa daghang pinulongan, kining maong hubad adunay pipila ka talagsaong mga kinaiyahan. Kini nagpasig-uli sa ngalan sa Diyos, si Jehova. Dugang pa, ang literal nga paghubad niini sa orihinal nga mga sinulat naghatag ug sukaranan alang sa padayong pag-uswag sa kahibalo sa kamatuoran sa Diyos.
17. Unsang dugang kahayag ang gipadan-ag sa 1962?
17 Ang pagpatin-aw sa “labaw nga mga awtoridad” sa Roma 13:1 ug ang gilapdon sa pagpasakop sa usa ka Kristohanon ngadto kanila nahitabo sa 1962. Ang bug-os nga pagtuon sa ika-13ng kapitulo sa Roma ug sa mga teksto sa Kasulatan sama sa Tito 3:1, 2 ug 1 Pedro 2:13, 17 nagpatin-aw nga ang ekspresyong “labaw nga mga awtoridad” nagtumong, dili kang Jehova nga Diyos ug kang Jesu-Kristo, kondili sa tawhanong mga awtoridad sa kagamhanan.
18. Unsa ang pipila ka kamatuoran nga gipatin-aw sa katuigan sa 1980?
18 Sa misunod nga mga tuig, ang dalan sa mga matarong nag-anam pa kasanag. Sa 1985 ang kahayag gipadan-ag kon unsay kahulogan sa pagka-gipahayag nga matarong “alang sa kinabuhi” ug matarong ingong higala sa Diyos. (Roma 5:18; Santiago 2:23) Ang kahulogan sa Kristohanong Tinghugyaw bug-os nga gipatin-aw sa 1987.
19. Sa unsang paagi si Jehova nagtagana ug dugang espirituwal nga kahayag alang sa iyang katawhan sa di pa dugayng katuigan?
19 Sa 1995 ang pagbulagbulag sa “mga karnero” gikan sa “mga kanding” mas nasabtan. Sa tuig 1998, dihay detalyadong katin-awan bahin sa panan-awon ni Ezequiel sa templo, nga nagakatuman na. Sa 1999 dihay katin-awan kon kanus-a ug kon sa unsang paagi ‘ang dulumtanang butang magbarog sa usa ka balaang dapit.’ (Mateo 24:15, 16; 25:32) Ug sa 2002 dugang pagsabot ang nabatonan bahin sa kahulogan sa pagsimba sa Diyos “uban sa espiritu ug sa kamatuoran.”—Juan 4:24.
20. Sa unsa pang bahina nga ang katawhan sa Diyos nakasinati ug pagdalisay?
20 Gawas pa sa organisasyonal ug doktrinal nga mga pagdalisay, dihay mga pagdalisay maylabot sa Kristohanong panggawi. Pananglitan, sa 1973 ang pagpanabako nasabtan ingong “kahugawan sa unod” ug angayng isipon ingong grabeng sala. (2 Corinto 7:1) Usa ka dekada sa ulahi, ang Enero 15, 1984, nga gula sa Ang Bantayanang Torre nagpatin-aw sa atong baroganan bahin sa paggamit ug mga armas. Kini maoy pipila lamang sa nagakasanag nga kahayag sa atong panahon.
Padayon sa Paglakaw Diha sa Dalan sa Nagakasanag nga Kahayag
21. Ang pagbaton sa unsang tinamdan ang motabang kanato sa pagpadayon sa paglakaw diha sa dalan sa nagakasanag nga kahayag?
21 “Malisod ang pagdawat ug pagpasibo sa usa ka kausaban,” miingon ang usa ka dugay nang ansiyano. Unsay nakatabang kaniya sa pagdawat sa daghang pagdalisay nga iyang nasaksihan sulod sa 48 ka tuig nga siya usa ka magmamantala sa Gingharian? Siya mitubag: “Ang pagbaton sa hustong tinamdan mao ang yawi. Kon dili nimo dawaton ang usa ka pagdalisay mabiyaan ka samtang ang organisasyon nagpadayon sa pag-uswag. Kon morag malisdan kaayo ako sa pagdawat sa mga kausaban, akong palandongon ang giingon ni Pedro kang Jesus: ‘Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan.’ Dayon akong pangutan-on ang akong kaugalingon, ‘Asa man ko moadto—sa mangitngit nga kalibotan?’ Nakatabang kini kanako sa pagpangupot pag-ayo sa organisasyon sa Diyos.”—Juan 6:68.
22. Sa unsang paagi kita makabenepisyo gikan sa paglakaw diha sa kahayag?
22 Ang kalibotan sa atong palibot anaa gayod sa mabagang kangitngit. Samtang si Jehova nagpadayon sa pagpadan-ag ug kahayag diha sa iyang katawhan, nagkadako ang kalainan tali kanila ug niadtong anaa sa kalibotan. Unsay himoon niining maong kahayag para kanato? Aw, maingon nga ang suga nga nagdan-ag sa usa ka lungag diha sa ngitngit nga dalan dili magkuha sa lungag, ang kahayag gikan sa Pulong sa Diyos dili magkuha sa mga kapeligrohan. Bisan pa niana, ang kahayag gikan sa Pulong sa Diyos motabang gayod kanato sa paglikay sa mga kapeligrohan aron kita makapadayon sa paglakaw diha sa dalan sa nagakasanag nga kahayag. Nan, magpadayon kita sa pagpatalinghog sa matagnaong pulong ni Jehova, nga “samag usa ka lampara nga nagadan-ag sa usa ka dapit nga mangitngit.”—2 Pedro 1:19.
Nahinumdom Ka Ba?
• Unsang organisasyonal nga kauswagan ang gipahinabo ni Jehova sa iyang katawhan?
• Ang nagakasanag nga kahayag nagpahinabo ug unsang pagdalisay maylabot sa doktrina?
• Unsang mga kausaban ang imong nasaksihan, ug unsay nakatabang kanimo sa pagdawat niana?
• Nganong buot man nimong magpadayon sa paglakaw diha sa dalan sa nagakasanag nga kahayag?
[Mga Pangutana sa Pagtuon]
[Mga hulagway sa panid 27]
Ang kombensiyon sa Cedar Point, Ohio niadtong 1922 nagpalagsik sa mga Estudyante sa Bibliya sa paghimo sa buluhaton sa Diyos
[Hulagway sa panid 29]
Ang “New World Translation of the Christian Greek Scriptures” nga giluwatan sa 1950, ni N. H. Knorr
[Picture Credit Line sa panid 26]
© 2003 BiblePlaces.com