Maunongong Nag-alagad Kang Kristo nga Hari

“Kaniya dihay gihatag nga pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.”—DANIEL 7:14.

1, 2. Giunsa nato pagkahibalo nga si Kristo wala pa magmando sa bug-os sa Gingharian niadtong 33 K.P.?

 KINSA nga magmamando ang namatay alang sa iyang mga sakop apan nabuhi pag-usab aron magmando ingong hari? Kinsa nga hari ang nakapuyo sa yuta, nga nagpalihok sa iyang mga sakop sa pagsalig ug pag-unong kaniya, ug unya nagmando gikan sa langit? Ang bugtong persona nga nakahimo niini ug sa uban pang mga butang mao si Jesu-Kristo. (Lucas 1:32, 33) Sa Pentekostes 33 K.P., human sa kamatayon, pagkabanhaw, ug pagkayab ni Kristo sa langit, ang Diyos ‘naghimo kaniyang ulo ibabaw sa tanang butang nganha sa kongregasyon.’ (Efeso 1:20-22; Buhat 2:32-36) Busa si Kristo nagsugod sa pagmando apan sa limitado nga diwa. Ang iyang unang mga sakop mao ang dinihogan-sa-espiritu nga mga Kristohanon, kinsa naglangkob sa espirituwal nga Israel, ang “Israel sa Diyos.”—Galacia 6:16; Colosas 1:13.

² Duolan sa 30 ka tuig human niadtong Pentekostes 33 K.P., gipamatud-an ni apostol Pablo nga si Kristo wala pa magmando sa bug-os sa Gingharian, apan siya diha na “sa tuong kamot sa Diyos, nga sukad niadto nagpaabot hangtod nga ibutang ang iyang mga kaaway ingon nga tumbanan sa iyang mga tiil.” (Hebreohanon 10:12, 13) Unya, sa naghinapos ang unang siglo K.P., nakita sa tigulang nga si apostol Juan pinaagi sa usa ka panan-awon ang Unibersohanong Soberano, si Jehova, nga nagpalingkod kang Kristo Jesus ingong Hari sa bag-ong natukod nga langitnong Gingharian. (Pinadayag 11:15; 12:1-5) Gikan sa atong panglantaw niini nga yugto sa kasaysayan, atong masubli ang lig-ong pamatuod nga si Kristo nagsugod pagmando ingong Mesiyanikong Hari sa langit niadtong 1914. a

3. (a) Ang maayong balita sa Gingharian naglakip ug unsang bag-ong mensahe sukad sa 1914? (b) Unsang mga pangutana ang atong ikasukna sa atong kaugalingon?

³ Oo, sukad sa 1914 ang maayong balita sa Gingharian naglakip ug usa ka makapahinam nga bag-ong mensahe. Si Kristo aktibo nang nagmando ingong Hari sa langitnong Gingharian sa Diyos, apan “taliwala sa [iyang] mga kaaway.” (Salmo 110:1, 2; Mateo 24:14; Pinadayag 12:7-12) Dugang pa, sa tibuok yuta, ang iyang maunongong mga sakop kinabubut-ong nagpailalom sa iyang awtoridad pinaagi sa pagpakigbahin sa tibuok-globong programa sa pagtudlo bahin sa Bibliya nga wala pa hitupngi sa kasaysayan sa tawo. (Daniel 7:13, 14; Mateo 28:18) Ang dinihogan-sa-espiritu nga mga Kristohanon, “ang mga anak sa gingharian,” maoy nagsilbing “mga embahador kapuli ni Kristo.” Sila maunongong gipaluyohan sa nagkadako nga panon sa “ubang mga karnero” ni Kristo, kinsa nagsilbing mga hawas sa Gingharian sa Diyos. (Mateo 13:38; 2 Corinto 5:20; Juan 10:16) Bisan pa niana, kinahanglang susihon nato kon kita ingong mga indibiduwal miila ba gayod sa awtoridad ni Kristo. Maunongon ba gayod kita kaniya? Sa unsang paagi ikapakita nato ang pagkamaunongon sa usa ka Hari nga nagmando sa langit? Apan, hisgotan una nato kon nganong magmaunongon kita kang Kristo.

Usa ka Hari nga Nakapukaw sa Atong Pagkamaunongon

4. Unsay nahimo ni Jesus ingong Umaabot-nga-Hari panahon sa iyang yutan-ong ministeryo?

⁴ Ang atong pagkamaunongon kang Kristo gipasukad sa atong apresasyon sa iyang nahimo maingon man sa iyang talagsaong mga hiyas. (1 Pedro 1:8) Samtang dinhi pa sa yuta, si Jesus ingong Umaabot-nga-Hari nagpasundayag diha sa limitadong paagi kon unsay iyang buhaton ingong nagamando nga Hari sa tibuok yuta sa takdang panahon sa  Diyos. Iyang gipakaon ang gigutom. Iyang giayo ang mga masakiton, buta, baldado, bungol, ug ang mga amang. Iya pa ganing gibanhaw ang pipila ka mga patay. (Mateo 15:30, 31; Lucas 7:11-16; Juan 6:5-13) Dugang pa, ang pagkahibalo bahin sa kinabuhi ni Jesus dinhi sa yuta makapasinati kanato sa iyang mga hiyas ingong umaabot nga Magmamando sa yuta—ilabina ang iyang nagsakripisyo-sa-kaugalingon nga gugma. (Marcos 1:40-45) Maylabot niini, si Napoléon Bonaparte gitaho nga nag-ingon: “Sila si Alejandro, Cesar, Carlomagno, ug ako nagtukod ug mga imperyo, apan pinasukad sa unsa nga nahimo namo ang among dagkong mga buhat? Pinasukad sa gahom. Si Jesu-Kristo lamang ang nagtukod sa iyang gingharian pinasukad sa gugma, ug niining panahona milyonmilyong tawo ang andam nga mamatay alang kaniya.”

5. Nganong ang kinaiya ni Jesus makapadani kaayo?

⁵ Tungod kay si Jesus malumog-buot ug mapainubsanon sa kasingkasing, kadtong nabug-atan sa mga kapit-os ug mga palas-anon napalagsik sa iyang makapalig-ong mga pagtulon-an ug malulotong kinaiya. (Mateo 11:28-30) Ang mga bata mibating relaks uban kaniya. Ang mapainubsanon, masinaboton nga mga tawo gustong mahimong iyang mga tinun-an. (Mateo 4:18-22; Marcos 10:13-16) Tungod sa iyang mahunahunaon ug matinahoron nga panggawi, iyang naangkon ang pagkamaunongon sa daghang mahinadlokon-sa-Diyos nga mga babaye, nga daghan kanila ang naghatag sa ilang panahon, kusog, ug materyal nga mga kabtangan aron sa pag-atiman kaniya samtang siya naghimo sa iyang ministeryo.—Lucas 8:1-3.

6. Unsang malumo nga mga pagbati ang gipadayag ni Jesus sa dihang namatay si Lazaro?

⁶ Gipakita ni Kristo ang iyang malumo kaayong pagbati sa dihang namatay ang iyang minahal nga higalang si Lazaro. Siya natandog pag-ayo sa kaguol nga gibati ni Maria ug Marta nga wala niya kapugngi ang pag-agulo, ug siya “mihilak.” Siya “naguol”—nga mibati ug dakong kasakit ug kasubo—bisan pag siya nahibalo nga sa dili madugay iya nang banhawon si Lazaro. Unya, natukmod sa gugma ug kaluoy, gigamit ni Jesus ang iyang hinatag-sa-Diyos nga gahom ug gibanhaw si Lazaro gikan sa mga patay.—Juan 11:11-15, 33-35, 38-44.

7. Nganong si Jesus takos sa atong pagkamaunongon? (Tan-awa usab ang kahon sa panid 31.)

⁷ Kita mahingangha gayod sa dakong gugma ni Jesus sa kon unsay matarong ug sa iyang pagdumot sa pagkasalingkapaw ug pagkadaotan. Duha ka higayon nga maisogon niyang gihinloan ang templo sa hakog nga mga magpapatigayon. (Mateo 21:12, 13; Juan 2:14-17) Dugang pa, ingong tawo dinhi sa yuta, siya nakasinati sa tanang matang sa kalisdanan ug nakaeksperyensiya mismo sa mga kapit-os ug mga problema nga atong giatubang. (Hebreohanon 5:7-9) Nahibalo usab si Jesus kon sama sa unsa nga mahimong biktima sa pagdumot ug inhustisya. (Juan 5:15-18; 11:53, 54; 18:38–19:16) Sa kataposan, siya maisogong nagpailalom sa mabangis nga kamatayon aron tumanon ang kabubut-on sa iyang Amahan ug mahatagan ang iyang mga sakop ug kinabuhing walay kataposan. (Juan 3:16) Dili ka ba matukmod sa maong mga hiyas ni Kristo sa pagpadayon sa pag-alagad kaniya nga maunongon? (Hebreohanon 13:8; Pinadayag 5:6-10) Apan unsay gikinahanglan aron mahimong sakop ni Kristo nga Hari?

Mga Kuwalipikasyon sa Pagkahimong Sakop

8. Unsang kinahanglanon ang angayng kab-oton sa mga sakop ni Kristo?

⁸ Hunahunaa kining maong pagtandi: Ang pagkahimong lungsoranon sa laing nasod subsob nga naglangkit ug pagkab-ot sa pipila ka sukaranang mga kuwalipikasyon. Ang umaabot nga mga lungsoranon gikinahanglan tingali nga maayog dungog ug makakab-ot sa pipila ka sukdanan labot sa kahimsog. Sa samang paagi, ang mga sakop ni Kristo kinahanglang maghupot ug hataas nga mga sukdanan sa moralidad ug espirituwal nga kahimsog.—1 Corinto 6:9-11; Galacia 5:19-23.

9. Sa unsang paagi ikapakita nato nga kita maunongon kang Kristo?

⁹ Makataronganon usab nga si Jesu-Kristo magkinahanglan nga ang iyang mga sakop magmaunongon kaniya ug sa iyang Gingharian. Ilang ikapakita kanang maong pagkamaunongon pinaagi sa pagkinabuhi sumala sa iyang gitudlo sa dinhi pa siya sa yuta ingong Umaabot-nga-Hari. Pananglitan, ilang unahon ang mga intereses sa Gingharian ug ang kabubut-on sa Diyos inay ang materyal nga mga butang. (Mateo 6:31-34) Sila kinasingkasing usab nga magpasundayag ug samag-Kristo nga personalidad, bisan ilalom sa malisod nga mga kahimtang. (1 Pedro 2:21-23) Dugang pa, ang mga sakop ni Kristo mosundog sa iyang panig-ingnan pinaagi sa paghimo sa unang tikang sa pagbuhat ug maayo ngadto sa uban.—Mateo 7:12; Juan 13:3-17.

10. Sa unsang paagi ang pagkamaunongon ngadto kang Kristo ikapasundayag diha (a) sa pamilya ug (b) sa kongregasyon?

 ¹⁰ Ang mga sumusunod ni Jesus magpakita usab sa ilang pagkamaunongon kaniya pinaagi sa pagsumbalik-silaw sa iyang mga hiyas diha sa pamilya. (Efeso 5:25, 28-30; 6:4; 1 Pedro 3:7) Pananglitan, ang mga bana magpakitag pagkamaunongon sa ilang langitnong Hari pinaagi sa pagsundog sa mga hiyas ni Kristo diha sa ilang pagtratar sa ilang mga asawa ug mga anak. (Efeso 5:25, 28-30; 6:4; 1 Pedro 3:7) Ang mga asawa magpakitag pagkamaunongon kang Kristo pinaagi sa putling panggawi ug pinaagi sa pagpasundayag ug “malinawon ug malumong espiritu.” (1 Pedro 3:1-4; Efeso 5:22-24) Ang mga anak maunongon kang Kristo sa dihang sila mosunod sa iyang panig-ingnan sa pagkamasinugtanon. Sa batan-on pa, si Jesus nagpasakop sa iyang mga ginikanan, bisan tuod sila dili hingpit. (Lucas 2:51, 52; Efeso 6:1) Ang mga sakop ni Kristo maunongong maningkamot sa pagsundog kaniya pinaagi sa ‘pagpakita ug pagbati alang sa isigkaingon, pagbaton ug inigsoong pagbati’ ug pinaagi sa pagkahimong ‘mabination uban ang kalumo.’ Sila maningkamot nga mahisama kang Kristo, nga ‘mapainubsanon sa hunahuna, dili magabalos ug kadaot sa kadaot o magasultig pasipala sa pasipala.’—1 Pedro 3:8, 9; 1 Corinto 11:1.

Masinundanon-sa-Balaod nga mga Sakop

11. Sa unsang mga balaod nga ang mga sakop ni Kristo magpasakop?

¹¹ Maingon nga ang umaabot nga mga lungsoranon sa usa ka nasod mosunod sa mga balaod sa ilang bag-ong nasod nga puy-an, ang mga sakop ni Kristo magpasakop “sa balaod ni Kristo” pinaagi sa pagpahiuyon sa ilang kinabuhi sa tanang gitudlo ug gisugo ni Jesus. (Galacia 6:2) Sila ilabinang maunongong magkinabuhi sumala sa “harianong balaod” sa gugma. (Santiago 2:8) Unsay naapil niining mga balaora?

12, 13. Sa unsang paagi kita maunongong magpasakop “sa balaod ni Kristo”?

¹² Ang mga sakop ni Kristo adunay mga kahuyangan ug mga kasaypanan. (Roma 3:23) Busa, kinahanglang ugmaron nila ang “dili-salingkapaw nga inigsoong pagbati” aron “maghigugmaay sa usag usa gikan sa kasingkasing.” (1 Pedro 1:22) “Kon ang usa adunay reklamo batok sa lain,” ang mga Kristohanon maunongong magpadapat sa balaod ni Kristo pinaagi sa ‘pag-antos sa usag usa ug kinabubut-on nga pagpasaylo sa usag usa.’ Ang pagsunod niini nga balaod motabang kanila sa pagpasaylo sa mga kahuyangan ug sa pagpangitag mga rason nga higugmaon ang usag usa. Dili ka ba mapasalamaton nga makauban kadtong kinsa, ingong maunongong pagpasakop sa atong mahigugmaong Hari, nagsul-ob sa gugma, ang “hingpit nga bugkos sa panaghiusa”?—Colosas 3:13, 14.

¹³ Dugang pa, gipatin-aw ni Jesus nga ang gugma nga iyang gipakita mas labaw pa kay sa gugma nga kasagarang ipakita sa mga tawo sa usag usa. (Juan 13:34, 35) Kon atong higugmaon kadto lamang nahigugma kanato, kita wala magbuhat ug “talagsaong butang.” Nianang kahimtanga ang atong  gugma dili-bug-os ug kulang. Giawhag kita ni Jesus nga sundogon ang gugma sa iyang Amahan pinaagi sa pagbaton ug may-prinsipyong gugma bisan alang sa mga kaaway nga nagdumot ug naglutos kanato. (Mateo 5:46-48) Kining maong gugma magpalihok usab sa mga sakop sa Gingharian sa paglahutay nga maunongon diha sa ilang pangunang buluhaton. Unsa man kana?

Gisulayan ang Pagkamaunongon

14. Nganong ang buluhatong pagsangyaw hinungdanon kaayo?

¹⁴ Ang mga sakop sa Gingharian sa Diyos karon adunay hinungdanong buluhaton sa “paghatag ug bug-os nga pagpamatuod mahitungod sa gingharian sa Diyos.” (Buhat 28:23) Hinungdanon ang pagbuhat niana tungod kay ang Mesiyanikong Gingharian magbindikar sa unibersohanong pagkasoberano ni Jehova. (1 Corinto 15:24-28) Sa dihang kita magsangyaw sa maayong balita, ang mga tawo nga makadungog niana adunay kahigayonan nga mahimong mga sakop sa Gingharian sa Diyos. Dugang pa, ang reaksiyon sa mga tawo sa maong mensahe mahimong basehanan ni Kristo nga Hari sa iyang paghukom sa katawhan. (Mateo 24:14; 2 Tesalonica 1:6-10) Busa, ang pangunang paagi diin atong ikapakita ang atong pagkamaunongon kang Kristo maoy pinaagi sa pagtuman sa iyang sugo nga sultian ang uban bahin sa Gingharian.—Mateo 28:18-20.

15. Nganong ang pagkamaunongon sa mga Kristohanon ginasulayan?

¹⁵ Siyempre, si Satanas mosupak sa buluhatong pagsangyaw kutob sa iyang mahimo, ug ang tawhanong mga magmamando dili moila sa hinatag-sa-Diyos nga awtoridad ni Kristo. (Salmo 2:1-3, 6-8) Mao nga gipasidan-an ni Jesus ang iyang mga tinun-an: “Ang ulipon dili labaw kay sa iyang agalon. Kon sila naglutos kanako, sila magalutos usab kaninyo.” (Juan 15:20) Busa, ang mga sumusunod ni Kristo nalangkit sa usa ka espirituwal nga pagpakiggubat nga nagsulay sa ilang pagkamaunongon.—2 Corinto 10:3-5; Efeso 6:10-12.

16. Sa unsang paagi ang mga sakop sa Gingharian mobayad sa “mga butang sa Diyos ngadto sa Diyos”?

¹⁶ Bisan pa niana, ang mga sakop sa Gingharian sa Diyos nagpabiling maunongon sa ilang dili-makita nga Hari apan sa samang higayon nagtahod sa tawhanong mga awtoridad. (Tito 3:1, 2) Si Jesus miingon: “Ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Marcos 12:13-17) Busa, ang mga sakop ni Kristo nagtuman sa mga balaod sa gobyerno nga dili mosumpaki sa mga balaod sa Diyos. (Roma 13:1-7) Apan, sa dihang ang Hudiyonhong hataas nga korte nagsalikway sa mga balaod sa Diyos pinaagi sa pagbaod sa mga tinun-an ni Jesus sa paghunong sa pagsangyaw, sila hugot apan matinahorong miingon nga kinahanglan nilang ‘sugton ang Diyos ingong magmamando inay ang mga tawo.’—Buhat 1:8; 5:27-32.

17. Nganong kita maisogong makasagubang sa mga pagsulay sa pagkamaunongon?

¹⁷ Siyempre, ang mga sakop ni Kristo kinahanglang magmaisogon gayod aron makapabiling maunongon sa ilang Hari sa dihang pagalutoson. Bisan pa niana, si Jesus miingon: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit.” (Mateo 5:11, 12) Nasinati sa unang mga sumusunod ni Kristo nga tinuod kining mga pulonga. Bisan sa dihang sila gibunalan tungod sa pagpadayon sa pagsangyaw bahin sa Gingharian, sila nagmaya “tungod kay giisip sila nga takos pakaulawan tungod sa iyang ngalan. Ug matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.” (Buhat 5:41, 42) Takos kamong hatagag komendasyon, tungod kay inyong gipakita ang samang espiritu sa pagkamaunongon sa dihang kamo nag-antos sa mga kalisdanan, sakit, pagbangotan, o pagsupak.—Roma 5:3-5; Hebreohanon 13:6.

18. Unsay gipaila sa gisulti ni Jesus ngadto kang Poncio Pilato?

 ¹⁸ Sa dihang siya Umaabot pa nga Hari, si Jesus nagpatin-aw ngadto sa Romanong Gobernador nga si Poncio Pilato: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away na unta aron dili ako ikatugyan ngadto sa mga Hudiyo. Apan, sa pagkatinuod, ang akong gingharian dili gikan niini nga tinubdan.” (Juan 18:36) Busa, ang mga sakop sa langitnong Gingharian dili mobakyaw ug armas batok kang bisan kinsa o modapig sa usa ka pundok diha sa bisan unsang tawhanong paggubatay. Sa pagpakitag pagkamaunongon ngadto sa “Prinsipe sa Pakigdait,” sila bug-os nga magpabiling neyutral sa makapabahinbahin nga mga kalihokan sa kalibotan.—Isaias 2:2-4; 9:6, 7.

Walay-Kataposang Ganti Alang sa Maunongong mga Sakop

19. Nganong ang mga sakop ni Kristo makalantaw sa umaabot nga masaligon?

¹⁹ Ang maunongong mga sakop ni Kristo, ang “Hari sa mga hari,” naglantaw sa umaabot nga masaligon. Sila mahinamong nagpaabot sa nagkahaduol na nga pagpasundayag niya sa iyang labaw-tawhanon nga harianong gahom. (Pinadayag 19:11–20:3; Mateo 24:30) Ang nanghibilin sa maunongon, dinihogan-sa-espiritu nga “mga anak sa gingharian” nagpaabot sa ilang bililhong panulondon ingong mga hari uban kang Kristo sa langit. (Mateo 13:38; Lucas 12:32) Ang maunongong “ubang mga karnero” ni Kristo mahinamong nagpaabot sa pag-uyon sa ilang Hari sa dihang siya moingon: “Umari, kamong gipanalanginan sa akong Amahan, panunda ninyo ang [yutan-ong Paraiso nga bahin sa] gingharian nga giandam alang kaninyo sukad pa sa pagkatukod sa kalibotan.” (Juan 10:16; Mateo 25:34) Busa, hinaot nga ang tanang sakop sa Gingharian magmadeterminado sa pagpadayon sa pag-alagad nga maunongon kang Kristo nga Hari.

[Footnote]

Makapatin-aw Ka Ba?

• Nganong si Kristo takos sa atong pagkamaunongon?

• Sa unsang paagi ang mga sakop ni Kristo nagpakita sa ilang pagkamaunongon ngadto kaniya?

• Nganong buot man nato nga magmaunongon kang Kristo nga Hari?

[Mga Pangutana sa Pagtuon]

[Kahon sa pahid 31]

DUGANG TALAGSAONG MGA HIYAS NI KRISTO

Pagkawalay-pinalabi—Juan 4:7-30.

Pagkamabination—Mateo 9:35-38; 12:18-21; Marcos 6:30-34.

Nagsakripisyo-sa-kaugalingong gugma—Juan 13:1; 15:12-15.

Pagkamaunongon—Mateo 4:1-11; 28:20; Marcos 11:15-18.

Empatiya—Marcos 7:32-35; Lucas 7:11-15; Hebreohanon 4:15, 16.

Pagkamakataronganon—Mateo 15:21-28.

[Hulagway sa panid 29]

Pinaagi sa pagpakitag gugma sa usag usa, kita maunongong nagpasakop “sa balaod ni Kristo”

[Mga hulagway sa panid 31]

Ang mga hiyas ba ni Kristo nagpalihok kanimo sa pag-alagad kaniya nga maunongon?