Pagtugkad sa Kasingkasing sa Bata

MAGUOL ka ba sa dihang makakita kag mga bata nga nagdulag pinusilay? Kanang dulaa komon kaayo bisan taliwala sa gagmay pang mga bata, tungod kay ang kabangisan kaylap diha sa kalibotan sa kalingawan. Unsaon nimo pagkombinsir ang usa ka bata nga bayloan ug mga dulaan nga nagpasiugdag pakigdait ang iyang mga dulaan nga nagdasig ug pakiggubat? Si Waltraud, nga dugay nang misyonarya sa mga Saksi ni Jehova sa Aprika, nakakaplag ug paagi sa pagtabang sa usa ka batang lalaki sa pagbuhat niana.

Tungod sa gubat, si Waltraud napugos sa pagbiya sa nasod nga iyang gipuy-an ug mibalhin sa laing nasod sa Aprika. Didto siya nagsugod sa pagtuon sa Bibliya uban sa inahan sa singko-anyos nga batang lalaki. Sa matag higayon nga moduaw siya sa inahan, ang bata nagdula ug gamayng pusil-pusil nga plastik, nga mao lamay dulaan nga iyang nabatonan. Si Waltraud wala sukad makakita kaniya nga nagtiro niini, apan kanunay niyang ablihan ug sirad-an ang pusil-pusil, nga morag nagkarga ug mga bala niini.

Giingnan ni Waltraud ang bata: “Dong Werner, nahibalo ka ba kon nganong mipuyo ko dinhi sa inyong nasod? Tungod sa gubat ako napugos sa pagbiya sa nasod nga akong gipuy-an aron sa paglikay sa kuyaw nga mga lalaki nga mamusil ug mga tawo ginamit ang gidala-dala nilang pusil sama nianang imoha. Sa imong hunahuna, maayo ba nga mamusil?”

“Dili,” si Werner mitubag nga masulub-on.

“Husto ka,” matod pa ni Waltraud. Dayon siya nangutana: “Nahibalo ka ba kon nganong magduawan ko nimo ug sa imong Mama kada semana? Tungod kini kay ang mga Saksi ni Jehova gustong motabang sa uban nga magmakigdaiton sa Diyos ug sa ilang mga silingan.” Nga may pag-uyon sa inahan ni Werner, si Waltraud miingon kaniya: “Kon imong ihatag kanako ang imong pusil-pusil, ako kining ilabay, ug ako mosaad nimo nga hatagan ti kag trak-trak nga upat ug ligid.”

Gitunol ni Werner ang iyang pusil-pusil. Siya naghulat ug upat ka semana, ug unya miabot ang iyang bag-ong dulaan—usa ka trak-trak nga gama sa kahoy, nga malipayon niyang gidawat.

Naggahin ka bag panahon sa pagpakigsulti sa imong mga anak, nga naningkamot sa pagtugkad sa ilang kasingkasing aron mapalihok sila sa paglabay sa mga dulaan nga parehas ug dagway sa mga armas nga gigamit sa pagpakiggubat? Kon mao, ikaw nagtudlo kanila ug usa ka pagtulon-an nga makahatag kanilag kaayohan sa tibuok nilang kinabuhi.