Lig-ona ang Inyong mga Kamot

“Lig-ona ang inyong mga kamot, kamo nga nagapatalinghog niining adlawa sa mga pulong gikan sa baba sa mga manalagna.”—ZACARIAS 8:9.

1, 2. Nganong ang mga basahon ni Haggeo ug ni Zacarias angay natong hatagan ug pagtagad?

 ANG mga tagna ni Haggeo ug ni Zacarias gisulat mga 2,500 ka tuig kanhi, bisan pa niana kini mapadapat gayod sa imong kinabuhi. Ang mga asoy sa Bibliya nga anaa niining duha ka basahon dili lamang kasaysayan. Kini maoy bahin sa “tanang butang nga gisulat kanhi . . . alang sa pagtudlo kanato.” (Roma 15:4) Ang daghang impormasyon nga atong mabasa diha niana magpahinabo nga maghunahuna kita bahin sa tinuod nga mga panghitabo sukad sa pagkatukod sa Gingharian sa langit niadtong 1914.

² Nga naghisgot sa mga panghitabo ug kahimtang nga nasinati sa katawhan sa Diyos sa kanhing panahon, si apostol Pablo miingon: “Karon kining mga butanga nahitabo kanila ingong mga panig-ingnan, ug kini gisulat ingong pasidaan kanato nga naabtan sa mga kataposan sa mga sistema sa mga butang.” (1 Corinto 10:11) Busa mangutana ka tingali, ‘Unsa ang bili sa mga basahon ni Haggeo ug ni Zacarias alang sa atong panahon?’

3. Unsay gihatagan ug bug-os nga pagtagad sa mga basahon ni Haggeo ug ni Zacarias?

³ Sumala sa gipahayag sa nag-unang artikulo, ang mga tagna ni Haggeo ug ni Zacarias nagpunting sa panahong ang mga Hudiyo namalik sa ilang hinatag-sa-Diyos nga yuta human sila makagawas sa pagkabihag sa Babilonya. Gihatagan ug pagtagad sa duha ka manalagna ang pagtukod pag-usab sa templo. Ang mga Hudiyo nagpahiluna sa patukoranan sa templo niadtong 536 W.K.P. Bisan pag gihunahuna sa pipila ka tigulang nga mga Hudiyo ang nangaging panahon, dihay dakong “pagsinggit sa pagmaya.” Sa pagkamatuod, hinuon, nagkahitabo sa atong panahon ang mas hinungdanong butang. Sa unsang paagi matuod kana?—Esdras 3:3-13.

4. Unsay nahitabo wala madugay human sa Gubat sa Kalibotan I?

⁴ Wala madugay human sa Gubat sa Kalibotan I, ang mga dinihogan ni Jehova nahigawas gikan sa pagkabihag sa Dakong Babilonya. Kadto nagpaila gayod nga sila gipaluyohan ni Jehova. Sayo pa niadto, ang relihiyosong mga pangulo ug ilang politikanhong mga kauban maorag nakapahunong sa publikong pagwali ug pagpanudlo sa mga Estudyante sa Bibliya. (Esdras 4:8, 13, 21-24) Bisan pa niadto, si Jehova nga Diyos naghanaw sa mga babag sa buluhaton sa pagwali ug paghimog tinun-an. Latas sa daghang katuigan sukad sa 1919, ang buluhaton sa Gingharian nagmalamboon ug walay bisan unsa nga nakapugong sa kauswagan niana.

5, 6. Unsang talagsaong kalamposan ang gipunting sa Zacarias 4:7?

⁵ Makapaneguro kita nga magpadayon ang pagwali ug pagpanudlo nga gihimo sa masinugtanong mga alagad ni Jehova sa atong panahon tungod sa iyang pagpaluyo. Sa Zacarias 4:7, atong mabasa: “Iyang pagulaon gayod ang pangulong bato. Adunay mga pagsinggit nganha niini: ‘Pagkamakabibihag! Pagkamakabibihag!’” Unsang talagsaong kalamposan sa atong panahon ang gipunting niini?

⁶ Ang Zacarias 4:7 nagapunting sa panahon nga ang matuod nga pagsimba sa Soberanong Ginoo mahidangat sa nahingpit nga kahimtang niini diha sa yutan-ong mga sawang sa iyang espirituwal nga templo. Ang maong templo mao ang kahikayan ni Jehova alang sa pagduol kaniya diha sa pagsimba pinasukad sa halad pasig-uli ni Kristo Jesus. Tinuod, ang dakong espirituwal nga templo naglungtad na sukad sa unang siglo K.P. Bisan pa niana, ang matuod nga pagsimba diha sa yutan-ong mga sawang niini pagahingpiton pa.  Ang milyonmilyong magsisimba nag-alagad karon diha sa yutan-ong sawang sa espirituwal nga templo. Kini sila ug ang daghan kaayo nga mga tawong pagabanhawon mahidangat sa kahingpitan panahon sa Usa ka Libo ka Tuig nga Pagmando ni Jesu-Kristo. Sa pagkatapos sa usa ka libo ka tuig, ang matuod nga mga magsisimba sa Diyos mao lamang ang mahibilin sa nahinloang yuta.

7. Unsay papel ni Jesus bahin sa pagpadangat sa matuod nga pagsimba sa nahingpit nga kahimtang niini sa atong adlaw, ug nganong angay kitang madasig niana?

⁷ Si Gobernador Zorobabel ug ang Hataas nga Saserdoteng si Josue nakasaksi sa pagkahuman sa templo niadtong 515 W.K.P. Gitagna sa Zacarias 6:12, 13 ang susamang papel ni Jesus diha sa pagpadangat sa matuod nga pagsimba sa hingpit nga kahimtang niini: “Mao kini ang giingon ni Jehova sa mga panon: ‘Ania ang tawo kansang ngalan maoy Turok. Ug siya moturok gikan sa iyang kaugalingong dapit, ug siya magatukod sa templo ni Jehova. Ug . . . siya, sa iyang bahin, magadala sa dignidad; ug siya molingkod ug magamando sa iyang trono, ug siya mahimong saserdote sa iyang trono.’” Tungod kay si Jesus, kinsa atua sa langit ug nagpahinabo sa pagturok sa Davidnong linya sa mga hari nagapaluyo man sa buluhaton sa Gingharian diha sa espirituwal nga templo, sa imong hunahuna aduna bay makapugong sa pag-uswag niini? Wala gayod! Dili ba kini angayng magdasig kanato sa pagpadayon sa atong ministeryo, nga dili magpalinga sa matag-adlawng mga atimanonon?

Mga Prioridad o Unang Pagatagdon

8. Nganong kinahanglang ibutang nato pag-una sa atong mga kinabuhi ang buluhaton sa espirituwal nga templo?

⁸ Aron makabaton sa pagpaluyo ug panalangin ni Jehova, kinahanglang ibutang natong una sa atong mga kinabuhi ang buluhaton diha sa espirituwal nga templo. Lahi sa mga Hudiyo nga miingon, “Ang panahon wala pa moabot,” kinahanglang hinumdoman nato nga kita nagkinabuhi sa “kataposang mga adlaw.” (Haggeo 1:2; 2 Timoteo 3:1) Gitagna ni Jesus nga ang iyang maunongong mga sumusunod magwali sa maayong balita sa Gingharian ug maghimog mga tinun-an. Bantayan gayod nato nga ang atong pribilehiyo sa pag-alagad dili mapasagdan. Ang buluhaton sa pagwali ug pagpanudlo nga temporaryong nahunong tungod sa pagsupak sa kalibotan gipadayon niadtong 1919, apan wala pa kini matapos. Hinuon, makapaneguro kang matapos gayod kini!

9, 10. Sa unsa nagdepende ang pagpanalangin ni Jehova, ug unsay ipasabot niana alang kanato?

⁹ Sa gidak-on nga magpadayon kita sa makugihong pag-alagad, kita panalanginan—ingong usa ka katawhan ug tinagsatagsa. Matikdi ang  saad ni Jehova nga niana makasalig kita. Sa dihang nahibalik ang mga Hudiyo sa bug-os-kalag nga pagsimba ug sa makugihong pagpadayon sa ilang buluhaton sa patukoranan sa templo, si Jehova miingon: “Sukad niining adlawa ako magapanalangin kaninyo.” (Haggeo 2:19) Makatagamtam silag bug-os nga kapasig-ulian sa iyang pag-uyon. Tagda karon ang mga panalangin nga anaa sa saad sa Diyos: “Maanaa unya ang binhi sa pakigdait; ang paras magahatag sa iyang bunga, ug ang yuta magahatag sa iyang abot, ug ang kalangitan magahatag sa ilang yamog; ug ipapanunod ko kining tanang butanga sa mga nahibilin niini nga katawhan.”—Zacarias 8:9-13.

¹⁰ Ingon nga si Jehova nagpanalangin sa maong mga Hudiyo sa espirituwal ug sa materyal nga paagi, kita usab iyang panalanginan samtang kita magbuhat sa buluhaton nga iyang gihatag kanato nga makugihon ug uban sa malipayong kasingkasing. Ang maong mga panalangin naglakip sa pakigdait sa atong taliwala, kasegurohan, kauswagan, ug espirituwal nga pagtubo. Bisan pa niana, paneguroa nga ang padayong pagpanalangin sa Diyos nagdepende sa atong pagbuhat sa buluhaton diha sa espirituwal nga templo sumala sa paaging buot ni Jehova nga buhaton kana.

11. Sa unsang paagi mahimo natong susihon ang atong kaugalingon?

¹¹ Mao karon ang panahon nga ‘ipatagad sa atong kasingkasing ang atong mga dalan.’ (Haggeo 1:5, 7) Angay kitang mogahin ug panahon sa pagsusi sa atong mga prioridad sa kinabuhi. Ang pagpanalangin ni Jehova kanato karon nagdepende sa gidak-on nga kita nagabayaw sa iyang ngalan ug nagapadayon sa atong buluhaton diha sa iyang espirituwal nga templo. Basin mangutana ka sa imong kaugalingon: ‘Nausob na ba ang akong mga prioridad? Komosta na ang akong kadasig alang kang Jehova, sa iyang kamatuoran, ug sa iyang buluhaton kon itandi sa kadasig nga akong nabatonan sa dihang gibawtismohan ako? Ang akong kaikag sa hamugaway nga kinabuhi nag-apektar ba sa pagtagad nga akong ginahatag kang Jehova ug sa iyang Gingharian? Ang kahadlok ba sa tawo—ang kabalaka kon unsay hunahunaon sa uban—sa usa ka paagi nagpugong ba kanako?’—Pinadayag 2:2-4.

12. Unsang kahimtang taliwala sa mga Hudiyo ang gipasiugda sa Haggeo 1:6, 9?

¹² Dili nato gustong pugngan sa Diyos ang iyang dagayang panalangin tungod sa atong pagpasagad sa buluhaton sa pagbayaw sa iyang ngalan. Hinumdomi nga human sa maayong pagsugod, ang napasig-uling mga Hudiyo “nagadagan, ang tagsatagsa alang sa iyang kaugalingong balay,” sumala sa gitaho sa Haggeo 1:9. Napuliki kaayo sila sa ilang kaugalingong inadlaw nga mga panginahanglan ug paagi sa kinabuhi. Busa, “dihay diyutay lamang nga ilang gidala,” kanihit sa lamiang pagkaon, ilimnon, ug makapainit nga besti. (Haggeo 1:6) Gipugngan ni Jehova ang iyang panalangin. Aduna bay pagtulon-an niini alang kanato?

13, 14. Sa unsang paagi ikapadapat nato ang pagtulon-ang makuha sa Haggeo 1:6, 9, ug nganong hinungdanon kini?

¹³ Dili ka ba mouyon nga aron magpadayon sa pagpahimulos sa mga panalangin sa Diyos, kinahanglang pugngan nato ang pagpangita ug mga butang alang sa atong kaugalingon nga mabiya na ang pagsimba kang Jehova? Kana matuod bisan kon ang kalihokan o interes nga  makapalinga sa atong pagtagad mao ang pagpangagpas sa bahandi, daling-madato nga mga proyekto, ambisyosong mga plano alang sa hataas nga edukasyon aron makabaton ug maayong karera niining sistemaha, o mga programa alang sa personal nga katagbawan.

¹⁴ Ang maong mga butang mahimong dili daotan sa kaugalingon. Bisan pa niana, dili ba nimo masabtan nga kon hunahunaon ang kinabuhing walay kataposan, kana sila sa pagkatinuod maoy “patay nga mga buhat”? (Hebreohanon 9:14) Sa unsang diwa? Kana maoy patay sa espirituwal nga paagi, kawang, ug dili mabungahon. Kon ang usa ka tawo magpadayon sa pagpangagpas niana, ang maong mga buhat mahimong mosangpot sa espirituwal nga kamatayon. Nahitabo kana sa pipila ka dinihogang mga Kristohanon sa adlaw sa mga apostoles. (Filipos 3:17-19) Nagakahitabo kini sa pipila sa atong panahon. Basin may nailhan kang pipila nga inanayng nahilayo gikan sa Kristohanong mga kalihokan ug sa kongregasyon; sila karon wala nay tinguha sa pagbalik sa pag-alagad kang Jehova. Gilaoman gayod nato nga sila mobalik kang Jehova, apan ang matuod mao nga ang pagpangagpas ug “patay nga mga buhat” mahimong mosangpot sa pagkawala sa pag-uyon ug panalangin ni Jehova. Masabtan nimo unsa gayod ka makapasubong hitabo unya kana. Kana magpasabot sa pagkawala unya sa kalipay ug sa pakigdait nga ipatungha sa espiritu sa Diyos. Ug hunahunaa unsa unya ka dakong kapildihan ang dili pagpakig-ambit sa mainitong Kristohanong pakig-uban sa mga kaigsoonan!—Galacia 1:6; 5:7, 13, 22-24.

15. Giunsa pagpakita sa Haggeo 2:14 ang kaseryoso sa atong pagsimba?

¹⁵ Kini seryoso kaayo nga butang. Matikdi gikan sa Haggeo 2:14 kon unsay pag-isip ni Jehova sa mga Hudiyo nga nagpasagad sa iyang balay sa pagsimba apan nagpakisame sa ilang kaugalingong mga balay, sa literal o sa masambingayong paagi. “‘Ingon niana kini nga katawhan, ug ingon niana kini nga nasod sa akong atubangan,’ mao ang giingon ni Jehova, ‘ug ingon niana ang tanang buhat sa ilang mga kamot, ug bisan unsa nga ilang itanyag didto. Kini mahugaw.’” Bisan unsang taphaw nga mga halad nga gitanyag sa maduhaduhaon-ug-kasingkasing nga mga Hudiyo sa temporaryong halaran sa Jerusalem dili madawat samtang ilang gipasagdan ang matuod nga pagsimba.—Esdras 3:3.

Garantisadong Pagpaluyo

16. Pinasukad sa mga panan-awon nga nadawat ni Zacarias, unsay napaneguro sa mga Hudiyo?

¹⁶ Ang masinugtanong mga Hudiyo nga nagtukod pag-usab sa templo sa Diyos gipasaligan sa pagpaluyo sa Diyos, sumala sa gipaila sa Diyos pinaagi sa sunodsunod nga walo ka panan-awon nga nadawat ni Zacarias. Ang unang panan-awon nagpasalig sa pagkahuman sa templo ug sa kauswagan alang sa Jerusalem ug Juda basta ang mga Hudiyo masinugtanong nagtuman sa buluhaton nga angay nilang buhaton. (Zacarias 1:8-17) Ang ikaduhang panan-awon nagsaad sa kalaglagan sa tanang kagamhanan nga nagsupak sa matuod nga pagsimba. (Zacarias 1:18-21) Ang ubang mga panan-awon nagpasalig sa panalipod sa Diyos sa buluhaton sa pagpanukod, pagganayan sa mga tawo gikan sa daghang kanasoran ngadto sa nahuman nga balay sa pagsimba ni Jehova, sa matuod nga kalinaw ug kasegurohan, pagwagtang sa daw dili-mabuntog nga mga babag sa buluhaton nga gihatag sa Diyos, paghanaw sa pagkadaotan, ug pagdumala ug pagpanalipod pinaagi sa mga manulonda. (Zacarias 2:5, 11; 3:10; 4:7; 5:6-11; 6:1-8) Imong masabtan kon nganong tungod sa maong mga garantiya sa pagpaluyo sa Diyos, ang mga masinugtanon nagpasibo sa ilang paagi sa kinabuhi ug naghatag sa ilang bug-os nga pagtagad diha sa buluhaton nga tungod niana sila gipagawas sa Diyos gikan sa pagkabihag.

17. Tungod sa pasalig nga atong nabatonan, unsay angay natong isukna sa atong kaugalingon?

 ¹⁷ Sa susamang paagi, ang atong pagsalig nga ang matuod nga pagsimba seguradong magmalamposon angayng magdasig kanato sa paglihok ug magtukmod kanato sa paghunahuna nga seryoso bahin sa balay sa pagsimba ni Jehova. Suknaa ang imong kaugalingon: ‘Kon nagtuo ako nga karon mao ang panahon sa pagbuhat sa buluhatong pagwali sa maayong balita sa Gingharian ug paghimog mga tinun-an, ang akong mga tumong ug estilo sa kinabuhi nahiuyon ba sa akong pagtuo? Ginagugol ko ba ang nahiangayng gidaghanon sa panahon diha sa pagtuon sa matagnaong Pulong sa Diyos, nga gikaikagan ko kana, ug gipakigsulti kana sa mga isigka-Kristohanon ug ngadto sa uban usab nga akong mahibalag?’

18. Unsay duol nang mahitabo, sumala sa Zacarias kapitulo 14?

¹⁸ Gihisgotan ni Zacarias ang pagkalaglag sa Dakong Babilonya nga sundan sa gubat sa Armagedon. Atong mabasa: “Kini mahimong usa ka adlaw nga mailhang iya ni Jehova. Kini dili adlaw, ni gabii; ug mahitabo nga sa kagabhion mohayag.” Oo, ang adlaw ni Jehova mahimo gayong mangitngit, matugnaw nga adlaw alang sa iyang mga kaaway sa yuta! Apan kana magpasabot sa padayong kahayag ug pag-uyon alang sa matinumanong mga magsisimba ni Jehova. Gibatbat usab ni Zacarias nga ang tanan sa bag-ong kalibotan magamantala sa pagkabalaan ni Jehova. Ang matuod nga pagsimba diha sa dakong espirituwal nga templo sa Diyos mao unya ang bugtong matang sa pagsimba sa yuta. (Zacarias 14:7, 16-19) Pagkatalagsaong pasalig! Atong masinati ang katumanan sa butang nga gitagna ug makita ang kabayawan sa pagkasoberano ni Jehova. Pagkatalagsaon unya ang maong adlaw nga iya ni Jehova!

Permanenteng mga Panalangin

19, 20. Nganong makapadasig kanimo ang Zacarias 14:8, 9?

¹⁹ Human nianang makapahinganghang kalamposan, si Satanas ug ang iyang mga demonyo bilanggoon diha sa usa ka bung-aw diin sila walay kalihokan. (Pinadayag 20:1-3, 7) Unya ibubo ang mga panalangin panahon sa Usa ka Libo ka Tuig nga Pagmando ni Kristo. Ang Zacarias 14:8, 9 nag-ingon: “Mahitabo gayod nianang adlawa nga ang buhing katubigan mogula gikan sa Jerusalem, katunga niini ngadto sa sidlakang dagat ug katunga niini ngadto sa kasadpang dagat. Kini mahitabo sa ting-init ug sa tingtugnaw. Ug si Jehova mahimong hari ibabaw sa tibuok yuta. Nianang adlawa usa lamang si Jehova, ug usa ra ang iyang ngalan.”

²⁰ Ang “buhing katubigan,” o “suba sa tubig sa kinabuhi,” nga naghulagway sa mga tagana ni Jehova alang sa kinabuhi, mapinadayonong moagos gikan sa sentro sa Mesiyanikong Gingharian. (Pinadayag 22:1, 2) Ang usa ka dakong panon sa mga magsisimba ni Jehova, kay nakalabang-buhi sa Armagedon, makabatog kaayohan pinaagi sa pagkagawas sa pagkahinukman sa kamatayon gumikan ni Adan. Bisan kadtong nangamatay na makabatog kaayohan pinaagi sa pagkabanhaw. Busa mosugod ang usa ka bag-ong yugto sa pagmando ni Jehova ibabaw sa yuta. Ilhon sa mga tawo sa tibuok yuta nga si Jehova mao ang Soberano sa Uniberso, nga maoy bugtong pagasimbahon.

21. Unsang determinasyon ang angay natong mabatonan?

²¹ Tungod sa tanan nga gitagna ni Haggeo ug ni Zacarias ug sa tanan nga natuman na, aduna kitay lig-ong katarongan sa pagpadayon sa buluhaton nga gipabuhat kanato sa Diyos diha sa yutan-ong mga sawang sa iyang espirituwal nga templo. Hangtod mahidangat ang matuod nga pagsimba sa nahingpit nga kahimtang niini, hinaot kitang tanan maningkamot sa pag-una sa intereses sa Gingharian diha sa atong kinabuhi. Ang Zacarias 8:9 nag-awhag kanato: “Lig-ona ang inyong mga kamot, kamo nga nagapatalinghog niining adlawa sa mga pulong gikan sa baba sa mga manalagna.”

Nahinumdom Ka Ba?

• Unsang makasaysayanhong panagsama ang naghimo sa mga basahon ni Haggeo ug ni Zacarias nga mapadapat karon?

• Unsang pagtulon-an bahin sa mga prioridad ang gihatag kanato ni Haggeo ug ni Zacarias?

• Nganong ang pagtuon sa basahon ni Haggeo ug ni Zacarias naghatag kanatog katarongan nga magmasaligon bahin sa umaabot?

[Mga Pangutana sa Pagtuon]

[Hulagway sa panid 26]

Gidasig ni Haggeo ug ni Zacarias ang mga Hudiyo sa pagbuhat nga bug-os kalag ug niana ilang madawat ang panalangin

[Mga hulagway sa panid 27]

Ikaw ba ‘nagadagan alang sa imong kaugalingong balay’?

[Hulagway sa panid 28]

Si Jehova misaad ug panalangin, ug iyang gihatag kana