Ang Katuyoan sa Diyos Alang sa Yuta—Hapit Nang Matuman

SA DIDTO pa sa Paraiso si Adan ug Eva, sila gisugo sa Diyos: “Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.”—Genesis 1:28.

Ang paggahom sa yuta wala lamang magpasabot sa pagtikad o pag-atiman sa usa ka gamayng luna niini. Si Adan ug Eva ug ang ilang mga anak kinahanglang magpasangkad sa Paraiso hangtod molukop kini sa tibuok yuta. Ugaling lang, ang unang magtiayon nakasala ug gipalayas gikan sa tanaman sa Eden. (Genesis 3:23, 24) Apan wala kana magpasabot nga ang yuta dili na gayod magamhan.

Tungod kay panalanginan sila sa Diyos, ang masinugtanong katawhan makagahom sa yuta. Sa dihang ang katawhan sa karaang Israel gipanalanginan sa Diyos, maayog mga abot ang ilang mga umahan ug maayog mga bunga ang ilang mga prutasan. Ang susamang mga kahimtang mao unya ang molungtad samtang ang atong yuta anam-anam nga mahimong paraiso. Sumala sa gisaad sa inspiradong Pulong sa Diyos, ang Bibliya, “ang yuta magapatungha gayod sa iyang bunga; ang Diyos, ang atong Diyos, magapanalangin kanato.” (Salmo 67:6) Sa pagkatinuod, ang kapatagan ug kabukiran sa yuta, ang kakahoyan ug kabulakan, ang kasubaan ug kadagatan niini magmaya. (Salmo  96:11-13; 98:7-9) Ang atong yuta matugob ug lunhawng katanoman, mabulokong kalanggaman, katingalahang kahayopan, ug mahigugmaong katawhan.

Hapit na ang Usa ka Bag-ong Kalibotan!

Hapit na natong matagamtam ang bag-ong kalibotan nga gisaad ni Jehova nga Diyos. “Adunay bag-ong mga langit ug usa ka bag-ong yuta nga atong ginapaabot sumala sa iyang saad,” misulat si apostol Pedro, “ug niini magpuyo ang pagkamatarong.” (2 Pedro 3:13) Human mabasa kanang mga pulonga ni Pedro, ang pipila lagmit mohinapos nga kining planetaha dili gayod mahimong paraiso. Nagtuo tingali sila nga ilisan ang literal nga langit ug yuta. Tinuod ba kana?

Unsa ang “bag-ong mga langit”? Kini dili ang literal nga mga langit nga gilalang sa Diyos. (Salmo 19:1, 2) Mao pay paghisgot ni Pedro sa simbolikong “mga langit”—ang tawhanong mga kagamhanan nga gituboy ibabaw sa ilang mga ginsakpan. (2 Pedro 3:10-12) Wala molampos ang pagmando niining maong “mga langit” ibabaw sa mga tawo ug kini pagahanawon. (Jeremias 10:23; Daniel 2:44) Ang “bag-ong mga langit” nga mopuli niini mao ang Gingharian sa Diyos nga gilangkoban sa Haring Jesu-Kristo ug sa iyang 144,000 ka kaubang mga magmamando nga gibanhaw ngadto sa langitnong kinabuhi.—Roma 8:16, 17; Pinadayag 5:9, 10; 14:1, 3.

Ang “bag-ong yuta” nga gihisgotan ni Pedro dili usa ka bag-ong planeta. Gilalang ni Jehova ang yuta nga hingpit aron puy-an sa mga tawo sa walay kataposan. (Salmo 104:5) Gamiton usahay sa Bibliya ang pulong “yuta” sa pagtumong sa mga tawo. (Genesis 11:1) Ang yuta nga hapit nang hanawon mao ang mga tawo nga nahimong bahin niining daotang kalibotan. Sa susama, ang kalibotan sa dili-diyosnong mga tawo nalaglag sa Lunop sa adlaw ni Noe. (2 Pedro 3:5-7) Nan, unsa ang “bag-ong yuta”? Kini mao ang bag-ong katilingban sa mga tawo—ang matuod nga mga magsisimba sa Diyos, kinsa “matul-id sa ilang mga kasingkasing.” (Salmo 125:4; 1 Juan 2:17) Ang tanang balaod sa “bag-ong yuta” maggikan sa “bag-ong mga langit.” Paneguroon sa matinumanong mga tawo dinhi sa yuta nga pagatumanon kining mga balaora.

Aduna Unyay Bag-o ug Kahibulongang mga Kausaban!

Si Jehova naghatag gayod kanato ug usa ka talagsaong puy-anan sa dihang iyang gibuhat ang yuta alang sa mga tawo. Siya mismo ang nag-ingon nga ang tanan niyang yutan-ong mga gibuhat “maayo kaayo.” (Genesis 1:31) Si Satanas nga Yawa nagdaldal kang Adan ug Eva sa pagrebelde. (Genesis 3:1-5; Pinadayag 12:9) Apan, ang Diyos hapit nang molihok sa pagseguro nga matagamtam sa mga matul-id “ang tinuod nga kinabuhi.” Kana mao ang “kinabuhing walay kataposan” ilalom sa hingpit nga mga kahimtang sa Paraiso. (1 Timoteo 6:12, 19) Atong susihon karon ang pipila sa mga panalangin nga atong mapahimuslan nianang panahona.

Sa Usa ka Libo ka Tuig nga Pagmando ni Kristo, si Satanas bilanggoon ug dili na makapahinabog kaalaotan sa mga tawo. Si apostol Juan miingon: “Nakita ko ang usa ka manulonda [si Miguel nga arkanghel, o si Jesu-Kristo] nga mikunsad gikan sa langit nga may dalang yawi sa kahiladman ug usa ka dakong kadena. Ug iyang gidakop ang dragon, ang orihinal nga halas, nga mao ang Yawa ug Satanas, ug gigapos siya sulod sa usa ka libo ka tuig. Ug iyang gitambog siya sa kahiladman ug gisirhan kini ug gitimbrehan kini sa ibabaw niya, aron dili na siya makapahisalaag pa sa kanasoran hangtod nga matapos ang usa ka libo ka tuig.” (Pinadayag 20:1-3; 12:12) Gawas nga wala nay impluwensiya gikan kang Satanas samtang atua siya sa kahiladman, ang katawhan magtagamtam ug daghan pang ubang mga panalangin ilalom sa pagmando sa Gingharian.

Ang pagkadaotan, kapintasan, ug gubat mahanaw na. Ang Bibliya nagsaad: “Sa dili na  madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:10, 11, 29) ‘Pahunongon [ni Jehova nga Diyos] ang mga gubat hangtod sa kinatumyan sa yuta.’ (Salmo 46:9) Pagkakahibulongang mga pasalig sa kasegurohan ug kalinaw!

Atong mabatonan ang daghang makapahimsog ug lamiang mga pagkaon. “Aduna unyay dagayang lugas sa ibabaw sa yuta,” miawit ang salmista. “Sa tumoy sa kabukiran adunay pagsugwak.” (Salmo 72:16) Nianang panahona, wala nay mag-antos sa kagutom.

Wala nay magsakit. Sa pagkatinuod, “walay pumoluyo nga moingon: ‘Ako masakiton.’” (Isaias 33:24; 35:5, 6) Sa dinhi pa si Jesu-Kristo sa yuta, iyang giayo ang mga sanlahon, bakol, ug buta. (Mateo 9:35; Marcos 1:40-42; Juan 5:5-9) Hunahunaa lang kon unsay iyang himoon sa bag-ong kalibotan! Handurawa ang kalipay sa dihang ang mga buta, bungol, bakol, ug mga amang mamaayo na.

Samtang ang masinugtanong mga tawo mouswag ngadto sa kahingpitan, ang kadaot nga gipahinabo sa pagkatigulang balihon. Mawala na unya ang mga antiyohos, sungkod, kratses, wheelchair, ospital, ug mga tambal. Pagkadagkong mga kausaban unya sa dihang mahibalik kanato ang kahimsog sa pagkabatan-on! (Job 33:25) Matag buntag, kita mahigmata gikan sa hinanok nga pagkatulog nga nalagsik ug andam na usab sa pagsugod sa laing adlaw sa malipayong mga buluhaton.

Ang pagpamanhaw sa mga minahal ug sa uban makapalipay kanato. (Juan 5:28, 29; Buhat 24:15) Pagkamakalilipay unya ang pag-abiabi kang Abel, Noe, Abraham, Sara, Job, Moises, Ruth, David, Elias, Ester, ug daghan pang uban! Minilyong uban pa ang pagabanhawon usab. Kadaghanan kanila wala pa gayod makakat-on bahin kang Jehova, apan sila abiabihon sa mga tawo nga maikagon sa pagtudlo kanila bahin sa Diyos, sa iyang mga katuyoan, ug bahin sa iyang Anak, si Jesu-Kristo. Samtang mahibalo ang mga binanhaw bahin sa ilang Maglalalang, ang yuta mapuno gayod sa kahibalo bahin kang Jehova.

Labaw sa tanan, kita makasimba sa atong bugtong matuod nga Diyos sa walay kataposan. Kita makapribilehiyo sa ‘pag-alagad kang Jehova uban ang pagmaya,’ ug kita magtambayayongay sa pagtukod ug maanindot nga mga balay, pagtikad sa yuta ug, sa ngadtongadto, maggahom sa tibuok yuta. (Salmo 100:1-3; Isaias 65:21-24) Pagkamakalilipay gayod ang pagkinabuhi sa walay kataposan diha sa usa ka mabungahon, malinawon, ug matahom nga paraiso nga makapasidungog sa balaang ngalan ni Jehova!—Salmo 145:21; Juan 17:3.

Kataposang Pagsulay Alang sa Katawhan

Sa iyang Usa ka Libo ka Tuig nga Pagmando, ipadapat ni Jesus ang mga kaayohan sa iyang halad lukat ngadto sa matag masinugtanong tawo. Sa ingon, ang tanang sala mawagtang, ug ang mga tawo mamahingpit. (1 Juan 2:2; Pinadayag 21:1-4) Sa dihang mahanaw na sa bug-os ang mga epekto sa sala ni Adan, ang hingpit nga mga tawo makakab-ot na sa pisikal, mental, moral, ug espirituwal nga mga sukdanan sa Diyos. Busa sila “mangabuhi” sa bug-os nga diwa sa dihang makadangat na sila sa kahingpitan. (Pinadayag 20:5) Kini ug ang Paraisong yuta maghimaya gayod kang Jehova!

Pagkahuman sa Usa ka Libo ka Tuig nga Pagmando ni Kristo, si Satanas nga Yawa ug  ang iyang mga demonyo, o daotang mga manulonda, pagabuhian sa hamubong panahon gikan sa kahiladman diin gibalhog sila sulod sa napulo ka siglo. (Pinadayag 20:1-3) Sila tugotan sa paghimog kataposang paningkamot sa pagpatalikod sa mga tawo gikan sa Diyos. Bisan tuod adunay mga tawo nga magpadaog sa daotang mga tinguha, kini nga rebelyon seguradong mapakyas. Laglagon ni Jehova ang hakog nga mga tawo uban kang Satanas ug sa tanan niyang mga demonyo. Ang pagkadaotan dili na gayod motungha pa. Ang tanang mamumuhat ug daotan mahanaw hangtod sa hangtod, ug ang mga matarong makadawat ug kinabuhing walay kataposan.—Pinadayag 20:7-10.

Atua Ka ba Unya Didto?

Ang walay-kataposang kalipay mao ang palaaboton sa mga nahigugma kang Jehova nga Diyos. Walay butang nga makapuol bahin sa kinabuhing walay kataposan sa Paraiso. Sa pagkatinuod, ang kinabuhi mahimong mas makaiikag sa paglabay sa panahon, kay walay kinutbanan ang kahibalo bahin kang Jehova nga Diyos. (Roma 11:33) Kanunay nga duna kay bag-ong butang nga makat-onan, ug ikaw adunay daghan kaayong panahon sa pagkuhag kahibalo. Ngano? Kay ikaw mabuhi, dili lamang sulod sa 70 o 80 ka tuig, kondili sa walay kataposan.—Salmo 22:26; 90:10; Ecclesiastes 3:11.

Kon ikaw nahigugma sa Diyos, ikaw magmalipayon kanunay sa pagbuhat sa iyang kabubut-on. Si apostol Juan misulat: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Busa, ayawg tugoti ang bisan unsa sa pagpugong kanimo sa pagpahimuot kang Jehova nga Diyos pinaagi sa pagbuhat kon unsay matarong. Hinumdomi kanunay ang kahibulongang paglaom nga gihatag kanimo sa Pulong sa Diyos, ang Bibliya. Magmadeterminado sa pagbuhat sa kabubut-on ni Jehova, ug ayaw gayod pagsimang gikan nianang dalana. Ingong resulta, atua ka unya didto sa dihang matuman na ang katuyoan sa Diyos alang sa yuta ug ang atong tibuok-yutang puy-anan mahimo nang usa ka paraiso hangtod sa hangtod.

[Hulagway sa panid 4]

Tungod sa panalangin sa Diyos, dagaya ang abot sa kaumahan sa Israel

[Hulagway sa panid 7]

Unsang mga panalangin ang gilaoman nimong matagamtam sa Paraiso?