“Kinahanglang Among Sugton ang Diyos Ingong Magmamando Inay ang mga Tawo”

“Iya ni Jehova ang Gubat”

DUHA ka magkaaway nga kasundalohan ang nagharongay sa usag usa sa magkaatbang nga mga bahin sa usa ka walog. Sulod sa 40 ka adlaw ang kalalakin-an sa Israel nahadlok pag-ayo ug giyagayagaan kanunay ni Goliat, ang hawod nga manggugubat sa mga Filistehanon.—1 Samuel 17:1-4, 16.

Gihagit ni Goliat sa kusog nga tingog ang mga Israelinhon niining mga pulonga: “Pagpilig usa ka tawo alang kaninyo, ug paanhia siya kanako. Kon makahimo siya sa pagpakig-away kanako ug iya akong mapatay, nan kami mahimo ninyong mga sulugoon. Apan kon ako makabuntog kaniya ug mapatay ko siya, kamo mahimo usab namo nga mga sulugoon, ug kamo mag-alagad kanamo. . . . Gihagit ko ang mga talay sa kasundalohan sa Israel niining adlawa. Hatagi ako ug usa ka tawo, ug kami mag-away!”—1 Samuel 17:8-10.

Sa karaang mga panahon, kasagarang magtakos ang duha ka hawod nga manggugubat sa paghawas sa ilang kasundalohan. Kon kinsay modaog, kana nagpasabot sa kadaogan sa kasundalohan nga iyang gihawasan. Apan kini nga manggugubat nga naghagit sa Israel dili ordinaryong sundalo. Siya maoy usa ka higante—usa ka maisog ug makahahadlok nga kaatbang. Apan tungod sa pagyagayaga ni Goliat sa kasundalohan ni Jehova, nahimong segurado ang iyang kaalaotan.

Kini dili lamang usa ka militaryong panagsangka. Ang panag-away maoy tali kang Jehova ug sa mga diyos sa mga Filistehanon. Imbes maisogong manguna sa iyang kasundalohan batok sa mga kaaway sa Diyos, si Haring Saul sa Israel nahadlok pag-ayo.—1 Samuel 17:11.

Usa ka Batan-ong Lalaki Misalig Kang Jehova

Panahon niini nga pag-urong sa panag-away, ang usa ka batan-ong lalaki nga nadihogan nang mahimong hari sa Israel ang miadto sa iyang mga magulang nga lalaki sa kasundalohan ni Saul. Siya mao si David. Sa iyang pagkadungog sa giingon ni Goliat, siya nangutana: “Kinsa ba kining dili-tinuli nga Filistehanon nga siya naghagit man sa nagtalay nga kasundalohan sa buhi nga Diyos?” (1 Samuel 17:26) Sa panglantaw ni David, si Goliat naghawas sa mga Filistehanon ug sa ilang mga diyos. Kay nahupngan sa matarong nga kasuko, buot ni David nga mobarog dapig kang Jehova ug sa Israel ug makigtakos sa paganong higante. Apan si Haring Saul miingon: “Dili ka makahimo sa pag-adto batok niini nga Filistehanon aron sa pagpakig-away kaniya, kay ikaw usa lamang ka bata.”—1 Samuel 17:33.

Pagkalahi sa panglantaw ni Saul sa iya ni David! Giisip lamang ni Saul si David ingong usa ka batang magbalantay sa karnero nga makigsangka sa usa ka mangtas nga higante. Apan, sa hunahuna ni David, si Goliat maoy usa lamang ka tawo nga misukol sa Soberanong Ginoo nga si Jehova. Si David maisogon kay siya kombinsido nga ang Diyos dili motugot nga ang Iyang ngalan ug ang Iyang katawhan biaybiayon lang ug dili silotan ang mga kaaway. Samtang si Goliat nanghambog bahin sa iyang kusog, si David misalig kang Jehova, nga nagtimbangtimbang sa situwasyon sumala sa panglantaw sa Diyos.

“Ako Mianhi Kanimo Uban sa Ngalan ni Jehova”

Ang pagtuo ni David adunay lig-ong pasikaranan. Siya nahinumdom nga gitabangan siya sa Diyos sa pagluwas sa iyang mga karnero gikan sa usa ka oso ug usa ka leyon. Nakaseguro ang batan-ong magbalantay nga tabangan siya ni Jehova karon sa pagpakigsangka niining makahahadlok nga kaawayng Filistehanon. (1 Samuel 17:34-37) Dala ang usa ka yanong saplong ug lima ka hamis nga mga bato, si David miasdang kang Goliat.

Ang batan-ong si David midawat niining daw lisod kaayo nga pagpakigsangka pinaagi sa pagsalig lamang sa kusog nga ihatag ni Jehova. Sa kamaisogon,  iyang giingnan ang Filistehanon: “Mianhi ka kanako nga nagdalag espada ug bangkaw ug salapang, apan ako mianhi kanimo uban sa ngalan ni Jehova sa mga panon, ang Diyos sa mga talay sa kasundalohan sa Israel, nga imong gihagit. Niining adlawa si Jehova magtugyan kanimo sa akong kamot . . . Ang katawhan sa tibuok yuta mahibalo nga adunay usa ka Diyos sa Israel. Ug kining tibuok kongregasyon mahibalo nga dili pinaagi sa espada ni pinaagi sa bangkaw nga si Jehova magaluwas, tungod kay iya ni Jehova ang gubat.”—1 Samuel 17:45-47.

Unsay sangpotanan? Kini ang giingon sa inspiradong asoy: “Si David, pinaagi sa usa ka lambuyog ug usa ka bato, nahimong mas kusganon kay sa Filistehanon ug nagpukan sa Filistehanon ug nagpatay kaniya; ug walay espada sa kamot ni David.” (1 Samuel 17:50) Wala siyay espada, apan siya adunay kusganong pagpaluyo ni Jehova nga Diyos. a

Ang maong panagsangka nagpamatuod nga husto gayod ang pagtuo ni David! Kon kita kinahanglang mopili tali sa pagkahadlok sa mga tawo ug pagsalig sa nagaluwas nga gahom ni Jehova, tin-aw kaayo kon unsay atong pilion: “Kinahanglang [atong] sugton ang Diyos ingong magmamando inay ang mga tawo.” (Buhat 5:29) Dugang pa, kon atong lantawon ang malisod nga mga situwasyon sumala sa panglantaw ni Jehova nga Diyos, kita makabaton ug timbang nga panglantaw bisan sa dagkong mga problema.

[Footnote]

[Kahon/Hulagway sa panid 9]

UNSA KA DAKO SI GOLIAT?

Ang asoy sa 1 Samuel 17:4-7 nagtug-an kanato nga ang gitas-on ni Goliat maoy duolan sa tulo ka metros. Atong mahibaloan ang kadako ug kakusgan ni Goliat pinaagi sa iyang tumbaga nga kotamaya. Kini mitimbang ug 57 kilos! Ang kuptanan sa iyang bangkaw maoy kahoy, ug ang uhas niini maoy puthaw nga mitimbang ug pito ka kilo. Tiaw mo kana, ang armadura pa lang ni Goliat mas bug-at pa kang David!