Sundoga ang Panig-ingnan ni Jesus ug Ipakita ang Kahangawa sa mga Kabos

ANG kakabos ug pagdaogdaog halos sama na ka dugay sa paglungtad sa tawo. Bisan pag ang Balaod sa Diyos sa Israel nagtinguha sa pagpanalipod sa mga kabos ug paghupay sa ilang pag-antos, kana nga Balaod sagad nga wala tumana. (Amos 2:6) Gisaway ni manalagnang Ezequiel ang paagi sa pagtratar sa mga kabos. Siya miingon: “Ang katawhan sa yuta naghimo sa ilang laraw sa pagpanikas ug nanakmit pinaagi sa pagpanulis, ug ang sinakit ug ang kabos ilang gidaogdaog, ug ang langyaw nga pumoluyo ilang gitikasan sa kawalay-hustisya.”—Ezequiel 22:29.

Walay kalainan ang kahimtang sa dinhi pa si Jesus sa yuta. Ang mga lider sa relihiyon bug-os nga walay kahangawa sa mga kabos ug mga nanginahanglan. Ang mga lider sa relihiyon gihubit ingong “mahigugmaon ug salapi” kinsa “nagapanukob sa mga balay sa mga babayeng balo” ug naghatag ug mas labaw nga pagtagad sa pagtuman sa ilang mga tradisyon inay kay sa pag-atiman sa mga tigulang ug mga kabos. (Lucas 16:14; 20:47; Mateo 15:5, 6) Makaiikag nga diha sa sambingay ni Jesus bahin sa maayong Samarianhon, ang usa ka saserdote ug Levihanon sa pagkakita sa samdan nga lalaki milabay kaniya ug miagi sa pikas daplin sa dalan inay moduol aron tabangan siya.—Lucas 10:30-37.

Si Jesus Nahangawa sa mga Kabos

Ang mga asoy sa Ebanghelyo sa kinabuhi ni Jesus nagpakita nga bug-os niyang nasabtan ang kalisdanan sa mga kabos ug siya masinaboton kaayo sa ilang mga panginahanglan. Bisan tuod si Jesus nagpuyo sa langit, iyang gihaw-asan ang iyang kaugalingon, nahimong tawo, ug ‘nahimong kabos  alang kanato.’ (2 Corinto 8:9) Sa pagkakita sa mga panon, si Jesus “naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” (Mateo 9:36) Ang asoy bahin sa kabos nga babayeng balo nagpakita nga si Jesus nakadayeg, dili sa dagkong mga gasa sa dato, kinsa mihatag “gikan sa ilang mga sobra,” kondili sa gamayng amot sa kabos nga balo. Ang gibuhat sa kabos nga balo nakatandog sa kasingkasing ni Jesus tungod kay siya “gikan sa iyang kawalad-on naghulog sa tanan niyang panginabuhian.”—Lucas 21:4.

Si Jesus wala lamang mobati ug kaluoy sa mga kabos kondili siya personal nga interesado sa ilang mga panginahanglan. Siya ug ang iyang mga apostoles adunay pondong salapi nga ilang gihatag sa kabos nga mga Israelinhon. (Mateo 26:6-9; Juan 12:5-8; 13:29) Gidasig ni Jesus kadtong buot mahimong iyang mga sumusunod sa pagdawat sa ilang obligasyon sa pagtabang sa mga nanginahanglan. Iyang gisultihan ang usa ka dato nga batan-ong magmamando: “Ibaligya ang tanang butang nga imong nabatonan ug iapod-apod ngadto sa mga tawong kabos, ug makabaton ka ug bahandi sa mga langit; ug umari ka mahimong akong sumusunod.” Ang kamatuoran nga ang lalaki dili andam sa pagsalikway sa iyang kabtangan nagpakita nga mas dako ang iyang gugma alang sa bahandi kay sa iyang gugma alang sa Diyos ug isigkatawo. Busa, wala kaniya ang mga hiyas nga gikinahanglan aron mahimong tinun-an ni Jesus.—Lucas 18:22, 23.

Ang mga Sumusunod ni Kristo Nahangawa sa mga Kabos

Human mamatay si Jesus, ang mga apostoles ug ubang mga sumusunod ni Kristo padayon nga nahangawa sa mga kabos sa ilang taliwala. Sa mga 49 K.P., si apostol Pablo nakigkita kang Santiago, Pedro, ug Juan ug gihisgotan ang sugo nga iyang nadawat gikan kang Ginoong Jesu-Kristo sa pagsangyaw sa maayong balita. Sila miuyon nga si Pablo ug Bernabe kinahanglang moadto sa “kanasoran,” nga mosangyaw lamang sa mga Hentil. Apan, si Santiago ug ang iyang mga kauban nag-awhag kang Pablo ug Bernabe nga ‘hinumdoman ang mga kabos.’ Ug kana ang ‘matinuorong gipanlimbasogan pagbuhat’ ni Pablo.—Galacia 2:7-10.

Panahon sa pagmando ni Emperador Claudius, usa ka grabeng gutom ang nag-apektar sa lainlaing bahin sa Imperyo sa Roma. Agig sanong, ang mga Kristohanon sa Antioquia ‘naninguha, nga ang matag usa kanila sumala sa iyang maarangan, makahimog pag-alagad pinaagig pagpadala ug hinabang ngadto sa mga igsoon nga nagpuyo sa Judea; ug kini gibuhat nila, nga nagpadala niini ngadto sa mga ansiyano pinaagi sa kamot ni Bernabe ug Saulo.’—Buhat 11:28-30.

Nasabtan usab sa matuod nga mga Kristohanon karon nga ang mga sumusunod ni Jesus kinahanglang magpakitag kahangawa sa mga kabos ug mga nanginahanglan, ilabina taliwala sa mga isigka-magtutuo. (Galacia 6:10) Busa, sila nagpakitag tinuod nga kahangawa alang niadtong nahikawan sa materyal nga mga panginahanglan. Pananglitan, sa 1998, gidaot sa grabeng hulaw ang kinadak-ang bahin sa amihanan-sidlakang Brazil. Ang hulaw nagdaot sa humay, bean, ug mais, nga miresulta sa kaylap nga gutom—ang kinagrabehan sa 15 ka tuig. Sa ubang mga dapit, bisan ang mainom nga tubig nagnihit. Ang mga Saksi ni Jehova sa ubang bahin sa nasod nag-organisar dayon ug mga komite sa hinabang, ug sa mubong panahon, sila nakatigom ug tonetonelada nga pagkaon ug nagbayad sa galastohan sa paghatod sa mga suplay.

Ang mga Saksi nga mihatag sa mga hinabang misulat: “Malipayon kaayo kami nga nakatabang sa among mga igsoon, ilabina kay nakaseguro kami nga among gilipay ang kasingkasing ni Jehova. Wala gayod namo kalimti ang mga pulong sa Santiago 2:15, 16.” Kanang mga bersikuloha sa  Bibliya nag-ingon: “Kon ang usa ka igsoong lalaki o babaye anaa sa hubo nga kahimtang ug walay pagkaon nga igo alang sa maong adlaw, ug unya usa kaninyo moingon kanila: ‘Panglakaw kamo nga malinawon, painiti ug busga ang inyong kaugalingon,’ apan wala ninyo sila hatagi sa mga kinahanglanon alang sa ilang lawas, unsay kapuslanan niini?”

Diha sa usa sa mga kongregasyon sa mga Saksi ni Jehova sa siyudad sa São Paulo, ang usa ka mapainubsanon ug masiboton nga Saksi nga kabos sa materyal sagad nga mangamas ug maayo aron lang masuportahan ang kaugalingon. Ang sister miingon: “Bisan kon ako nagkinabuhi sa kakabos, ang mensahe sa Bibliya naghatag ug tinuod nga kahulogan sa akong kinabuhi. Ambot lang kon unsa na kahay nahitabo kanako kon wala gayod ako tabangi sa akong mga kaubang Saksi.” Dihay panahon nga kining kugihan nga Kristohanong babaye kinahanglang operahan apan dili niya maarangan ang pagbayad sa galastohan. Niining kahimtanga, ang Kristohanong mga igsoon sa kongregasyon nakahimo sa pagbayad sa galastohan sa operasyon. Ang pagtabang sa mga isigkamagtutuo nga nanginahanglan gibuhat sa matuod nga mga Kristohanon sa tibuok kalibotan.

Apan, bisan unsa pa tingali ka makalilipay kana nga mga kasinatian, tataw nga kanang sinserong mga paningkamot dili magwagtang sa kakabos. Bisan ang gamhanang mga gobyerno ug dagkong internasyonal nga mga ahensiya sa hinabang, bisan tuod adunay nahimong mga kalamposan, wala gayod makawagtang sa dugay na kaayong suliran sa kakabos. Busa, ang pangutana motungha, Unsa man ang bug-os nga solusyon sa kakabos ug sa ubang mga suliran nga nagsakit sa katawhan?

Ang mga Pagtulon-an sa Bibliya Nagtaganag Malungtarong Tabang

Ang mga asoy sa Ebanghelyo nag-ingon nga si Jesu-Kristo kanunayng naghimog maayong mga buhat alang niadtong mga kabos o adunay ubang mga panginahanglan. (Mateo 14:14-21) Apan, unsa nga kalihokan ang hinungdanon kaayo alang kaniya? Sa usa ka okasyon, human makagugol ug pipila ka panahon sa pagtabang niadtong nanginahanglan, gisultihan ni Jesus ang iyang mga tinun-an: “Mangadto kita sa laing dapit, sa kasikbit nga mga lungsod, aron makawali usab ako didto.” Nganong gihunong man ni Jesus ang iyang pagtabang sa mga masakiton ug mga nanginahanglan aron ipadayon ang iyang pagsangyaw? Siya mipatin-aw pinaagi sa pag-ingon: “Alang niini nga katuyoan [sa ato pa, ang pagsangyaw] nga ako mianhi.” (Marcos 1:38, 39; Lucas 4:43) Bisan pag ang pagbuhat ug maayong mga buhat alang sa mga tawo nga nanginahanglan hinungdanon kang Jesus, ang pagsangyaw bahin sa Gingharian sa Diyos maoy iyang pangunang buluhaton.—Marcos 1:14.

Sanglit ang Bibliya nag-awhag sa mga Kristohanon sa ‘pagsunod pag-ayo sa mga tunob ni Jesus,’ ang mga Kristohanon karon adunay tin-aw nga giya bahin sa pag-una sa hinungdanong mga butang diha sa ilang mga paningkamot sa pagtabang sa uban. (1 Pedro 2:21) Sama kang Jesus, sila motabang sa mga tawo nga nanginahanglan. Apan, sama usab kang Jesus, ilang giisip ang buluhaton sa pagtudlo sa mensahe sa Bibliya bahin sa maayong balita sa Gingharian sa Diyos nga labing hinungdanong kalihokan sa ilang kinabuhi. (Mateo 5:14-16; 24:14; 28:19, 20) Apan, nganong angayng isipon nga mas hinungdanon ang pagsangyaw sa mensahe nga makaplagan diha sa Pulong sa Diyos kay sa laing matang sa pagtabang sa uban?

Ang tinuod-kinabuhing kasinatian gikan sa tibuok kalibotan nagpakita nga sa dihang masabtan  ug sundon sa mga tawo ang praktikal nga mga tambag sa Bibliya, sila mas maandam sa pagsagubang sa adlaw-adlawng mga suliran sa kinabuhi, lakip na sa kakabos. Dugang pa, ang mensahe sa Bibliya bahin sa Gingharian sa Diyos nga gisangyaw sa mga Saksi ni Jehova karon naghatag sa mga tawo ug paglaom alang sa umaabot—usa ka paglaom nga maghimo sa kinabuhi nga mas makapatagbaw, bisan ilalom sa labing masulayong mga kahimtang. (1 Timoteo 4:8) Unsa paglaoma kana?

Ang Pulong sa Diyos nagpasalig kanato bahin sa atong umaabot: “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini magpuyo ang pagkamatarong.” (2 Pedro 3:13) Sa dihang ang Bibliya magsulti bahin sa “yuta,” kini usahay nagtumong sa mga tawo nga nagpuyo sa yuta. (Genesis 11:1) Busa ang matarong nga “bag-ong yuta” nga gisaad nga moabot maoy usa ka katilingban sa katawhan nga giuyonan sa Diyos. Ang Pulong sa Diyos nagsaad usab nga ilalom sa pagmando ni Kristo, kadtong giuyonan sa Diyos makadawat sa gasa nga kinabuhing walay kataposan ug magpahimulos sa usa ka makapatagbawng kinabuhi diha sa yutan-ong paraiso. (Marcos 10:30) Kanang talagsaong umaabot mabatonan sa tanan, lakip na sa mga kabos. Nianang “bag-ong yuta,” ang suliran sa kakabos masulbad na sa bug-os.

[Kahon/Hulagway sa panid 7]

SA UNSANG PAAGI ‘PAGALUWASON NI JESUS ANG KABOS’?—Salmo 72:12

HUSTISYA: “Hukman unta niya ang mga sinakit sa katawhan, luwason unta niya ang mga anak sa kabos, ug dugmokon unta niya ang mga tikasan.” (Salmo 72:4) Panahon sa pagmando ni Kristo ibabaw sa yuta, aduna na unyay hustisya alang sa tanan. Wala nay korapsiyon, usa ka hampak nga nagyudyod ngadto sa kakabos sa mga nasod nga aduna untay kahigayonan nga madato.

PAKIGDAIT: “Sa iyang mga adlaw molambo ang matarong, ug ang kadagaya sa pakigdait hangtod nga ang bulan mahanaw na.” (Salmo 72:7) Kasagaran ang kakabos sa kalibotan maoy resulta sa tawhanong mga panagbangi ug pakiggubat. Si Kristo magpahinabo ug bug-os nga pakigdait sa yuta, sa ingon mawagtang ang usa sa dagkong mga hinungdan sa kakabos.

KAHANGAWA: “Maluoy siya sa timawa ug sa kabos, ug pagaluwason niya ang mga kalag sa mga kabos. Gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.” (Salmo 72:12-14) Ang timawa, kabos, ug dinaogdaog mahimo na unyang bahin sa usa ka malipayong tawhanong pamilya, nga nahiusa ilalom sa pagdumala ni Haring Jesu-Kristo.

KAUSWAGAN: “Aduna unyay dagayang lugas sa ibabaw sa yuta.” (Salmo 72:16) Panahon sa pagmando ni Kristo, aduna na unya kadagaya sa materyal nga mga butang. Ang mga tawo dili na mag-antos sa kanihit sa pagkaon ug mga gutom nga maoy subsob nga hinungdan sa kakabos karon.

[Hulagway sa panid 4, 5]

Si Jesus nagpakitag personal nga interes sa mga panginahanglan sa mga kabos

[Hulagway sa panid 6]

Ang mensahe sa Bibliya maghatag ug tinuod nga paglaom