Si Jehova Nagabansay ug mga Magbalantay Alang sa Iyang Panon

“Si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.”—PROVERBIO 2:6.

1, 2. Nganong ang bawtismadong mga lalaki mangab-ot ug dugang responsibilidad diha sa kongregasyon?

 “AKO nalipay kaayo sa dihang ako natudlo ingong ansiyano,” miingon si Nick, kinsa nag-alagad ingong magtatan-aw sulod na sa pito ka tuig. “Akong giisip kining pribilehiyoa ingong kahigayonan nga mapalapad ang akong pag-alagad kang Jehova. Akong gibati nga ako adunay utang kabubut-on kaniya tungod sa tanan nga iyang nahimo alang kanako. Nagtinguha usab ako sa pagtabang sa mga membro sa kongregasyon kutob sa akong maarangan, sa pag-abag kanila sama sa pag-abag sa ubang mga ansiyano kanako.” Apan gawas sa kalipay, siya nabalaka usab. “Tungod kay ako wala pay 30 anyos sa dihang ako natudlo ingong ansiyano,” nagpadayon si Nick, “ako nabalaka nga basin kulang pa ako sa gikinahanglang mga katakos—ang katakos sa pag-ila ug kaalam—sa pagbantay sa kongregasyon sa epektibong paagi.”

² Kadtong gitudlo ni Jehova nga moatiman sa iyang panon adunay daghang katarongan nga malipay. Gipahinumdoman ni apostol Pablo ang mga ansiyano nga gikan sa Efeso sa usa ka katarongan sa dihang, nagkutlo kang Jesus, siya miingon: “Adunay labaw nga kalipay sa paghatag kay sa pagdawat.” (Buhat 20:35) Ang pag-alagad ingong ministeryal nga alagad o ansiyano nagtagana sa bawtismadong mga lalaki ug dugang mga paagi sa paghatag ngadto kang Jehova ug sa kongregasyon. Pananglitan, ang ministeryal nga mga alagad nakigtambayayong sa mga ansiyano. Kini nga mga alagad nag-atiman usab sa daghan pang ubang makapupos-ug-panahon apan hinungdanong mga asaynment. Ang maong mga igsoon gipalihok sa gugma alang sa Diyos ug sa silingan sa paghatag ug bililhong pag-alagad.—Marcos 12:30, 31.

3. Nganong magpanuko tingali ang uban sa pagkab-ot ug mga pribilehiyo diha sa kongregasyon?

³ Komosta na man ang usa ka Kristohanong lalaki nga magpanuko sa pagpangab-ot sa pribilehiyo nga mahimong ministeryal nga alagad ug sa ngadtongadto mahimong ansiyano tungod kay gibati niya nga siya kulang sa katakos? Sama kang Nick, siya tingali mabalaka nga wala niya mabatoni ang gikinahanglang mga katakos aron mahimong epektibong magbalantay. Ingong bawtismadong lalaki, nalakip ka ba niadtong mibati ug ingon niana? Dunay pasikaranan ang maong mga kabalaka. Ang tinudlong mga magbalantay manubag kang Jehova kon giunsa nila pagtratar ang panon. Si Jesus miingon: “Ang matag usa nga gihatagan ug daghan, daghan usab ang pangayoon kaniya; ug ang usa nga gitugyanan ug daghan sa mga tawo, sila mangayo kaniya ug labaw kay sa kasagaran.”—Lucas 12:48.

4. Sa unsang paagi gitabangan ni Jehova kadtong iyang gitudlo sa pag-atiman sa iyang mga karnero?

⁴ Gidahom ba ni Jehova kadtong iyang gitudlo ingong ministeryal nga mga alagad ug mga ansiyano nga moabaga ug dugang responsibilidad nga walay madawat nga tabang? Sa kasukwahi, siya nagtagana ug praktikal nga tabang nga makapaarang kanila dili lamang sa pagsagubang kondili sa pagkahimong malamposon usab. Ingon sa gihisgotan sa nag-unang artikulo, si Jehova naghatag kanila sa iyang balaang espiritu, nga ang bunga niana motabang kanila sa pag-atiman sa mga karnero sa malumo nga paagi. (Buhat 20:28; Galacia 5:22, 23) Gawas pa, si Jehova naghatag kanila ug kaalam, kahibalo, ug katakos sa pag-ila. (Proverbio 2:6) Sa unsang paagi gihimo niya kini? Hisgotan nato ang tulo ka paagi diin ginabansay ni Jehova ang mga indibiduwal nga iyang gitudlo sa pag-atiman sa iyang mga karnero.

Gibansay sa Eksperyensiyadong mga Magbalantay

5. Nganong sila si Pedro ug Juan maoy epektibong mga magbalantay?

⁵ Sa dihang ang mga apostoles nga sila si Pedro ug Juan mibarog atubangan sa Sanhedrin, ang maalamon-sa-kalibotan nga mga maghuhukom niana nga hukmanan nag-isip sa mga lalaki atubangan kanila  ingong “dili-edukado ug ordinaryo.” Tinuod, sila makabasa ug makasulat, apan wala sila makaagi ug rabinikong pagbansay sa pagtuon sa Kasulatan. Bisan pa niana, sila si Pedro ug Juan duyog sa ubang mga tinun-an napamatud-an ingong epektibong mga magtutudlo, nga nagpalihok sa daghan niadtong namati kanila nga mahimong mga magtutuo. Sa unsang paagi kining ordinaryong mga lalaki nahimong talagsaong mga magtutudlo? Human mamati kang Pedro ug Juan, “naila [sa hukmanan] nga sila nag-ubanan kang Jesus.” (Buhat 4:1-4, 13) Tinuod, sila nakadawat sa balaang espiritu. (Buhat 1:8) Apan dayag usab—bisan niadtong buta-sa-espirituwal nga mga maghuhukom—nga si Jesus nagbansay niadtong mga tawhana. Sa dihang kauban pa nila siya sa yuta, gitudloan ni Jesus ang mga apostoles dili lamang kon unsaon pagtigom sa mga tawong karnerohon kondili usab kon unsaon pagbantay kanila sa dihang sila mahimo nang bahin sa panon.—Mateo 11:29; 20:24-28; 1 Pedro 5:4.

6. Unsang panig-ingnan sa pagbansay sa uban ang gihatag ni Jesus ug Pablo?

⁶ Human mabanhaw si Jesus, siya nagpadayon sa pagbansay niadtong natudlo ingong mga magbalantay. (Pinadayag 1:1; 2:1–3:22) Pananglitan, siya maoy nagpili mismo kang Pablo ug nagdumala sa pagbansay kaniya. (Buhat 22:6-10) Gipabilhan ni Pablo ang pagbansay nga iyang nadawat ug gipasa ngadto sa ubang mga ansiyano ang iyang nakat-onan. (Buhat 20:17-35) Pananglitan, siya migahin ug dakong panahon ug naningkamot pag-ayo sa pagbansay kang Timoteo aron kini mahimong “mamumuo” diha sa pag-alagad sa Diyos, “nga walay angayng ikaulaw.’ (2 Timoteo 2:15) Silang duha nahimong suod nga managhigala. Sayosayo pa niana, si Pablo misulat kang Timoteo: “Sama sa usa ka anak uban sa amahan siya nagpaulipon uban kanako sa pagpauswag sa maayong balita.” (Filipos 2:22) Si Pablo wala magtinguha sa paghimo kang Timoteo o kang bisan kinsang tawo nga iyang tinun-an. Hinunoa, iyang gidasig ang mga isigka-magtutuo nga mahimong ‘tigsundog kaniya, ingon nga siya nagsundog kang Kristo.’—1 Corinto 11:1.

7, 8. (a) Unsang eksperyensiya ang nagpakita sa benepisyo nga mosangpot sa dihang ang mga ansiyano mosundog kang Jesus ug Pablo? (b) Kanus-a magsugod ang mga ansiyano sa pagbansay sa umaabot nga ministeryal nga mga alagad ug mga ansiyano?

⁷ Sa pagsundog kang Jesus ug Pablo, ang eksperyensiyadong mga magbalantay maoy manguna sa pagbansay sa bawtismadong mga lalaki, nga adunay susamang maayong mga resulta. Tagda ang eksperyensiya ni Chad. Siya gimatuto diha sa nabahin-sa-relihiyon nga panimalay apan di pa dugay siya natudlo ingong ansiyano. Siya miingon: “Latas sa katuigan, ubay-ubayng eksperyensiyadong mga ansiyano ang mitabang kanako nga mouswag sa espirituwal. Tungod kay ang akong amahan dili man magtutuo, ang maong mga ansiyano nagpakita ug linaing interes kanako ug nahisamag akong espirituwal nga mga amahan. Sila migahin ug panahon sa pagbansay kanako diha sa ministeryo, ug sa ulahi, usa ka ansiyano ang nagbansay kanako sa pag-atiman sa mga asaynment sa kongregasyon nga akong nadawat.”

⁸ Ingon sa gipakita sa eksperyensiya ni Chad, ang mga magbalantay nga adunay katakos sa pag-ila magsugod sa pagbansay sa umaabot nga ministeryal nga mga alagad ug mga ansiyano dugay pa una sila mahimong kuwalipikado sa maong mga pribilehiyo. Ngano man? Tungod kay ang Bibliya nagsugo nga ang ministeryal nga mga alagad ug mga ansiyano kinahanglang makakab-ot una sa hataas nga moral ug espirituwal nga sukdanan sa dili pa sila itudlo nga mag-alagad sa maong kapasidad. Sila kinahanglang ‘masulayan una kon angayan ba.’—1 Timoteo 3:1-10.

9. Unsang responsibilidad ang nabatonan sa hamtong nga mga magbalantay, ug ngano?

⁹ Kon ang bawtismadong mga lalaki pagasulayan, makataronganon lamang nga sila bansayon una. Sa pag-ilustrar: Kon ang usa ka estudyante pakuhaon ug usa ka lisod nga pasulit nga niana ang mga magtutudlo wala maghatag kaniya ug espesipikong pagbansay, makapasar kaha ang estudyante sa pasulit? Lagmit gayod nga mahagbong siya. Busa, gikinahanglan ang pagbansay. Apan, ang kugihan nga mga magtutudlo magbansay sa mga estudyante dili lamang aron makapasar sa pasulit kondili usab aron magamit ang kahibalo nga ilang nabatonan. Sa samang paagi, ang makugihong mga ansiyano motabang sa bawtismadong mga lalaki sa pag-ugmad sa mga hiyas nga gikinahanglan sa usa ka tinudlong lalaki pinaagi sa pagtagana kanila ug espesipikong pagbansay. Gibuhat nila kana dili lamang aron kining maong mga igsoon mahimong itudlo ingong ministeryal nga mga alagad o mga ansiyano kondili usab aron sila makaatiman pag-ayo sa panon.  (2 Timoteo 2:2) Siyempre, ang bawtismadong mga igsoong lalaki kinahanglang maningkamot usab sa pagkab-ot sa mga kuwalipikasyon nga gikinahanglan sa usa ka ministeryal nga alagad o ansiyano. (Tito 1:5-9) Bisan pa niana, pinaagi sa kinabubut-ong pagbansay niadtong nagapangab-ot ug responsibilidad sa kongregasyon, ang eksperyensiyadong mga magbalantay makatabang kanila nga mas daling mouswag.

10, 11. Sa unsang paagi ang mga magbalantay makabansay sa uban alang sa dugang mga pribilehiyo?

¹⁰ Sa espesipiko, sa unsang paagi ang eksperyensiyadong mga magbalantay makabansay sa uban sa pag-atiman sa mga pribilehiyo diha sa kongregasyon? Una sa tanan, pinaagi sa pagpakitag interes sa mga igsoon sa kongregasyon—nga kanunayng makig-uban kanila diha sa ministeryo sa kanataran ug magtabang kanila sa pagpauswag sa ilang katakos sa paggamit sa “pulong sa kamatuoran sa hustong paagi.” (2 Timoteo 2:15) Ang hamtong nga mga magbalantay maghisgot uban nianang mga igsoona sa kalipay nga bation gumikan sa pag-alagad sa uban ug sa katagbawan nga ila mismong bation gumikan sa paghimo ug pagkab-ot ug espirituwal nga mga tumong. Maluloton usab silang mohatag ug espesipikong mga sugyot kon sa unsang paagi mouswag ang usa ka igsoon aron mahimong ‘panig-ingnan sa panon.’—1 Pedro 5:3, 5.

¹¹ Sa dihang ang usa ka igsoon matudlo ingong ministeryal nga alagad, ang maalamong mga magbalantay magpadayon sa pagbansay kaniya. Si Bruce, kinsa nag-alagad ingong ansiyano sulod sa daghang katuigan, miingon: “Gusto kong molingkod uban sa usa ka bag-ong natudlo nga ministeryal nga alagad ug sublion uban kaniya ang mga instruksiyon nga gipatik sa matinumanon ug maalamong ulipon. Basahon usab namo ang bisan unsang mga giya mahitungod sa iyang espesipikong asaynment, ug dayon gusto nakong motrabaho uban kaniya hangtod nga siya masinati na sa iyang mga katungdanan.” Sa dihang ang usa ka alagad mag-anam ka hanas, siya mahimong bansayon usab sa buluhatong pagduaw isip magbalantay. “Sa dihang ikuyog nako ang usa ka ministeryal nga alagad sa pagduaw isip magbalantay,” nagpadayon si Bruce, “ako siyang tabangan sa pagpili ug espesipikong mga teksto nga magdasig ug magpalihok sa indibiduwal o pamilya nga among duawon. Ang pagkakat-on kon unsaon paggamit ang Kasulatan sa paagi nga kini makatukbil sa kasingkasing maoy hinungdanon aron ang usa ka ministeryal nga alagad mahimo unyang epektibong magbalantay.”—Hebreohanon 4:12; 5:14.

12. Sa unsang paagi ang eksperyensiyadong mga magbalantay makabansay sa bag-ong natudlo nga mga ansiyano?

¹² Ang bag-ong natudlo nga mga magbalantay makabenepisyo usab ug dako sa dugang pagbansay. Si Nick, nga gihisgotan ganina, miingon: “Ang pagbansay nga akong nadawat ilabina gikan sa duha ka gulanggulang na nga mga magtatan-aw mapuslanon kaayo. Kining mga igsoona subsob nga nakasabot kon sa unsang paagi angayng dumalahon ang pipila ka butang. Sila mapailobon gayod nga mamati kanako ug seryosong magtagad sa akong mga panglantaw—bisan pag dili sila mouyon niana. Daghan akog nakat-onan sa pagpaniid sa ilang mapainubsanon ug matinahoron nga pagpakiglabot sa mga igsoon sa kongregasyon. Kining maong mga ansiyano nagpasiugda kanako sa panginahanglan nga gamiton ang Bibliya sa hanas nga paagi sa dihang mag-atiman sa mga problema o sa dihang maghatag ug pagdasig.”

Nabansay sa Pulong sa Diyos

13. (a) Unsay gikinahanglan sa usa ka igsoong lalaki aron mahimong epektibong magbalantay? (b) Nganong si Jesus miingon: “Ang gitudlo ko dili akoa”?

¹³ Sa pagkatinuod, ang Pulong sa Diyos, ang Bibliya, naundan ug mga balaod, prinsipyo, ug mga panig-ingnan nga gikinahanglan sa usa ka magbalantay aron mahimong “bug-os nga masinangkapan alang sa tanang maayong buhat.” (2  Timoteo 3:16, 17) Ang usa ka igsoon edukado tingali, apan ang iyang kahibalo sa Kasulatan ug kon giunsa niya pagpadapat kini mao ang makatabang kaniya nga mahimong  epektibong magbalantay. Tagda ang panig-ingnan ni Jesus. Siya mao ang labing intelihente, labing masinaboton, ug ang labing maalamon nga espirituwal nga magbalantay nga nabuhi sukad sa yuta; bisan pa niana, siya wala magsalig sa iyang kaugalingong kaalam sa dihang nagtudlo sa mga karnero ni Jehova. Siya miingon: “Ang gitudlo ko dili akoa, kondili iya sa nagpadala kanako.” Nganong gihatag man ni Jesus ang pasidungog ngadto sa iyang langitnong Amahan? Siya nagpatin-aw: “Siya nga mosulti sa iya rang kaugalingon nagatinguha sa iyang kaugalingong himaya.”—Juan 7:16, 18.

14. Sa unsang paagi ang mga magbalantay maglikay sa pagtinguha sa ilang kaugalingong himaya?

¹⁴ Ang maunongong mga magbalantay maglikay sa pagtinguha sa ilang kaugalingong himaya. Ilang ipasukad ang ilang tambag ug pagdasig, dili sa ilang kaugalingong kaalam, kondili sa Pulong sa Diyos. Ilang nasabtan nga ang asaynment sa usa ka magbalantay mao ang pagtabang sa mga karnero nga makabaton sa ‘hunahuna ni Kristo,’ dili sa hunahuna sa mga ansiyano. (1 Corinto 2:14-16) Pananglitan, komosta kon ang usa ka ansiyano nga nagtabang sa usa ka magtiayon sa pagsulbad sa mga suliran sa kaminyoon nagbase sa iyang tambag sa iyang kaugalingong eksperyensiya inay kay sa mga prinsipyo sa Bibliya ug impormasyon nga gipatik sa “matinumanon ug maalamong ulipon”? (Mateo 24:45 )Ang iyang tambag lagmit maimpluwensiyahan pag-ayo sa lokal nga mga kostumbre ug malimitahan sa iyang limitadong kasinatian. Itugot ta, ang ubang mga kostumbre dili man sayop, ug ang maong ansiyano tingali eksperyensiyado na. Apan ang mga karnero makabenepisyo pag-ayo sa dihang ang mga magbalantay magdasig kanila sa pagpamati sa tingog ni Jesus ug sa mga pulong ni Jehova inay kay sa mga hunahuna sa mga tawo o sa mga prinsipyo sa lokal nga kostumbre.—Salmo 12:6; Proverbio 3:5, 6.

Gibansay sa “Matinumanon ug Maalamong Ulipon”

15. Unsang sugo ang gihatag ni Jesus ngadto sa “matinumanon ug maalamong ulipon,” ug unsa ang usa ka hinungdan sa kalamposan sa ulipon nga matang?

¹⁵ Ang mga magbalantay sama sa mga apostoles nga si Pedro, Juan, ug Pablo maoy mga membro sa grupo nga gihubit ni Jesus ingong “matinumanon ug maalamong ulipon.” Kining ulipon nga matang gilangkoban sa dinihogan-sa-espiritu nga mga igsoon ni Jesus dinhi sa yuta, kansang paglaom mao ang pagmando uban kang Kristo sa langit. (Pinadayag 5:9, 10) Sa kataposang mga adlaw niining sistemaha, ang gidaghanon sa mga igsoon ni Kristo nga nahibilin dinhi sa yuta nagkunhod, nga maoy pagadahomon. Apan, ang buluhaton nga gisugo ni Jesus kanila nga tumanon—ang pagsangyaw sa maayong balita sa Gingharian sa dili pa moabot ang kataposan—mas kaylap karon kay sukad masukad. Bisan pa niana, ang ulipon nga matang malamposon gayod! Ngano? Sa usa ka bahin, tungod kay ilang gibansay ang mga membro sa “ubang mga karnero” sa pagtabang kanila sa buluhatong pagsangyaw ug pagpanudlo. (Juan 10:16; Mateo 24:14; 25:40) Karon, ang dakong bahin sa buluhaton gipalampos niining maunongong grupo.

16. Sa unsang paagi ang ulipon nga matang nagbansay sa tinudlong mga lalaki?

¹⁶ Sa unsang paagi ang ulipon nga matang nagtagana niining maong pagbansay? Sa unang siglo, ang mga hawas sa ulipong matang giawtorisahan sa pagbansay ug pagtudlo ug mga magtatan-aw diha sa mga kongregasyon, ug sila, sa baylo, nagbansay sa mga karnero. (1 Corinto 4:17) Mao man usab karon. Ang Nagamandong Lawas—ang gamay nga grupo sa dinihogang mga ansiyano nga naghawas sa ulipon nga matang—nag-awtorisar sa mga hawas niini sa pagbansay ug pagtudlo ug ministeryal nga mga alagad ug mga ansiyano diha sa tinagpulo ka libo ka kongregasyon sa tibuok kalibotan. Gawas pa, ang Nagamandong Lawas nag-organisar ug mga tunghaan aron sa pagbansay sa mga membro sa Komite sa Sanga, nagapanawng mga magtatan-aw, mga ansiyano, ug ministeryal nga mga alagad kon sa unsang paagi maatiman pag-ayo ang mga karnero. Dugang pagtultol ang gitagana pinaagi sa mga sulat, mga artikulo nga gipatik diha sa Ang Bantayanang Torre, ug pinaagi sa ubang mga publikasyon, sama sa Organisado Aron Buhaton ang Kabubut-on ni Jehova. a

17. (a) Sa unsang paagi gipakita ni Jesus ang iyang pagsalig sa ulipon nga matang? (b) Sa unsang paagi ikapakita sa espirituwal nga mga magbalantay nga sila adunay pagsalig sa ulipon nga matang?

¹⁷ Dako kaayo ang pagsalig ni Jesus sa ulipon nga matang nga iya kining gitudlo sa pagdumala sa “tanan niyang mga kabtangan”—sa ato pa, sa tanan niyang espirituwal nga mga intereses sa yuta. (Mateo 24:47) Ang tinudlong mga magbalantay nagpamatuod nga sila usab adunay pagsalig sa ulipon nga matang pinaagi sa pagpadapat sa mga pagtultol nga ilang nadawat gikan sa Nagamandong Lawas niini. Oo, sa dihang ang mga magbalantay magbansay sa uban, sa dihang sila magpabansay sa Pulong sa Diyos, ug sa dihang ilang ipadapat ang pagbansay nga gitagana sa ulipon nga matang, sila nagpalambo sa panaghiusa taliwala sa panon. Pagkamapasalamaton nato nga si Jehova nagbansay ug mga lalaki nga may dakong kahingawa sa matag membro sa Kristohanong kongregasyon!

[Footnote]

Unsay Imong Tubag?

• Sa unsang paagi ang hamtong nga espirituwal nga mga magbalantay makabansay sa uban?

• Nganong ang mga magbalantay dili magtudlo binase sa ilang kaugalingong panghunahuna?

• Sa unsang paagi ug ngano nga ang mga magbalantay magpakita ug pagsalig sa ulipon nga matang?

[Mga Pangutana sa Pagtuon]

[Mga hulagway sa panid 24, 25]

Ang Kristohanong mga ansiyano nagbansay sa batabata pa nga mga lalaki diha sa kongregasyon

 [Mga hulagway sa panid 26]

“Ang matinumanon ug maalamong ulipon” nagbansay pag-ayo sa mga ansiyano