Kinsa Karon ang Nagpadapat sa mga Pagtulon-an ni Kristo?

SI Jesu-Kristo kaylap nga gilantaw ingong usa sa labing bantogang mga tawo nga nabuhi sukad. Daghan ang nag-isip kaniya ingong labing bantogang tawo. Sa halos duha ka libo ka tuig, ang iyang mga pagtulon-an nakaimpluwensiyag dako sa daghang kinabuhi—“yano nga kinabuhi sa maluloton ug buotan nga mga tawo maingon man sa mga pilantropo,” nagsulat ang Ingles nga awtor nga si Melvyn Bragg.

Unsay Panglantaw sa mga Tawo sa Kristiyanidad?

Unsay panglantaw sa mga tawo sa Kristiyanidad? Gihubit kini ingong “usa sa kinadak-ang espirituwal nga kauswagan sa katawhan.” Usa ka panglantaw ang gipahayag ni David Kelso sa Glasgow Caledonian University, sa Scotland. Siya misulat: “Ang duha ka libo ka tuig nga kasaysayan niini napuno sa dili-hitupngang mga kalamposan sa natad sa arte, arkitektura, pilosopiya, musika ug katilingbanong kalihokan.”

Apan, daghan pang uban ang lahig panglantaw sa mga butang. Dili sila tutol sa Kristiyanidad sumala sa pagkahubit niana sa usa ka diksiyonaryo: “Usa ka relihiyon nga gipasukad sa mga pagtulon-an ni Jesu-Kristo ug ang pagtuo nga siya ang anak sa Diyos.” (Collins Cobuild) Hinunoa, sila gingil-aran sa binuhatan sa relihiyosong mga institusyon ug organisasyon nga nag-angkong naghawas sa Kristiyanidad.

Pananglitan, ang ika-19ng siglong Aleman nga pilosopo nga si Friedrich Nietzsche naghubit sa Kristiyanidad diha sa ulahing kahulogan niini ingong “walay-kataposang lama sa katawhan.” Siya misulat nga kini maoy “usa ka dakong tunglo, usa ka kinadak-ang korapsiyon, . . . nga mogamit ug bisan unsang pamaagi nga makadaot, malimbongon, tinagotago, ug mapanimaslon.” Tinuod, naghinobra ang panglantaw ni Nietzsche, apan ang pipila ka mas makataronganong tigpaniid adunay susamang mga panghinapos. Ngano?  Tungod kay latas sa kasiglohan ang binuhatan niadtong nag-angkong mga Kristohanon nagpakita, dili sa mga hiyas ni Jesu-Kristo, kondili sa kaylap nga “moral nga kadunotan, makalilisang nga mga krimen ug mga pasipala.”

Gipaluyohan ba ni Kristo ang Kristiyanidad Karon?

Busa, makataronganon ang pagsukna, “Gipaluyohan ba ni Kristo ang Kristiyanidad karon?” Ang pipila moingon dihadiha “Siyempre gipaluyohan niya kini!” “Dili ba misaad man siya sa iyang mga sumusunod nga siya magauban kanila ‘bisan hangtod sa kataposan sa kalibotan’?” (Mateo 28:20, King James Version) Oo, gisulti kana ni Jesus. Apan iya bang gipasabot nga siya magauban sa tanan nga nag-angkong iyang sumusunod, bisan unsa pay binuhatan nianang tawhana?

Hinumdomi, ang pipila ka lider sa relihiyon sa adlaw ni Jesus nagtuo nga ang Diyos nagauban gayod kanila. Sanglit gipili man sa Diyos ang Israel alang sa usa ka linaing papel, ang pipila ka lider sa relihiyon naghunahuna nga dili gayod sila isalikway sa Diyos—bisan unsa pay ilang gibuhat. (Miqueas 3:11) Apan, sa ngadtongadto bug-os nilang gisalikway ang mga balaod ug mga sukdanan sa Diyos. Tungod niini, prangka silang giingnan ni Jesu-Kristo: “Tan-awa! Ang inyong balay mabiniyaan kaninyo.” (Mateo 23:38) Ang tibuok relihiyosong sistema nawad-an sa pabor sa Diyos. Iyang gisalikway kini ug gitugotan ang kasundalohang Romano nga magpukan sa kaulohang siyudad niini, ang Jerusalem, ug sa templo niini sa 70 K.P.

Ingon ba usab niini ang mahimong dangatan sa Kristiyanidad karon? Atong tagdon kon unsang mga kinahanglanon ang gidugang ni Jesus sa iyang saad nga siya magauban sa iyang mga sumusunod hangtod sa “kataposan sa kalibotan.”

 [Mga hulagway sa panid 2, 3]

Ang mga pagtulon-an ni Jesu-Kristo nakaimpluwensiyag dako sa kinabuhi sa milyonmilyong tawo sa tibuok yuta