Unsay Katuyoan sa Diyos Alang sa Yuta?

NGANONG malingaw ka mang mosuroy sa usa ka parke o sa banika nga daghag bulak nga nangalimyon sa kahumot? Nganong malipay ka man inigkakita nimog maanindot nga lanaw o habog nga kabukiran diin ang tayuktok niini natabonan sa mga panganod? Nganong mohunong ka man aron paminawon ang masaya nga awit sa kalanggaman diha sa kakahoyan? Ug nganong makapahimuot kaayo ang pagtan-aw sa maanindot nga osa nga nagluksolukso o sa usa ka panon sa mga karnero nga nanibsib diha sa kabalilihan?

Adunay usa lamang ka tubag niining mga pangutanaha. Kita gilalang aron mopuyo sa usa ka Paraiso! Kana maoy gipuy-an sa sinugdan sa una natong mga ginikanan, si Adan ug Eva. Atong nakuha gikan kanila ang atong tinguha sa pagpuyo sa Paraiso, ug nakuha usab nila ang maong tinguha gikan sa ilang Maglalalang, si Jehova nga Diyos. Siya nahibalo nga kitang mga tawo malipay diha sa Paraiso tungod kay iya kitang gilalang nga may mga hiyas nga gikinahanglan sa pagtagamtam sa maong kahibulongan nga yutan-ong puy-anan.

Nganong gilalang man ni Jehova ang yuta? Iyang ‘giumol kini aron pagapuy-an’ sa mga tawo. (Isaias 45:18) “Ang Magbubuhat sa yuta” naghatag kang Adan ug Eva ug usa ka matahom nga paraisong puy-anan, ang tanaman sa Eden. (Jeremias 10:12; Genesis 2:7-9, 15, 21, 22) Dayag nga nahimuot gayod sila sa mga suba, mga bulak, ug mga kahoy niini! Makita ang maanindot nga kalanggaman nga naglupadlupad sa kalangitan, ug ang nagkalainlaing mga mananap nga nagsuroysuroy sa yuta—walay usa kanila ang peligroso sa tawo. Naglangoylangoy ang mga isda ug ang uban pang mga linalang diha sa tin-aw ug hinlong katubigan. Labaw sa tanan, nag-uban sila si Adan ug Eva. Mahimo silang manganak ug magpasangkad sa ilang Paraisong puy-anan nga malipayong makig-uban sa ilang nagkadakong pamilya.

Bisan tuod ang yuta dili usa ka paraiso sa pagkakaron, kini ikatandi sa usa ka maayo kaayong balay sa usa ka malipayong pamilya. Ang tanan natong gikinahanglan—kahayag, kainit, tubig, ug pagkaon ania niining atong tibuok-kalibotang puy-anan nga hinatag sa Diyos. Mapasalamaton gayod kita sa kahayag ug kainit sa adlaw ug sa bugnawng kahayag sa bulan sa magabii! (Genesis 1:14-18) Anaa sa ilalom sa yuta ang mga sugnod,  sama sa karbon ug aseite, nga atong magamit alang sa kainit. Tungod sa siklo sa tubig ug sa sistema sa mga suba, lanaw, ug kadagatan sa yuta, kita adunay tubig. Ug ang yuta gibakbakan ug lunhaw nga kabalilihan.

Maingon nga ang pagkaon ikapondo sa balay, adunay daghang suplay sa pagkaon dinhi sa yuta. Pinaagi sa mga abot sa mga umahan ug sa mga bunga sa mga kahoy, si Jehova ‘naghatag kanato ug mabungahong mga panahon ug nagbuhong sa atong mga kasingkasing sa kalipay.’ (Buhat 14:16, 17) Kay ang yuta maayo na kaayong puy-anan, hunahunaa lang kon unsa na unyay kahimtang niining yutaa sa dihang ang “malipayong Diyos,” si Jehova, maghimo niining usa ka paraiso!—1 Timoteo 1:11.

 [Picture Credit Lines sa panid 2]

COVER: Earth: NASA photo; Stars: NASA, ESA and AURA/Caltech