“Unsay Kahulogan sa Purpurang Triyanggulo?”

“PIPILA ka adlaw nga miagi, nakadawat akog kopya sa Ang Bantayanang Torre gikan sa usa sa mga Saksi ni Jehova,” misulat ang usa ka empleyado sa gobyerno nga nagtrabaho sa ministri sa hustisya sa Seoul, Republika sa Korea. Siya mipadayon: “Sa pagbasa niini, ako nakakat-on ug pipila ka impormasyon bahin sa paglutos sa mga Saksi ni Jehova ubos sa pagmando sa Nazi ug Komunista. Apan aduna akoy pangutana. Ang letrato sa hapin nagpakita sa mga Saksi ni Jehova nga adunay binalit-ad nga purpurang triyanggulo sa wala nga bahin sa ilang mga dyaket. Unsay kahulogan sa purpurang triyanggulo?”

Sa Alemanya ubos sa pagmando sa Nazi, ang mga Saksi ni Jehova midumili sa pagsaludo kang Hitler, ug sila nagpabiling neyutral sa politika ug militar. Busa ang mga Nazi mapintasong naglutos kanila, nga nagbilanggo sa mga 12,000 ka Saksi sa nagkalainlaing gidugayon diha sa mga prisohan ug mga kampo konsentrasyon. Duolan sa 2,000 kanila ang nangamatay, diin ginatos kanila ang gipamatay.

Unsay buot ipasabot sa purpurang triyanggulo diha sa ilang uniporme sa prisohan? “Ang lainlaing kategoriya sa mga binilanggo diha sa mga kampo [sa Nazi] adunay linaing mga marka nga magpaila kanila,” nag-ingon ang librong Anatomy of the SS State. “Ang uniporme nga sistema sa pagbutang ug ilhanan gisugyot sa wala pa ang gubat pinaagi sa pagtahi ug triyanggulo nga panapton diha sa uniporme sa matag binilanggo, ang kolor nagdepende sa iyang kategoriya: kon mga binilanggo sa politika, pula; kon mga Saksi ni Jehova, purpura; kon mga kontra-katilingban, itom; kon mga kriminal, berde; kon mga homoseksuwal, pink; kon mga langyaw, asul. Gawas pa sa dekolor nga triyanggulo, ang binilanggong mga Hudiyo gipasul-ob ug uniporme nga dunay dalag nga triyanggulo nga gitahi diha sa dekolor nga triyanggulo aron maporma ang sayis-kantos nga Bituon ni David.”

“Kon hinumdoman lamang sa mga tawo bisan diin ang leksiyon sa purpurang triyanggulo nga baroganan kon unsa ang husto,” misulat si Propesor John K. Roth diha sa iyang libro nga Holocaust Politics, “kini mahimong proteksiyon batok sa kadaot, ug kini makagiya kanato sa paggawi nga maligdong nga takos matahod sa tanang tawo.” Ang mga Saksi ni Jehova naghimog usa ka dokumentaryo nga nakadawat ug pasidungog, ang Jehovah’s Witnesses Stand Firm Against Nazi Assault. Palihog hangyoa ang usa sa mga Saksi ni Jehova aron imong makita kini nga video.