Pagkab-ot sa mga Kinahanglanon sa Kristohanong Bawtismo
Pagkab-ot sa mga Kinahanglanon sa Kristohanong Bawtismo
“Unsay nakapugong kanako nga mabawtismohan?”—BUHAT 8:36.
1, 2. Sa unsang paagi gisugdan ni Felipe ang pagpakig-estorya sa usa ka Etiopianhong opisyal, ug unsay nagpamatuod nga kining tawhana interesado sa espirituwal nga mga butang?
USA o duha ka tuig human sa kamatayon ni Jesus, may opisyal sa gobyerno nga nagbiyahe pahabagatan subay sa dalan nga gikan sa Jerusalem paingon sa Gaza. Anaa sa unahan ang kapoy nga biyahe sa karwahe nga tingali moabot ug 1,500 kilometros. Kining debotadong lalaki gikan pa sa Etiopia ug miadto sa Jerusalem aron mosimba kang Jehova. Sa dugay nga panaw sa pagpauli, gigamit niya ang iyang panahon sa maalamong paagi pinaagi sa pagbasa sa Pulong sa Diyos—nga nagpamatuod sa pagtuo nianang tawhana. Nakita ni Jehova kining sinserong tawo, ug pinaagi sa usa ka manulonda, Iyang gitultolan ang disipulong si Felipe aron sangyawan siya.—Buhat 8:26-28.
2 Wala malisdi si Felipe sa pagsugod sa pagpakig-estorya tungod kay ang Etiopianhong opisyal nagbasa ug kusog, nga maoy naandan niadtong mga adlawa. Busa, nadungog ni Felipe nga ang eunuko nagbasa sa linukot nga basahon ni Isaias. Ang yanong pangutana ni Felipe nagpukaw sa interes sa opisyal: “Nakasabot ka ba gayod sa imong ginabasa?” Kini misangpot sa usa ka panaghisgot sa Isaias 53:7, 8. Sa kataposan, “gipahayag [ni Felipe] kaniya ang maayong balita bahin kang Jesus.”—Buhat 8:29-35.
3, 4. (a) Nganong gibawtismohan dayon ni Felipe ang Etiopianhon? (b) Unsang mga pangutana ang atong tagdon karon?
3 Sulod sa mubo nga panahon, nasabtan sa Etiopianhon ang papel ni Jesus diha sa katuyoan sa Diyos, maingon man ang panginahanglan nga mahimong bawtismadong tinun-an ni Kristo. “Unsay nakapugong kanako nga mabawtismohan?” nangutana siya kang Felipe sa dihang nakakita siyag linaw diha sa duol. Siyempre, kini maoy talagsaong panghitabo. Siya maoy usa ka tawo sa pagtuo nga nagsimba na sa Diyos ingong Hudiyong kinabig. Lagmit magpaabot pa siyag dugay una moabot ang laing kahigayonan nga siya mabawtismohan. Labawng hinungdanon, kining tawhana nakasabot kon unsay gikinahanglan sa Diyos kaniya, ug gusto niyang mosanong nga kinasingkasing. Si Felipe malipayong miuyon sa iyang hangyo, ug ang Etiopianhon, human mabawtismohi, “nagpadayon sa pagpanaw nga nagmaya.” Sa walay duhaduha siya nahimong madasigong magwawali sa maayong balita didto sa iyang nasod.—Buhat 8:36-39.
4 Bisan tuod ang pagpahinungod ug pagpabawtismo kinahanglang palandongon pag-ayo sa dili pa himoon, ang pananglitan sa Etiopianhong opisyal nagpakita nga dihay mga higayon diin ang mga indibiduwal nabawtismohan sa wala madugay human nila madungog ang kamatuoran sa Pulong sa Diyos. a Busa, haom nga tagdon ang mosunod nga mga pangutana: Unsang matanga sa pagpangandam ang himoon sa dili pa magpabawtismo? Sa unsang gilapdon nga ang pangedaron makaapektar niini? Unsang espirituwal nga pag-uswag ang angayng makita sa dili pa bawtismohan ang usa ka tawo? Labaw sa tanan, nganong gikinahanglan man ni Jehova sa iyang mga alagad nga himoon kining maong lakang?
Usa ka Seryosong Panaad
5, 6. (a) Sa unsang paagi ang katawhan sa Diyos sa miagi misanong sa gugma ni Jehova? (b) Unsang suod nga relasyon uban sa Diyos ang atong mabatonan sa dihang kita mabawtismohan?
5 Human luwasa ang mga Israelinhon gikan sa Ehipto, si Jehova andam sa pagdawat kanila ingong iyang “linaing katigayonan,” sa paghigugma ug pagpanalipod kanila ug paghimo kanila nga “usa ka balaang nasod.” Apan aron madawat ang maong mga panalangin, ang katawhan kinahanglang mosanong sa gugma sa Diyos sa espesipikong paagi. Gihimo nila kini pinaagi sa pag-uyon sa pagbuhat “sa tanan nga gisulti ni Jehova” ug pagsulod sa usa ka pakigsaad uban kaniya. (Exodo 19:4-9) Sa unang siglo, gisugo ni Jesus ang iyang mga sumusunod sa paghimog mga tinun-an sa katawhan sa tanang kanasoran, ug kadtong midawat sa iyang pagtulon-an gibawtismohan. Ang usa ka maayong relasyon uban sa Diyos nagdepende sa pagtuo kang Jesu-Kristo nga pagasundan sa bawtismo.—Mateo 28:19, 20; Buhat 2:38, 41.
6 Kining maong mga asoy sa Kasulatan nagpakita nga panalanginan ni Jehova kadtong mohimo ug motuman sa seryosong panaad nga moalagad kaniya. Alang sa mga Kristohanon, ang pagpahinungod ug pagpabawtismo maoy kinahanglanong mga lakang nga motultol sa panalangin ni Jehova. Kita determinado nga mosubay sa iyang mga dalan ug magtinguha sa iyang giya. (Salmo 48:14) Sa baylo, si Jehova mahulagwayong nagkupot sa atong kamot ug nag-agak kanato diha sa dalan nga angay natong pagalaktan.—Salmo 73:23; Isaias 30:21; 41:10, 13.
7. Nganong ang pagpahinungod ug pagpabawtismo usa ka personal nga desisyon?
7 Kinahanglan nga ang magtukmod kanato sa paghimo niining maong mga lakang mao ang gugma kang Jehova ug ang tinguha nga alagaron siya. Walay usa ang angayng magpabawtismo tungod lamang kay dunay nag-ingon kaniya nga igo na ang gidugayon sa iyang pagtuon o tungod kay ang iyang mga higala magpabawtismo na. Siyempre, ang mga ginikanan ug ang ubang hamtong nga mga Kristohanon magdasig tingali sa usa ka tawo sa paghunahuna bahin sa pagpahinungod ug pagpabawtismo. Giawhag ni apostol Pedro kadtong nakadungog kaniya sa Pentekostes nga “magpabawtismo.” (Buhat 2:38) Bisan pa niana, ang atong pagpahinungod maoy personal nga butang, ug walay usa nga makahimo niana alang kanato. Kinahanglang kita maoy modesisyon sa pagbuhat sa kabubut-on sa Diyos.—Salmo 40:8.
Igong Pagpangandam Alang sa Bawtismo
8, 9. (a) Nganong ang pagbawtismo sa masuso wala mahiuyon sa Kasulatan? (b) Unsang espirituwal nga pag-uswag ang kinahanglang himoon sa mga batan-on sa dili pa magpabawtismo?
8 Ang mga bata ba makahimo sa pagpahinungod pinasukad sa kahibalo? Ang Kasulatan wala magtakda ug edad nga ang usa magpabawtismo. Bisan pa niana, ang mga masuso tinong dili mahimong mga magtutuo, makapasundayag ug pagtuo, o makapahinungod ngadto sa Diyos. (Buhat 8:12) Mahitungod sa unang-siglong mga Kristohanon, ang historyanong si Augustus Neander nag-ingon diha sa iyang librong General History of the Christian Religion and Church: “Sa sinugdan ang pagbawtismo gihimo ngadto lamang sa mga hamtong, tungod kay ang mga tawo naanad na sa paghunahuna nga ang bawtismo ug pagtuo dakog kalambigitan.”
9 Sa kahimtang sa mga batan-on, ang uban nakaugmad na ug usa ka sukod sa espirituwalidad sa linghod nga pangedaron, samtang ang uban dugaydugay pa. Apan sa dili pa magpabawtismo, ang usa ka batan-on kinahanglang adunay personal nga relasyon kang Jehova, usa ka tukmang pagsabot sa pasukaranang mga pagtulon-an sa Kasulatan, ug usa ka tin-aw nga pagsabot kon unsay nalangkit sa pagpahinungod, sama sa kinahanglanon alang sa mga hamtong.
10. Unsang mga lakang ang angayng himoon sa dili pa magpahinungod ug magpabawtismo?
10 Gihatagan ni Jesus ug instruksiyon ang iyang mga tinun-an nga tudloan ang mga bag-ohan sa tanang butang nga iyang gisugo. (Mateo 28:20) Busa una sa tanan, ang mga bag-ohan kinahanglang makabaton ug tukmang kahibalo sa kamatuoran, nga sa baylo makapaarang kanila sa pag-ugmad ug pagtuo kang Jehova ug sa iyang Pulong. (Roma 10:17; 1 Timoteo 2:4; Hebreohanon 11:6) Unya, sa dihang ang kamatuoran sa Kasulatan modulot sa kasingkasing sa usa ka tawo, kini magpalihok kaniya sa paghinulsol ug pagbiya sa iyang kanhing paagi sa pagkinabuhi. (Buhat 3:19) Sa kataposan, ang usa ka tawo makaabot sa punto diin siya magtinguha na sa pagpahinungod sa iyang kaugalingon kang Jehova ug magpabawtismo, ingon sa gisugo ni Jesus.
11. Nganong hinungdanon nga kita regular nga makig-ambit sa buluhatong pagsangyaw sa dili pa magpabawtismo?
11 Ang laing hinungdanong lakang nga himoon sa dili pa magpabawtismo mao ang pagpakig-ambit sa pagsangyaw sa maayong balita sa Gingharian. Mao kini ang labing hinungdanong buluhaton nga gipabuhat ni Jehova sa iyang katawhan niining kataposang mga adlaw. (Mateo 24:14) Busa ang dili-bawtismadong mga magmamantala makatagamtam sa kalipay sa pagpakigsulti sa uban bahin sa ilang pagtuo. Ang pagpakig-ambit niining buluhatona mag-andam usab kanila alang sa regular ug masiboton nga pagpakigbahin diha sa ministeryo sa kanataran human sa bawtismo.—Roma 10:9, 10, 14, 15.
Aduna bay Nakapugong Kanimo sa Pagpabawtismo?
12. Unsay nakapugong sa pipila sa pagpabawtismo?
12 Ang pipila dili pa magpabawtismo tungod kay sila nagpanuko sa pagdawat sa responsibilidad nga nalangkit niana. Ilang naamgohan nga aron makab-ot ang mga sukdanan ni Jehova, sila kinahanglang mohimog dagkong mga kausaban sa ilang kinabuhi. O nahadlok sila nga malisdan sila sa pagtuman sa mga kinahanglanon sa Diyos human sa bawtismo. Ang uban mangatarongan pa gani, “Basin makasala unya ko ug mapalagpot gikan sa kongregasyon.”
13. Sa adlaw ni Jesus, unsay nakapugong sa pipila ka tawo sa pagkahimong mga sumusunod ni Jesus?
13 Sa adlaw ni Jesus, gitugotan sa uban ang personal nga mga intereses ug mga relasyon sa pamilya nga makapugong kanila sa pagkahimong iyang mga tinun-an. Ang usa ka eskriba miingon nga siya mosunod kang Jesus bisan asa Siya moadto. Apan miingon si Jesus nga sa daghang higayon, wala gani siyay dapit nga kapahulayan sa gabii. Sa dihang gidapit ni Jesus ang laing mamiminaw nga mahimong iyang sumusunod, kining tawhana mitubag nga kinahanglang “ilubong” una niya ang iyang amahan. Lagmit, mas gusto niyang magpabilin sa balay ug maghulat hangtod mamatay ang iyang amahan inay kay mosunod kang Jesus ug atimanon ang maong responsibilidad sa pamilya sa dihang kinahanglanon na. Sa kataposan, ang ikatulong indibiduwal miingon nga sa dili pa mosunod kang Jesus, kinahanglang “manamilit” una siya sa iyang panimalay. Gihubit ni Jesus kanang paglangaylangay ingong ‘paglingi sa mga butang nga anaa sa luyo.’ Busa, kadtong gustong maglangaylangay dayag nga makakita gayod ug mga pasangil sa paglikay sa ilang Kristohanong responsibilidad.—Lucas 9:57-62.
14. (a) Sa unsang paagi si Pedro, Andres, Santiago, ug Juan misanong sa dihang gidapit sila ni Jesus nga mahimong mga mangingisda ug mga tawo? (b) Nganong dili kita angayng magpanuko sa pagdawat sa yugo ni Jesus?
14 Ang panig-ingnan ni Pedro, Andres, Santiago, ug Juan lahi kaayo. Sa dihang gidapit sila ni Jesus sa pagsunod kaniya ug mahimong mga mangingisda ug mga tawo, ang Bibliya nag-ingon: “Dihadiha gibiyaan ang mga pukot, sila misunod kaniya.” (Mateo 4:19-22) Pinaagi sa pagdesisyon dayon nga mosunod kang Jesus, ilang naeksperyensiyahan mismo ang giingon ni Jesus kanila sa ulahi: “Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mateo 11:29, 30) Bisan tuod ang bawtismo naglangkit ug usa ka yugo sa responsibilidad, gipasaligan kita ni Jesus nga kini masayon ug magaan nga makapahayahay gayod kanato.
15. Sa unsang paagi ang mga panig-ingnan ni Moises ug Jeremias nagpakita nga kita makasalig nga madawat ang tabang sa Diyos?
15 Siyempre, normal lang nga mobatig kakulang sa katakos. Si Moises ug Jeremias sa sinugdan mibati nga dili sila makahimo sa gipabuhat ni Jehova kanila. (Exodo 3:11; Jeremias 1:6) Sa unsang paagi gidasig sila sa Diyos? “Ako magauban kanimo,” giingnan niya si Moises. “Ako nagauban kanimo sa pagluwas kanimo,” gisaaran niya si Jeremias. (Exodo 3:12; Jeremias 1:8) Kita usab makasalig sa tabang sa Diyos. Ang paghigugma sa Diyos ug pagsalig kaniya makatabang kanato sa pagbuntog sa nagpabilin nga mga pagduhaduha kon kita ba makatuman sa atong pagpahinungod. “Walay kahadlok diha sa gugma,” misulat si apostol Juan, “hinunoa ang hingpit nga gugma naghingilin sa kahadlok.” (1 Juan 4:18) Ang usa ka gamayng bata mahadlok tingali kon mag-inusara siya sa paglakaw, apan siya masaligon kon siya maglakaw nga nagkupot sa kamot sa iyang amahan. Sa samang paagi, kon kita mosalig kang Jehova uban sa tibuok natong kasingkasing, siya nagsaad nga ‘tul-iron ang atong mga dalan’ samtang kita maglakaw uban kaniya.—Proverbio 3:5, 6.
Usa ka Dungganon nga Okasyon
16. Nganong ang bawtismo naglangkit ug bug-os nga paglusbog sa tubig?
16 Kasagaran, sa dili pa himoon ang pagbawtismo adunay pakigpulong pinasukad sa Kasulatan nga nagpatin-aw sa pagkahinungdanon sa Kristohanong bawtismo. Sa konklusyon niining maong pakigpulong, ang mga kandidato hangyoon sa pagpahayag sa dayag sa ilang pagtuo pinaagi sa pagtubag sa duha ka pangutana sa bawtismo. (Roma 10:10; tan-awa ang kahon sa panid 22.) Dayon ang mga kandidato ilusbog sa tubig, nga nagsunod sa sumbanan nga gihatag ni Jesus mismo. Gipakita sa Bibliya nga human mabawtismohi, si Jesus ‘mihaw-as sa tubig.’ (Mateo 3:16; Marcos 1:10) Klaro nga bug-os nga gilusbog ni Juan Bawtista si Jesus. b Ang bug-os nga paglusbog haom nga nagsimbolo sa dakong kausaban nga atong nahimo sa atong kinabuhi—kita sa mahulagwayong paagi namatay maylabot sa atong kanhing pagkinabuhi ug nagsugod ug bag-ong kinabuhi diha sa pag-alagad sa Diyos.
17. Sa unsang paagi ang mga kandidato sa bawtismo ug ang mga tumatambong makatampo sa dignidad sa maong okasyon?
17 Ang bawtismo maoy seryoso ug malipayon usab nga okasyon. Gipaila sa Bibliya nga si Jesus nag-ampo sa dihang gilusbog siya ni Juan sa Suba sa Jordan. (Lucas 3:21, 22) Kaharmonya sa panig-ingnan ni Jesus, ang mga kandidato sa bawtismo karon kinahanglang magpakita ug dungganong panggawi. Ug tungod kay giawhag kita sa Bibliya nga magbesti nga makasaranganon diha sa atong adlaw-adlaw nga kinabuhi, labi na gayod nga patalinghogan nato kining tambaga sa adlaw sa atong bawtismo! (1 Timoteo 2:9) Ang mga tumatambong makapakita usab ug angayan nga pagtahod pinaagi sa pagpamati pag-ayo sa pakigpulong sa bawtismo ug pagpaniid sa bawtismo sa hapsay nga paagi.—1 Corinto 14:40.
Mga Panalangin nga Matagamtam sa Bawtismadong mga Tinun-an
18, 19. Unsang mga pribilehiyo ug mga panalangin ang mabatonan pinaagi sa pagpabawtismo?
18 Sa dihang kita magpahinungod sa atong kaugalingon ngadto sa Diyos ug mabawtismohan, kita mahimo nang bahin sa usa ka linain nga pamilya. Una sa tanan, si Jehova mahimong atong Amahan ug atong Higala. Kita nahimulag sa Diyos sa wala pa kita mabawtismohi; karon kita mapasig-uli na. (2 Corinto 5:19; Colosas 1:20) Pinaagi sa halad ni Kristo, kita makapakigsuod sa Diyos ug siya makigsuod kanato. (Santiago 4:8) Ang manalagnang si Malaquias naghubit kon sa unsang paagi si Jehova nagtagad ug namati niadtong naggamit ug nagdala sa iyang ngalan, ug iyang iapil ang ilang mga ngalan diha sa iyang basahon sa handomanan. “Sila mahimong akoa gayod,” miingon ang Diyos, “ug ako maluoy kanila, ingon sa usa ka tawo nga naluoy sa iyang anak nga nagaalagad kaniya.”—Malaquias 3:16-18.
19 Pinaagi sa pagpabawtismo kita mahimong bahin sa tibuok-kalibotang panag-igsoonay. Sa dihang si apostol Pedro nangutana kon unsang mga panalangin ang madawat sa mga tinun-an ni Kristo tungod sa mga pagsakripisyo nga ilang nahimo, si Jesus nagsaad: “Ang matag usa nga nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta tungod sa akong ngalan magadawat ug pilo-pilo pa ug makapanunod sa kinabuhing walay kataposan.” (Mateo 19:29) Katuigan sa ulahi, si Pedro misulat bahin sa “tibuok kapunongan sa mga igsoon” nga naugmad “dinhi sa kalibotan.” Si Pedro nakaeksperyensiya mismo sa tabang ug mga panalangin sa usa ka mahigugmaong panag-igsoonay, ug mao man usab kita.—1 Pedro 2:17; 5:9.
20. Unsang maanindot nga paglaom ang atong mabatonan pinaagi sa pagpabawtismo?
20 Dugang pa, miingon si Jesus nga kadtong mosunod kaniya “makapanunod sa kinabuhing walay kataposan.” Oo, pinaagi sa pagpahinungod ug pagpabawtismo kita makabaton ug paglaom nga “makapangupot pag-ayo sa tinuod nga kinabuhi”—kinabuhing walay kataposan sa bag-ong kalibotan sa Diyos. (1 Timoteo 6:19) Aduna pa bay mas maayong patukoranan alang sa umaabot nga atong ikapahiluna alang sa atong kaugalingon ug sa atong mga pamilya? Kining maanindot nga paglaom makapaarang kanato sa ‘paglakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.’—Miqueas 4:5.
[Mga footnote]
a Ang tulo ka libong Hudiyo ug mga kinabig nga namati sa pakigpulong ni Pedro sa Pentekostes nabawtismohan usab dayon. Siyempre, sama sa Etiopianhong eunuko, sila sinati na sa pasukaranang mga pagtulon-an ug mga prinsipyo sa Pulong sa Diyos.—Buhat 2:37-41.
b Ang Gregong pulong nga baʹpti·sma (bawtismo) nagtumong sa “sunodsunod nga aksiyon sa paglusbog, pagkanailalom sa tubig ug paghaw-as,” sumala sa Vine’s Expository Dictionary of New Testament Words.
Makapatin-aw Ka Ba?
• Sa unsang paagi ug ngano nga kita kinahanglang mosanong sa gugma ni Jehova?
• Unsang espirituwal nga pag-uswag ang kinahanglang himoon sa dili pa magpabawtismo?
• Nganong dili gayod nato tugotan ang kahadlok nga mapakyas o ang pagpanuko sa pagdawat ug responsibilidad nga mopugong kanato sa pagpabawtismo?
• Unsang talagsaong mga panalangin ang matagamtam sa bawtismadong mga tinun-an ni Jesu-Kristo?
[Mga Pangutana sa Pagtuon]
[Hulagway sa panid 26]
“Unsay nakapugong kanako nga mabawtismohan?”
[Mga hulagway sa panid 29]
Ang bawtismo maoy seryoso ug malipayon usab nga okasyon