Ang mga Kalipay sa Paglakaw Diha sa Integridad
Ang mga Kalipay sa Paglakaw Diha sa Integridad
“Ang panalangin ni Jehova—mao kana ang makapadato, ug dili niya kana dugangan ug kasakit.”—PROVERBIO 10:22.
1, 2. Nganong kinahanglan natong likayan ang sobra nga paghunahuna sa umaabot?
“ANG sobra nga paghunahuna sa umaabot . . . makapugong kanato sa pagkakita sa atong kahimtang karon,” matod sa usa ka Amerikanong pilosopo. Kini matuod sa mga batang sobra nga naghunahuna bahin sa mga pribilehiyo sa hingkod nga tawo mao nga dili na sila makakita sa mga kaayohan sa pagkabata hangtod sa panahon nga sila tigulang na.
2 Bisan ang mga magsisimba ni Jehova wala malibre sa maong panghunahuna. Tagda kon unsay mahimong mahitabo. Kita nangandoy nga matuman ang saad sa Diyos nga ipatungha ang usa ka paraiso sa yuta. Maikagon natong gipaabot ang kinabuhi nga wala nay sakit, pagkatigulang, kasakit, ug pag-antos. Bisan pag maayo ang pagdahom nianang mga butanga, unsa na man kon sobra natong gihunahuna ang pisikal nga mga panalangin sa unahan mao nga dili na kita makakita sa atong espirituwal nga mga panalangin karon? Pagabasolan gayod nato kana! Kita daling mawad-ag kadasig ug mobatig ‘kasakit sa kasingkasing tungod kay ang atong mga pagdahom nalangan’ nga dili maoy atong gidahom. (Proverbio 13:12) Basin mobati kitag grabe nga kasub-anan o depresyon tungod sa mga suliran ug kalisdanan sa kinabuhi. Inay masagubang ang daotang mga kahimtang, basin makaugmad kita sa tinamdan sa pagkareklamador. Malikayan kining tanan pinaagi sa pagpamalandong nga mapasalamaton sa atong mga panalangin karon.
3. Unsay hatagan natog bug-os nga pagtagad niining artikuloha?
3 “Ang panalangin ni Jehova—mao kana ang makapadato, ug dili niya kana dugangan ug kasakit,” matod sa Proverbio 10:22. Dili ba ang espirituwal nga kadagaya sa mga alagad ni Jehova karon maoy usa ka panalangin nga pagakalipayan? Hisgotan nato ang pipila ka bahin sa atong espirituwal nga kadagaya ug tan-awon kon unsay kahulogan niana kanato sa personal. Ang pagpamalandong sa mga pabor nga gihatag ni Jehova sa “matarong nga nagalakaw diha sa iyang integridad” makapalig-on gayod sa atong determinasyon nga mopadayon sa malipayong pag-alagad sa atong langitnong Amahan.—Proverbio 20:7.
‘Mga Panalangin nga Makapadato Kanato’ Karon
4, 5. Unsang pagtulon-an sa Bibliya ang imo gayong gipabilhan, ug ngano?
4 Tukmang kahibalo bahin sa mga pagtulon-an sa Bibliya. Ang mga relihiyon sa Kakristiyanohan kasagarang nag-angkon nga sila nagtuo sa Bibliya. Ugaling lang, wala sila magkauyon kon unsay gitudlo niini. Bisan ang mga membro sa samang relihiyon sagad adunay lahi nga mga opinyon kon unsay tinuod nga gitudlo sa Kasulatan. Pagkalahi sa ilang kahimtang kay sa mga alagad ni Jehova! Bisan kon unsay atong nasodnon, kultural, etnikong kagikan, kita nagasimba sa Diyos nga atong nailhan sa ngalan. Siya dili misteryosong diyos nga trinidad. (Deuteronomio 6:4; Salmo 83:18; Marcos 12:29) Nahibalo usab kita nga ang pangunang isyu sa pagkasoberano sa Diyos sa tibuok uniberso hapit nang mahusay ug pinaagi sa paghupot sa atong integridad kaniya, ang matag usa kanato personal nga nalangkit sa maong isyu. Nahibalo kita sa kamatuoran bahin sa mga patay ug dili kita mobatig makalilisang nga kahadlok sa Diyos nga magpaantos kono sa mga tawo diha sa impiyernong-kalayo o magbalhog kanila sa purgatoryo.—Ecclesiastes 9:5, 10.
5 Dugang pa, makalilipay gayod ang pagkahibalo nga kita wala motunghang sulagma lang pinaagi sa ebolusyon! Hinunoa, kita gilalang sa Diyos, nga gibuhat diha sa iyang kaugalingong dagway. (Genesis 1:26; Malaquias 2:10) “Pagadayegon ko ikaw tungod kay sa makalilisang nga paagi ako katingalahan nga pagkabuhat,” miawit ang salmista ngadto sa iyang Diyos. “Ang imong mga buhat katingalahan, ingon sa nasayran pag-ayo sa akong kalag.”—Salmo 139:14.
6, 7. Unsang mga kausaban diha sa imong kinabuhi o sa uban ang imong nahibaloan nga maoy usa ka panalangin?
6 Pagkagawas sa makadaot nga mga bisyo ug panggawi. Ang mga pasidaan bahin sa mga kapeligrohan sa pagtabako, sobrang pag-inom, ug pagkamahilayon sa sekso kaylap diha sa media. Ang maong mga pasidaan kasagarang wala tagda. Apan unsay mahitabo sa dihang ang usa ka sinserong tawo makahibalo nga ang matuod nga Diyos nagsaway nianang mga buhata ug siya nasubo tungod sa mga nagbuhat niana? Segurado gayod, ang maong tawo matukmod nga wagtangon kanang daotang mga bisyo gikan sa iyang kinabuhi! (Isaias 63:10; 1 Corinto 6:9, 10; 2 Corinto 7:1; Efeso 4:30) Bisan tuod sa panguna iyang buhaton kini sa pagpahimuot kang Jehova nga Diyos, madawat usab niya ang dugang nga mga kaayohan—mas maayong panglawas ug ang kalinaw sa hunahuna.
7 Ang paghunong sa daotang mga bisyo maoy lisod kaayo alang sa daghang tawo. Bisan pa niana, kada tuig tinagpulo ka libo ang mohunong niana. Sila nagpahinungod sa ilang kaugalingon kang Jehova ug nagpabawtismo sa tubig, sa ingon nagpadayag nga ilang giwagtang ang mga bisyo nga dili makapahimuot sa Diyos gikan sa ilang mga kinabuhi. Pagkamakapadasig kana kanatong tanan! Makapalig-on kana sa atong determinasyon sa pagpabilin nga nahigawas sa pagkaulipon sa makasasala ug makadaot nga panggawi.
8. Unsang tambag nga gipasukad sa Bibliya ang makatabang sa kalipay sa pamilya?
8 Malipayon nga pamilyahanong kinabuhi. Nagkahuyang ang pamilyahanong kinabuhi diha sa daghang nasod. Ang daghang kaminyoon mosangko sa pagdiborsiyo, nga sagad magbilin ug mga anak nga nadaot sa emosyonal nga paagi. Sa pipila ka nasod sa Uropa, usa rag ginikanan ang halos 20 porsiyento sa mga pamilya. Sa unsang paagi si Jehova nagtabang kanato sa paglakaw diha sa dalan sa integridad niining bahina? Palihog basaha ang Efeso 5:22–6:4, ug matikdi ang maayong tambag sa Pulong sa Diyos alang sa mga bana, mga asawa, ug mga anak. Ang pagpadapat sa giingon dinhi ug sa ubang bahin sa Kasulatan segurado nga makapalig-on sa bugkos sa kaminyoon, makatabang sa mga ginikanan sa pagmatutog mga anak sa hustong paagi, ug makatabang sa pagtukod ug malipayong pamilya. Dili ba kana usa ka panalangin nga pagakalipayan?
9, 10. Sa unsang paagi ang atong panglantaw sa umaabot lahi sa iya sa kalibotan?
9 Pasalig nga ang mga suliran sa kalibotan hapit nang masulbad. Bisan pa sa siyentipikanhon ug teknolohikanhon nga kahanas ug sa sinserong paningkamot sa pipila ka lider, ang seryosong mga suliran sa kinabuhi karon nagpabilin nga wala masulbad. Si Klaus Schwab, magtutukod sa World Economic Forum, di pa dugayng nag-ingon nga “nagakataas ang listahan sa mga suliran nga giatubang sa kalibotan ug nagakamubo ang panahon sa pagsulbad kanila.” Naghisgot siya bahin sa “mga kapeligrohan nga nag-apektar sa tanang nasod sama sa terorismo, pagkadaot sa kalikopan ug pagkamabalhinon sa kahimtang sa panalapi.” Mihinapos si Schwab: “Karon, labaw pa kay sukad masukad, giatubang sa kalibotan ang tinuod nga mga hitabo nga kinahanglang molihok ang nagkahiusa nga mga nasod ug nga sila determinado gayod.” Samtang nagpadayon ang ika-21 nga siglo, nagpabiling mangiob ang katibuk-ang panglantaw sa umaabot sa katawhan.
10 Makapahimuot gayod ang pagkahibalo nga si Jehova naghimo ug usa ka kahikayan nga makaarang sa pagsulbad sa tanang suliran sa katawhan—ang Mesiyanikong Gingharian sa Diyos! Pinaagi niana, ang matuod nga Diyos ‘magpahunong sa mga gubat’ ug magpatunghag ‘dagayang pakigdait.’ (Salmo 46:9; 72:7) Ang dinihogang Hari, si Jesu-Kristo, ‘magluwas sa kabos, sa sinakit, ug sa timawa gikan sa pagpanglupig ug sa kapintasan.’ (Salmo 72:12-14) Ubos sa pagmando sa Gingharian, wala na unyay kanihit sa pagkaon. (Salmo 72:16) Si Jehova ‘magapahid sa tanang luha gikan sa atong mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.’ (Pinadayag 21:4) Ang Gingharian natukod na sa langit ug hapit nang molihok sa pagsulbad sa tanang suliran sa yuta.—Daniel 2:44; Pinadayag 11:15.
11, 12. (a) Ang pagpangagpas ba ug kalingawan mohatag ug malungtarong kalipay? Ipatin-aw. (b) Unsay makahatag ug tinuod nga kalipay?
11 Pagkahibalo kon unsay makahatag ug tinuod nga kalipay. Unsay makahatag ug tinuod nga kalipay? Usa ka sikologo miingon nga ang kalipay adunay tulo ka sangkap—kalingawan, pakiglangkit sa mga kalihokan nga sama sa trabaho ug pamilya, ug katuyoan (pagbuhat alang sa mas dakong tumong o sa tumong nga dili sa kaugalingon). Nianang tulo, iyang gilista ang kalingawan ingon nga labing gamay ug bili ug siya miingon: “Kini talagsaon tungod kay daghang tawo ang nagsentro sa ilang kinabuhi sa pagpangagpas sa kalingawan.” Unsa ang hunahuna sa Bibliya bahin niini?
12 Si Haring Solomon sa karaang Israel miingon: “Ako mismo miingon sulod sa akong kasingkasing: ‘Ari karon, sulayan ko ikaw sa pagmaya. Labot pa, pagpahimulos sa maayo.’ Ug, tan-awa! kana usab kakawangan. Ako miingon sa katawa: ‘Binuang!’ ug sa pagmaya: ‘Unsay ginabuhat niini?’” (Ecclesiastes 2:1, 2) Sa Kasulatanhong paagi, ang kalipay nga ginahatag sa paglingawlingaw temporaryo lamang. Komosta man ang pagpakiglangkit sa kalihokan? Aduna kitay labing mapuslanong kalihokan nga pakiglangkitan—ang buluhatong pagsangyaw sa Gingharian ug paghimog tinun-an. (Mateo 24:14; 28:19, 20) Pinaagi sa pagpaambit sa uban sa mensahe sa kaluwasan nga gipahayag diha sa Bibliya, makahimo kita sa buluhaton nga mahimong moresulta sa atong kaluwasan mismo ug niadtong mamati kanato. (1 Timoteo 4:16) Ingon nga “mga isigkamagbubuhat sa Diyos,” atong masinati nga “adunay labaw nga kalipay sa paghatag kay sa pagdawat.” (1 Corinto 3:9; Buhat 20:35) Kining buluhatona makadugang ug kahulogan sa atong kinabuhi ug motagana sa Maglalalang ug usa ka tubag alang sa iyang tigtamay, si Satanas nga Yawa. (Proverbio 27:11) Sa pagkatinuod, gipakita ni Jehova kanato nga ang diyosnong pagkamahinalaron mohatag ug tinuod ug malungtarong kalipay.—1 Timoteo 4:8.
13. (a) Sa unsang paagi ang Teokratikanhong Tunghaan sa Ministeryo maoy usa ka panalangin nga atong kalipayan? (b) Sa unsang paagi nakabaton kag mga kaayohan gikan sa Teokratikanhong Tunghaan sa Ministeryo?
13 Usa ka hinungdanon ug epektibong programa sa pagbansay. Si Gerhard nag-alagad ingong ansiyano sa usa ka kongregasyon sa mga Saksi ni Jehova. Sa paghinumdom sa iyang pagkabatan-on, siya nag-ingon: “Ingong usa ka batan-on, ako may dagkong mga suliran sa pagsulti. Kon mapit-osan, ako dili makalitok ug magnganga sa pagsulti. Gibati ko ang pagkatimawa ug ang depresyon. Gihikay sa akong mga ginikanan nga mokuha kog kurso sa pagsulti, apan ang ilang mga paningkamot wala molampos. Ang akong suliran maoy labot sa pangisip, dili sa pisikal. Apan si Jehova may talagsaong tagana—ang Teokratikanhong Tunghaan sa Ministeryo. Ang pag-apil sa maong tunghaan mihatag kanakog kaisog. Gipaningkamotan ko gayod ang pagpadapat sa akong nakat-onan. Ug milampos kadto! Mas larino na ang akong pagsulti, wala na ako mobatig depresyon, ug nahimo kong mas maisogon diha sa ministeryo. Nagahatag pa gani ako karon ug mga pakigpulong publiko. Mapasalamaton gayod ako kang Jehova, kinsa nakapauswag sa akong kinabuhi pinaagi sa maong tunghaan.” Dili ba ang paagi sa pagbansay ni Jehova kanato aron buhaton ang iyang buluhaton maoy usa ka hinungdan sa pagmaya?
14, 15. Sa mga panahon sa kagul-anan, unsang tabang ang dali nga mabatonan? Iilustrar.
14 Personal nga relasyon uban kang Jehova ug pagpaluyo sa nahiusang internasyonal nga panag-igsoonay. Si Katrin, nga nagpuyo sa Alemanya, nasubo kaayo sa pagkadungog ug mga balita bahin sa kusog nga linog ug sa miresulta nga tsunami sa habagatan-silangang Asia. Ang iyang anak babaye didto sa Thailand niadtong tungora sa dihang mihapak ang katalagman. Sulod sa 32 ka oras ang iyang inahan wala masayod kon buhi pa ba ang iyang anak o kon naapil ba siya sa mga namatay nga nagkadaghan sa oras-oras. Pagkadako nga kahupayan ang gibati ni Katrin sa dihang nakadawat siya sa kataposan ug tawag sa telepono nga nagpasalig kaniya nga luwas ra ang iyang anak!
15 Unsay nakatabang kang Katrin niadtong mga taknaa sa kabalaka? Misulat siya: “Gigugol ko niadto ang halos tanang panahon sa pag-ampo kang Jehova. Subsob kong namatikdan nga kadto nakahatag kanakog dakong kalig-on ug kalinaw sa hunahuna. Dugang pa, ang mahigugmaong espirituwal nga mga igsoon miduaw ug midasig kanako.” (Filipos 4:6, 7) Pagkadaotan gayod unta ang iyang kahimtang kon iya pang gipalabay kadtong makapaguol nga mga takna nga wala makabenepisyo sa pag-ampo kang Jehova ug sa paghupay sa mahigugmaong espirituwal nga mga igsoon! Ang atong suod nga relasyon kang Jehova ug sa iyang Anak uban sa atong suod nga pagpakig-uban sa Kristohanong mga igsoon maoy talagsaong panalangin, nga bililhon kaayo nga dili angay natong ipakaway-bili.
16. Ipahayag ang usa ka kasinatian nga nag-ilustrar sa bili sa paglaom sa pagkabanhaw.
16 Ang paglaom nga makita pag-usab ang namatay nga mga minahal. (Juan 5:28, 29) Ang usa ka batan-ong lalaki nga ginganlag Matthias gimatuto ingong usa sa mga Saksi ni Jehova. Ugaling lang, wala niya pabilhi ang iyang mga panalangin ug nahilayo siya sa Kristohanong kongregasyon sa dihang tin-edyer pa. Siya nagsulat karon: “Wala gayod koy seryosong mga pagpakigsulti uban sa akong amahan. Latas sa mga katuigan, kanunay kaming nagkalalis. Hinuon, gitinguha kanunay sa akong amahan ang kinamaayohang butang alang kanako. Ako iya gayong gimahal, nga wala ko hiamgohi niadto. Niadtong 1996, samtang naglingkod ko sa daplin sa iyang higdaanan, nga nagkupot sa iyang kamot ug naghilak tungod sa pagbasol, ako siyang giingnan nga gikasubo ko pag-ayo ang tanan kong nabuhat ug gimahal ko gayod siya. Apan wala siya makadungog kanako. Human sa pagkasakit sa mubong panahon, siya namatay. Kon mabuhi ako nga makakita sa akong amahan panahon sa pagkabanhaw, bawion namo ang nangaging panahon. Ug malipay gayod siyang mahibalo nga ako nagaalagad karon ingong ansiyano ug ang akong asawa ug ako nagaalagad ingong mga payunir.” Talagsaon gayong panalangin ang paglaom sa pagkabanhaw alang kanato!
“Dili Niya Dugangan Kana ug Kasakit”
17. Unsay angay natong masinati tungod sa pagpamalandong sa mga panalangin ni Jehova?
17 Mahitungod sa iyang langitnong Amahan, si Jesu-Kristo miingon: “Siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.” (Mateo 5:45) Kon si Jehova nga Diyos mohatag ug mga panalangin bisan sa mga dili-matarong ug sa mga daotan, pagkalabi pa nga siya magapanalangin niadtong nagalakaw diha sa dalan sa integridad! “Walay bisan unsang maayo nga ihikaw ni Jehova gikan niadtong nagalakaw nga dili salawayon,” nag-ingon ang Salmo 84:11. Sa dihang kita magpalandong sa linaing pagtagad ug kabalaka nga iyang gipakita alang niadtong nahigugma kaniya, mosugwak gayod ang pagkamapasalamaton ug kalipay sa atong mga kasingkasing!
18. (a) Sa unsang paagi ikaingon nga dili dugangan ni Jehova ug kasakit ang iyang panalangin? (b) Nganong nagaantos man ang daghang maunongong mga alagad ni Jehova?
18 “Ang panalangin ni Jehova”—mao kanay naghatag ug espirituwal nga kauswagan sa iyang katawhan. Ug gipasaligan kita nga “dili niya dugangan kana ug kasakit.” (Proverbio 10:22) Nan nganong makaagom man ug mga pagsulay ug mga kalisdanan ang daghang maunongong mga alagad sa Diyos, nga naghatag kanilag dakong kasakit ug pag-antos? Ang mga kalisdanan ug kagul-anan modangat kanato tungod sa tulo ka dagkong mga hinungdan. (1) Atong kaugalingon nga makasasalang kiling. (Genesis 6:5; 8:21; Santiago 1:14, 15) (2) Si Satanas ug ang iyang mga demonyo. (Efeso 6:11, 12) (3) Ang daotang kalibotan. (Juan 15:19) Bisan pag gitugot ni Jehova nga mahitabo kanato ang daotang mga butang, dili kana gikan niya. Sa pagkatinuod, “ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag.” (Santiago 1:17) Ang mga panalangin ni Jehova dili magpahinabog kasakit.
19. Unsay nagpaabot niadtong nagpadayon sa paglakaw diha sa integridad?
19 Ang pagkasinatig espirituwal nga kadagaya kanunayng naglangkit sa pagpakigsuod sa Diyos. Sa dihang atong maugmad ang suod nga relasyon uban niya, atong ‘maampingong gitipigan alang sa atong kaugalingon ang usa ka maayong patukoranan alang sa umalabot, aron kita makapangupot pag-ayo sa tinuod nga kinabuhi’—ang walay-kataposang kinabuhi. (1 Timoteo 6:12, 17-19) Sa umaabot nga bag-ong kalibotan sa Diyos, ang atong espirituwal nga bahandi pagaubanan ug pisikal nga mga panalangin. Ang tinuod nga kinabuhi mao unya ang masinati sa tanan nga “nagpadayon sa pagpamati sa tingog ni Jehova.” (Deuteronomio 28:2) Uban ang napalig-ong determinasyon, magpadayon kita paglakaw nga malipayon diha sa integridad.
Unsay Imong Nakat-onan?
• Nganong dili maalamon ang sobra nga paghunahuna sa umaabot?
• Unsang mga panalangin ang atong gipahimuslan?
• Nganong nagaantos man ang matinumanong mga alagad sa Diyos?
[Mga Pangutana sa Pagtuon]