Pagsabot sa Bibliya—Unsay Motabang Kanimo?

“GITAGOAN nimo nga maampingon kining mga butanga gikan sa mga maalamon ug sa mga makinaadmanon, ug nagbutyag niini ngadto sa mga bata.” (Lucas 10:21) Kining mga pulonga nga gisulti ni Jesus sa iyang langitnong Amahan nagpaila nga aron masabtan ang Bibliya, kita kinahanglang magbaton ug hustong tinamdan. Ang kaalam ni Jehova nadayag pinaagi sa iyang pagtaganag basahon nga ang mapainubsanon, andam magpatudlo nga mga tawo lamang ang makasabot pag-ayo niini.

Kadaghanan kanato malisdan sa pagpasundayag ug pagkamapainubsanon. Kitang tanan nakapanunod sa kiling nga magmapahitas-on. Dugang pa, kita nagkinabuhi sa “kataposang mga adlaw,” taliwala sa mga tawo nga ‘mahigugmaon sa ilang kaugalingon, . .  gahig ulo, nangburot sa garbo.’ (2 Timoteo 3:1-4) Kini ang mga tinamdan nga mobabag kanato sa pagsabot sa Pulong sa Diyos. Ikasubo, sa usa ka sukod kitang tanan naimpluwensiyahan sa atong palibot. Nan, sa unsang paagi atong mahuptan ang tinamdan nga gikinahanglan sa pagsabot sa Bibliya?

Pag-andam sa Kasingkasing ug Hunahuna

Si Esdras, nga usa ka lider kaniadto sa katawhan sa Diyos, ‘nag-andam sa iyang kasingkasing sa pagkonsulta sa balaod ni Jehova.’ (Esdras 7:10) Aduna bay paagi nga maandam nato ang atong kasingkasing? Oo. Kita makasugod pinaagi sa pagbaton ug hustong panglantaw sa Kasulatan. Ngadto sa mga isigka-Kristohanon, si apostol Pablo misulat: “Dihang nadawat ninyo ang pulong sa Diyos, nga inyong nadungog gikan kanamo, inyong gidawat kini, dili ingong pulong sa mga tawo, kondili, ingon sa kon unsa kini sa pagkatinuod, ingong pulong sa Diyos.” (1 Tesalonica 2:13) Bisan tuod mga tawo ang gigamit sa Diyos sa pagsulat sa Kasulatan, ang ilang gisulat naggikan kang Jehova. Ang pagdawat nianang hinungdanong kamatuoran maghimo kanatong mas madinawaton sa atong gibasa.—2 Timoteo 3:16.

Ang laing paagi sa pag-andam sa atong kasingkasing maoy pinaagi sa pag-ampo. Sanglit ang Bibliya giinspirar man sa balaang espiritu, ang mensahe niana atong masabtan sa tabang sa maong espiritu. Kita kinahanglang moampo alang sa maong tabang. Matikdi kon sa unsang paagi kini gipabilhan sa salmista kinsa misulat: “Pasabta ako, aron mabantayan ko ang imong balaod ug makatuman ako niini sa bug-os nga kasingkasing.” (Salmo 119:34) Kita kinahanglang moampo dili lamang aron hatagan kita ug katakos sa hunahuna sa pagsabot sa kon unsay nasulat kondili usab aron mabatonan nato ang kasingkasing nga madinawaton sa kon unsay gisulti sa Bibliya. Aron masabtan ang Bibliya, kinahanglan kitang magmadinawaton sa kon unsay matuod.

Samtang mamalandong ka aron mabatonan ang hustong tinamdan, hunahunaa kon sa unsang paagi makatabang kanimo ang pagtuon sa Bibliya. Kita adunay daghang maayo kaayong mga katarongan  nga basahon ang Pulong sa Diyos, apan ang labing hinungdanong katarongan mao nga kini motabang kanato nga masuod sa Diyos. (Santiago 4:8) Sa dihang atong mabasa kon unsay reaksiyon ni Jehova sa lainlaing mga kahimtang, kon sa unsang paagi iyang gipabilhan kadtong nahigugma kaniya, kon sa unsang paagi siya nakiglabot niadtong mibiya kaniya, atong masabtan kon unsa siyang matanga sa pagkapersona. Kinahanglan nga ang atong pangunang motibo sa pagbasa sa Bibliya maoy aron mas makaila pa nato ang Diyos ug niining paagiha mapalig-on ang atong relasyon kaniya.

Mga Babag sa Pagbaton ug Hustong Tinamdan

Unsa kahay makababag kanato sa pagsabot sa Pulong sa Diyos? Ang usa ka babag mao ang wala-sa-lugar nga pagkamaunongon. Pananglitan, ikaw tingali nagtamod sa mga pagtulon-an ug mga opinyon sa pipila ka tawo. Apan, komosta kon kining mga tawhana wala gayod magtuboy o magpabili sa kamatuoran sa Pulong sa Diyos? Ilalom nianang mga kahimtanga, malisod tingali ang pagsabot kon unsay tinuod nga gitudlo sa Bibliya. Busa, ang Bibliya nagdasig kanato sa pagsusi pag-ayo kon unsay ginatudlo kanato.—1 Tesalonica 5:21.

Ang inahan ni Jesus, si Maria, nakaatubang niana nga suliran. Siya gimatuto sumala sa tradisyon sa mga Hudiyo. Siya nagsunod gayod sa Moisesnong Balaod ug walay duhaduha tig-adtoan sa sinagoga. Sa ulahing bahin sa iyang kinabuhi iyang nasayran nga ang paagi sa pagsimba nga gitudlo sa iyang mga ginikanan kaniya dili na dalawaton sa Diyos. Ingong resulta, gidawat ni Maria ang pagtulon-an ni Jesus ug nalakip siya sa unang mga membro sa Kristohanong kongregasyon. (Buhat 1:13, 14) Dili kadto pagpakitag kawalay-pagtahod sa iyang mga ginikanan o sa ilang mga tradisyon; hinunoa, kadto maoy timailhan sa iyang gugma alang Diyos. Aron kita makabaton ug kaayohan gikan sa Bibliya, sama kang Maria kinahanglang hatagan natog labawng importansiya ang pagkamaunongon sa Diyos kay sa pagkamaunongon ni bisan kinsa.

Ikasubo, daghang tawo ang wala kaayo magpabili sa kamatuoran sa Bibliya. Ang uban kontento na sa pagsunod sa relihiyosong mga tradisyon nga gipasukad sa kabakakan. Gipakita sa uban ang kawalay-pagtagad sa kamatuoran pinaagi sa ilang sinultihan ug paagi sa pagkinabuhi. Busa, ang pagdawat sa kamatuoran sa Bibliya nagkinahanglag sakripisyo: Kini maghimo kanimong lahi sa imong mga higala, mga isigka-trabahante, ug bisan gani ang imong pamilya. (Juan 17:14) Bisan pa niana, ang usa ka maalamong tawo misulat: “Palita ang kamatuoran ug ayaw kana ibaligya.” (Proverbio 23:23) Kon imong pabilhan pag-ayo ang kamatuoran, si Jehova motabang kanimo sa pagsabot sa Bibliya.

Ang lain pang babag sa pagsabot sa mensahe sa Bibliya mao ang pagkadili-andam mopadapat sa kon unsay gisulti niana. Gisultihan ni Jesus ang iyang mga tinun-an: “Kaninyo gitugot ang pagsabot sa sagradong mga tinago sa gingharian sa mga langit, apan kanila wala kini itugot. Kay ang kasingkasing niini nga katawhan nahimong dili-madinawaton, ug pinaagi sa ilang mga dalunggan sila nakadungog nga walay pagsanong.” (Mateo 13:11, 15) Kadaghanan niadtong gisangyawan ni Jesus maoy mga tawo nga dili madinawaton, dili andam nga magbag-o. Pagkalahi gayod niini nga tinamdan nianang sa usa ka nagapanaw nga magpapatigayon nga gihisgotan ni Jesus diha sa usa ka ilustrasyon! Sa pagkakaplag ug usa ka perlas nga bililhon kaayo, gibaligya dayon sa magpapatigayon ang tanang butang nga iyang nabatonan aron paliton kana. Kinahanglang isipon usab nato nga bililhon ang pagsabot sa kamatuoran sa Bibliya.—Mateo 13:45, 46.

Ang Babag sa Pagkadaling Matudloan

Ang pangunang babag sa pagsabot sa Bibliya mao ang tinamdan nga dili daling-matudloan. Malisdan tingali ang usa ka tawo sa pagdawat ug bag-ong mga ideya gikan sa usa ka ubos nga tawo. Apan, ang mga apostoles ni Jesu-Kristo maoy mga tawong “dili edukado ug ordinaryo.” (Buhat 4:13) Sa pagpatin-aw kon nganong ingon sila niana, si Pablo misulat: “Inyong nakita ang iyang pagtawag kaninyo, mga igsoon, nga dili daghan ang maalamon sa unodnong paagi ang gitawag, dili daghan ang gamhanan, dili daghan ang hamili ug kagikan; kondili gipili sa Diyos ang binuang nga mga butang sa kalibotan, aron iyang mapakaulawan ang mga tawong maalamon.” (1 Corinto 1:26, 27) Kon nalisdan ka sa pagpakitag pagkamapainubsanon tungod kay ang nagtudlo kanimo maoy ubos nga tawo, hinumdomi nga siya maoy instrumento lamang nga gigamit sa Diyos sa pagtudlo kanimo. Aduna pa bay mas dakong pribilehiyo kay sa matudloan ni Jehova, ang atong “Dakong Instruktor”?—Isaias 30:20; 54:13.

Ang pangulo sa kasundalohan sa Sirya nga si Naaman  nalisdan sa pagsunod sa instruksiyon sa usa ka ubos nga tawo. Kay gustong maayo ang iyang sanla, miadto siya sa Israel aron sa pagpakigkita sa manalagna ni Jehova nga si Eliseo. Apan ang instruksiyon sa Diyos sa pag-ayo sa sanla gipadayag kang Naaman pinaagi sa usa ka sulugoon. Ang mensahe ug ang paagi sa pagpresentar niini nakapalisod gayod kang Naaman sa pagsunod niini nga mapainubsanon, mao nga sa sinugdan midumili siya sa pagtuman sa pulong sa manalagna sa Diyos. Sa ulahi, giusab ni Naaman ang iyang tinamdan ug naayo siya. (2 Hari 5:9-14) Maatubang nato ang susamang mga suliran sa dihang kita magbasa sa Bibliya. Atong makat-onan nga aron maayo sa espirituwal ug moral nga paagi, gikinahanglan natong sundon ang bag-ong paagi sa pagkinabuhi. Magmapainubsanon ba kita aron matudloan kita sa kon unsay angay natong buhaton? Kadto lamang andam nga magpatudlo ang makasabot sa Bibliya.

Ang maayong tinamdan gipakita sa usa ka tawong may katungdanan ilalom ni Candace, nga rayna sa mga Etiopianhon. Mopauli na siya sa Aprika sakay sa iyang karo sa dihang ang tinun-ang si Felipe midagan ug miabay niana ug nakigsulti kaniya. Gipangutana ni Felipe ang tawo kon iya bang nasabtan ang iyang ginabasa. Ang opisyal mapainubsanong mitubag: “Unsaon ko man pagkasabot, gawas kon adunay magtudlo kanako?” Sa dihang iyang nasabtan ang Pulong sa Diyos, ang maong tawo gibawtismohan. Human niana, siya “nagpadayon sa pagpanaw nga nagmaya.”—Buhat 8:27-39.

Ang mga Saksi ni Jehova sa kinatibuk-an maoy ordinaryong mga tawo. Matag semana sila nagdumalag mga pagtuon sa Bibliya diha sa kabalayan sa kapin sa unom ka milyong tawo. Sanglit ang Bibliya nagtudlo sa kinamaayohang paagi sa kinabuhi, nagpatin-aw sa bugtong seguradong paglaom sa katawhan, ug nagpadayag kon sa unsang paagi atong mailhan ang Diyos, nakaplagan sa milyonmilyong tawo nga ang pagtuon sa Bibliya ug pagsabot sa gisulti niini maoy tinubdan sa dakong kalipay. Mabatonan nimo kini nga kalipay.

[Hulagway sa panid 7]

Nalisdan si Naaman sa pagsunod sa mga instruksiyon gikan sa usa ka ubos nga sulugoon

[Hulagway sa panid 7]

Ang pagsabot sa Bibliya makapalipay sa atong kasingkasing