“Kinahanglang Among Sugton ang Diyos Ingong Magmamando Inay ang mga Tawo”

Giluwas Pinaagi sa “Bililhong Dugo”

ANG kinalabwang buhat sa gugma ni Jehova mao ang pagpadala sa iyang bugtong nga Anak aron sa pagtanyag sa iyang hingpit nga tawhanong kinabuhi ingong usa ka lukat. Kay kita mga makasasala man, kita nagkinahanglan gayod niana nga lukat, sanglit wala may tawong dili-hingpit nga ‘sa bisan unsang paagi . . . makatubos sa usa ka igsoon, ni makahatag sa Diyos ug usa ka lukat alang kaniya . . . aron siya makapabiling buhi hangtod sa kahangtoran.’ (Salmo 49:6-9) Pagkamapasalamaton nato nga “gihatag [sa Diyos] ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan”!—Juan 3:16.

Sa unsang paagi ang lukat makaluwas kanato? Atong hisgotan ang upat ka paagi aron kita makabaton ug kagawasan ingong resulta niining dakong buhat sa gugma ni Jehova nga Diyos.

Nakabaton ug Kagawasan Pinaagi sa Lukat

Una, ang halad ni Jesus makaluwas kanato gikan sa napanunod nga sala. Kitang tanan nangatawo sa sala. Oo, kita makasasala bisan wala pa kita makalapas sa balaod ni Jehova. Sa unsang paagi? Ang Roma 5:12 nag-ingon: “Ang sala misulod sa kalibotan pinaagi sa usa ka tawo [Adan] ug ang kamatayon pinaagi sa sala.” Ingong mga anak sa makasasalang si Adan, atong napanunod ang iyang pagkadili-hingpit. Hinunoa, ang bayad sa lukat nagpaposible nga kita mahigawas sa pagkaulipon sa napanunod nga sala. (Roma 5:16) Si Jesus ‘nakatilaw ug kamatayon alang sa matag tawo,’ nga nagpas-an sa mga resulta sa sala sa mga kaliwat ni Adan.—Hebreohanon 2:9; 2 Corinto 5:21; 1 Pedro 2:24.

Ikaduha, ang lukat makatubos kanato gikan sa makamatay nga mga epekto sa sala. “Ang suhol nga ginabayad sa sala mao ang kamatayon.” (Roma 6:23) Ang silot sa sala maoy kamatayon. Pinaagi sa paghalad sa iyang kinabuhi diha sa kamatayon, gipaposible sa Anak sa Diyos nga makabaton ug kinabuhing walay kataposan ang masinugtanong katawhan. Sa pagkatinuod, “siya nga magpasundayag ug pagtuo sa Anak adunay kinabuhing walay kataposan; siya nga dili mosugot sa Anak dili makakita sa kinabuhi.”—Juan 3:36.

Matikdi nga kita maluwas lamang gikan sa mga epekto sa sala kon kita magpasundayag ug pagtuo sa Anak sa Diyos. Nalangkit niini ang paghimog mga kausaban sa atong kinabuhi ug ipahiuyon kini sa kabubut-on sa Diyos. Kinahanglan nga atong isalikway ang bisan unsang sayop nga dalan nga tingali atong ginasubay ug kinahanglang molihok sa pagbuhat sa kon unsay makapahimuot sa Diyos. Si apostol Pedro nag-ingon nga kita kinahanglang ‘maghinulsol ug mamalik aron mapapas ang atong mga sala.’—Buhat 3:19.

Ikatulo, pinaagi sa gitanyag nga halad ni Jesus kita dili na mag-antos ug sad-an nga konsensiya. Ang tanan nga magpahinungod kang Jehova ug mahimong bawtismadong mga tinun-an sa iyang Anak makabaton ug kahupayan. (Mateo 11:28-30) Bisan pa sa atong pagkadili-hingpit, kita malipayon kaayong makaalagad sa Diyos uban ang hinlo nga konsensiya. (1 Timoteo 3:9; 1 Pedro 3:21) Kon atong isugid ang atong mga sala ug mohunong sa pagbuhat ug daotan, kita kaluy-an ug makabaton ug kahupayan gikan sa nahasol nga konsensiya.—Proverbio 28:13.

Nagtaganag Tabang ug Paglaom

Sa kataposan, pinaagi sa pagpasundayag ug pagtuo sa lukat, kita maluwas gikan sa kahadlok maylabot sa atong baroganan atubangan sa Diyos. Si apostol Juan misulat: “Kon adunay makasala, kita adunay usa ka magtatabang ngadto sa Amahan, si Jesu-Kristo.” (1 Juan 2:1) Mahitungod sa papel ni Jesus ingong magtatabang, si apostol Pablo misulat:  “Siya makahimo usab sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.” (Hebreohanon 7:25) Samtang kita makasasala pa, kita nagkinahanglan sa pag-alagad sa Hataas nga Saserdote nga si Jesu-Kristo aron sa pagtabang kanato nga makabaton ug matarong nga baroganan atubangan sa Diyos. Sa unsang paagi si Jesus milihok ingong hataas nga saserdote alang kanato?

Kap-atan ka adlaw human sa iyang pagkabanhaw sa 33 K.P., si Jesus mikayab sa langit, diin iyang gitanyag ang bili sa iyang “bililhong dugo” ngadto sa Diyos. Tungod niini, si Jesus sa dili madugay magpahigawas sa katawhan gikan sa sala ug kamatayon. * (1 Pedro 1:18, 19) Busa, dili ka ba mouyon nga si Jesu-Kristo takos sa atong gugma ug pagkamasinugtanon?

Dugang pa, takos si Jehova nga Diyos sa atong gugma ug pagkamasinugtanon. Siya sa pagkamahigugmaon maoy naghatag kanato ug “kagawasan pinaagi sa lukat.” (1 Corinto 1:30) Kita nakautang kaniya dili lamang sa atong kinabuhi karon kondili sa bisan unsang palaaboton usab nato sa pagtagamtam ug kinabuhing walay kataposan. Busa, angay gayod nga atong ‘sugton ang Diyos ingong magmamando inay ang mga tawo.’—Buhat 5:29.

[Footnote]

[Kahon/Mga hulagway sa panid 9]

NAHIBALO KA BA?

• Si Jesus mikayab sa langit gikan sa Bukid sa mga Olibo.—Buhat 1:9, 12.

• Ang matinumanong mga apostoles ni Jesus lamang ang nakasaksi sa iyang pagkayab sa langit.—Buhat 1:2, 11-13.