Mga Pangutana Gikan sa mga Magbabasa

Unsay atong makat-onan sa pagdili nga mabasa sa Exodo 23:19: “Dili mo lat-an ang nating kanding sa gatas sa inahan niini”?

Kini nga sugo sa Moisesnong Balaod, nga tulo ka beses nga mabasa sa Bibliya, makatabang kanato sa pagsabot sa panglantaw ni Jehova sa kon unsay nahiangay, sa iyang pagkamabination, ug sa iyang kalumo. Kini nagpasiugda usab sa iyang pagdumot sa bakak nga pagsimba.—Exodo 34:26; Deuteronomio 14:21.

Ang paglata sa nating kanding o sa ubang mananap sa gatas sa inahan niini supak sa balaod ni Jehova sa kinaiyahan. Gitagana sa Diyos ang gatas sa inahan ingong pagkaon sa nati nga makatabang sa pagdako niini. Ang pagluto sa nating kanding sa gatas sa iyang inahan, matod pa sa usa ka eskolar, nagpakitag “kawalay-pagtahod sa relasyon tali sa inahan ug anak nga gilig-on ug gibalaan sa Diyos.”

Dugang pa, ang uban nag-ingon nga ang paglata sa nating kanding sa gatas sa inahan niini lagmit maoy usa ka paganong rituwal nga gihimo aron sa pagpatunghag ulan. Kon mao, ang pagdili nanalipod sa mga Israelinhon batok sa binuang ug linuog nga relihiyosong mga buhat sa mga nasod sa ilang palibot. Ang Moisesnong Balaod espesipikong nagdili sa mga Israelinhon sa pagsubay sa mga lagda nianang mga nasora.—Levitico 20:23.

Sa kataposan, atong nakita sa maong balaod ang malumong pagbati ni Jehova. Sa pagkatinuod, ang Balaod adunay susamang mga sugo nga nagdili sa pagmaltratar sa mga mananap ug nanalipod kanila batok niadtong mosupak sa balaod sa kinaiyahan. Pananglitan, nalakip sa Balaod ang mga sugo nga nagdili sa paghalad sa mananap gawas kon kini nakauban na sa inahan niini labing menos sulod sa pito ka adlaw, pag-ihaw sa mananap ug sa anak niini sa mao ra nga adlaw, ug sa pagkuha sa inahan ug sa iyang mga itlog o kuyabog gikan sa salag niini.—Levitico 22:27, 28; Deuteronomio 22:6, 7.

Klaro nga ang Balaod dili kay usa lamang ka komplikado nga hugpong sa mga lagda ug mga pagdili. Usa sa mga kaayohan sa Balaod mao nga ang mga prinsipyo niini makatabang kanato sa pagpauswag sa atong moral nga pagbati nga tukmang nagbanaag sa kahibulongang mga hiyas ni Jehova.—Salmo 19:7-11.

[Picture Credit Line sa panid 31]

© Timothy O’Keefe/Index Stock Imagery