Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Sulayi kon makatubag ka ba sa mosunod nga mga pangutana:

• Unsay pipila ka katarongan kon nganong naglungtad ang grabeng pagkadaotan karon?

Ang usa ka hinungdan sa daotang mga buhat mao ang kiling sa tawo sa pagbuhat ug daotan. (Genesis 8:21) Ang laing hinungdan mao nga ang kadaghanang tawo kulang ug tukmang kahibalo bahin sa kabubut-on sa Diyos. Dugang pa, si Satanas, ang tagmugna sa pagkadaotan, nagpadayon sa pagpangilabot sa kalihokan sa tawo.—1/1, mga panid 4-6.

• Unsang positibong mga epekto ang moresulta sa pagsultig maayong pulong sa hustong panahon? (Proverbio 12:25)

Kini makapalig-on sa pagsalig sa atong kaestorya, makadasig ug makapalihok kaniya, ug makapabati kaniya nga dinawat sa grupo. Lain pa, ang atong pagpaningkamot sa paghatag ug komendasyon motabang kanato sa pagkakita sa maayong mga hiyas sa uban.—1/1, mga panid 16-17.

• Unsay sulod sa arka sa pakigsaad?

Kini nasudlan sa duha ka papan nga bato sa Balaod ug diyutayng mana usab. Human sa pagrebelde ni Kore, gisulod diha sa Arka ang sungkod ni Aaron aron magsilbing pamatuod batok sa maong kaliwatan. (Hebreohanon 9:4) Ang sungkod ug ang mana lagmit gikuha gikan sa Arka sa wala pa ipahinungod ang templo ni Solomon.—1/15, panid 31.

• Nganong ang mga Hudiyo sa panahon ni Nehemias kinahanglang magdalag kahoy ngadto sa templo?

Ang halad nga kahoy wala isugo diha sa Moisesnong Balaod. Apan sa panahon ni Nehemias dunay panginahanglan sa daghang kahoy aron gamiton sa pagsunog sa mga halad diha sa halaran.—2/1, panid 11.

• Unsa ang Muratorian Fragment?

Kini maoy bahin sa manuskritong Latin. Ang orihinal nga teksto gisulat diha sa Grego sa hinapos nga bahin sa ikaduhang siglo K.P. Kini naundan sa labing karaang listahan sa mga basahon sa Kristohanon Gregong Kasulatan nga giisip nga kasaligan, mao man usab sa mga komento bahin sa mga basahon ug sa mga magsusulat niini.—2/15, mga panid 13-14.

• Nganong si Raynang Vasti sa Persia padayong nagdumili sa pag-atubang sa hari? (Ester 1:10-12)

Ang Bibliya wala maghisgot sa iyang motibo. Ang pipila ka eskolar nag-ingon nga midumili siya tungod kay dili niya gustong mapakaulawan atubangan sa nangahubog nga mga dinapit sa hari. O tingali kining maanyag nga rayna dili gayod mapinasakopon, busa siya naghatag ug dili-maayong panig-ingnan ngadto sa ubang mga asawa diha sa Imperyo sa Persia.—3/1, panid 9.

• Sa unsang paagi ang lukat makahatag ug kagawasan?

Ang halad ni Jesus makapahigawas kanato gikan sa napanunod nga sala ug makatubos kanato gikan sa makamatay nga mga epekto sa sala. (Roma 6:23) Tungod niining halara, ang matuod nga mga Kristohanon dili na hasolon sa ilang tanlag. Ug pinaagi sa pagpasundayag ug pagtuo sa lukat, kita mapahigawas gikan sa kahadlok mahitungod sa atong baroganan atubangan sa Diyos. (1 Juan 2:1)—3/15, panid 8.

• Unsay atong makat-onan gikan sa pagdili sa Balaod nga lat-an ang nating kanding sa gatas sa inahan niini? (Exodo 23:19)

Ang maong paglata lagmit usa ka paganong rituwal nga gihimo aron sa pagpatunghag ulan. (Levitico 20:23) Gitagana sa Diyos ang gatas sa inahan ingong pagkaon sa nati nga makatabang sa pagdako niini. Ang paglata sa nating kanding ginamit ang gatas sa inahan niini maoy pagpakitag kawalay-pagtahod sa gimugna-sa-Diyos nga relasyon tali sa inahan ug sa nati. Ang balaod batok niini nagpakita sa pagkamabination sa Diyos.—4/1, panid 31.