Ang Tagana sa Diyos sa Pagtabon-sa-Sala

ANG Iningles nga pulong “atonement” naggikan sa ekspresyon nga “at one” o sibo ug, diha sa Bibliya, nagpasabot ug pagtabon sa mga sala. Sa Hebreohanong Kasulatan ang mga termino nga nagtumong sa pagtabon-sa-sala makita sa daghang higayon, ilabina diha sa mga basahon sa Levitico ug Numeros. Ang ka·pharʹ mao ang Hebreohanong pulong sa pagtabon-sa-sala, ug lagmit kini sa orihinal nagkahulogang “taklob,” apan giduso usab ang kahulogan nga “pagpapas.”

Ang Panginahanglan sa Tawo ug Pagtabon-sa-Sala

Ang tawo nagkinahanglan ug pagtabon-sa-sala tungod sa napanunod nga kasal-anan (1 Hari 8:46; Salmo 51:5; Ecclesiastes 7:20; Roma 3:23), ug ang may tulubagon niini, dili ang Diyos, kondili ang tawo mismo. (Deuteronomio 32:4, 5) Si Adan, kinsa nawad-an sa kinabuhing walay kataposan ingong hingpit nga tawo, nagpasa sa sala ug kamatayon ngadto sa iyang mga anak (Roma 5:12), ug busa ang mga kaliwat ni Adan gihukman ug kamatayon. Aron ang tawo makabaton pag-usab ug kahigayonan nga makatagamtam ug kinabuhing walay kataposan, nan, nahiuyon sa legal nga prinsipyo nga gilakip ni Jehova sa ulahi diha sa Moisesnong Balaod, nga mao, bara-i-bara, ang eksaktong pagtabon-sa-sala gikinahanglan sa pagtugbang nianang giwala ni Adan.—Deuteronomio 19:21.

Sumala sa paggamit niini sa Bibliya, ang “pagtabon-sa-sala” adunay sukaranang ideya sa “pagtaklob” o “pagbaylo,” ug kanang gihatag ingong baylo sa, o ingong “taklob” sa, laing butang kinahanglang mosibo niana. Busa, ang bisan unsa nga ibayad sa usa ka butang nga nawala kinahanglang “sibo” nianang butanga, nga bug-os motakdo niana ingong eksaktong katumbas. Kinahanglang kini dili sobra o kulang. Walay tawong dili hingpit ang makatagana ug ingon niana nga pagtabon-sa-sala aron mapasig-uli ang hingpit nga tawhanong kinabuhi ngadto kang bisan kinsa o sa tanang katawhan. (Salmo 49:7, 8) Aron mabayran kanang giwala ni Adan, usa ka halad-sa-sala nga sama ug bili sa usa ka hingpit nga tawhanong kinabuhi ang kinahanglang ibayad.

Naghimo si Jehova nga Diyos ug usa ka kahikayan sa pagtabon-sa-sala sa mga Israelinhon nga naghulagway sa usa ka mas dakong tagana sa pagtabon-sa-sala. Si Jehova ug dili ang tawo ang angayng pasidunggan sa pagpili ug pagpadayag sa instrumento sa pagtabon-sa-sala aron mapapas ang napanunod nga sala ug maghatag ug kahupayan gikan sa pagkahinukman ug kamatayon.

Mga Halad sa Pagtabon-sa-Sala

Sumala sa gisugo sa Diyos, ang mga Israelinhon kinahanglan maghalad ug mga halad-sa-sala aron ang sala matabonan. (Exodus 29:36; Levitico 4:20) Ilabinang hinungdanon mao ang tinuig nga Adlaw sa Pagtabon-sa-Sala, sa dihang ang hataas nga saserdote sa Israel maghalad ug mga hayop ingong pagtabon-sa-sala para sa iyang kaugalingon, para sa ubang mga Levihanon, ug para sa dili-saserdotehanong mga tribo sa Israel. (Levitico 16) Ang ihalad nga mga hayop kinahanglang walay depekto, nga nagpakita nga kinahanglang hingpit ang gihulagwayan niini. Dugang pa, dako kaayo ug bili ang pagtabon-sa-sala tungod kay kinabuhi sa hayop ang kinahanglang hunoson, ug ang dugo niini ulaon aron sa pagtabon sa sala. (Levitico 17:11) Ang mga halad-sa-sala nga gihimo sa mga Israelinhon ug ang lainlaing bahin sa tinuig nga Adlaw sa Pagtabon-sa-Sala sa walay duhaduha nagpahinumdom kanila kon unsa ka peligroso ang ilang makasasalang kahimtang ug sila nagkinahanglan gayod ug bug-os nga pagtabon-sa-sala. Apan, ang mga halad nga hayop dili bug-os nga makatabon sa sala sa tawo tungod kay ang mga hayop mas ubos man sa tawo, kinsa gihatagan ug awtoridad sa paggahom kanila.—Genesis 1:28; Salmo 8:4-8; Hebreohanon 10:1-4.

Natuman Diha Kang Kristo Jesus

Ang Kristohanon Gregong Kasulatan tatawng naglangkit sa bug-os nga pagtabon sa tawhanong mga sala uban kang Jesu-Kristo. Diha kaniya natuman ang mga larawan ug mga landong sa Moisesnong Balaod, tungod kay siya mao ang Usa nga gihulagwayan sa nagkalainlaing mga halad nga hayop. Ingong hingpit, walay-sala nga tawo, si Jesus mao ang halad-sa-sala alang sa tanang kaliwat ni Adan nga sa ngadtongadto mapahigawas gikan sa napanunod nga sala ug kamatayon. (2 Corinto 5:21) Si Kristo “mihalad ug usa ka halad alang sa mga sala hangtod sa kahangtoran” (Hebreohanon 10:12), ug siya mao gayod “ang Kordero sa Diyos nga magakuha sa sala sa kalibotan.” (Juan 1:29, 36; 1 Corinto 5:7; Pinadayag 5:12; 13:8; itandi ang Isaias 53:7.) Ang kapasayloan mabatonan lamang pinaagi sa pag-ula sa dugo (Hebreohanon  9:22), ug ang mga Kristohanon nga nagalakaw diha sa kahayag gipasaligan nga ‘ang dugo ni Jesus nga Anak sa Diyos nagahinlo kanato gikan sa tanang sala.’—1 Juan 1:7; Hebreohanon 9:13, 14; Pinadayag 1:5.

Ang hingpit nga tawhanong kinabuhi ni Jesus nga gitanyag ingong halad mao ang gihulagwayan sa halad sa sala. Kini ang bililhong butang nga nagpalit sa katawhan, nga naglukat kanila gikan sa napanunod nga sala ug kamatayon. (Tito 2:13, 14; Hebreohanon 2:9) Si Kristo mismo nag-ingon: “Ang Anak sa tawo mianhi, dili aron pagaalagaran, kondili aron sa pag-alagad ug sa paghatag sa iyang kalag nga usa ka lukat [Gr., lyʹtron] baylo sa daghan.” (Marcos 10:45) Ang iyang halad maoy eksaktong bayad sa giwala sa makasasalang si Adan, tungod kay si Jesus hingpit man ug busa katumbas ni Adan sa wala pa makasala ang unang tawo.—1 Timoteo 2:5, 6; Efeso 1:7.

Kahikayan Gihimo Aron ang Tawo Mapasig-uli sa Diyos

Ang sala sa tawo maoy nakaulang sa Diyos ug sa tawo, kay si Jehova supak sa sala. Ang kal-ang tali sa tawo ug sa iyang Maglalalang mapasig-uli lamang pinaagi sa paghimo sa gikinahanglang tinuod nga “pagtaklob,” o pagtabon, sa maong sala. (Isaias 59:2; Habakuk 1:13; Efeso 2:3) Apan si Jehova nga Diyos mihimog kahikayan aron mapasig-uli ang makasasalang katawhan kaniya pinaagi sa hingpit nga tawong si Jesu-Kristo. Busa, si apostol Pablo misulat: “Kita usab nagasadya diha sa Diyos pinaagi sa atong Ginoong Jesu-Kristo, nga pinaagi kaniya kita karon nakadawat sa pagpasig-uli.” (Roma 5:11) Aron kahimut-an ni Jehova, kinahanglang dawaton sa mga tawo ang tagana sa Diyos aron sila mapasig-uli kaniya pinaagi kang Jesu-Kristo. Pinaagi lamang niini nga makabalik ang tawo sa kahimtang nga natagamtam ni Adan sa wala pa siya makasala. Sa paghimo niining maong kahikayan, ang gugma sa Diyos napasundayag.—Roma 5:6-10.

Hustisya Nakab-ot Pinaagi sa Pagtanyag ug Usa ka Halad Pasig-uli

Apan, kinahanglang makab-ot ang hustisya. Bisan pag gilalang nga hingpit, ang tawo natental sa pagpakasala ug busa si Adan ug ang iyang mga kaliwat gihukman sa Diyos. Tungod sa hustisya ug pagsunod sa mga sukdanan sa pagkamatarong, kinahanglang ipahamtang sa Diyos ang gilatid sa iyang balaod nga silot batok sa masinupakong si Adan. Apan ang gugma maoy nagpalihok sa Diyos sa pagtaganag usa ka pangtubos aron nga pinaagi niana makab-ot ang hustisya, ug nga walay paglapas sa hustisya, ang mahinulsolong mga kaliwat sa makasasalang si Adan mahimong mapasaylo ug makigdait sa Diyos. (Colosas 1:19-23) Busa, “gipadala [ni Jehova] ang iyang Anak ingong usa ka halad pasig-uli alang sa atong mga sala.” (1 Juan 4:10; Hebreohanon 2:17) Ang paghatag ug usa ka halad makapahimo sa usa nga dalawaton, o inuyonan. Ang halad pasig-uli ni Jesus nagwagtang sa hinungdan sa paghukom sa Diyos sa tawhanong linalang ug naghatag kaniya ug kahigayonan nga maangkon ang pag-uyon ug kaluoy sa Diyos. Kining matanga sa halad pasig-uli nagwagtang sa sala ug sa silot nga kamatayon sa espirituwal nga Israel ug sa tanang midawat niini.—1 Juan 2:1, 2; Roma 6:23.

Ang kahikayan sa pagtubos tatawng makita diha sa pipila ka teksto sa Bibliya nga naghisgot sa pagtabon-sa-sala. Pananglitan, si Pablo nag-ingon nga “si Kristo namatay alang sa atong mga sala sumala sa Kasulatan” (1 Corinto 15:3), ug nga “pinaagi sa pagpalit, gipagawas kita ni Kristo gikan sa tunglo sa Balaod pinaagi sa pagkahimong tinunglo inay nga kita [mga Hudiyo], tungod kay kini nahisulat: ‘Tinunglo ang matag tawo nga gibitay sa estaka.’” (Galacia 3:13; Deuteronomio 21:23) Si Pedro mikomento: “Siya nagpas-an sa atong mga sala diha sa iyang kaugalingong lawas sa estaka, aron kita mamatay ngadto sa kasal-anan ug mabuhi ngadto sa pagkamatarong. Ug ‘pinaagi sa iyang mga labod kamo nangaayo.’” (1 Pedro 2:24; Isaias 53:5) Si Pedro usab nagsulat: “Si Kristo namatay sa makausa alang sa tanang panahon maylabot sa mga sala, usa ka matarong nga tawo alang sa mga dili-matarong, aron siya magtultol kaninyo ngadto sa Diyos.”—1 Pedro 3:18.

Ipasundayag ang Pagtuo sa Mahigugmaong Tagana sa Diyos

Gipasundayag sa Diyos ug ni Kristo ang ilang gugma pinaagi sa pagtagana ug bug-os nga pagtabon sa mga sala nga napanunod sa tawo. (Juan 3:16; Roma 8:32; 1 Juan 3:16) Apan aron makabenepisyo gikan niini, ang usa ka tawo kinahanglang kinasingkasing nga maghinulsol ug magpasundayag ug pagtuo. Si Jehova wala mahimuot sa mga halad sa Juda sa dihang kini gitanyag uban ang dili hustong tinamdan. (Isaias 1:10-17) Gipadala sa Diyos si Kristo “ingong halad alang sa pagpasig-uli pinaagi sa pagtuo diha sa iyang dugo.” (Roma 3:21-26) Kadtong motuo ug modawat sa tagana sa Diyos sa pagtabon-sa-sala pinaagi ni Jesu-Kristo makabaton ug kaluwasan; kadtong mosalikway niini nga tagana dili makabaton ug kaluwasan. (Buhat 4:12) Ug, si bisan kinsa nga “tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala, apan may usa ka makahahadlok nga pagpaabot sa paghukom.”—Hebreohanon 10:26-31.