Mga Magbalantay nga “mga Panig-ingnan Alang sa Panon”
Mga Magbalantay nga “mga Panig-ingnan Alang sa Panon”
‘Bantayi ninyo ang panon sa Diyos nga ubos sa inyong pag-atiman . . . nga kinabubut-on . . . , maikagon . . . , nga mahimong mga panig-ingnan alang sa panon.’—1 PEDRO 5:2, 3.
1, 2. (a) Unsang pribilehiyo ang gipiyal ni Jesus kang apostol Pedro, ug nganong makataronganon ang pagsalig ni Jesus? (b) Unsay pagbati ni Jehova sa tinudlong mga magbalantay?
USA ka higayon niana sa wala pa ang Pentekostes 33 K.P., si Pedro ug ang unom pa ka tinun-an nangaon sa pamahaw nga gihikay ni Jesus diha sa baybayon sa Dagat sa Galilea. Dili kini ang unang higayon nga nakita ni Pedro ang binanhawng si Jesus, ug sa walay duhaduha nalipay siya sa pagkahibalo nga buhi si Jesus. Apan tingali nabalaka usab si Pedro. Tungod kay, pipila lang ka adlaw una pa niana, iyang gilimod atubangan sa mga tawo nga nakaila siya kang Jesus. (Lucas 22:55-60; 24:34; Juan 18:25-27; 21:1-14) Gibadlong ba ni Jesus ang mahinulsolong si Pedro tungod sa iyang kakulang ug pagtuo? Wala. Hinunoa, iyang gipiyalan si Pedro sa pribilehiyo nga pakaonon ug bantayan ang “gagmayng mga karnero [ni Jesus].” (Juan 21:15-17) Ingon sa gipakita sa asoy sa Bibliya bahin sa kasaysayan sa unang-siglong Kristohanong kongregasyon, makataronganon ang pagsalig ni Jesus kang Pedro. Duyog sa ubang mga apostoles ug mga ansiyano sa Jerusalem, si Pedro nagbantay gayod sa Kristohanong kongregasyon panahon sa grabeng mga pagsulay ug kusog nga pag-uswag.—Buhat 1:15-26; 2:14; 15:6-9.
2 Karon, si Jehova pinaagi kang Jesu-Kristo nagtudlo ug kuwalipikadong mga lalaki nga mag-alagad ingong espirituwal nga mga magbalantay aron sa pag-agak sa Iyang mga karnero latas sa labing makuyaw nga mga panahon sa kasaysayan sa tawo. (Efeso 4:11, 12; 2 Timoteo 3:1) Makataronganon ba ang maong pagsalig? Ang malinawon nga Kristohanong panag-igsoonay nga naglungtad sa tibuok kalibotan nagpamatuod nga makataronganon kana. Tinuod, kining maong mga magbalantay masayop usab, sama kang Pedro. (Galacia 2:11-14; Santiago 3:2) Bisan pa niana, gipiyalan sila ni Jehova nga maoy moatiman sa mga karnero nga “iyang gipalit pinaagi sa dugo sa iyang kaugalingong Anak.” (Buhat 20:28) Gimahal pag-ayo ni Jehova kining mga tawhana, nga nag-isip kanila nga “takos sa doble nga pasidungog.”—1 Timoteo 5:17.
3. Sa unsang paagi nahuptan sa espirituwal nga mga magbalantay ang andam ug maikagon nga espiritu?
3 Sa unsang paagi nahuptan sa espirituwal nga mga magbalantay ang andam ug maikagon nga espiritu, sa ingon nahimong mga panig-ingnan sa panon? Sama kang Pedro ug sa ubang unang-siglong mga magbalantay, sila nagasalig sa balaang espiritu sa Diyos, nga naghatag kanila sa kusog nga ilang gikinahanglan aron maabaga ang ilang responsibilidad. (2 Corinto 4:7) Ang balaang espiritu nagpatungha usab diha kanila sa bunga sa espiritu—gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon. (Galacia 5:22, 23) Hisgotan nato ang pipila ka espesipikong mga paagi diin ang mga magbalantay makahatag ug panig-ingnan sa pagpasundayag niining maong bunga samtang sila nagbantay sa panon sa Diyos nga ubos sa ilang pag-atiman.
Higugmaa ang Panon ug ang Tagsa-tagsa ka Karnero
4, 5. (a) Sa unsang paagi si Jehova ug Jesus nagpakita ug gugma alang sa panon? (b) Unsa ang pipila ka paagi diin ang espirituwal nga mga magbalantay nagpasundayag ug gugma alang sa panon?
4 Ang pangunang hiyas nga gipatungha sa espiritu sa Diyos mao ang gugma. Gipasundayag ni Jehova ang iyang gugma alang sa panon sa katibuk-an sa dihang iya kining gitagan-an ug abundang espirituwal nga pagkaon. (Isaias 65:13, 14; Mateo 24:45-47) Apan, labaw pa ang iyang gihimo kay sa pagpakaon lamang sa panon. Siya adunay mahigugmaong kahingawa alang sa tagsa-tagsa ka karnero. (1 Pedro 5:6, 7) Si Jesus usab nahigugma sa panon. Iyang gihalad ang iyang kalag alang niana, ug siya nakaila “sa ngalan” sa matag usa ka karnero.—Juan 10:3, 14-16.
5 Ang espirituwal nga mga magbalantay nagsundog kang Jehova ug Jesus. Sila nagpasundayag ug gugma alang sa panon sa Diyos sa katibuk-an pinaagi sa ‘pagkugi sa pagpanudlo’ diha sa kongregasyon. Ang ilang binase-sa-Bibliya nga mga pakigpulong makatabang sa pagpakaon ug pagpanalipod sa panon, ug ang ilang paghago niining bahina makita sa tanan. (1 Timoteo 4:13, 16) Ang dili kaayo makita mao ang panahon nga ilang gigugol sa pag-asikaso sa mga rekord sa kongregasyon, sa mga sulat, paghimog mga eskedyul, ug sa pag-atiman sa daghan pang butang aron maseguro nga ang mga tigom sa kongregasyon ug ubang kalihokan mapahigayon nga “may kahapsay ug pinaagig kahikayan.” (1 Corinto 14:40) Kadaghanan niining trabahoa gihimo nga wala makita sa uban ug tingali wala ra kaayo mamatikdi sa uban. Kana mao gayoy paghago nga gipalihok sa gugma.—Galacia 5:13.
6, 7. (a) Unsa ang usa ka paagi diin ang mga magbalantay mas masinati sa mga karnero? (b) Nganong mapuslanon usahay nga ipahayag nato ang atong gibati ngadto sa usa ka ansiyano?
6 Ang mahigugmaong Kristohanong mga magbalantay naningkamot sa pagpakita ug personal nga interes sa tagsa-tagsa ka karnero diha sa kongregasyon. (Filipos 2:4) Ang usa ka paagi diin ang mga magbalantay mas masinati sa tagsa-tagsa ka karnero mao ang pag-uban kanila diha sa publikong buluhaton nga pagsangyaw. Subsob nga iuban ni Jesus ang iyang mga sumusunod diha sa buluhatong pagsangyaw ug gigamit ang maong mga okasyon sa paghatag ug pagdasig. (Lucas 8:1) Ang usa ka eksperyensiyadong Kristohanong magbalantay miingon: “Akong nakaplagan nga ang usa sa kinamaayohang mga paagi nga masinati ug madasig ang usa ka igsoon maoy sa pag-uban kanila diha sa pagsangyaw sa kanataran.” Kon wala ka makahigayon ning bag-o pa sa pag-uban sa usa sa mga ansiyano diha sa pag-alagad sa kanataran, nganong dili mohimog mga kahikayan sa paghimo dayon niini?
7 Ang gugma nagpalihok kang Jesus sa pag-ambit sa mga kalipay ug kagul-anan sa iyang mga sumusunod. Pananglitan, sa dihang ang 70 sa iyang mga tinun-an malipayong namauli gikan sa ilang pagsangyaw, si Jesus “nalipay sa hilabihan.” (Lucas 10:17-21) Apan, sa dihang nakita niya ang epekto sa kamatayon ni Lazaro diha kang Maria ug sa mga membro sa ilang pamilya ug sa ilang mga higala, “si Jesus mihilak.” (Juan 11:33-35) Sa samang paagi, ang mahingawaon nga mga magbalantay karon may empatiya usab sa gibati sa mga karnero. Ang gugma nagpalihok kanila sa ‘pagmaya uban sa mga tawong nagmaya’ ug sa ‘paghilak uban sa mga tawong nanghilak.’ (Roma 12:15) Kon ikaw nagmalipayon o nagmasulub-on, ayaw pagpanuko sa pagpahayag sa imong gibati ngadto sa Kristohanong mga magbalantay. Ang pagkadungog nga ikaw nagmalipayon makadasig kanila. (Roma 1:11, 12) Ang pagkasayod nila bahin sa imong mga pagsulay makapaarang kanila sa pagpalig-on ug paghupay kanimo.—1 Tesalonica 1:6; 3:1-3.
8, 9. (a) Sa unsang paagi ang usa ka ansiyano nagpakita ug gugma sa iyang asawa? (b) Unsa ka hinungdanon nga ang usa ka magbalantay magpakitag gugma sa iyang pamilya?
8 Ang gugma nga nabatonan sa usa ka magbalantay alang sa panon ilabinang madayag diha sa iyang paagi sa pagtratar sa iyang pamilya. (1 Timoteo 3:1, 4) Kon siya minyo, ang gugma ug pasidungog nga iyang gipakita sa iyang asawa maghatag ug panig-ingnan nga sundogon sa ubang mga bana. (Efeso 5:25; 1 Pedro 3:7) Tagda ang komento sa usa ka Kristohanong babaye nga ginganlag Linda. Ang iyang bana nag-alagad ingong magtatan-aw sulod sa kapin sa 20 ka tuig sa wala pa kini mamatay. Si Linda miingon: “Ang akong bana puliki gayod kanunay sa pag-atiman sa kongregasyon. Apan gipabati niya kanako nga daw magkauban kaming duha sa pag-atiman sa kongregasyon. Subsob niyang ipahayag ang iyang apresasyon sa akong pagpaluyo kaniya, ug iyang gigugol ang iyang libreng panahon uban kanako. Tungod niini, ako mibating gihigugma ug wala masina sa panahon nga iyang gigugol sa pag-alagad sa kongregasyon.”
9 Kon ang usa ka Kristohanong magbalantay adunay mga anak, ang iyang mahigugmaong pagdisiplina ug regular nga paghatag ug komendasyon sa iyang mga anak magsilbing sumbanan sa ubang mga ginikanan. (Efeso 6:4) Sa pagkatinuod, ang gugma nga iyang gipakita sa iyang pamilya padayong magpamatuod nga siya takos sa katungdanan nga gipiyal kaniya sa dihang siya gitudlo sa balaang espiritu ingong magbalantay.—1 Timoteo 3:4, 5.
Palamboa ang Kalipay ug Kalinaw Pinaagi sa Pagpakigkomunikar
10. (a) Unsay makahatag ug negatibong epekto sa kalipay ug kalinaw sa kongregasyon? (b) Unsang isyu ang makatugaw unta sa kalinaw sa unang-siglong kongregasyon, ug sa unsang paagi nasulbad ang maong isyu?
10 Ang balaang espiritu makapatunghag kalipay ug kalinaw diha sa kasingkasing sa tagsa-tagsa ka Kristohanon, taliwala sa lawas sa mga ansiyano, ug sa kongregasyon sa katibuk-an. Apan, ang kakulang ug madayganong komunikasyon adunay negatibong epekto sa maong kalipay ug kalinaw. Si Haring Solomon sa kakaraanan nag-ingon: “Mapakyas ang mga plano kon walay kompidensiyal nga panagsultihanay.” (Proverbio 15:22) Sa laing bahin, ang matinahoron ug madayganon nga komunikasyon magpalambo sa kalipay ug kalinaw. Pananglitan, sa dihang ang isyu bahin sa sirkunsisyon makatugaw unta sa kalinaw sa unang-siglong kongregasyon, ang nagamandong lawas sa Jerusalem nangayo sa pagtultol sa balaang espiritu. Kini nga mga ansiyano nagpahayag usab sa ilang lainlaing mga panghunahuna bahin sa maong isyu. Human sa madasigon kaayong panaghisgot, sila nakahimog desisyon. Sa dihang ilang gipahibalo ang ilang hiniusang desisyon ngadto sa mga kongregasyon, ang mga igsoon “nagmaya maylabot sa maong pagdasig.” (Buhat 15:6-23, 25, 31; 16:4, 5) Ang kalipay ug kalinaw napalambo.
11. Sa unsang paagi ang mga ansiyano makapalambo sa kalipay ug kalinaw diha sa kongregasyon?
11 Mao man usab karon, ang mga magbalantay magpalambo sa kalipay ug kalinaw diha sa kongregasyon pinaagi sa pagkahimong maayong makigsulti. Sa dihang ang mga problema makatugaw sa kalinaw sa kongregasyon, sila magmiting ug bukas nga magpahayag sa ilang gibati. Sila matinahorong mamati sa mga hunahuna sa ilang mga isigka-magbalantay. (Proverbio 13:10; 18:13) Human mag-ampo alang sa balaang espiritu, ilang ibase ang ilang mga desisyon sa mga prinsipyo sa Bibliya ug sa mga giya nga gipatik sa “matinumanon ug maalamong ulipon.” (Mateo 24:45-47; 1 Corinto 4:6) Sa dihang makab-ot sa lawas sa mga ansiyano ang desisyon nga binase sa Kasulatan, ang matag ansiyano magpasakop sa pagtultol sa balaang espiritu pinaagi sa pagpaluyo sa maong desisyon bisan pag ang iyang personal nga opinyon wala uyoni sa kadaghanan. Ang maong pagkamakasaranganon magpalambo sa kalipay ug kalinaw ug maghatag ug maayong panig-ingnan sa mga karnero kon unsaon paglakaw uban sa Diyos. (Miqueas 6:8) Ikaw ba makasaranganong nakigkooperar sa binase-sa-Bibliya nga mga desisyon nga gihimo sa mga magbalantay sa kongregasyon?
Magbaton ug Hataas-nga-Pailob ug Pagkamaluloton
12. Nganong kinahanglan man nga si Jesus magbaton ug hataas-nga-pailob ug kalulot sa iyang pagpakiglabot sa iyang mga apostoles?
12 Si Jesus hataas-ug-pailob ug maluloton sa iyang pagpakiglabot sa iyang mga apostoles, bisan pag nasayop sila sa makadaghan. Pananglitan, daghang higayon nga gipaningkamotan ni Jesus nga ipasiugda kanila ang panginahanglan nga magmapainubsanon. (Mateo 18:1-4; 20:25-27) Bisan pa niana, sa kataposang gabii sa kinabuhi ni Jesus dinhi sa yuta, human gayod nga gipakitaan niya sila ug leksiyon bahin sa pagkamapainubsanon pinaagi sa paghugas sa ilang mga tiil, “dihay nahitabo usab nga mainit nga panaglalis sa ilang taliwala bahin sa kon kinsa kanila ang labing dako.” (Lucas 22:24; Juan 13:1-5) Gikasab-an ba ni Jesus ang mga apostoles? Wala, siya malulotong nangatarongan kanila, nga nag-ingon: “Kinsa ba ang labaw, ang nagahirag sa lamesa o ang nagaalagad? Dili ba ang nagahirag sa lamesa? Apan ako ania sa inyong taliwala ingon nga usa nga nagaalagad.” (Lucas 22:27) Ang hataas-nga-pailob ug pagkamaluloton ni Jesus—dinuyogan sa iyang maayong panig-ingnan—sa ngadtongadto nakatandog sa kasingkasing sa mga apostoles.
13, 14. Kanus-a ilabinang gikinahanglan nga magmaluloton ang mga magbalantay?
13 Sa samang paagi, ang espirituwal nga magbalantay kinahanglan tingaling mohatag ug tambag sa makadaghan ngadto sa usa ka tawo mahitungod sa usa ka kahuyangan. Ang magbalantay mahimong mapikal sa maong tawo. Apan, kon iyang hinumdoman ang iyang kaugalingong mga kasaypanan samtang siya ‘nagapahimangno sa mga badlonganon,’ siya makapakita ug hataas-nga-pailob ug kalulot ngadto sa iyang igsoon. Nianang paagiha iyang gisundog si Jesus ug si Jehova, kinsa nagpakita niining mga hiyasa ngadto sa tanang Kristohanon—lakip na sa mga magbalantay.—1 Tesalonica 5:14; Santiago 2:13.
14 Usahay, ang mga magbalantay kinahanglan tingaling mohatag ug bug-at nga tambag ngadto sa usa nga nakahimog grabeng sala. Kon ang indibiduwal dili mahinulsolon, kinahanglang palagpoton sa mga magbalantay ang nakasala gikan sa kongregasyon. (1 Corinto 5:11-13) Bisan pa niana, ang paagi sa ilang pagpakiglabot nianang tawhana magpakita nga ilang gidumtan ang sala, dili ang makasasala. (Judas 23) Ang pagkamaluloton sa mga magbalantay hayan makapasayon sa nahisalaag nga karnero sa pagbalik ra unya ngadto sa panon.—Lucas 15:11-24.
Ang Maayong mga Buhat Gipalihok sa Pagtuo
15. Unsa ang usa ka paagi diin ang mga magbalantay nagsundog sa pagkamaayo ni Jehova, ug unsay nagpalihok kanila sa pagbuhat niana?
15 “Si Jehova maayo sa tanan,” bisan niadtong walay apresasyon sa iyang gibuhat alang kanila. (Salmo 145:9; Mateo 5:45) Ang pagkamaayo ni Jehova ilabinang nadayag sa pagkaagi nga iyang gipadala ang iyang katawhan sa pagwali sa “maayong balita sa gingharian.” (Mateo 24:14) Ang mga magbalantay nagsumbalik-silaw sa pagkamaayo sa Diyos pinaagi sa pagpanguna niining buluhatong pagwali. Unsay nagpalihok sa ilang makugihong paningkamot? Ang lig-ong pagtuo kang Jehova ug sa iyang mga saad.—Roma 10:10, 13, 14.
16. Sa unsang paagi ang mga magbalantay ‘makabuhat ug maayo’ ngadto sa mga karnero?
16 Gawas pa sa pagbuhat ug “maayo ngadto sa tanan” pinaagi sa pagsangyaw, ang mga magbalantay adunay responsibilidad sa pagbuhat ug maayo “ilabina kanila nga [ilang] kabanay sa pagtuo.” (Galacia 6:10) Ang usa ka paagi nga gibuhat nila kini maoy sa paghimog makapadasig nga mga pagduaw isip magbalantay. “Malipay kong mohimog mga pagduaw isip magbalantay,” matod pa sa usa ka ansiyano. “Kini naghatag kanako ug kahigayonan sa paghatag ug komendasyon sa mga igsoon alang sa ilang mga paningkamot ug sa pagtabang kanila nga masabtan nga ang ilang paghago gipabilhan.” Usahay, ang mga ansiyano mosugyot tingali ug mga paagi diin ang usa ka indibiduwal makapauswag sa iyang pag-alagad kang Jehova. Sa pagbuhat niana, ang maalamong mga magbalantay nagsundog kang apostol Pablo. Tagda ang paagi nga siya mihangyo sa mga igsoon sa Tesalonica: “Kami masaligon sa Ginoo maylabot kaninyo, nga kamo nagbuhat ug nagpadayon sa pagbuhat sa mga butang nga among gisugo.” (2 Tesalonica 3:4) Ang maong mga ekspresyon sa pagsalig makatukbil sa maayong mga kinaiya sa mga karnero ug makapasayon kanila sa ‘pagsugot sa mga nagapanguna.’ (Hebreohanon 13:17) Sa dihang ikaw makatagamtam ug makapadasig nga pagduaw sa mga magbalantay, nganong dili nimo ipahayag ang imong apresasyon niana?
Ang Kalumo Nagkinahanglan ug Pagpugong-sa-Kaugalingon
17. Unsang pagtulon-an ang nakat-onan ni Pedro gikan kang Jesus?
17 Si Jesus malumog-buot, bisan pag siya gihagit. (Mateo 11:29) Sa dihang siya gibudhian ug gidakop, si Jesus nagpasundayag ug kalumo ug hilabihang pagpugong-sa-kaugalingon. Sa kamadalidalion, si Pedro milanit ug espada ug mibalos. Apan gipahinumdoman siya ni Jesus: “Naghunahuna ba kamo nga dili ako makapangamuyo sa akong Amahan aron hatagan ako niining gutloa ug kapin sa napulog-duha ka lehiyon sa mga manulonda?” (Mateo 26:51-53; Juan 18:10) Nakat-onan ni Pedro ang pagtulon-an ug sa ulahi iyang gipahinumdoman ang mga Kristohanon: “Si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob. . . . Sa gisultihan siya ug pasipala, wala siya mobalos sa pagsultig pasipala. Sa nag-antos siya, wala siya manghulga.”—1 Pedro 2:21-23.
18, 19. (a) Kanus-a nga ang mga magbalantay ilabinang magpasundayag ug kalumo ug pagpugong-sa-kaugalingon? (b) Unsang mga pangutana ang atong hisgotan sa sunod nga pagtuon?
18 Sa samang paagi, ang epektibong mga magbalantay malumog-buot bisan pag sila wala pakitai ug maayong pagtagad. Pananglitan, ang uban nga ilang gisulayan pagtabang diha sa kongregasyon dili tingali modawat niana. Kon ang indibiduwal nga nagkinahanglan ug tabang maluya o masakiton sa espirituwal, basin siya ‘mamulong nga walay paghunahuna sama sa mga dunggab sa espada’ sa dihang tambagan. (Proverbio 12:18) Apan, sama kang Jesus, ang mga magbalantay dili mobalos pinaagig mahait nga mga pulong o mapanimaslong mga lihok. Hinunoa, sila magpasundayag gihapon ug pagpugong-sa-kaugalingon ug pagbati alang sa isigkaingon, nga mahimong panalangin ngadto sa usa nga nanginahanglan ug tabang. (1 Pedro 3:8, 9) Nakakat-on ka ba sa panig-ingnan sa mga ansiyano ug nagpasundayag ug kalumo ug pagpugong-sa-kaugalingon sa dihang ikaw gitambagan?
19 Sa walay duhaduha, si Jehova ug Jesus nagpabili gayod sa paghago sa libolibong magbalantay nga kinabubut-ong nag-atiman sa tibuok-kalibotang panon. Si Jehova ug ang iyang Anak aduna usay halalom nga pagmahal alang sa libolibong ministeryal nga mga alagad nga nagpaluyo sa mga ansiyano sa ‘pag-alagad sa mga balaan.’ (Hebreohanon 6:10) Nan, ngano man nga ang pipila ka bawtismadong mga lalaki nagpanuko sa pagkab-ot niining “maayong buhat”? (1 Timoteo 3:1) Ug sa unsang paagi ginabansay ni Jehova kadtong iyang gitudlo ingong mga magbalantay? Atong hisgotan kining mga pangutanaha sa sunod nga artikulo.
Nahinumdom Ka Ba?
• Unsa ang pipila ka paagi diin ang mga magbalantay nagpakita ug gugma alang sa panon?
• Sa unsang paagi ang tanan diha sa kongregasyon makapalambo sa kalipay ug pakigdait?
• Nganong ang mga magbalantay magpakitag hataas-nga-pailob ug magmaluloton sa dihang maghatag ug tambag?
• Sa unsang paagi ang mga ansiyano magpasundayag ug pagkamaayo ug pagtuo?
[Mga Pangutana sa Pagtuon]
[Hulagway sa panid 18]
Ang mga ansiyano gipalihok sa gugma sa pag-alagad sa kongregasyon
[Mga hulagway sa panid 18]
Sila naggugol usab ug panahon uban sa ilang mga pamilya diha sa paglingawlingaw . . .
. . . ug sa ministeryo
[Hulagway sa panid 20]
Ang maayong komunikasyon taliwala sa mga ansiyano magpalambo sa kalipay ug pakigdait diha sa kongregasyon