Mga Pangutana Gikan sa mga Magbabasa

Unsay nagpahinabo sa “tilinguhaong mga butang sa tanang kanasoran” sa pagsulod sa ‘balay’ sa matuod nga pagsimba?—Haggeo 2:7.

Pinaagi kang manalagnang Haggeo, si Jehova nagtagna: “Uyogon ko ang tanang kanasoran, ug ang tilinguhaong mga butang sa tanang kanasoran manulod; ug pun-on ko kining balaya sa himaya.” (Haggeo 2:7) Ang pag-uyog ba sa “tanang kanasoran” maoy hinungdan nga ang “tilinguhaong mga butang” sa mga nasod—ang matinud-anog-kasingkasing nga mga tawo—modawat sa matuod nga pagsimba? Ang tubag maoy dili.

Tagda kon unsay nag-uyog, o nagtay-og, sa mga nasod ug kon unsay resulta niini. Ang Bibliya nag-ingon nga “nagkaguliyang ang mga nasod ug ang nasodnong mga pundok nagyagubyob ug walay-pulos nga butang.” (Salmo 2:1) Ang “walay-pulos nga mga butang” nga ilang ‘giyagubyob,’ o gipamalandong, mao ang pagpatunhay sa ilang kaugalingong soberanya. Walay laing makatay-og kanila kondili ang hulga sa ilang pagmando.

Ang tibuok-kalibotang pagsangyaw sa mga Saksi ni Jehova bahin sa natukod na nga Gingharian sa Diyos nakahulga gayod sa mga nasod. Sa pagkatinuod, ang Mesiyanikong Gingharian sa Diyos nga gimandoan ni Jesu-Kristo “magadugmok ug magatapos niining tanang [hinimog-tawo nga] gingharian.” (Daniel 2:44) Ang mensahe sa paghukom nga apil sa atong buluhatong pagsangyaw nagtay-og sa mga nasod. (Isaias 61:2) Ug mosamot pa kana samtang nagkakaylap ug nagkakusog ang pagsangyaw nga buluhaton. Ang pag-uyog nga gitagna sa Haggeo 2:7 maoy tilimad-on sa unsa?

Sa Haggeo 2:6, atong mabasa: “Mao kini ang giingon ni Jehova sa mga panon, ‘Sa makausa pa—diyutay na lamang nga panahon—ug uyogon ko ang kalangitan ug ang yuta ug ang dagat ug ang mamala nga yuta.’” Sa pagkutlo niining bersikuloha, si apostol Pablo misulat: “Siya misaad, nga nag-ingon: ‘Apan sa makausa pa tay-ogon ko dili lamang ang yuta kondili ang langit usab.’ Karon ang mga pulong ‘Apan sa makausa pa’ nagpasabot nga pagakuhaon ang mga butang ginatay-og ingong mga butang nga hinimo, aron makapabilin ang mga butang nga wala tay-oga [ang Gingharian].” (Hebreohanon 12:26, 27) Oo, ang bug-os presenteng sistema sa mga butang pagalaglagon ug pulihan sa bag-ong kalibotan nga ipahinabo sa Diyos.

Ang pag-uyog sa mga nasod dili mao ang hinungdan kon nganong nadani ang matinud-anog-kasingkasing nga mga tawo sa matuod nga pagsimba. Ang nakapadani kanila ngadto kang Jehova ug sa iyang pagsimba mao usab ang hinungdan kon nganong nauyog ang mga nasod, nga mao ang tibuok-kalibotang pagsangyaw sa natukod na nga Gingharian sa Diyos. Ang pagmantala sa ‘makapalipay nga balita sa walay kataposang maayong balita’ nakadani sa hustong nakiling nga mga tawo sa pagsimba sa matuod nga Diyos.—Pinadayag 14:6, 7.

Ang mensahe sa Gingharian maoy mensahe sa paghukom ug kaluwasan. (Isaias 61:1, 2) Ang pagsangyaw niini adunay duha ka sangpotanan: ang pagkauyog sa mga nasod ug ang pagsulod sa tilinguhaong mga butang sa mga nasod sa kadayeganan ni Jehova.