Pagsabot sa Bibliya—Kalipay nga Imong Mabatonan

ANG Bibliya adunay bililhong mga kamatuoran gikan sa Diyos. Kini nagpadayag kanato bahin sa katuyoan sa kinabuhi, sa hinungdan sa pag-antos sa tawo, ug sa kaugmaon sa katawhan. Kini nagtudlo kanato kon unsaon pagkaplag ang kalipay, kon unsaon pagpakighigala, ug kon unsaon pagsulbad ang mga problema. Mas hinungdanon pa niana, kita makakat-on bahin sa atong Maglalalang ug langitnong Amahan, si Jehova. Ang maong kahibalo makapalipay kanato ug maghatag ug katuyoan sa atong kinabuhi.

Diha sa Bibliya ang pagkuhag kahibalo sa Diyos gipakasama sa pagkaon. Si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4; Hebreohanon 5:12-14) Maingon nga ang pagkaon ug makapahimsog nga kalan-on matag adlaw gikinahanglan aron kita makapabiling buhi, ang regular nga pagbasa sa Pulong sa Diyos hinungdanon usab aron kita makapahimulos sa saad sa Diyos nga kinabuhing walay kataposan.

Kita ganahang mokaon tungod kay kita gilalang nga may kinaiyanhong katakos sa pagtagamtam sa kalami sa pagkaon ug tungod kay kini magtagbaw sa pasukaranang kinahanglanon. Apan, kita adunay laing pasukaranang kinahanglanon nga angay natong tagbawon aron kita magmalipayon. Si Jesus nag-ingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Ang kalipay mabatonan tungod kay kana nga panginahanglan mahimong matagbaw pinaagi sa pagsabot sa Pulong sa Diyos.

Tinuod nga ang ubang mga tawo nalisdan sa pagsabot sa Bibliya. Pananglitan, nagkinahanglan ka tingali ug tabang sa mga teksto nga nagtumong sa dili-pamilyar nga mga kostumbre o mga teksto nga naggamit ug mga sambingay. Dugang pa, adunay mga tagna nga gisulat diha sa simbolikong pinulongan nga masabtan lamang pinaagi  sa pagkonsiderar sa laing mga teksto sa Bibliya nga naghisgot sa mao gihapong ulohan. (Daniel 7:1-7; Pinadayag 13:1, 2) Bisan pa niana, imo gayong masabtan ang Bibliya. Sa unsang paagi makaseguro ka nga mahimong masabtan ang Bibliya?

Kalipay nga Mabatonan sa Tanan

Ang Bibliya maoy Pulong sa Diyos. Diha niana gipahayag sa Diyos kanato ang iyang kabubut-on. Magtagana ba ang Diyos ug usa ka basahon nga dili masabtan o masabtan lamang sa mga tawong edukado? Dili, tungod kay si Jehova maluloton kaayo. Si Kristo Jesus miingon: “Kinsang amahana taliwala kaninyo nga, kon ang iyang anak mangayog isda, tingali maghatag kaniyag serpente inay isda? O kon siya usab mangayog itlog, hatagan siyag tanga? Busa, kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” (Lucas 11:11-13) Busa, ikaw makaseguro nga mahimo nimong masabtan ang Bibliya ug kon ikaw sinserong mohangyo sa Diyos, iyang itagana ang tabang nga imong gikinahanglan aron masabtan ang iyang Pulong. Sa pagkatinuod, ang paninugdang mga pagtulon-an sa Bibliya masabtan bisan sa mga bata!—2 Timoteo 3:15.

Bisan tuod gikinahanglan ang pagpaningkamot aron masabtan ang Bibliya, ang pagbuhat niana adunay kusganon, makapadasig nga epekto kanato. Human sa iyang pagkabanhaw, si Jesus nagpakita ngadto sa duha sa iyang mga tinun-an ug nakigsulti kanila bahin sa mga tagna sa Bibliya. Ang asoy ni Lucas nag-ingon: “Sukad kang Moises ug sa tanang mga Manalagna iyang gibatbat kanila ang mga butang maylabot sa iyang kaugalingon diha sa tibuok Kasulatan.” Unsay resulta? Nianang gabhiona, samtang ilang gipamalandong ang ilang nakat-onan, ang mga tinun-an nagsultihanay sa usag usa: “Dili ba ang atong mga kasingkasing nagdilaab man samtang nakigsulti siya kanato sa dalan, samtang iyang gibuksan sa bug-os ang mga Kasulatan kanato?” (Lucas 24:13-32) Ang pagkasabot sa Pulong sa Diyos nakapalipay kanila tungod kay kini nagpalig-on sa ilang pagtuo sa mga saad sa Diyos ug naghatag kanila ug positibong panglantaw sa umaabot.

Inay mag-isip niini nga usa ka hago nga trabaho, ang pagkasabot sa Pulong sa Diyos makaiikag ug mapuslanon, sama ka makapalipay sa pagkaon ug makapahimsog nga kalan-on. Unsay kinahanglan nimong himoon aron mabatonan ang maong pagsabot? Ang sunod nga artikulo maghisgot kon sa unsang paagi imong kalipayan “ang mismong kahibalo sa Diyos.”—Proverbio 2:1-5.

[Hulagway sa panid 4]

Sama sa usa ka mahigugmaong amahan, si Jehova naghatag sa balaang espiritu aron tabangan kita sa pagsabot sa Bibliya