Maayo Ka Bang Makigkomunikar?

“SULAT sa Gugma sa Usa ka 60-Anyos.” Kana ang tema sa usa ka bangga sa sweepstakes sa usa ka bangko sa Japan pipila ka tuig kanhi. Kini nag-awhag sa mga Hapones nga nagpanuigon ug 50 ngadto sa 60 anyos sa pagpahayag sa ilang “tinuod nga pagbati” ngadto sa ilang mga kapikas. Ang usa ka sumasalmot misulat sa iyang asawa: “Mahimong kataw-an nimo kini, apan magbasol ako kon dili nako isulti kini, busa akong isulti sa kusog ang akong pagbati: Salamat sa pagpakasal kanako.”

Sa daghang kultura, lakip sa pipila diha sa Sidlakan, ang pagpahayag sa pagbati sa usa wala idasig. Bisan pa niana, kapin sa 15,000 ang misalmot sa maong bangga sa sulat sa gugma. Kini napopular kaayo nga gisundan kinig lain pang bangga, ug daghang libro ang napatik nga gipasukad sa maong mga sulat. Kini nagpasabot nga sa kahiladman, daghan ang gustong magpahayag sa ilang pagbati ngadto sa ilang minahal nga kapikas. Apan, ang uban dili gustong mohimo niana. Ngano man? Tingali tungod kay gikinahanglan ang paningkamot ug kahanas aron masabtan sa uban—sama sa usa ka kapikas—ang ilang pagbati.

Si Hitoshi Kato, kinsa misulat ug usa ka libro bahin sa pagretiro, nag-ingon nga taliwala sa edarang mga magtiayon sa Japan, daghang kaso sa diborsiyo ang gipasaka sa mga asawa tungod sa nakagamot nang mga kayugot nga gihambin sulod sa daghang katuigan. “Apan,” siya miingon, “kini maoy resulta usab sa dili pagsultihay sa magtiayon sa dihang adunay mga suliran aron mahusay kana.”

Sa panahon sa pagretiro, ang bana makurat na lang sa dihang ang iyang asawa motunol kaniyag usa ka abiso bahin sa diborsiyo. Sulod sa daghang katuigan, ang maong magtiayon lagmit wala gayod magkasultihanay bahin sa ilang pagbati sa usag usa. Ang bana ug asawa naningkamot tingali sa pagpahayag sa ilang pagbati apan sila dili  makapadayon sa pag-estorya ug tarong. Imbes maugmad ang mas suod nga relasyon, magsige na lang hinuon silag lalis.

Sa unsang paagi mahimong sulbaron sa bana ug asawa ang ilang mga kasungian sa malinawong paagi ug ikapahayag ang ilang pagbati sa makapahimuot nga paagi? Maikag ka tingaling mahibalo nga ang kadaghanan sa praktikal nga mga sugyot makaplagan, dili diha sa usa ka kinabag-ohang libro nga iya sa tigtambag bahin sa kaminyoon, kondili diha sa usa ka karaang basahon nga gipabilhan sulod sa daghang kasiglohan—ang Bibliya.