Andam Ka na ba Aron Makalabang-Buhi?

“Sumulod ka sa arka, ikaw ug ang tibuok mo nga panimalay, tungod kay ikaw ang nakita ko nga matarong sa akong atubangan taliwala niini nga kaliwatan.”—GENESIS 7:1.

1. Unsay gitagana ni Jehova aron adunay makalabang-buhi sa mga adlaw ni Noe?

 SI Jehova “nagpadala ug lunop sa usa ka kalibotan sa dili-diyosnong katawhan” sa mga adlaw ni Noe, apan Siya may gitagana usab aron adunay makalabang-buhi. (2 Pedro 2:5) Gihatagan sa matuod nga Diyos ang matarong nga si Noe ug tin-aw nga mga instruksiyon kon unsaon pagbuhat ang usa ka arka aron adunay maluwas nga kinabuhi latas sa tibuok-kalibotan nga lunop. (Genesis 6:14-16) Sumala sa atong dahomon sa usa ka buotang alagad ni Jehova, “gibuhat ni Noe ang sumala sa tanan nga gisugo sa Diyos kaniya.” Sa pagkatinuod, “gibuhat niya ang ingon gayod.” Ang pagkamasinugtanon ni Noe maoy usa ka bahin sa hinungdan nga kita buhi karong adlawa.—Genesis 6:22.

2, 3. (a) Unsay sanong sa mga katalirongan ni Noe sa iyang kalihokan? (b) Uban ang unsang pagsalig nga si Noe misulod sa arka?

² Dili gamay nga buluhaton ang pagbuhat ug arka. Lagmit gayong natingala ang daghang tawo kon unsay ginabuhat ni Noe ug sa iyang pamilya. Bisan pa niana, dili pa kadto igo sa pagpatuo kanila nga ang paglabang-buhi nag-agad sa pagsulod nila sa arka. Sa kataposan, naupos ra ang pailob sa Diyos niadtong daotang kalibotan.—Genesis 6:3; 1 Pedro 3:20.

³ Human sa daghang katuigan sa paghago ni Noe ug sa iyang pamilya, si Jehova miingon kang Noe: “Sumulod ka ug ang tibuok mo nga panimalay sa arka, tungod kay ikaw ang akong nakita nga matarong sa akong atubangan taliwala niini nga kaliwatan.” Tungod sa pagtuo ug pagsalig sa pulong ni Jehova, “si Noe misulod, ug kauban niya ang iyang mga anak nga lalaki ug iyang asawa ug ang mga asawa sa iyang mga anak nga lalaki.” Gisirhan ni Jehova ang ganghaan aron panalipdan ang iyang mga magsisimba. Sa pag-abot sa Lunop sa yuta, ang arka napamatud-an nga kasaligang tagana sa Diyos alang sa kaluwasan.—Genesis 7:1, 7, 10, 16.

Mga Kahimtang Karon nga Sama sa Adlaw ni Noe

4, 5. (a) Sa unsa gitandi ni Jesus ang panahon sa iyang presensiya? (b) Unsang mga panagsama ang naglungtad tali sa adlaw ni Noe ug sa atong panahon?

⁴ “Maingon kaniadto sa mga adlaw ni Noe, mao man usab unya ang presensiya sa Anak sa tawo.” (Mateo 24:37) Gipaila ni Jesus pinaagi nianang mga pulonga nga ang panahon sa iyang dili-makitang presensiya mahisama sa mga adlaw ni Noe, ug tinuod gayod kana. Sukad ilabina sa 1919, ang usa ka pasidaang mensahe nga susama sa gihatag ni Noe gimantala na ngadto sa katawhan sa tanang kanasoran. Sa katibuk-an, ang ilang sanong maoy susama sa iya sa katawhan sa mga adlaw ni Noe.

⁵ Pinaagi sa Lunop, milihok si Jehova batok sa usa ka kalibotan nga “napuno sa kapintasan.” (Genesis 6:13) Nadayag sa tanang nakakita kanila nga si Noe ug ang iyang pamilya milikay sa pagpakigbahin sa maong kapintasan ug malinawon hinuong nagpadayon sa pagbuhat sa arka. Makakita usab kitag samang kahimtang sa atong adlaw. Ang sinserong mga tawo karon “makakita gayod sa kalainan tali sa usa nga matarong ug sa usa nga daotan, tali sa usa nga nag-alagad sa Diyos ug sa usa nga wala mag-alagad kaniya.” (Malaquias 3:18) Ang pagkamaminatud-on, kalulot, pagkamakigdaiton, ug kakugi nga gipasundayag sa mga Saksi ni Jehova gidayeg sa dili-madapigong mga tumatan-aw, ug ang maong mga hiyas nagpaila nga ang katawhan sa Diyos maoy lahi sa kalibotan sa katibuk-an. Ang mga  Saksi nagsalikway sa tanang matang sa kapintasan ug sila nagpagiya sa espiritu ni Jehova. Kanay hinungdan nga sila gipanalanginag kalinaw ug sila nagsubay sa matarong nga dalan.—Isaias 60:17.

6, 7. (a) Unsay wala masabti sa mga tawo sa adlaw ni Noe, ug sa unsang paagi susama usab ang kahimtang karon? (b) Unsang mga pananglitan ang nagpakita nga ang mga Saksi ni Jehova sa katibuk-an giisip nga lahi?

⁶ Ang mga katalirongan ni Noe napakyas sa pag-ila nga si Noe gipaluyohan sa Diyos ug nagbuhat sumala sa giya sa Diyos. Busa wala nila tuohi ang iyang pagwali ug wala sila molihok sumala sa iyang pasidaang mensahe. Komosta karon? Bisan pag daghan ang nakadayeg sa buluhaton ug panggawi sa mga Saksi ni Jehova, ang kadaghanan dili motuo sa maayong balita ug sa mga pasidaan sa Bibliya. Ang mga silingan, mga amo, o mga paryente mahimong modayeg sa maayong mga hiyas sa matuod nga mga Kristohanon apan unya maanugon, “Kon dili lang unta na sila mga Saksi ni Jehova!” Ang nahikalimtan sa maong mga maniniid mao nga ang mga Saksi nagpasundayag sa mga hiyas sama sa gugma, pakigdait, kalulot, pagkamaayo, kalumo, ug pagpugong-sa-kaugalingon tungod kay gigiyahan man sila sa balaang espiritu sa Diyos. (Galacia 5:22-25) Kini makadugang gayod sa pagkakatuohan sa ilang mensahe.

⁷ Pananglitan, ang mga Saksi ni Jehova sa Rusya nagtukod ug usa ka Kingdom Hall. Ang usa ka lalaki nga mihunong aron makigsulti sa usa sa mga trabahante miingon: “Pagkatalagsaong dapit sa konstruksiyon—walay nanigarilyo, walay namalikas, ug walay hubog! Usa ka ba sa mga Saksi ni Jehova?” Gisukna siya sa trabahante, “Kon motubag kog dili, motuo ka ba?” Mitubag dayon ang tawo, “Dili gayod.” Sa laing siyudad sa Rusya, ang alkalde nakadayeg kaayo sa dihang iyang nakita ang mga Saksi nga nagtukod sa ilang bag-ong Kingdom Hall. Miingon siya nga bisan pag giisip niya kanhi nga ang tanang relihiyon sama ra, human makakita sa sinsero nga pagkadili-hakog nga gipakita sa mga Saksi ni Jehova, wala na siya mag-isip niana. Duha ra kini ka pananglitan nga nagpakita nga ang katawhan ni Jehova maoy lahi niadtong wala magsunod sa mga sukdanan sa Bibliya.

8. Sa unsa nag-agad ang atong pagkaluwas sa kalaglagan niining daotang kalibotan?

⁸ Sa kataposang yugto sa “karaang kalibotan” nga nalaglag sa Lunop, si Noe maoy matinumanon nga “magwawali sa pagkamatarong.” (2 Pedro 2:5) Niining kataposang mga adlaw sa presenteng sistema sa mga butang, ang katawhan ni Jehova nagapahibalo sa matarong nga mga sukdanan sa Diyos ug nagamantala sa maayong balita mahitungod sa posibilidad nga makalabang-buhi ngadto sa bag-ong kalibotan. (2 Pedro 3:9-13) Ingon nga si Noe ug ang iyang mahadlokon-sa-Diyos nga pamilya naluwas sa sulod sa arka, ang pagkaluwas sa mga tawo karon nag-agad sa ilang pagtuo ug sa ilang maunongon nga pagpakig-uban sa yutan-ong bahin sa tibuok-kalibotan nga organisasyon ni Jehova.

 Pagtuo Gikinahanglan Aron Makalabang-Buhi

9, 10. Nganong ang pagtuo gikinahanglan aron makalabang-buhi kita sa kalaglagan sa sistema sa mga butang ni Satanas?

⁹ Unsay kinahanglang buhaton sa usa ka tawo aron maluwas sa nagsingabot nga kalaglagan niining kalibotana nga nailalom sa gahom ni Satanas? (1 Juan 5:19) Kinahanglang ilhon una niya nga ang panalipod gikinahanglan. Unya kinahanglan niyang pahimuslan ang maong panalipod. Ang katawhan sa adlaw ni Noe nagkinabuhi sa ilang naandang paagi sa pagkinabuhi sa adlaw-adlaw ug wala nila masabti nga nagkinahanglan silag panalipod batok sa nagsingabot nga katalagman. Sila nakulangan pag laing butang—ang pagtuo sa Diyos.

¹⁰ Sa laing bahin, si Noe ug ang iyang pamilya nakasabot nga sila nagkinahanglan sa panalipod ug sa pagluwas. Sila nagpasundayag usab ug pagtuo sa Soberano sa Uniberso, si Jehova nga Diyos. “Kon walay pagtuo imposible ang pagpahimuot [kang Jehova],” misulat si apostol Pablo, “kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” Si Pablo midugang: “Tungod sa pagtuo si Noe, human hatagi sa Diyos ug pasidaan mahitungod sa mga butang nga wala pa makita, nagpakitag diyosnong kahadlok ug nagtukod ug arka aron sa pagluwas sa iyang panimalay; ug pinaagi niini nga pagtuo iyang gihukman ang kalibotan, ug siya nahimong manununod sa pagkamatarong nga maoy sumala sa pagtuo.”—Hebreohanon 11:6, 7.

11. Unsay atong makat-onan gikan sa paagi sa paghatag ni Jehova ug panalipod sa karaang kapanahonan?

¹¹ Aron makalabang-buhi sa kalaglagan sa daotang sistema sa mga butang karon, dili lang kay kita motuo nga kini laglagon. Kita kinahanglang magpasundayag ug pagtuo, nga pahimuslan sa bug-os ang mga tagana sa Diyos alang sa paglabang-buhi. Siyempre, kita kinahanglang magpasundayag ug pagtuo sa halad lukat sa Anak sa Diyos, si Jesu-Kristo. (Juan 3:16, 36) Bisan pa niana, angay natong hinumdoman nga kadto lamang didto sa sulod sa arka ni Noe ang nakalabang-buhi sa Lunop. Sa susamang paagi, ang mga siyudad nga dalangpanan sa karaang Israel nagtaganag panalipod alang sa dili-tinuyong mamumuno sa panahon lang nga modangop una siya sa maong siyudad ug unya magpabilin sa sulod hangtod sa pagkamatay sa hataas nga saserdote. (Numeros 35:11-32) Sa ikanapulo nga hampak sa Ehipto sa adlaw ni Moises, gipatay ang panganay sa mga Ehiptohanon, apan naluwas ang panganay sa mga Israelinhon. Ngano man? Si Jehova nagsugo kang Moises: “Magkuha sila [mga Israelinhon] ug bahin sa dugo [sa kordero sa Paskuwa] ug isablig kini sa duha ka poste sa pultahan ug sa ibabawng bahin sa pultahan sa mga balay diin adto nila kini kan-a. . . . Ug walay mogula kaninyo sa ganghaan sa iyang balay hangtod sa pagkabuntag.” (Exodo 12:7, 22) Kinsa ang panganay sa mga Israelinhon nga mangahas sa dili pagtagad sa  maong mga pahimangno sa Diyos pinaagi sa paggula sa balay nga gimarkahan ug dugo nga giwisik sa duha ka poste sa ganghaan ug sa ibabawng bahin sa ganghaan?

12. Unsang pangutana ang angayng isukna sa matag usa kanato, ug ngano?

¹² Busa kita adunay hinungdan sa pagpamalandong pag-ayo sa atong personal nga kahimtang. Tinuod ba kitang naapil sa kahikayan ni Jehova alang sa espirituwal nga panalipod? Inighampak sa dakong kasakitan, ang mga luha sa kalipay ug pagkamapasalamaton modaligdig sa mga nawong niadtong nagtinguha sa maong panalipod. Alang sa uban, aduna lamang unyay mga luha sa kasubo ug pagbasol.

Progresibong mga Pagpasibo Mag-andam Kanato

13. (a) Unsay nalampos sa organisasyonal nga mga pagpasibo? (b) Ipatin-aw ang pipila ka progresibong mga pagpasibo.

¹³ Si Jehova nagpahinabo ug progresibong mga pagpasibo sa yutan-ong bahin sa iyang organisasyon. Kining maong mga pagpasibo nakapatahom ug nakapalig-on sa iyang kahikayan alang sa atong espirituwal nga panalipod. Sukad sa katuigang 1870 hangtod sa 1932, ang mga membro sa kongregasyon maoy nagpili sa mga ansiyano ug mga diakono alang sa maong mga katungdanan. Niadtong 1932 ang pinili nga mga ansiyano gipulihan sa usa ka komite sa pag-alagad nga gipili sa kongregasyon aron moayuda sa usa ka tinudlong direktor sa pag-alagad. Niadtong 1938, ang mga kahikayan gihimo aron itudlo sa teokratikanhong paagi ang tanang alagad sa kongregasyon. Ubos sa pagdumala sa Nagamandong Lawas sa mga Saksi ni Jehova, sukad sa 1972, ang mga rekomendasyon himoon ug kon kini maaprobahan, makadawat ang mga kongregasyon ug mga sulat nga nagtudlo sa teokratikanhong paagi sa mga magtatan-aw ug sa ministeryal nga mga alagad. Latas sa katuigan, gipauswagan ang katungdanan sa Nagamandong Lawas ug gihimo ang mga kausaban aron mahimong mas sayon ang buluhaton niini.

14. Unsang programa sa pagbansay ang nagsugod niadtong 1959?

¹⁴ Niadtong 1950, human sa maampingong pagtuon sa Salmo 45:16 mitungha ang usa ka programa sa pagbansay nga nagapadayon karon. Kanang tekstoha mabasa: “Puli sa imong mga katigulangan anaa unya ang imong mga anak, nga imong itudlo ingon nga mga prinsipe sa tibuok nga yuta.” Ang mga ansiyano nga nagapanguna karon diha sa kongregasyon ginabansay alang sa teokratikanhong mga buluhaton sa pagkakaron ug human sa Armagedon. (Pinadayag 16:14, 16) Ang Tunghaan sa Ministeryo sa Gingharian gisugdan niadtong 1959. Niadtong panahona, ang usa ka bulan nga kurso gitagana ilabina alang sa mga alagad sa kongregasyon, nga maoy pagtawag niadto sa nagadumalang mga magtatan-aw. Kining tunghaana gipadak-an karon nga naghatag nag instruksiyon alang sa tanang magtatan-aw ug ministeryal nga mga alagad. Pagkahuman niana, ang maong mga igsoong lalaki maoy manguna sa pagbansay sa indibiduwal nga Saksi ni Jehova diha sa ilang kaugalingong mga kongregasyon. Busa, ang tanan matabangan sa espirituwal nga paagi ug matabangan sa pagpauswag sa ilang pagkaepektibo sa ministeryo ingong mga magmamantala sa maayong balita sa Gingharian.—Marcos 13:10.

15. Unsay duha ka paagi aron matipigan ang kaputli sa Kristohanong kongregasyon?

¹⁵ Ang mga indibiduwal nga buot mahimong bahin sa Kristohanong kongregasyon kinahanglang makakab-ot ug tinong mga kinahanglanon. Makataronganon lang nga dili dawatong bahin sa kongregasyon kadtong mabiaybiayon karong adlawa, sama nga kanang matanga sa mga tawo walay luna sa arka ni Noe. (2 Pedro 3:3-7) Sukad gayod  sa 1952, ang mga Saksi ni Jehova nagpaluyo sa mas tin-aw nga pagsabot sa usa ka kahikayan nga makatabang sa pagpanalipod sa kongregasyon—nga mao, ang pagpalagpot sa dili-mahinulsolong mga makasasala. Hinuon, ang tinuod nga mahinulsolong mga mamumuhat ug daotan mahigugmaong tabangan sa ‘pagtul-id sa mga alagianan sa ilang mga tiil.’—Hebreohanon 12:12, 13; Proverbio 28:13; Galacia 6:1.

16. Unsa ang espirituwal nga kahimtang sa katawhan ni Jehova?

¹⁶ Ang espirituwal nga kauswagan sa katawhan ni Jehova dili katingad-an o aksidente lamang. Pinaagi sa manalagnang si Isaias, si Jehova miingon: “Tan-awa! Ang akong mga alagad mangaon, apan kamo panggutomon. Tan-awa! Ang akong mga alagad manginom, apan kamo pang-uhawon. Tan-awa! Ang akong mga alagad managmaya, apan kamo manag-antos sa kaulawan. Tan-awa! Ang akong mga alagad managhugyaw sa kalipay tungod sa maayong kahimtang sa kasingkasing, apan kamo managtuaw tungod sa kasakit sa kasingkasing ug kamo motiyabaw tungod sa bug-os nga pagkahugno sa espiritu.” (Isaias 65:13, 14) Si Jehova nagpadayon sa pagtagana kanatog dagayang suplay sa tukma-sa-panahon ug makapahimsog nga espirituwal nga pagkaon nga padayong makapalig-on kanato sa espirituwal.—Mateo 24:45.

Magmaandam Aron Makalabang-Buhi

17. Unsay makatabang kanato sa pagpangandam aron makalabang-buhi?

¹⁷ Labaw pa kay sukad masukad, karon mao ang panahon nga “magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa.” (Hebreohanon 10:23-25) Ang pagpabiling suod ug aktibong makig-uban sa usa sa kapig 98,000 ka kongregasyon sa mga Saksi ni Jehova motabang kanato sa pagpangandam sa atong kaugalingon aron makalabang-buhi. Ang atong mga isigkamagtutuo magpaluyo kanato samtang maningkamot kita sa pagpadayag sa “bag-ong pagkatawo” ug manlimbasog gayod sa bug-os kasingkasing sa pagtabang sa uban nga makakat-on sa tagana ni Jehova alang sa kaluwasan.—Efeso 4:22-24; Colosas 3:9, 10; 1 Timoteo 4:16.

18. Nganong determinado ka sa pagpabilin nga suod sa Kristohanong kongregasyon?

¹⁸ Si Satanas ug ang iyang daotang kalibotan nagtinguha gayod sa paghaylo kanato pahilayo sa Kristohanong kongregasyon. Bisan pa niana, kita makapabilin nga bahin niini ug makalabang-buhi sa pagkalaglag sa presenteng daotang sistema sa mga butang. Hinaot unta nga ang gugma kang Jehova ug pagkamapasalamaton tungod sa iyang mahigugmaong mga tabang magpalihok kanato nga mahimong mas determinado kay sukad masukad nga pakyason ang mga paningkamot ni Satanas. Ang pagpamalandong sa atong mga panalangin karon makapalig-on sa atong determinasyon. Ang pipila sa maong mga panalangin hisgotan sa sunod artikulo.

Unsa ang Imong mga Tubag?

• Sa unsang paagi ang atong panahon susama sa adlaw ni Noe?

• Unsang hiyasa ang hinungdanon kaayo aron makalabang-buhi?

• Unsang progresibong mga pagpasibo ang nakapalig-on sa kahikayan ni Jehova alang sa atong panalipod?

• Sa unsang paagi kita personal nga makapangandam aron makalabang-buhi?

[Mga Pangutana sa Pagtuon]

[Hulagway sa panid 22]

Ang mga katalirongan ni Noe wala motuo kaniya

[Hulagway sa panid 23]

Mapuslanon nga tuohan ang pasidaang mga mensahe sa Diyos

[Hulagway sa panid 24]

Unsang katuyoan ang gipalampos sa Tunghaan sa Ministeryo sa Gingharian?

[Hulagway sa panid 25]

Karon mao ang panahon sa pagpabilin nga suod sa Kristohanong kongregasyon