Ayaw Kahadlok—Si Jehova Magauban Kanimo!

KAPIN sa 50 ka tuig kanhi, wala madugay human sa pagbuto sa unang nukleyar nga mga bomba, ang mananaog ug Nobel Prize nga siyentipikong si Harold C. Urey nag-ingon bahin sa umaabot: “Kita mangaon sa kahadlok, matulog sa kahadlok, mabuhi sa kahadlok ug mamatay sa kahadlok.” Ang atong kalibotan karon, sa pagkatinuod, natuhop sa kahadlok, ug kini dili ikahibulong! Adlaw-adlaw, ang mga mantalaan nagbalita sa makalilisang nga mga hitabo bahin sa terorismo, mabangis nga mga krimen, ug sa misteryosong mga sakit.

Ingong mga Kristohanon, kita nahibalo kon unsay kahulogan sa maong mga kahimtang. Kini nagpaila nga kita nagkinabuhi na sa “kataposang mga adlaw” niining daotang sistema, nga sumala sa gitagna sa Bibliya mailhan pinaagi sa “makuyaw nga mga panahong lisod sagubangon.” (2 Timoteo 3:1) Busa milig-on ang atong pagsalig nga duol nang ipadangat ni Jehova nga Diyos ang usa ka bag-ong kalibotan diin magpuyo ang pagkamatarong. (2 Pedro 3:13) Apan, sa kasamtangan, kita ba dili na angayang mobati ug kahadlok?

Kahadlok ug ang mga Alagad sa Diyos

Si Jacob, David, ug Elias maoy mga alagad ni Jehova nga mibati ug kahadlok sa dihang nag-atubang ug kapeligrohan. (Genesis 32:6, 7; 1 Samuel 21:11, 12; 1 Hari 19:2, 3) Kining mga tawhana wala makulangi ug pagtuo. Sa kasukwahi, sila nagpasundayag ug lig-ong pagsalig kang Jehova. Bisan pa niana, si Jacob, David, ug Elias mga tawhanon; busa, sila giabot ug kahadlok. “Si Elias maoy usa ka tawo nga may pagbati nga sama kanato,” nagsulat ang tinun-ang si Santiago.—Santiago 5:17.

Kita usab mabalaka tingali sa dihang kita maghunahuna sa kalisod nga atong naagoman karon o nianang lagmit atong maatubang sa umaabot. Kanang matanga sa kahadlok hisabtan. Sa pagkatinuod, ang Bibliya nag-ingon nga si Satanas nga Yawa determinado sa ‘pagpakiggubat’ niadtong “nagabantay sa mga sugo sa Diyos ug may buluhaton sa pagpamatuod bahin kang Jesus.” (Pinadayag 12:17) Bisan pag kanang mga pulonga mapadapat ilabina sa dinihogang mga Kristohanon, si Pablo nagsulat: “Ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Bisan pa niana, kita dili angayng magpadaog sa kahadlok sa dihang mag-atubang ug mga suliran. Ngano?

“Usa ka Diyos sa mga Buhat sa Pagluwas”

Ang salmistang si David misulat: “Ang matuod nga Diyos maoy usa ka Diyos sa mga buhat sa pagluwas alang kanato.” (Salmo 68:20) Si Jehova sublisubling nagpakita sa iyang katakos sa pagluwas sa iyang katawhan, pinaagi sa pagluwas kanila gikan sa peligrosong mga kahimtang o pinaagi sa paghatag kanilag kusog aron makalahutay. (Salmo 34:17; Daniel 6:22; 1 Corinto 10:13) Sumala sa imong natun-an sa Bibliya, pila ka buok nianang maong “mga buhat sa pagluwas” ang imong mahinumdoman?

Ginamit ang Watch Tower Publications Index, a nganong dili manukiduki nianang tinuod-kinabuhing mga hitabo sama sa tibuok-kalibotang Lunop sa adlaw ni Noe, sa pagluwas kang Lot ug sa iyang mga anak nga babaye gikan sa Sodoma ug Gomora, sa Paggula sa Israel gikan sa Ehipto ug sa ilang pagtabok sa Pulang Dagat, o sa napakyas nga plano ni Haman sa pagpuo sa mga Hudiyo? Ang pagbasa ug unya pagpalandong niining kulbahinam nga mga asoy magpalig-on sa imong pagtuo nga si Jehova maoy usa ka Diyos sa mga buhat sa pagluwas. Sa baylo, kini motabang kanimo nga masagubang ang mga pagsulay sa imong pagtuo nga maisogon.

Modernong-Adlaw nga mga Panig-ingnan

Makahunahuna ka bag modernong-adlaw nga  mga panig-ingnan sa pagkamalahutayon diha sa inyong dapit? Tingali usa ka tawo nga napriso tungod sa pagpabiling matinumanon sa Diyos. Lagmit duna kay kaila nga usa ka edaran nang Kristohanon nga nag-alagad kang Jehova bisan pag daghan nag gipamati sa lawas. O tagda ang mga batan-on nga nagpabiling bulag gikan sa kalibotan bisan pa sa grabeng pagpit-os sa ilang mga isigka-estudyante. Anaa usab ang nag-inusara nga mga ginikanan, nga nagpadako sa ilang mga anak nga walay abag sa usa ka kapikas, o wala-maminyo nga mga indibiduwal nga nag-alagad kang Jehova bisan pag sila nagmamingawon. Unsay imong makat-onan gikan kanila? Ang pagpalandong sa ilang matinumanong pagkinabuhi makatabang kanimo sa paglahutay ug sa pagpabiling maisogon bisan pa sa mga pagsulay nga lagmit imong masagubang.

Ang pagkamaisogon gikinahanglan dili lamang sa dihang kita makasugamak ug pagsupak ug paglutos kondili usab sa dihang kita magsugod sa pagduhaduha sa gugma ni Jehova kanato. Kinahanglang ugmaron nato ang pagsalig nga ang lukat ni Kristo mapadapat kanato ingong indibiduwal. (Galacia 2:20) Sa ingon, kita dili mahadlok o malisang sa pagduol kang Jehova. Kon kita mobating dili takos sa gugma ni Jehova, kita makapalandong sa mga pulong ni Jesus sa iyang mga sumusunod: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan. Apan ang mismong mga buhok sa inyong ulo naihap ang tanan. Busa ayaw kamo kahadlok: kamo labaw pag bili kay sa daghang goryon.”—Mateo 10:29-31.

Ang mga magasin nga Bantayanang Torre ug Pagmata! kasagarang magpatik ug mga eksperyensiya sa modernong-adlawng mga Saksi ni Jehova nga maisogong nakasagubang sa malisod nga mga kahimtang. Kini wala magpasabot nga sila walay negatibong pagbati sa ilang naagoman. Apan wala nila tugoti ang maong pagbati nga magpahunong kanila sa pag-alagad kang Jehova. Ang ilang napatik nga mga asoy makatabang kanimo sa paglahutay nga maisogon usab. Tagda ang duha ka pananglitan.

Ang Pagkaangol Nakausab sa Iyang Kinabuhi

Ang Abril 22, 2003 nga gula sa Pagmata! adunay artikulong “Kon sa Unsang Paagi ang Pagkaangol Nakausab sa Akong Kinabuhi.” Niining artikuloha, si Stanley Ombeva, nga usa sa mga Saksi ni Jehova sa Kenya, nag-asoy sa mga kalisdanan nga iyang naagoman sa dihang siya nabanggaan sa sakyanan nga kusog kaayong nagdagan. Sa migrabe ang pagkadaot sa iyang panglawas, siya nawad-ag trabaho ug sa tanang benepisyo. “Sa dihang nasabtan nako nga seryoso ang akong kahimtang, matod pa ni Brader Ombeva sa iyang asoy, “ako nahimong negatibo, makikaugalingon, ug pungtanon. Usahay, ako masuko ug mabingkilon.” Bisan pa sa iyang mapait nga kahimtang, kining Kristohanon nga tawo nagmaisogon. Wala niya tugoti ang kahigawad nga modaog kaniya ug magpahunong kaniya sa bug-os. Hinunoa, siya misalig kang Jehova. “Gitabangan niya ako kanunay sa tanan nakong pag-antos nga tungod niana maulaw ako usahay sa akong kaugalingon,” nag-ingon si Brader Ombeva. “Mihimo ako ug hugot nga desisyon nga magbasa ug mamalandong sa mga teksto nga akong nahibaloan nga makahupay sa akong kahimtang.”

Ang way-lipodlipod nga mga komento ni Brader Ombeva nakatabang sa daghan sa paglahutay sa mga pagsulay nga maisogon. “Ako mihilak sa dihang gibasa nako kini nga artikulo,” misulat ang usa ka Kristohanong babaye. “Ako nagtuo nga pinaagi niining artikuloha si Jehova nagpakita sa iyang mabination ug mahigugmaong pag-atiman ug naghupay kanako.” Ang laing Saksi nagsulat: “Ang mga artikulong sama niini naghatag ug dakong pagdasig kanato nga nakasinatig susamang mga kahimtang ug hilom nga nag-antos.”

 Pagbuntog sa Kaguol

Ang laing makapatandog nga eksperyensiya mao ang kang Herbert Jennings, nga gisaysay sa artikulong “Wala Kamo Mahibalo Kon Maunsa ang Inyong Kinabuhi Ugma.” b Si Brader Jennings nakigbisog sa bipolar disorder. Nahinumdom niadtong bag-o pang nagsugod ang iyang sakit, siya miingon: “Dili tiaw bisan ang pagtambong sa Kristohanong mga tigom. Apan, ako bug-os kombinsido sa kahinungdanon sa espirituwal nga panag-ubanay. Aron makasagubang, sagad akong mosulod sa Kingdom Hall human makapahiluna ang mga tawo ug mobiya sa dili pa sila magkayagaw human sa programa.”

Lisod usab ang pagsangyaw. “Usahay, human makaabot sa usa ka balay, ako walay kaisog bisan sa pagpislit sa timbre sa pultahan,” asoy pa ni Brader Jennings. “Apan, ako dili mobiya, kay nasayod ako nga ang among ministeryo magkahulogan sa kaluwasan sa among kaugalingon ug ngadto ni bisan kinsa nga mauyonong mosanong. (1 Timoteo 4:16) Pagkataudtaod, makontrolar na nako ang akong emosyon, moadto ako sa sunod pultahan, ug mosulay pag-usab. Pinaagi sa padayong pagpakig-ambit diha sa ministeryo, akong namentinar ang igoigong espirituwal nga kalagsik, ug nakapalambo kana sa akong katakos sa pagsagubang.”

Ang matinud-anong asoy ni Brader Jennings nakatabang sa daghang magbabasa sa pagbuntog sa ilang mga kaguol nga maisogon usab. Pananglitan, ang usa ka Kristohanong sister nagsulat: “Sa 28 ka tuig nga ako nagbasa sa mga magasing Bantayanang Torre ug Pagmata!, wala pa gayod ako matandog sukad ug ingon niini sa dihang nabasa nako kini nga artikulo. Ako napugos sa paghunong sa bug-os-panahong pag-alagad ug mibating sad-an, nga naghunahuna nga kon niadtong higayona ako aduna pay dakong pagtuo, nan, ako makapadayon gayod unta. Ang pagbasa sa kaagi ni Brader Jennings nga napugos sa pag-undang sa ilang asaynment aron sa pag-atiman sa iyang sakit nakatabang kanako sa paglantaw sa akong kahimtang sa timbang nga paagi. Kini mao gayoy tubag sa akong mga pag-ampo!”

Sa susama, ang usa ka Kristohanong lalaki nagsulat: “Human sa napulo ka tuig nga pag-alagad ingong ansiyano sa kongregasyon, kinahanglan nakong buhian ang akong pribilehiyo tungod sa sakit sa utok. Ako mobatig dakong kapakyasan nga ako maguol pag-ayo sa dihang mobasa ug mga artikulo bahin sa sugilanon sa kinabuhi, nga sagad nagsaysay sa talagsaong mga kalamposan sa katawhan ni Jehova. Apan ang pagkamalahutayon ni Brader Jennings nakapadasig kanako. Akong nabasa ang artikulo sa daghang higayon.”

Magpadayon nga Masaligon

Sama nila ni Brader Ombeva ug Brader Jennings, daghan sa mga Saksi ni Jehova ang padayong nagsimba kang Jehova nga Diyos nga maisogon bisan pa sa lisod kaayong mga problema. Kon ikaw usa kanila, dalayegon ka. Ikaw makasalig nga “ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nag-alagad sa mga balaan ug nagpadayon sa pag-alagad.”—Hebreohanon 6:10.

Ingon nga si Jehova mitabang sa iyang matinumanong katawhan sa karaang mga panahon sa pagpukan sa ilang mga kaaway, siya makatabang kanimo nga magmadaogon batok sa bisan unsang mga problema nga imong maatubang. Busa, palandonga ang mga pulong nga gisulti ni Jehova pinaagi ni manalagnang Isaias: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.’”—Isaias 41:10.

[Mga footnote]

[Mga hulagway sa panid 16]

Sama nila ni Stanley Ombeva (ibabaw) ug Herbert Jennings (tuo), daghan ang nag-alagad kang Jehova nga maisogon

[Picture Credit Line sa panid 14]

USAF photo