“Estoryahi pa Kami!”

SA Nezlobnaya, Rusya, ang usa ka klase sa literatura sa hayskul nagtuon sa mga sinulat sa usa ka Rusong awtor nga si Mikhail Bulgakov. Lakip sa iyang mga sinulat mao ang usa ka nobela nga nagtamay kang Jesu-Kristo, apan naghubit kang Satanas ingong bayani. Human sa lektyur, giingnan sa maestra ang mga estudyante nga maghatag siya ug pasulit base sa maong nobela. Apan, usa sa mga estudyante, usa ka 16-anyos nga Saksi ni Jehova nga ginganlag Andrey, matinahorong mihangyo sa iyang maestra alang sa eksemsiyon sa pagkuhag pasulit tungod kay ang iyang tanlag dili motugot nga magtuon siya niining matanga sa libro. Hinunoa, siya mitanyag nga magsulat ug usa ka essay nga magpatin-aw kon sa unsang paagi iyang gilantaw si Jesu-Kristo. Misugot ang maestra.

Sa iyang essay, gipatin-aw ni Andrey nga bisan tuod iyang gitahod ang opinyon sa uban, iyang nakaplagan nga ang kinamaayohang paagi sa pagkat-on bahin kang Jesus mao ang pagbasa sa usa sa upat ka asoy sa Ebanghelyo. Sa pagbuhat niana, “kamo makakat-on bahin sa kinabuhi ug mga pagtulon-an ni Jesus nga giasoy mismo sa mga nakakita kaniya.” Si Andrey midugang: “Ang laing butang nga angayng tagdon mao ang paagi nga gihubit si Satanas. Ang uban morag malingaw sa pagbasa ug usa ka libro nga naghisgot kang Satanas ingong bayani apan ako dili malingaw niini.” Iyang gipatin-aw nga si Satanas sa pagkatinuod maoy usa ka gamhanang daotan nga espiritung linalang nga mitalikod sa Diyos, nagdalag pagkadaotan, kasakitan, ug pag-antos sa katawhan. Gitapos ni Andrey ang iyang essay: “Ako nagtuo nga dili makahatag kanakog kaayohan ang pagbasa niini nga nobela. Siyempre, dili kay wala ako makaangay kang Bulgakov ingong usa ka magsusulat. Apan alang kanako, mas gusto nakong basahon ang Bibliya sa pagkat-on sa makasaysayanhong kamatuoran bahin kang Jesu-Kristo.”

Nalipay kaayo ang magtutudlo ni Andrey sa essay nga tungod niana iyang gipaandam siya ug binaba nga report bahin kang Jesu-Kristo. Miuyon dayon si Andrey. Sa sunod nilang klase sa literatura, gibasa ni Andrey ang iyang report atubangan sa tibuok klase. Iyang gipatin-aw kon nganong nagtuo siya nga si Jesus mao ang labing bantogang tawo nga nabuhi sukad. Dayon iyang gibasa ang usa ka kapitulo nga naghisgot bahin sa kamatayon ni Jesus gikan sa basahon sa Bibliya nga Mateo. Tungod kay hapit nang mahurot ang panahon nga gitagal alang sa iyang report, gusto ni Andrey nga taposon na kini, apan ang iyang mga klasmet nag-awhag kaniya: “Estoryahi pa kami! Unsay sunod nga nahitabo?” Busa iyang gipadayon ang pagbasa sa asoy ni Mateo bahin sa pagkabanhaw ni Jesus.

Sa natapos na si Andrey, ang iyang mga klasmet daghan kaayog pangutana bahin kang Jesus ug kang Jehova. “Ako nag-ampo kang Jehova alang sa kaalam, ug iyang gitubag ang akong pag-ampo,” matod pa ni Andrey. “Akong natubag ang tanan nilang mga pangutana!” Human sa klase, gihatagan ni Andrey ang iyang magtutudlo ug usa ka kopya sa librong Ang Labing Bantogang Tawo nga Nabuhi Sukad, a ug mahinangpon niyang gidawat kini. Si Andrey miingon: “Gihatagan niya akog taas nga grado sa akong report ug gidayeg niya ako tungod kay wala nako ikaulaw ang akong pagtuo. Siya miingon usab nga uyon siya sa pipila ka butang nga akong gituohan.”

Si Andrey nalipay nga siya nakahukom sa pagsunod sa iyang nabansay-sa-Bibliya nga tanlag pinaagi sa dili pagbasa sa mga basahon nga nagtamay kang Jehova ug sa iyang Anak, si Jesu-Kristo. Ang maong determinasyon wala lang manalipod kaniya batok sa dili-kasulatanhong mga panglantaw kondili nagbukas usab ug talagsaong kahigayonan sa pagpaambit sa hinungdanong mga kamatuoran sa Bibliya ngadto sa uban.

[Footnote]