Pagtigom sa mga Butang sa Langit ug sa mga Butang sa Yuta
Pagtigom sa mga Butang sa Langit ug sa mga Butang sa Yuta
“Sumala sa iyang gikahimut-an nga . . . tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.”—EFESO 1:9, 10.
1. Unsay “gikahimut-an” ni Jehova alang sa langit ug yuta?
KALINAW SA TIBUOK UNIBERSO! Mao kana ang mahimayaong katuyoan ni Jehova, “ang Diyos sa kalinaw.” (Hebreohanon 13:20) Iyang gidasig si apostol Pablo sa pagsulat nga ang Iyang “gikahimut-an” mao ang ‘pagtigom pag-usab sa tanang butang diha kang Kristo, ang mga butang sa mga langit ug ang mga butang sa yuta.’ (Efeso 1:9, 10) Unsa ba gayod ang gipasabot sa berbo nga gihubad ug ‘pagtigom pag-usab’ niining bersikuloha? Ang eskolar sa Bibliya nga si J. B. Lightfoot nag-ingon: “Ang ekspresyon nagpasabot ug kaharmonya sa tibuok uniberso, diin dili na maglungtad ang dili angayan ug makapabahinbahin nga mga elemento, kondili ang tanang bahin masentro ug mahiusa diha kang Kristo. Ang sala ug kamatayon, kagul-anan ug kapakyasan ug pag-antos, mawala na.”
“Mga Butang sa mga Langit”
2. Kinsa “ang mga butang sa mga langit” nga kinahanglang tigomon?
2 Gisumaryo ni apostol Pedro ang kahibulongang paglaom sa matuod nga mga Kristohanon sa dihang siya misulat: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:13) Ang “bag-ong mga langit” nga gisaad dinhi nagtumong sa bag-ong nagamandong awtoridad, ang Mesiyanikong Gingharian. “Ang mga butang sa mga langit” nga gihisgotan ni Pablo sa iyang sulat ngadto sa mga taga-Efeso pagatigomon “diha kang Kristo.” Sila mao ang limitadong gidaghanon sa mga tawo nga gipili nga magmando uban kang Kristo sa mga langit. (1 Pedro 1:3, 4) Kining 144,000 ka dinihogang mga Kristohanon “gipalit gikan sa yuta,” “gipalit gikan sa katawhan,” aron mahimong kaubang mga manununod ni Kristo sa iyang langitnong Gingharian.—Pinadayag 5:9, 10; 14:3, 4; 2 Corinto 1:21; Efeso 1:11; 3:6.
3. Sa unsang paagi ikaingon nga ang mga dinihogan ‘naglingkod sa langitnong mga dapit’ bisan dinhi pa sa yuta?
3 Ang dinihogang mga Kristohanon ipanganak pag-usab pinaagi sa balaang espiritu aron mahimong espirituwal nga mga anak ni Jehova. (Juan 1:12, 13; 3:5-7) Tungod kay gisagop sila ni Jehova ingong “mga anak,” sila mahimong mga igsoon ni Jesus. (Roma 8:15; Efeso 1:5) Kay ingon niana, bisan ania pa sa yuta, sila giingon nga ‘bangonon ug palingkoron sa langitnong mga dapit nga nahiusa kang Kristo Jesus.’ (Efeso 1:3; 2:6) Ilang nahuptan kining binayaw nga espirituwal nga posisyon tungod kay sila “gitimbrehan sa gisaad nga balaang espiritu, nga maoy pasiunang timaan sa [ilang] panulondon” nga giandam alang kanila didto sa mga langit. (Efeso 1:13, 14; Colosas 1:5) Busa, sila mao “ang mga butang sa mga langit,” kansang gidaghanon nga gimbut-an ni Jehova kinahanglang pagatigomon.
Ang Pagpanigom Nagsugod
4. Kanus-a ug sa unsang paagi ang pagtigom sa “mga butang sa mga langit” nagsugod?
4 Nahiuyon sa “pagdumala,” o paagi sa pagdumala ni Jehova sa mga butang, ang pagtigom sa “mga butang sa mga langit” magsugod “sa kinutoban sa tinudlong kapanahonan.” (Efeso 1:10) Kanang gitakdang panahon miabot sa Pentekostes 33 K.P. Nianang adlawa, ang balaang espiritu gibubo ngadto sa mga apostoles ug sa usa ka pundok sa mga tinun-an, mga lalaki ug babaye. (Buhat 1:13-15; 2:1-4) Kini naghatag ug pamatuod nga ang bag-ong pakigsaad nagsugod na sa paglihok, nga nagtimaan sa pagkatukod sa Kristohanong kongregasyon ug sa bag-ong nasod sa espirituwal nga Israel, ang “Israel sa Diyos.”—Galacia 6:16; Hebreohanon 9:15; 12:23, 24.
5. Nganong si Jehova nagmugna man ug bag-ong “nasod” nga mopuli sa unodnong Israel?
5 Ang Balaod sa pakigsaad nga gihimo uban sa unodnong Israel wala magpatungha ug “gingharian sa mga saserdote ug usa ka balaan nga nasod” nga mag-alagad sa langit hangtod sa kahangtoran. (Exodo 19:5, 6) Giingnan ni Jesus ang Hudiyong relihiyosong mga lider: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” (Mateo 21:43) Ang maong nasod, ang espirituwal nga Israel, gilangkoban sa dinihogang mga Kristohanon nga pagadad-on ngadto sa bag-ong pakigsaad. Kanila, si apostol Pedro misulat: “Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron kaylap ninyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag. Kay kanhi kamo dili usa ka katawhan, apan karon kamo maoy katawhan sa Diyos.” (1 Pedro 2:9, 10) Ang unodnong Israel dili na mao ang katawhan nga gipakigsaaran ni Jehova. (Hebreohanon 8:7-13) Sumala sa gitagna ni Jesus, ang pribilehiyo nga mahimong bahin sa Mesiyanikong Gingharian gikuha gikan kanila ug gihatag ngadto sa 144,000 ka membro sa espirituwal nga Israel.—Pinadayag 7:4-8.
Gidala Ngadto sa Pakigsaad sa Gingharian
6, 7. Unsang linaing pakigsaad ang gihimo ni Jesus uban sa iyang inanak-sa-espiritu nga mga igsoon, ug unsay kahulogan niini alang kanila?
6 Sa gabii nga gisugdan ni Jesus ang Memoryal sa iyang kamatayon, iyang giingnan ang iyang matinumanong mga apostoles: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian, aron nga mangaon kamo ug manginom sa akong lamesa diha sa akong gingharian, ug magalingkod sa mga trono aron sa paghukom sa napulog-duha ka tribo sa Israel.” (Lucas 22:28-30) Dinhi gihisgotan ni Jesus ang usa ka linaing pakigsaad nga iyang gihimo uban sa iyang 144,000 ka inanak-sa-espiritu nga mga igsoon, nga magpabiling “matinumanon bisan hangtod sa kamatayon” ug magpamatuod nga sila ‘mga mananaog.’—Pinadayag 2:10; 3:21.
7 Kadtong sakop niining grupoha nga limitado ang gidaghanon nagsalikway sa tanang paglaom nga mabuhi sa yuta ingong mga tawo nga unod ug dugo. Sila magamando uban kang Kristo sa langit, nga molingkod sa mga trono aron sa paghukom sa katawhan. (Pinadayag 20:4, 6) Susihon nato karon ang ubang mga teksto nga mapadapat lamang niining maong mga dinihogan ug magpakita kon nganong ang “ubang mga karnero” dili makig-ambit sa mga emblema sa Memoryal.—Juan 10:16.
8. Unsay gipakita sa mga dinihogan sa ilang pagkaon sa tinapay? (Tan-awa ang kahon sa panid 23.)
8 Ang mga dinihogan mag-antos sama kang Kristo ug andam nga makaagom sa kamatayon nga sama sa iyaha. Ingong sakop nianang pundoka, si Pablo nag-ingon nga siya andam nga mohimog bisan unsang sakripisyo aron iyang “maangkon si Kristo aron mailhan siya ug ang gahom sa iyang pagkabanhaw ug ang panag-ambitay diha sa iyang mga pag-antos.” Oo, si Pablo andam nga makaagom “sa kamatayon nga sama sa iyaha.” (Filipos 3:8, 10) Daghang dinihogang mga Kristohanon ang nag-antos diha sa ilang unodnong mga lawas sa “makamatay nga pagtratar nga gihimo ngadto kang Jesus.”—2 Corinto 4:10.
9. Unsang lawasa ang gihawasan sa tinapay sa Memoryal?
9 Sa dihang gisugdan ang Panihapon sa Ginoo, si Jesus miingon: “Kini nagkahulogan sa akong lawas.” (Marcos 14:22) Ang iyang gitumong mao ang iyang literal nga lawas, nga hapit nang bunalan ug magkadugo. Ang tinapay nga walay lebadura maoy haom nga simbolo nianang lawasa. Ngano? Tungod kay sa Bibliya, ang lebadura mahimong magkahulogan ug sala o pagkadaotan. (Mateo 16:4, 11, 12; 1 Corinto 5:6-8) Si Jesus hingpit, ug ang iyang tawhanong lawas walay sala. Iyang itanyag kanang hingpit nga lawas ingong halad pasig-uli. (Hebreohanon 7:26; 1 Juan 2:2) Ang iyang pagbuhat niana makabenepisyo sa tanang matinumanong mga Kristohanon, sila man naglaom nga mabuhi sa langit o mabuhi sa walay kataposan sa paraiso sa yuta.—Juan 6:51.
10. Sa unsang paagi kadtong moinom sa bino sa Memoryal ‘makig-ambit sa dugo ni Kristo’?
10 Mahitungod sa bino nga imnon sa dinihogang mga Kristohanon panahon sa Memoryal, si Pablo misulat: “Ang kopa sa panalangin nga atong gipanalanginan, dili ba kini usa ka pagpakig-ambit sa dugo ni Kristo?” (1 Corinto 10:16) Sa unsang paagi kadtong moinom sa bino ‘makig-ambit sa dugo ni Kristo’? Tinong dili sila moapil sa pagtagana sa halad lukat, tungod kay sila mismo kinahanglan mang lukaton. Pinaagi sa ilang pagtuo sa nagalukat nga gahom sa dugo ni Kristo, ang ilang mga sala mapasaylo ug sila ipahayag nga matarong alang sa kinabuhi didto sa langit. (Roma 5:8, 9; Tito 3:4-7) Ang 144,000 ka kaubang mga manununod ni Kristo “gibalaan,” gilain, gihinloan gikan sa sala aron mahimong “mga balaan” pinaagi sa bili sa giula nga dugo ni Kristo. (Hebreohanon 10:29; Daniel 7:18, 27; Efeso 2:19) Oo, pinaagi sa iyang giula nga dugo nga si Kristo ‘mipalit ug mga tawo alang sa Diyos gikan sa matag tribo ug pinulongan ug katawhan ug nasod, ug gihimo sila nga usa ka gingharian ug mga saserdote ngadto sa atong Diyos, ug sila magamando ingong mga hari ibabaw sa yuta.’—Pinadayag 5:9, 10.
11. Pinaagi sa pag-inom sa bino sa Memoryal, unsay gipaila sa mga dinihogan?
11 Sa dihang gisugdan ni Jesus ang Memoryal sa iyang kamatayon, iyang gitunol ang kopa sa bino ngadto sa iyang matinumanong mga apostoles ug miingon: “Inom kamo gikan niini, kamong tanan; kay kini nagkahulogan sa akong ‘dugo sa pakigsaad,’ nga igabubo alang sa daghan sa kapasayloan sa mga sala.” (Mateo 26:27, 28) Maingon nga ang dugo sa mga torong baka ug sa mga kanding nagpalig-on sa pakigsaad sa Balaod tali sa Diyos ug sa nasod sa Israel, ang dugo ni Jesus nagpalig-on sa bag-ong pakigsaad nga himoon ni Jehova uban sa espirituwal nga Israel, sugod sa Pentekostes 33 K.P. (Exodo 24:5-8; Lucas 22:20; Hebreohanon 9:14, 15) Pinaagi sa pag-inom sa bino nga nagsimbolo sa “dugo sa pakigsaad,” ang mga dinihogan nagpaila nga sila gidala ngadto sa bag-ong pakigsaad ug nakadawat sa mga kaayohan niini.
12. Sa unsang paagi ang mga dinihogan nabawtismohan ngadto sa kamatayon ni Kristo?
12 Ang mga dinihogan mapahinumdoman usab sa laing butang. Giingnan ni Jesus ang iyang matinumanong mga tinun-an: “Sa kopa nga akong ginaimnan kamo magainom, ug sa bawtismo nga ginabawtismo kanako kamo pagabawtismohan.” (Marcos 10:38, 39) Sa ulahi si apostol Pablo naghisgot ug mga Kristohanon nga “gibawtismohan ngadto sa kamatayon [ni Kristo].” (Roma 6:3) Ang mga dinihogan nagkinabuhi nga may pagsakripisyo. Ang ilang kamatayon maoy usa ka sakripisyo sa pagkaagi nga ilang gisalikway ang bisan unsang paglaom nga mabuhi sa yuta sa walay kataposan. Ang bawtismo niining dinihogang mga Kristohanon ngadto sa kamatayon ni Kristo matapos sa dihang human mamatay nga matinumanon sila banhawon ingong espiritung mga linalang nga “magmando ingong mga hari” uban kang Kristo sa langit.—2 Timoteo 2:10-12; Roma 6:5; 1 Corinto 15:42-44, 50.
Pagpakig-ambit sa mga Emblema
13. Nganong kadtong adunay yutan-ong paglaom dili makig-ambit sa mga emblema sa Memoryal, apan nganong motambong man sila sa Memoryal?
13 Tungod kay ang pagpakig-ambit sa tinapay ug bino nga gipasa panahon sa Memoryal naglangkit niining tanan, dayag nga dili haom nga makig-ambit niini kadtong adunay yutan-ong paglaom. Kadtong adunay yutan-ong paglaom nakasabot nga sila mismo dili dinihogang mga membro sa lawas ni Kristo, ni sila bahin sa bag-ong pakigsaad nga gihimo ni Jehova uban niadtong magmando uban kang Jesu-Kristo. Tungod kay “ang kopa” naghawas sa bag-ong pakigsaad, kadto lamang bahin sa bag-ong pakigsaad ang makig-ambit sa mga emblema. Kadtong naglaom nga mabuhi sa walay kataposan sa tawhanong kahingpitan dinhi sa yuta ilalom sa Gingharian wala mabawtismohi ngadto sa kamatayon ni Jesus ni gitawag aron magmando uban kaniya sa langit. Kon sila makig-ambit sa mga emblema, kini magkahulogan ug usa ka butang nga dili mapadapat kanila. Busa, sila dili makig-ambit, apan sila motambong sa Memoryal ingong matinahorong mga tigpaniid. Sila mapasalamaton sa tanan nga nahimo ni Jehova alang kanila pinaagi sa iyang Anak, lakip na sa paghatag ug kapasayloan pinasukad sa giula nga dugo ni Kristo.
14. Sa unsang paagi ang mga dinihogan mapalig-on sa espirituwal pinaagi sa pagpakig-ambit sa tinapay ug bino?
14 Ang kataposang pagtimbre sa pipila lamang ka Kristohanon nga gitawag aron magmando uban kang Kristo sa langit hapit nang makompleto. Hangtod sa kataposan sa ilang kinabuhi nga may sakripisyo dinhi sa yuta, ang mga dinihogan gipalig-on sa espirituwal pinaagi sa pagpakig-ambit sa mga emblema sa Memoryal. Sila mibating nahiusa sa ilang mga igsoon ingong mga membro sa lawas ni Kristo. Ang ilang pagpakig-ambit sa mga emblema nga tinapay ug bino magpahinumdom kanila sa ilang responsibilidad nga magmatinumanon hangtod sa kamatayon.—2 Pedro 1:10, 11.
Pagtigom sa “mga Butang sa Yuta”
15. Kinsa ang gitigom nga miduyog sa dinihogang mga Kristohanon?
15 Sukad sa tungatungang bahin sa katuigan sa 1930, nagkadaghang membro sa “ubang mga karnero,” kinsa dili bahin sa “gamayng panon” ug kansang paglaom mao ang mabuhi sa yuta sa walay kataposan, ang miduyog sa mga dinihogan. (Juan 10:16; Lucas 12:32; Zacarias 8:23) Sila nahimong maunongong mga kauban sa mga igsoon ni Kristo, nga naghatag ug bililhong tabang diha sa pagwali ‘niining maayong balita sa gingharian’ ingong pagpamatuod ngadto sa tanang kanasoran. (Mateo 24:14; 25:40) Sa pagbuhat niana, sila may kahigayonan nga pagahukman ni Kristo ingong iyang “mga karnero,” nga ibutang diha sa iyang “tuong kamot” sa pag-uyon sa dihang siya moanhi aron sa paghukom sa kanasoran. (Mateo 25:33-36, 46) Pinaagi sa pagtuo diha sa dugo ni Kristo, sila maglangkob sa “dakong panon,” nga makalabang-buhi sa “dakong kasakitan.”—Pinadayag 7:9-14.
16. Kinsay mahilakip sa “mga butang sa yuta,” ug sa unsang paagi silang tanan makabaton ug kahigayonan nga mahimong “mga anak sa Diyos”?
16 Ang kataposang pagtimbre sa 144,000 mag-andam sa dalan alang sa pagbuhi sa “mga hangin” sa kalaglagan batok sa daotang sistema sa mga butang ni Satanas dinhi sa yuta. (Pinadayag 7:1-4) Panahon sa Usa ka Libo ka Tuig nga Pagmando ni Kristo ug sa iyang kaubang mga hari-saserdote, ang dakong panon pagaduyogan sa dili-maihap nga gidaghanon sa mga binanhaw. (Pinadayag 20:12, 13) Sila may kahigayonan nga mahimong permanenteng yutan-on nga mga sakop sa Mesiyanikong Hari, si Kristo Jesus. Sa kataposan sa Milenyal nga Pagmando, kining tanang “mga butang sa yuta” ipailalom sa kataposang pagsulay. Kadtong magmatinumanon, pagasagopon ingong yutan-ong “mga anak sa Diyos.”—Efeso 1:10; Roma 8:21; Pinadayag 20:7, 8.
17. Sa unsang paagi matuman ang katuyoan ni Jehova?
17 Busa, pinaagi sa iyang maalamon kaayong “pagdumala,” o paagi sa pagdumala sa mga butang, matuman ni Jehova ang iyang katuyoan nga “tigomon pag-usab ang tanang butang diha kang Kristo, ang mga butang sa mga langit ug ang mga butang sa yuta.” Ang tanang intelihenteng mga linalang sa langit ug sa yuta matigom na unya diha sa tibuok-unibersong kalinaw, nga malipayong magpasakop sa matarong nga pagkasoberano sa Dakong May-Katuyoan nga si Jehova.
18. Sa unsang paagi ang mga dinihogan ug ang ilang mga kauban makabenepisyo gikan sa pagtambong sa Memoryal?
18 Pagkamakapalig-on unya sa pagtuo alang sa pipila ka dinihogan ug sa ilang mga kauban nga milyonmilyong ubang mga karnero nga magtigom sa Abril 12, 2006! Ilang saulogon ang Memoryal sa kamatayon ni Kristo, sumala sa gisugo ni Jesus: “Ipadayon ninyo ang pagbuhat niini sa paghandom kanako.” (Lucas 22:19) Ang tanang manambong angayng mahinumdom sa nahimo ni Jehova alang kanila pinaagi sa iyang pinalanggang Anak, si Kristo Jesus.
Agig Pagsubli
• Unsay katuyoan ni Jehova alang sa mga butang sa langit ug sa mga butang sa yuta?
• Kinsa ang “mga butang sa mga langit,” ug sa unsang paagi sila natigom?
• Kinsa ang “mga butang sa yuta,” ug unsang paglaom ang nalangkit?
[Mga Pangutana sa Pagtuon]
[Kahon sa panid 23]
Ang “Lawas ni Kristo”
Diha sa 1 Corinto 10:16, 17, sa dihang naghisgot sa kahulogan sa tinapay alang sa dinihogang mga igsoon ni Kristo, si Pablo naghisgot ug “lawas” sa linain nga diwa. Siya miingon: “Ang tinapay nga atong gipikaspikas, dili ba kini pagpakig-ambit sa lawas ni Kristo? Tungod kay adunay usa ka tinapay, kita, bisan tuod daghan, usa ka lawas, kay kitang tanan nagapakig-ambit nianang usa ka tinapay.” Sa dihang ang dinihogang mga Kristohanon mokaon sa tinapay panahon sa Memoryal, ilang gimantala ang ilang panaghiusa sa sulod sa kongregasyon sa mga dinihogan, nga nahisama sa usa ka lawas diin si Kristo ang Ulo.—Mateo 23:10; 1 Corinto 12:12, 18.
[Mga hulagway sa panid 23]
Nganong ang mga dinihogan lamang ang makig-ambit sa tinapay ug bino?
[Hulagway sa panid 25]
Pinaagi sa pagdumala ni Jehova, ang tanang linalang sa langit ug sa yuta mahiusa