Mga Pangutana Gikan sa mga Magbabasa

Kon ang usa ka tawo gihasi sa mga demonyo, unsay iyang mahimo aron siya makalingkawas?

Ang Pulong sa Diyos nagpakita nga kadtong nag-antos sa pag-atake sa mga demonyo makalingkawas gikan sa maong pagpanghasi. Hinungdanon ang pag-ampo aron makalingkawas. (Marcos 9:25-29) Apan ang usa nga gihasi sa mga demonyo kinahanglang mohimo pag dugang mga lakang. Ang mga hitabo nga naglangkit sa unang-siglong mga Kristohanon nag-ilustrar kon unsa pay angayng buhaton.

Sa wala pa sila nahimong mga sumusunod ni Kristo, ang pipila ka indibiduwal sa karaang Efeso nalangkit sa demonismo. Apan, sa nakadesisyon sila sa pag-alagad sa Diyos, ‘kadtong naggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan.’ (Buhat 19:19) Pinaagi sa pagsunog sa ilang mga basahon sa pagpanag-an, ang bag-ong mga magtutuo sa Efeso naghatag ug maayong panig-ingnan alang kang bisan kinsa nga buot makalingkawas gikan sa pag-atake sa mga demonyo karon. Kinahanglan gayod nga ilang wagtangon ang tanang butang nga nalangkit sa espiritismo. Kini naglakip sa mga libro, magasin, pelikula, materyal gikan sa Internet, mga musika nga nalangkit sa espiritismo, mao man usab ang mga anting-anting o ubang butang nga ginasul-ob alang sa “proteksiyon” o nalangkit sa espiritistikanhong mga buhat.—Deuteronomio 7:25, 26; 1 Corinto 10:21.

Pipila ka tuig human sunoga sa mga Kristohanon sa Efeso ang ilang mga basahon sa salamangka, si apostol Pablo misulat: “Kita adunay pakigdumog . . . batok sa daotang mga puwersa nga espirituhanon.” (Efeso 6:12) Si Pablo nag-awhag sa mga Kristohanon: “Isul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.” (Efeso 6:11) Kanang tambaga mapadapat gihapon karon. Angayng palig-onon sa mga Kristohanon ang ilang espirituwalidad aron mapanalipdan ang ilang kaugalingon batok sa daotang mga espiritu. “Labaw sa tanang butang,” si Pablo nagpasiugda, “dad-a ang dakong taming sa pagtuo, nga pinaagi niini kamo makapalong sa tanang nagdilaab nga mga udyong sa daotan.” (Efeso 6:16) Mapalig-on sa usa ka tawo ang iyang pagtuo pinaagi sa pagtuon sa Bibliya. (Roma 10:17; Colosas 2:6, 7) Busa, ang regular nga pagtuon sa Bibliya makatabang kanato sa pag-ugmad ug pagtuo nga magsilbing depensa batok sa impluwensiya sa daotang mga espiritu.—Salmo 91:4; 1 Juan 5:5.

Ang mga Kristohanon sa Efeso kinahanglang mohimo pag laing hinungdanong lakang. Si Pablo nagsulti kanila: “Uban ang tanang matang sa pag-ampo ug pangamuyo . . . pag-ampo sa tanang higayon pinaagi sa espiritu.” (Efeso 6:18) Oo, ang hugot nga pag-ampo alang sa panalipod ni Jehova hinungdanon gayod alang niadtong buot makalingkawas sa pag-atake sa mga demonyo karon. (Proverbio 18:10; Mateo 6:13; 1 Juan 5:18, 19) Haom nga misulti ang Bibliya: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.”—Santiago 4:7.

Bisan tuod ang usa nga giatake sa demonyo angayng mag-ampo nga mainiton alang sa kalingkawasan, ang ubang tinuod nga mga Kristohanon makaampo usab alang sa maong indibiduwal nga hugot nga nagtinguha sa pag-alagad kang Jehova ug naningkamot gayod sa pagsukol sa daotang mga espiritu. Sila makahangyo sa Diyos nga ang usa nga gisakit sa mga demonyo makabaton unta ug espirituwal nga kalig-on aron makasukol sa pag-atake sa mga demonyo. Sanglit ang Pulong sa Diyos nag-ingon nga “ang pangamuyo sa usa ka tawong matarong, sa dihang kini nagalihok, adunay dakong puwersa,” ang mga pag-ampo nga gibungat sa mga alagad sa Diyos makahatag gayod ug kaayohan niadtong gisakit sa mga demonyo nga naghimo sa ilang maarangan sa ‘pagsukol sa Yawa.’—Santiago 5:16.

[Hulagway sa panid 31]

Ang mga magtutuo sa Efeso nagsunog sa ilang mga basahon sa salamangka