Magpahilayo sa Bakak nga Pagsimba!
Magpahilayo sa Bakak nga Pagsimba!
“‘Gumula kamo gikan sa ilang taliwala, ug ilain ang inyong kaugalingon,’ nagaingon si Jehova, ‘ug hunong na sa paghikap sa mahugaw nga butang.’”—2 CORINTO 6:17.
1. Unsay espirituwal nga kahimtang sa daghang sinserong mga tawo?
DAGHANG sinserong mga tawo ang wala mahibalo sa kamatuoran bahin sa Diyos ug sa kaugmaon sa katawhan. Kay wala makakaplag sa gikinahanglan kaayong mga tubag sa ilang mga pangutana labot niana, sila naglibog pag-ayo ug mibating walay kasegurohan. Milyonmilyon ang naulipon sa mga patuotuo, rituwal, ug mga selebrasyon nga makapasuko sa atong Maglalalang. Lagmit, ikaw may mga silingan ug mga paryente nga nagtuo sa usa ka kalayonhong impiyerno, sa usa ka trinidad nga Diyos, sa pagkadili-mamatay sa kalag, o sa ubang bakak nga pagtulon-an.
2. Unsay nahimo sa mga lider sa relihiyon, ug unsay resulta?
2 Kinsay responsable niining kaylap nga espirituwal nga kangitngit? Makapatingala nga ang relihiyon maoy responsable niini—sa espesipiko ang relihiyosong mga organisasyon ug mga lider nga nagtudlo ug mga ideya nga supak sa mga hunahuna sa Diyos. (Marcos 7:7, 8) Tungod niini, daghang tawo ang nalimbongan sa pagtuo nga sila nagsimba sa matuod nga Diyos, apan sa tinuoray ilang gipasuko siya. Ang bakak nga relihiyon maoy direktang responsable niining makapasubo nga kahimtang.
3. Kinsa ang pangunang tigpasiugda sa bakak nga relihiyon, ug giunsa siya paghubit diha sa Bibliya?
3 Adunay dili-makita nga persona nga nagpaluyo sa bakak nga relihiyon. Nagtumong kaniya, si apostol Pablo miingon: “Ang diyos niini nga sistema sa mga butang nagbuta sa mga hunahuna sa mga dili-magtutuo, aron nga ang kahayag sa mahimayaong maayong balita bahin kang Kristo, nga mao ang larawan sa Diyos, dili makadan-ag.” (2 Corinto 4:4) “Ang Diyos niini nga sistema sa mga butang” walay lain kondili si Satanas nga Yawa. Siya mao ang pangunang tigpasiugda sa bakak nga pagsimba. “Si Satanas kanunayng naghimo sa iyang kaugalingon nga usa ka manulonda sa kahayag,” misulat si Pablo. “Busa dili talagsaon kon ang iyang mga ministro usab kanunayng maghimo sa ilang kaugalingon nga mga ministro sa pagkamatarong.” (2 Corinto 11:14, 15) Himoon ni Satanas ang daotang mga butang nga morag maayong tan-awon ug limbongan ang mga tawo aron motuo sa iyang mga bakak.
4. Unsay gisulti sa Balaod sa Diyos ngadto sa karaang Israel bahin sa mini nga mga manalagna?
4 Mao diay nga gihukman gayod sa Bibliya ang bakak nga relihiyon! Pananglitan, ang Moisesnong Balaod espesipikong nagpasidaan sa piniling katawhan sa Diyos batok sa mini nga mga manalagna. Si bisan kinsa nga magpasiugda ug bakak nga mga pagtulon-an ug sa pagsimba sa mini nga mga diyos ‘pagapatyon tungod kay siya nagsultig pagsukol batok kang Jehova.’ Ang mga Israelinhon gisugo nga ‘kuhaon ang daotan gikan sa ilang taliwala.’ (Deuteronomio 13:1-5) Oo, giisip ni Jehova ang bakak nga relihiyon ingong daotan.—Ezequiel 13:3.
5. Unsang mga pasidaan ang angay natong patalinghogan karon?
5 Gipabanaag ni Jesu-Kristo ug sa iyang mga apostoles ang kayugot ni Jehova batok sa bakak nga relihiyon. Gipasidan-an ni Jesus ang iyang mga tinun-an: “Pagbantay sa mini nga mga manalagna nga manganha kaninyo nga nagsapot sa pagkakarnero, apan sa sulod sila maoy mga lobo nga manunukob.” (Mateo 7:15; Marcos 13:22, 23) Si Pablo misulat nga “ang kapungot sa Diyos gipadayag gikan sa langit batok sa tanang pagkadili-diyosnon ug pagkadili-matarong sa mga tawo nga nagsugpo sa kamatuoran.” (Roma 1:18) Hinungdanon gayod nga patalinghogan sa matuod nga mga Kristohanon kining maong mga pasidaan ug likayan si bisan kinsa nga nagtago sa kamatuoran sa Pulong sa Diyos o nagpakaylap sa bakak nga mga pagtulon-an!—1 Juan 4:1.
Gumula Kamo Gikan sa “Dakong Babilonya”
6. Sa unsang paagi ang “Dakong Babilonya” gilarawan diha sa Bibliya?
6 Tagda kon sa unsang paagi ang basahon sa Bibliya sa Pinadayag naghubit sa bakak nga relihiyon. Kini gilarawan ingong hubog nga bigaon nga nag-impluwensiya sa daghang gingharian ug sa katawhan niini. Kining mahulagwayong babaye nakighilawas sa daghang hari ug nahubog sa dugo sa matuod nga mga magsisimba sa Diyos. (Pinadayag 17:1, 2, 6, 18) Adunay ngalan nga nasulat sa iyang agtang nga mohaom sa iyang mahugaw ug mangil-ad nga panggawi. Ang ngalan maoy “Dakong Babilonya, ang inahan sa mga bigaon ug sa dulumtanang mga butang sa yuta.”—Pinadayag 17:5.
7, 8. Sa unsang paagi ang bakak nga relihiyon namampam, ug unsay mga resulta?
7 Ang paghubit sa Kasulatan sa Dakong Babilonya mohaom sa tanang bakak nga relihiyon sa kalibotan. Bisan tuod ang libolibong relihiyon dili opisyal nga nahiusa ingong usa ka tibuok-kalibotang organisasyon, sila nagkahiusa gayod sa katuyoan ug binuhatan. Ingon sa paglarawan sa imoral nga babaye diha sa Pinadayag, ang bakak nga relihiyon adunay dakong impluwensiya sa mga kagamhanan. Susama sa usa ka babaye nga dili matinud-anon sa iyang mga panumpa sa kaminyoon, ang bakak nga relihiyon namampam pinaagi sa pagpakig-alyansa sa lainlaing politikanhong mga gahom. “Mga mananapaw, wala ba kamo mahibalo nga ang pagpakighigala sa kalibotan maoy pagpakig-away sa Diyos?” misulat ang disipulo nga si Santiago. “Busa, bisan kinsa nga buot makighigala sa kalibotan maghimo sa iyang kaugalingon nga kaaway sa Diyos.”—Santiago 4:4.
8 Kining panag-alyansa sa bakak nga relihiyon ug sa mga kagamhanan misangpot sa grabeng pag-antos sa tawo. Ang Aprikanong tig-analisar sa politika nga si Dr. Xolela Mangcu nag-ingon nga “ang kasaysayan sa kalibotan adunay daghang pananglitan sa pinakyaw nga pagpamatay nga nahitabo tungod sa panag-alyansa sa relihiyon ug politika.” Ang usa ka mantalaan miingon di pa dugay: “Ang labing dugoon ug labing peligroso nga mga panagbangi karon . . . nasentro sa relihiyon.” Milyonmilyong tawo ang nangamatay diha sa mga gubat nga gipaluyohan sa relihiyon. Ang Dakong Babilonya naglutos ug nagpatay pa gani sa matuod nga mga alagad sa Diyos, sa ingon nahubog sa ilang dugo, ingnon ta.—Pinadayag 18:24.
9. Sa unsang paagi ang pagdumot ni Jehova sa bakak nga pagsimba gipahayag diha sa basahon sa Pinadayag?
9 Ang pamatuod nga gidumtan ni Jehova ang bakak nga pagsimba klarong makita diha sa mahitabo unya sa Dakong Babilonya. Ang Pinadayag 17:16 nag-ingon: “Ang napulo ka sungay nga imong nakita, ug ang mapintas nga mananap, kini sila magadumot sa bigaon ug magalaglag ug magahubo kaniya, ug magakaon sa iyang unod ug magaugdaw kaniya sa kalayo.” Una, ang usa ka dakong mananap magwataswatas kaniya hangtod siya mamatay ug magakaon sa iyang unod. Dayon, ang bisan unsa nga mahibilin sa iyang lawas pagaut-oton sa kalayo. Sa samang paagi, ang mga kagamhanan sa kalibotan sa dili madugay molihok na sa pagtapos sa bakak nga relihiyon. Ang Diyos maoy magtukmod kanila sa pagbuhat niana. (Pinadayag 17:17) Ang Dakong Babilonya, ang tibuok-kalibotang imperyo sa bakak nga relihiyon, tinong pagalaglagon. “Siya dili na gayod igkita pa.”—Pinadayag 18:21.
10. Unsay atong baroganan maylabot sa bakak nga relihiyon?
10 Unsay baroganan sa matuod nga mga Kristohanon maylabot sa Dakong Babilonya? Ang Bibliya klaro kaayong nagsugo: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.” (Pinadayag 18:4) Kadtong gustong maluwas kinahanglang mogula sa bakak nga relihiyon sa dili pa ulahi ang tanan. Sa dinhi pa sa yuta, si Jesu-Kristo nagtagna nga sa kataposang mga adlaw, daghan ang mangangkon lamang nga nagsunod kaniya. (Mateo 24:3-5) Nianang mga tawhana, siya nag-ingon: “Wala gayod ako makaila kaninyo! Pahilayo gikan kanako, kamong mga mamumuhat sa kalapasan.” (Mateo 7:23) Ang naentrono na nga Hari, si Jesu-Kristo, nagsalikway sa bakak nga relihiyon.
Magpahilayo—Sa Unsang Paagi?
11. Unsay angay natong buhaton aron makapahilayo sa bakak nga pagsimba?
11 Ang matuod nga mga Kristohanon magpahilayo sa bakak nga pagsimba, nga magsalikway sa bakak nga relihiyosong mga pagtulon-an. Kini nagpasabot nga kita dili maminaw o motan-aw sa relihiyosong mga programa diha sa radyo ug telebisyon ug dili mobasa sa relihiyosong literatura nga nagpakaylap ug mga bakak bahin sa Diyos ug sa iyang Pulong. (Salmo 119:37) Maalamon usab nga kita dili motambong sa mga salo-salo ug mga kalingawan nga gipaluyohan sa bisan unsang organisasyon nga nalangkit sa bakak nga relihiyon. Dugang pa, kita dili mopaluyo sa bisan unsang paagi sa bakak nga pagsimba. (1 Corinto 10:21) Ang paglikay niining mga butanga manalipod kanato nga ‘dili madagit pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.’—Colosas 2:8.
12. Sa unsang paagi maputol sa usa ka tawo ang iyang kalambigitan sa bakak nga relihiyosong mga organisasyon?
12 Komosta kon ang usa ka tawo nga gustong mahimong usa sa mga Saksi ni Jehova sa pagkakaron maoy membro sa bakak nga relihiyon? Kasagaran, ang usa ka sulat sa pagluwat magsilbing pamatuod nga ang usa ka tawo dili na gustong isipon ingong membro sa usa ka bakak nga relihiyon. Ilabinang hinungdanon nga ang maong tawo molihok dayon aron bug-os nga malikayan ang bisan unsang matang sa espirituwal nga kahugawan gikan sa bakak nga pagsimba. Ang mga lihok sa usa nga gustong mag-Saksi kinahanglang klarong magpakita ngadto sa relihiyosong organisasyon ug sa publiko nga dili na siya membro nianang relihiyona.
13. Unsang tambag ang gihatag sa Bibliya mahitungod sa panginahanglan nga magpahilayo sa bakak nga pagsimba?
13 “Ayaw pagpayugo nga dili timbang sa mga dili-magtutuo,” misulat si apostol Pablo. “Kay aduna bay panag-ubanay ang pagkamatarong ug ang kalapasan? O aduna bay pakig-ambitay ang kahayag uban sa kangitngit? Dugang pa, aduna bay panag-uyon tali kang Kristo ug Belial? O aduna bay bahin ang tawong matinuohon uban sa usa ka dili-magtutuo? Ug aduna bay panag-uyon ang templo sa Diyos uban sa mga idolo? . . . ‘Busa gumula kamo gikan sa ilang taliwala, ug ilain ang inyong kaugalingon,’ nagaingon si Jehova, ‘ug hunong na sa paghikap sa mahugaw nga butang.’” (2 Corinto 6:14-17) Kita nagpatalinghog niining mga pulonga pinaagi sa pagpahilayo sa bakak nga pagsimba. Ang tambag ba ni Pablo nagpasabot nga kita kinahanglang magpahilayo usab sa mga magsisimba sa bakak nga relihiyon?
“Padayon sa Paglakaw Diha sa Kaalam”
14. Kinahanglan bang likayan nato sa bug-os kadtong nakigbahin sa bakak nga pagsimba? Ipatin-aw.
14 Kinahanglan bang likayan sa matuod nga mga magsisimba ang tanang tawo nga nakigbahin sa bakak nga pagsimba? Kita ba bug-os nga dili makig-uban niadtong mga tawo nga dili sama natog pagtuo? Ang tubag maoy dili. Ang ikaduha sa kinadak-ang mga sugo nag-ingon: “Higugmaon mo ang imong silingan sama sa imong kaugalingon.” (Mateo 22:39) Kita tinong nagpasundayag ug gugma sa atong mga silingan sa dihang kita nagpaambit kanila sa maayong balita sa Gingharian. Mapakita usab nato ang atong gugma kanila sa dihang ato silang tun-an sa Bibliya ug pahibaloon sa panginahanglan nga magpahilayo sa bakak nga pagsimba.
15. Unsay kahulogan sa pagkahimong “dili bahin sa kalibotan”?
15 Bisan tuod kita nagwali sa maayong balita ngadto sa atong mga silingan, ingong mga sumusunod ni Jesus kita ‘dili bahin sa kalibotan.’ (Juan 15:19) Ang terminong “kalibotan” dinhi nagtumong sa tawhanong katilingban nga nahimulag sa Diyos. (Efeso 4:17-19; 1 Juan 5:19) Kita bulag sa kalibotan sa pagkaagi nga atong likayan ang mga tinamdan, sinultihan, ug panggawi nga makapasuko kang Jehova. (1 Juan 2:15-17) Dugang pa, kaharmonya sa prinsipyo nga “ang daotang pakig-uban makadaot sa mapuslanong pamatasan,” kita dili makigsuod niadtong wala magkinabuhi sumala sa Kristohanong mga sukdanan. (1 Corinto 15:33) Ang pagkahimong dili bahin sa kalibotan nagpasabot ug pagpabiling “dili mahugawan sa kalibotan.” (Santiago 1:27) Busa, ang pagkahimong bulag sa kalibotan wala magpasabot nga ibulag nato ang atong kaugalingon sa ubang mga tawo.—Juan 17:15, 16; 1 Corinto 5:9, 10.
16, 17. Sa unsang paagi trataron sa mga Kristohanon kadtong wala mahibalo sa kamatuoran sa Bibliya?
16 Nan, sa unsang paagi nato trataron kadtong wala mahibalo sa mga kamatuoran sa Bibliya? Ngadto sa kongregasyon sa Colosas, si Pablo misulat: “Magpadayon sa paglakaw sa kaalam ngadto sa mga tagagawas, nga magpalit sa nahiangay nga panahon alang sa inyong kaugalingon. Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.” (Colosas 4:5, 6) Si apostol Pedro misulat: “Balaana si Kristo ingong Ginoo diha sa inyong mga kasingkasing, nga andam kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.” (1 Pedro 3:15) Gitambagan ni Pablo ang mga Kristohanon nga “dili magsultig daotan mahitungod kang bisan kinsa, dili palaaway, makataronganon, magpasundayag ug bug-os nga kalumo sa tanang tawo.”—Tito 3:2.
17 Ingong mga Saksi ni Jehova, kita dili mogawi nga bastos o mapahitas-on sa uban. Dili gayod nato tamayon ang mga tawo sa ubang mga relihiyon. Hinunoa, kita mataktikanhon, bisan pag ang tagbalay, silingan, o kauban sa trabaho dili maluloton o manginsulto kanato.—Colosas 4:6; 2 Timoteo 2:24.
“Magpadayon sa Paghupot sa Sumbanan sa Makapahimsog nga mga Pulong”
18. Unsang makapasubong espirituwal nga kahimtang ang masinati niadtong mobalik sa bakak nga pagsimba?
18 Human makat-oni ang mga kamatuoran sa Bibliya, pagkamakapasubo kon ang usa mobalik sa bakak nga pagsimba! Gihubit sa Bibliya ang makapasubong mga sangpotanan sa maong dalan sa dihang kini nag-ingon: “Dayag nga kon, human makaikyas gikan sa mga kahugawan sa kalibotan pinaagi sa tukmang kahibalo sa Ginoo ug Manluluwas nga si Jesu-Kristo, sila malangkit pag-usab niini mismong mga butanga ug mabuntog, ang kataposang mga kahimtang mahimong labi pang daotan alang kanila kay sa nahauna. . . . Ang mga pulong sa matuod nga panultihon nahitabo kanila: ‘Ang iro mibalik sa iyang sinuka, ug ang anay nga naligoan na mibalik pagligid sa lapok.’”—2 Pedro 2:20-22.
19. Nganong hinungdanon nga magpabiling alisto sa bisan unsa nga magpameligro sa atong espirituwalidad?
19 Kinahanglang magmaalisto kita sa bisan unsa nga magpameligro sa atong espirituwalidad. Aduna gayoy mga kapeligrohan! Si apostol Pablo nagpasidaan: “Ang inspiradong pulong nag-ingon gayod nga sa ulahing mga yugto sa panahon adunay pipila nga mangahulog gikan sa pagtuo, nga magtagad sa nagpahisalaag nga inspiradong mga pulong ug mga pagtulon-an sa mga demonyo.” (1 Timoteo 4:1) Kita nagkinabuhi sa “ulahing mga yugto sa panahon.” Kadtong dili magpahilayo sa bakak nga pagsimba “gituyatuya sa mga balod ug gidala ngadto-nganhi sa matag hangin sa pagtulon-an pinaagi sa paglingla sa mga tawo, pinaagi sa kamalipatlipaton sa pagmugnag sayop.”—Efeso 4:13, 14.
20. Sa unsang paagi mapanalipdan nato ang atong kaugalingon batok sa makadaot nga impluwensiya sa bakak nga relihiyon?
20 Sa unsang paagi mapanalipdan nato ang atong kaugalingon batok sa makadaot nga impluwensiya sa bakak nga relihiyon? Palandonga ang tanan nga gitagana ni Jehova. Atong nabatonan ang Pulong sa Diyos, ang Bibliya. (2 Timoteo 3:16, 17) Si Jehova nagtagana usab ug dagayang espirituwal nga pagkaon pinaagi sa “matinumanon ug maalamon nga ulipon.” (Mateo 24:45) Samtang kita mouswag diha sa kamatuoran, dili ba angay natong ugmaron ang gana sa ‘gahing pagkaon nga alang sa mga tawong hamtong’ ug ang tinguha nga magtigom diin kita makakat-on ug espirituwal nga mga kamatuoran? (Hebreohanon 5:13, 14; Salmo 26:8) Hinaot nga magmadeterminado kita nga pahimuslan sa bug-os ang mga tagana ni Jehova aron kita ‘makapadayon sa paghupot sa sumbanan sa makapahimsog nga mga pulong’ nga atong nadungog. (2 Timoteo 1:13) Sa ingon, makapahilayo kita gikan sa bakak nga pagsimba.
Unsay Imong Nakat-onan?
• Unsa ang “Dakong Babilonya”?
• Unsay angay natong buhaton aron makapahilayo sa bakak nga relihiyon?
• Unsang mga kapeligrohan sa atong espirituwalidad ang angay natong likayan?
[Mga Pangutana sa Pagtuon]
[Hulagway sa panid 28]
Nahibalo ka ba kon nganong ang “Dakong Babilonya” gihulagway ingong imoral nga babaye?
[Hulagway sa panid 29]
Ang “Dakong Babilonya” tinong pagalaglagon
[Hulagway sa panid 31]
Kita magpakita ug “kalumo sa buot ug halawom nga pagtahod” niadtong dili sama natog pagtuo