Sugilanon sa Kinabuhi

Pagkahibalo Kon Unsay Husto ug Pagbuhat Niana

SUMALA SA GIASOY NI HADYN SANDERSON

Kas-a giingnan ni Jesus ang iyang mga apostoles: “Kon nahibalo kamo niining mga butanga, malipayon kamo kon inyo kining buhaton.” (Juan 13:17) Oo, tingali kita nahibalo kon unsay husto, apan usahay, lisod ang pagbuhat niana! Apan, human magkinabuhi ug kapin sa 80 ka tuig, nga ang 40 niana akong gigugol diha sa misyonaryong pag-alagad, ako kombinsido nga tinuod ang giingon ni Jesus. Ang pagbuhat kon unsay gisulti sa Diyos mosangpot gayod sa kalipay. Pasaysaya ko ninyo.

SA 1925, sa dihang ako tres anyos, ang akong mga ginikanan mitambong ug usa ka pakigpulong bahin sa Bibliya didto sa among lungsod sa Newcastle, Australia. Ang pakigpulong, “Minilyong Buhi Karon Dili na Gayod Mamatay,” nakapakombinsir sa akong inahan nga iya nang nakaplagan ang kamatuoran, ug siya nagsugod sa pagtambong nga regular sa Kristohanong mga tigom. Apan, ang interes sa akong amahan dali rang naawop. Siya misupak sa bag-ong-kaplag nga pagtuo ni Mama ug namahad nga mobiya kon dili kana talikdan ni Mama. Gihigugma ni Mama ang akong amahan ug buot niya nga magkahiusa ang pamilya. Bisan pa niana, siya nahibalo nga ang pagkamasinugtanon ngadto sa Diyos mao ang labawng hinungdanon, ug siya determinado nga mobuhat kon unsay husto sa mga mata ni Jehova. (Mateo 10:34-39) Ang akong amahan mibiya, ug human niana panagsa na lang nako siyang makita.

Sa paghinumdom, nakadayeg ako sa pagkamaunongon ni Mama sa Diyos. Ang iyang desisyon misangpot sa usa ka kinabuhi nga tugob sa espirituwal nga mga panalangin alang sa akong magulang nga babaye, si Beulah, ug kanako. Kini nagtudlo usab kanamo ug hinungdanong leksiyon—sa dihang mahibaloan namo kon unsay husto, kinahanglang manglimbasog kami sa pagbuhat niana.

 Mga Pagsulay sa Pagtuo

Ang mga Estudyante sa Bibliya, ingon sa pagtawag kaniadto sa mga Saksi ni Jehova, naningkamot pag-ayo sa pagtabang sa among pamilya. Ang akong apohan nga babaye miipon pagpuyo kanamo ug midawat usab sa kamatuoran sa Bibliya. Siya ug si Mama kanunayng magkauban diha sa buluhatong pagsangyaw, diin ang ilang ligdong nga pamarog ug pagkamahigalaon nakadani sa pagtahod sa mga tawo.

Sa kasamtangan, ang gulang-gulang na nga Kristohanong mga lalaki naghatag kanako ug linaing pagtagad ug mapuslanong pagbansay. Sa wala madugay akong nakat-onan ang paggamit ug kard nga testimonya sa paghatag ug yanong mga presentasyon ngadto sa mga tawo diha sa ilang kabalayan. Ako nagpatokar usab ug girekord nga mga pakigpulong bahin sa Bibliya diha sa madala-dala nga ponograpo ug miapil sa mga martsa ginamit ang mga plakard diha sa pangunang karsada sa lungsod. Lisod kadto, tungod kay ako nakigbisog sa kahadlok sa tawo. Apan, ako nahibalo kon unsay husto ug determinadong mobuhat niana.

Human makatapos ug tungha, ako nagsugod pagtrabaho sa bangko, nga naglangkit ug pag-adto sa daghang sanga sa maong bangko sa tibuok estado sa New South Wales. Bisan tuod diyutay lang ang mga Saksi nianang dapita sa nasod, ang akong pagbansay nakatabang nga magpabiling buhi ang akong pagtuo. Si Mama nagpadala kanako ug makapadasig nga mga sulat nga nakapalig-on kanako sa espirituwal.

Ang maong mga sulat naghatag kanako ug tabang sa tukmang panahon. Ang Gubat sa Kalibotan II nagsugod na, ug ako gimandoan nga magpalista sa pagkasundalo. Ang manedyer sa bangko maoy tawo nga hinimba kaayo ug siya usa ka komander sa militar sa among dapit. Sa dihang akong gipatin-aw ang akong neyutral nga baroganan ingong Kristohanon, gihatagan ko niyag ultimatum—mobiya sa akong relihiyon o moundang sa akong trabaho sa bangko! Misamot kini sa dihang ako mireport ngadto sa sentro sa pagpangrekluta ug mga sundalo sa among lugar. Ang manedyer atua didto ug gitutokan ako sa dihang ako miduol sa lamesa diin gihimo ang pagpangrehistro. Sa dihang wala ako mopirma sa mga papeles sa pagrekluta, nasuko ang mga opisyales. Gikulbaan ko, apan ako determinado nga mobuhat kon unsay husto. Sa tabang ni Jehova, ako nagpabiling kalmado ug determinado. Sa dihang sa ulahi akong nahibaloan nga may pipila ka bugoy nga nangita kanako, akong gidalidali ug empake ang akong mga butang ug misakay dayon sa tren!

Sa pagbalik nako sa Newcastle, ako gitaral sa korte aron sukitsukiton kauban sa pito pa ka brader nga midumili sa pagserbisyo sa militar. Gisentensiyahan kami sa huwes ug tulo ka bulan nga pagkabilanggo ilalom sa bug-at nga trabaho. Bisan tuod ang pagkabilanggo dili maayong kasinatian, ang pagbuhat kon unsay husto nagdalag mga panalangin. Human kami buhii, usa sa akong mga kauban sa selda, usa ka Saksi nga ginganlag Hilton Wilkinson, nagdapit kanako nga motrabaho alang kaniya diha sa iyang estudio. Didto akong nahimamat ang akong naasawa sa ulahi, si Melody, kinsa nagtrabaho didto sa estudio ingong tig-abiabi sa mga kustomer. Wala madugay human ako buhii, ako gibawtismohan ingong simbolo sa akong pagpahinungod kang Jehova.

Paghimong Tumong sa Bug-os-Panahong Pag-alagad

Human kami maminyo, si Melody ug ako nag-abli ug among kaugalingong estudio sa Newcastle. Wala madugay midaghan pag-ayo ang among trabaho nga kini nakaapektar pag-ayo sa among panglawas ug espirituwalidad. Nianang panahona, si Ted Jaracz, kinsa nag-alagad kaniadto sa sangang buhatan sa mga Saksi ni Jehova sa Australia ug karon usa na ka membro sa Nagamandong Lawas, nakigsulti kanamo bahin sa among espirituwal nga mga tumong. Human nianang maong panaghisgot, kami nakahukom sa pagbaligya sa among negosyo ug pagpayano sa among kinabuhi. Sa 1954 kami mipalit ug usa ka gamayng treyler, mibalhin ngadto sa siyudad sa Ballarat sa estado sa Victoria, ug nagsugod sa pag-alagad ingong mga payunir, o bug-os-panahong mga tig-ebanghelyo.

 Samtang nakigtambayayong kami sa gamayng kongregasyon sa Ballarat, gipanalanginan ni Jehova ang among mga paningkamot. Sulod sa 18 ka bulan, ang gidaghanon sa mga tawo nga nanambong sa mga tigom miusbaw pag-ayo gikan sa 17 ngadto sa 70. Dayon miabot ang imbitasyon sa pagsulod sa nagapanawng ministeryo, o buluhaton sa sirkito, didto sa estado sa Habagatang Australia. Sa misunod nga tulo ka tuig, kami nalipay sa pagduaw sa mga kongregasyon sa siyudad sa Adelaide ug sa mga rehiyon nga tinubdan sa bino ug mga sitrus ubay sa Murray River. Nausab gayod ang among kinabuhi! Kami malipayon nga nag-alagad kauban sa mahigugmaong mga igsoon. Pagkadakong panalangin kana tungod sa pagbuhat sa among nahibaloan nga maoy husto!

Usa ka Misyonaryong Asaynment

Sa 1958 among gipahibalo ang sangang buhatan sa Australia nga nagplano ming motambong sa “Balaang Kabubut-on” nga Internasyonal nga Asembliya sa New York City sa ulahing bahin nianang tuiga. Sila mibalos pinaagi sa pagpadala kanamo ug mga aplikasyon alang sa Gilead nga tunghaan sa misyonaryo didto sa Tinipong Bansa. Tungod kay kami mga 35 anyos na, kami naghunahuna nga dili na mi dawaton sa Gilead. Bisan pa niana, among gipadala ang among mga aplikasyon ug kami gidapit nga motambong sa ika-32 nga klase. Sa tunga-tunga sa kurso, among nadawat ang among misyonaryong asaynment—sa India! Bisan pag sa sinugdan kami nabalaka, kami nagtinguha sa pagbuhat kon unsay husto ug malipayong midawat sa among asaynment.

Kami misakay ug barko ug nakaabot sa Bombay (karon Mumbai) usa niana ka buntag sayo sa 1959. Gatosan ka mga trabahador ang nangatulog diha sa pantalan. Lahi ug baho ang hangin. Pagsidlak sa adlaw, may ideya na kami kon unsa unyay among masinatian. Wala pa gayod kami makasinati ug ingon niana kainit nga klima! Giabiabi kami sa usa ka misyonaryong magtiayon, sila si Lynton ug Jenny Dower, nga kauban namong nagpayunir sa Ballarat. Ila ming gidala sa sangang buhatan ug Puy-anang Bethel sa India, nga anaa sa ikaduhang andana sa usa ka siot nga apartment nga nahimutang duol sa kinapusoran sa siyudad. Didto nagpuyo ang unom ka boluntaryo sa Bethel. Giingnan mi ni Brader Edwin Skinner, kinsa nag-alagad ingong misyonaryo sa India sukad sa 1926, nga mopalit ug duha ka maleta nga gama sa lona, sa dili pa kami moadto sa among asaynment. Kining matanga sa maleta sagad makita nga gikarga diha sa mga tren sa India ug mapuslanon kaayo kanamo panahon sa among mga pagbiyahe sa ulahi.

Human sa duha ka adlaw nga biyahe sa tren, kami nakaabot sa among asaynment sa Tiruchchirappalli, usa ka siyudad sa habagatang estado sa Madras (karon Tamil Nadu). Didto, kami miduyog sa tulo ka Indian nga espesyal payunir nga nagsangyaw ngadto sa populasyon nga mokabat ug 250,000 ka tawo. Yano kaayo ang among kinabuhi. Sa usa ka higayon, wala na makaabot ug $4 (U.S.) ang among kuwarta. Apan sa dihang nahurot na kini, wala kami pasagdi ni Jehova. Usa ka tawo nga nagtuon sa Bibliya ang nagpahulam kanamo ug kuwarta aron makaabang ug balay nga haom alang sa pagpahigayon ug mga tigom. Kas-a sa dihang wala na miy pagkaon, usa ka silingan ang malulotong naghatag kanamo ug curry nga ilang giluto. Gilamian ko adto, apan halang kaayo kadto nga ako gisid-ok!

Diha sa Kanataran

Bisan tuod ang pipila ka tawo sa Tiruchchirappalli nagsultig Iningles, ang kadaghanan nagsultig Tamil. Busa, kami naningkamot nga makakat-on ug yanong presentasyon alang sa pagsangyaw sa kanataran ginamit ang maong pinulongan. Tungod niana, naangkon namo ang pagtahod sa daghang tawo niadtong dapita.

Nalingaw kaayo kami sa among balay-balay nga ministeryo. Ang mga Indian sa kinaiyanhon maabiabihon, ug kadaghanan kanila nagdalit kanamo ug pabugnaw. Tungod kay ang temperatura subsob nga moabot ug 40 grado Celsius, giapresyar gayod namo ang ilang pagkamaabiabihon. Sugo sa maayong pamatasan nga maghisgot unag personal nga mga butang sa dili pa namo ipresentar ang among mensahe. Ang mga tagbalay subsob nga mangutana kanako ug sa akong asawa: “Tagadiin man mo? Duna ba moy anak? Nganong wala man?” Kon mahibaloan nilang wala kamiy anak, kasagarang itudlo nila ang usa ka maayong doktor nga amo konong konsultahon! Bisan pa niana, pinaagi sa maong mga kabildohay among napailaila ang among kaugalingon ug nasaysay ang kahinungdanon sa among binase-sa-Bibliya nga buluhaton.

Kadaghanang tawo nga among gisangyawan Hindu ug relihiyon—usa ka sistema sa mga pagtuo nga lahi kaayo sa Kristiyanidad. Inay kay makigdebate bahin sa komplikadong pilosopiya sa mga Hindu,  kami yanong nagsangyaw sa maayong balita sa Gingharian sa Diyos—ug maayo kinig mga resulta. Sulod sa unom ka bulan, duolan sa 20 ka tawo ang misugod pagtambong sa mga tigom diha sa among gipuy-an. Ang usa niining mga tawhana maoy usa ka sibil nga inhenyero nga ginganlag Nallathambi. Siya ug ang iyang anak nga lalaki nga si Vijayalayan, sa ulahi nakatabang ug mga 50 ka tawo nga mahimong mga alagad ni Jehova. Si Vijayalayan nag-alagad usab ug makadiyot sa sanga sa India.

Kanunayng Nagabiyahe

Wala pa dangtig unom ka bulan ang among pag-estar sa India sa dihang ako gidapit nga mag-alagad ingong unang magtatan-aw sa distrito sa nasod. Kini naglangkit ug pagbiyahe sa tibuok India, nga mag-organisar ug mga asembliya ug makigtambayayong sa siyam ka grupo sa pinulongan. Hago kadto nga trabaho. Kami mag-empake ug mga sinina ug kasangkapan nga gamiton sulod sa unom ka bulan diha sa tulo ka kaban nga gama sa lata ug sa among lig-ong mga maleta ug mogikan sa siyudad sa Madras (karon Chennai) sakay sa tren. Tungod kay ang gidak-on sa teritoryo sa distrito moabot mag 6,500 kilometros kon liboton, kami kanunayng nagabiyahe. Sa usa ka higayon, natapos ang among asembliya sa habagatang siyudad sa Bangalore nianang Dominggo. Dayon mibiyahe kami paamihanan paingon sa Darjeeling diha sa tiilan sa Himalayas aron mag-alagad sa laing asembliya pagkasunod semana. Ang panaw paingon sa Darjeeling naglangkit ug pagbiyaheg mga 2,700 kilometros ug pagbalhinbalhin ug tren sa lima ka higayon.

Sa among unang mga panaw, kami nalipay sa pagpasalida sa pelikula nga The New World Society in Action. Pinaagi niining pelikulaha ang mga tawo nasinati sa gilapdon sa buluhaton sa yutan-ong organisasyon ni Jehova. Subsob nga gatosan ka tawo ang manan-aw matag salida niini. Sa usa ka higayon, amo kining gipasalida atubangan sa usa ka grupo nga nagtapok diha sa daplin sa karsada. Samtang nagpadayon ang salida, mibaga ang dag-om ug paspas nga nag-irog paingon sa among nahimutangan. Tungod kay dihay higayon nga ang usa ka panon sa mga tawo nangasuko sa dihang gihunong ang pagpasalida, ako nakahukom nga ipadayon ang pagpasalida apan paspason kini. Maayo gani nga natapos na ang pelikula sa dihang mitaligsik.

Sa misunod nga katuigan, si Melody ug ako mibiyahe ngadto sa kadaghanang dapit sa India. Tungod kay ang kada lugar adunay kaugalingong matang sa pagkaon, sinina, pinulongan, ug talan-awon, sama ra kadtog nagbiyahe kami sa lainlaing nasod. Pagkanindot sa kadaiyahan diha sa mga linalang ni Jehova! Tinuod usab kana sa ihalas nga mga mananap sa India. Kas-a, samtang kami nagkampo sa lasang sa Nepal, kita kaayo namo ang usa ka dakong tigre. Matahom kaayo kadtong mananapa. Ang pagkakita niana nagpalig-on sa among tinguha nga makaadto sa Paraiso, diin sa kataposan aduna nay pakigdait tali sa mga tawo ug mga mananap.

Organisasyonal nga mga Kauswagan

Niadtong panahona, ang mga igsoon sa India kinahanglang mopahiuyon sa organisasyonal nga mga kahikayan ni Jehova. Diha sa pipila ka kongregasyon, ang mga lalaki manglingkod sa usa ka bahin sa tigomanan samtang ang mga babaye manglingkod sa pikas bahin. Ang mga tigom talagsa rang magsugod nga untop sa panahon. Sa usa ka dapit, ang  kusog nga bagting sa kampana maoy magpahibalo sa mga magmamantala sa Gingharian nga kinahanglan nang moadto sa tigomanan. Sa ubang mga dapit, ang mga magmamantala mag-agad sa posisyon sa adlaw sa pagtino sa oras sa ilang pagtambong sa mga tigom. Ang mga asembliya ug mga duaw sa mga magtatan-aw sa sirkito dili regular. Ang mga igsoon andam nga mohimo kon unsay husto, apan sila nagkinahanglag pagbansay.

Sa 1959, gisugdan sa organisasyon ni Jehova ang Tunghaan sa Ministeryo sa Gingharian. Kining tibuok-kalibotang programa sa pagbansay nakatabang sa mga magtatan-aw sa sirkito, espesyal payunir, misyonaryo, ug mga ansiyano sa kongregasyon sa pagtuman sa ilang Kasulatanhong mga responsibilidad sa mas epektibong paagi. Sa dihang ang maong tunghaan nagsugod sa India niadtong Disyembre 1961, ako nag-alagad ingong instruktor sa klase. Sa hinayhinay, ang mga resulta sa maong pagbansay nakabenepisyo sa mga kongregasyon sa tibuok nasod, ug kini kusog nga miuswag. Sa dihang ang mga igsoon nahibalo kon unsay husto, ang espiritu sa Diyos nagtukmod kanila sa pagbuhat niana.

Ang dagkong mga kombensiyon nagdasig ug naghiusa usab sa mga igsoon. Ang talagsaon niining maong mga kombensiyon mao ang “Walay-Kataposang Maayong Balita” nga Internasyonal nga Asembliya sa New Delhi niadtong 1963. Ang mga Saksi gikan sa lainlaing dapit sa India mibiyahe ug libolibong kilometros aron sa pagtambong sa maong asembliya, nga daghan kanila naggasto sa ilang tanang tinigom nga kuwarta aron lang makatambong. Tungod kay nanambong usab ang 583 ka delegado gikan sa 27 pa ka nasod, mao kadto ang unang higayon nga ang mga Saksi sa India nakahimamat ug nakapakig-uban sa daghan kaayong bisita nga mga igsoon.

Sa 1961, si Melody ug ako gidapit nga mahimong bahin sa pamilyang Bethel sa Bombay, diin sa ulahi ako nag-alagad ingong membro sa Komite sa Sanga. Nakadawat pa ako ug laing mga pribilehiyo. Sulod sa daghang katuigan, ako nag-alagad ingong magtatan-aw sa sona sa mga bahin sa Asia ug sa Tungang Sidlakan. Tungod kay ang buluhatong pagsangyaw gidili man diha sa kadaghanan niining mga nasora, ang mga magmamantala didto kinahanglang ‘magmabinantayon ingon sa mga halas apan inosente ingon sa mga salampati.’—Mateo 10:16.

Pag-uswag ug mga Kausaban

Pag-abot namo sa India niadtong 1959, 1,514 ka magmamantala ang aktibo sa maong nasod. Karon, ang mga magmamantala miabot na ug kapin sa 24,000. Aron maatiman kining maong pag-uswag, kaduha mi mamalhin ug bag-ong puy-anang Bethel diha o duol sa Bombay. Unya, sa Marso 2002, ang pamilyang Bethel mibalhin na usab—niining panahona sa usa ka bag-ong pundok sa mga bilding nga gitukod duol sa Bangalore, sa habagatang India. Sa pagkakaron, kining modernong pasilidad gipuy-an sa 240 ka membro sa Bethel, nga ang pipila kanila naghubad ug literatura sa Bibliya ngadto sa 20 ka pinulongan.

Bisan tuod si Melody ug ako naghinamhinam pagbalhin ngadto sa Bangalore, tungod sa dili-maayong panglawas kami napugos pagpauli sa Australia niadtong 1999. Karon kami nag-alagad ingong mga membro sa pamilyang Bethel sa Sydney. Bisan tuod wala na kami sa India, ang among gugma alang sa among minahal nga mga higala ug espirituwal nga mga anak nianang nasora lig-on gihapon. Pagkamakalilipay nga makadawat ug mga sulat gikan kanila!

Sa paghinumdom sa kapin sa 50 ka tuig nga bug-os-panahong pag-alagad, si Melody ug ako mibati nga kami dagayang gipanalanginan. Kaniadto, kami naghago aron matipigan ang mga hulagway sa mga tawo diha sa letrato, apan ang paghago aron sa pagtipig sa mga tawo nga buhi diha sa panumdoman sa Diyos maoy labing maayo. Pagkanindot sa among mga eksperyensiya tungod sa among desisyon nga unahon ang kabubut-on sa Diyos sa among kinabuhi! Oo, ang pagbuhat sa kon unsay giingon sa Diyos nga husto mosangpot gayod sa kalipay!

[Mga mapa sa panid 15]

(Alang sa aktuwal nga pagkahan-ay, tan-awa ang publikasyon)

INDIA

New Delhi

Darjeeling

Bombay (Mumbai)

Bangalore

Madras (Chennai)

Tiruchchirappalli

[Mga hulagway sa panid 13]

Sila si Hadyn ug Melody sa 1942

[Hulagway sa panid 16]

Ang pamilyang Bethel sa India, sa 1975