Gimahal sa Diyos ang mga Tigulang

ANG kaylap nga pagmaltratar karon sa mga tigulang dili ikatingala. Dugay na kanhi, ang Bibliya nagtagna nga sa “kataposang mga adlaw” niining dili diyosnon nga kalibotan, ang mga tawo ‘mahigugmaon sa ilang kaugalingon, walay kinaiyanhong pagbati.’ (2 Timoteo 3:1-3) Ang Gregong pulong nga gihubad ug “kinaiyanhong pagbati” mahimong maglakip sa gugma nga kinaiyanhong naglungtad sulod sa pamilya. Ingong katumanan sa tagna sa Bibliya, kanang matanga sa pagbati dayag nga nihit karon.

Lahi kaayo sa mga tawong nagmaltratar sa mga tigulang, si Jehova nga Diyos nagpabili pag-ayo ug nagmahal niadtong taas nag pangedaron. Tagda kon sa unsang paagi gipakita kini sa Bibliya.

“Maghuhukom sa mga Babayeng Balo”

Ang kahingawa ni Jehova nga Diyos sa mga tigulang gipamatud-an diha sa Hebreohanong Kasulatan. Pananglitan, sa Salmo 68:5, si David nagtawag sa Diyos ingong “usa ka maghuhukom sa mga babayeng balo,” nga kasagaran maoy mga tigulang. a Sa ubang mga hubad sa Bibliya, ang pulong “maghuhukom” gihubad nga “tigdepensa,” “tigpanalipod,” ug “tiglaban.” Dayag nga gimahal ni Jehova ang mga balo. Gani, ang Bibliya nag-ingon nga kon sila maltratahon, ang iyang kasuko mosilaob. (Exodo 22:22-24) Ang mga balo—ug ang tanang matinumanong mga tigulang—gipabilhan pag-ayo sa Diyos ug sa iyang mga alagad. Gipahayag sa Proverbio 16:31 ang panglantaw ni Jehova nga Diyos ug sa iyang katawhan sa dihang kini nag-ingon: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.”

Dili ikatingala nga ang pagtahod alang sa mga tigulang maoy hinungdanong bahin sa  Balaod nga gihatag ni Jehova ngadto sa Israel. Ang mga Israelinhon gisugo: “Atubangan sa buhok nga ubanon motindog ka, ug magpakita ka ug pagtamod sa tawong tigulang, ug kahadlokan mo ang imong Diyos. Ako mao si Jehova.” (Levitico 19:32) Busa, ang tinamdan sa Israel alang sa mga tigulang dako gayod ug kalambigitan sa ilang relasyon kang Jehova nga Diyos. Ang usa ka tawo dili makapangangkon nga gihigugma niya ang Diyos kon iyang gimaltratar ang mga tigulang.

Ang mga Kristohanon dili na ilalom sa Moisesnong Balaod. Apan, sila nailalom sa “balaod ni Kristo,” nga makaimpluwensiya ug dako sa ilang panggawi ug tinamdan, lakip na ang pagpakitag gugma ug pagtagad alang sa mga ginikanan ug sa mga tigulang. (Galacia 6:2; Efeso 6:1-3; 1 Timoteo 5:1-3) Ug ang mga Kristohanon magpakita ug gugma dili lamang tungod kay sila gisugo sa pagtuman niini apan tungod kay sila gipalihok sa ilang kasingkasing. “Mainiton nga maghigugmaay sa usag usa gikan sa kasingkasing,” awhag pa ni apostol Pedro.—1 Pedro 1:22.

Ang tinun-ang si Santiago naghatag ug dugang rason kon nganong angay natong mahalon ang mga tigulang. Siya nagsulat: “Ang dagway sa pagsimba nga hinlo ug wala mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan, ug ang pag-amping sa kaugalingon nga dili mahugawan sa kalibotan.” (Santiago 1:27) Si Santiago nagpasiugdag makapukaw-sa-hunahuna nga punto. Kini nagpahibalo kanato kon unsa ka bililhon kining minahal nga mga indibiduwal alang kang Jehova.

Busa, dili lamang igo ang paglikay nga pasakitan ang mga tigulang. Hinunoa, kita angay nga sinserong magtagad kanila pinaagi sa paghimog maayong mga buhat. (Tan-awa ang kahong “Gugma nga Gipakita sa Buhat,” sa mga panid 6-7.) Si Santiago nagsulat: “Patay ang pagtuo nga walay binuhatan.”—Santiago 2:26.

Paghatag ug Kahupayan Panahon “sa Ilang Kasakitan”

Adunay laing punto nga atong makat-onan sa mga pulong ni Santiago. Matikdi nga gisultihan ni Santiago ang mga Kristohanon nga atimanon ang mga balo “sa ilang kasakitan.” Ang Gregong pulong nga gihubad ug “kasakitan” sa panguna nagkahulogan ug kasub-anan, balatian, ug pag-antos ingong resulta sa mga kapit-os sa atong kahimtang sa kinabuhi. Walay duhaduha nga daghan sa mga tigulang ang nakasinati sa maong kagul-anan. Ubay-ubay kanila ang nagmamingawon. Ang uban naguol tungod sa mga limitasyon nga dala sa pagkatigulang. Bisan kadtong aktibo pa sa ilang pag-alagad sa Diyos tingali mawad-an sa kadasig. Tagda si John, b usa ka matinumanong magwawali sa Gingharian sa Diyos kapin na sa 40 ka tuig, nga ang ulahing 30 ka tuig niana iyang gigugol sa linain nga bug-os-panahong pag-alagad. Karon sa iyang edad nga 80 kapin, si John miadmitir nga usahay mawad-an siyag kadasig. Siya nag-ingon: “Ako sagad mamalandong ug mahinumdom sa daghan kaayong sayop nga akong nahimo. Kanunay nakong gihunahuna nga dili pa igo ang akong nahimo.”

Ang maong mga indibiduwal mahimong mahupayan sa pagkahibalo nga si Jehova, bisan tuod hingpit, wala mangita ug kahingpitan kanato. Bisan pag siya nasayod nga kita masalaypon, ang Bibliya nag-ingon bahin kaniya: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” (Salmo 130:3) Oo, si Jehova dili magsentro sa iyang pagtagad sa atong mga sayop kondili magatan-aw kon unsay anaa sa atong kasingkasing. Sa unsang paagi kita nahibalo niini?

Si Haring David—nga nakasala tungod sa  pagkadili-hingpit—gidasig sa Diyos sa pagsulat sa mosunod nga mga pulong, nga narekord sa Salmo 139:1-3: “Oh Jehova, ikaw nakasusi kanako, ug ikaw nakaila kanako. Ikaw nahibalo sa akong paglingkod ug sa akong pagtindog. Gitagad mo ang akong hunahuna gikan sa halayo. Ang akong pagpanaw ug ang akong paghigda imong nasusi, ug ikaw nasinati sa tanan kong mga dalan.” Dinhi, ang pulong “nasusi” sa literal nagkahulogan ug “pag-alig-ig,” sama sa paagi nga ang mag-uuma magpalid ug tahop aron mabilin ang mga lugas. Ilalom sa pagdasig sa Diyos, si David nagpasalig kanato nga palabyon ni Jehova ang atong mga sayop ug hinumdoman Niya ang atong maayong mga buhat.

Ang atong maluluy-on nga langitnong Amahan mahinumdom—ug magpabili—sa atong maayong mga buhat basta kita magpabiling matinumanon kaniya. Sa pagkatinuod, ang Bibliya nag-ingon nga iyang lantawon nga usa ka buhat sa pagkadili-matarong kon kalimtan niya ang atong buhat ug ang gugma nga atong gipakita alang sa iyang ngalan.—Hebreohanon 6:10.

“Ang Unang mga Butang Nangagi Na”

Gipakita sa Bibliya nga ang mga problema nga dala sa pagkatigulang dili maoy katuyoan sa Diyos alang sa katawhan. Ang makapaluya nga mga epekto niini nabatyagan lamang sa mga tawo human nga ang atong orihinal nga mga ginikanan,  ang unang lalaki ug babaye, mirebelde batok sa ilang Maglalalang. (Genesis 3:17-19; Roma 5:12) Apan, kini dili magpadayon hangtod sa hangtod.

Sumala sa gihisgotan na, daghan sa daotang mga kahimtang nga atong naagoman karon—lakip na ang pagmaltratar sa mga tigulang—nagpamatuod nga kita nagkinabuhi na sa “kataposang mga adlaw” niining sistema sa mga butang. (2 Timoteo 3:1) Katuyoan sa Diyos nga wagtangon ang mga epekto sa sala, lakip na ang makadaot nga mga epekto sa pagtigulang ug kamatayon. Ang Bibliya nag-ingon: “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:4.

Sa bag-ong kalibotan sa Diyos, mawala na unya ang mga pagpanakit sa kalawasan nga dala sa pagkatigulang. Ingon man usab ang pagmaltratar sa mga tigulang. (Miqueas 4:4) Bisan kadtong nangamatay nga anaa sa panumdoman sa Diyos pagabanhawon, aron sila usab makabaton ug kahigayonan nga mabuhing walay kataposan sa usa ka paraisong yuta. (Juan 5:28, 29) Nianang panahona, madayag gayod sa tanan nga gimahal ni Jehova nga Diyos dili lamang ang mga tigulang kondili ang tanan nga nagmatinumanon kaniya.

[Mga footnote]

[Kahon/Mga hulagway sa panid 6, 7]

Gugma nga Gipakita sa Buhat

Taliwala sa mga Saksi ni Jehova, ang mga ansiyano sa kongregasyon nanguna sa pag-atiman sa mga tigulang. Seryoso nilang gituman ang tambag ni apostol Pedro: “Bantayi ninyo ang panon sa Diyos nga ubos sa inyong pag-atiman.” (1 Pedro 5:2) Ang praktikal nga mga paagi sa pag-atiman sa mga tigulang maoy bahin sa pag-atiman sa panon sa Diyos. Apan, unsa may nalangkit niini?

Nagkinahanglan gayod ug pailob ug malagmit balik-balik nga mga pagduaw ug mahigalaong pagpakig-estorya aron mahibaloan ang tinuod nga mga panginahanglan sa usa ka tigulang. Tingali nagkinahanglan silag tabang sa pagpamalit ug pagpanghinlo, transportasyon aron makatambong sa Kristohanong mga tigom, pagbasa sa Bibliya ug Kristohanong mga basahon, ug uban pang mga butang. Kon posible, ang praktikal ug kasaligang mga kahikayan angayng himoon ug ipatuman. c

Apan, unsa na man kon ang usa ka tigulang nga igsoon diha sa kongregasyon anaa sa malisod nga kahimtang, tingali nanginahanglan ug pinansiyal nga tabang? Maayo nga susihon una kon aduna bay mga anak o ubang paryente nga makatabang. Kini nahiuyon sa giingon sa 1 Timoteo 5:4: “Kon ang babayeng balo adunay mga anak o mga apo, patun-a una kini sila sa pagpakita sa diyosnong pagkamahinalaron diha sa ilang kaugalingong panimalay ug magpadayon sa paghatag sa angayng balos ngadto sa ilang mga ginikanan ug mga apohan, kay kini maoy dalawaton sa panan-aw sa Diyos.”

Ang mga tigulang nanginahanglan tingali ug tabang sa pagkahibalo kon kuwalipikado ba sila nga makadawat ug mga tabang nga gitagana sa gobyerno. Tingali ang pipila diha sa kongregasyon makahimo sa pagtabang. Kon walay mabatonan nga tabang, angayng tinoon sa mga ansiyano kon ang maong indibiduwal takos ba nga tabangan sa kongregasyon. Sa pipila ka kahimtang, kini gitugotan sa unang-siglo nga kongregasyon, kay si apostol Pablo nagsulat sa iyang isigka-magbubuhat nga si Timoteo: “Ipalista ang babayeng balo nga dili moubos sa kan-uman ka tuig ang pangedaron, asawa sa usa ka bana, nga gipamatud-an tungod sa iyang maayong mga buhat, kon siya nagmatuto ug mga anak, kon siya nag-abiabi ug mga estranyo, kon siya naghugas sa mga tiil sa mga balaan, kon siya nagtabang niadtong anaa sa kasakitan, kon siya makugihong nagsunod sa tanang maayong buhat.”—1 Timoteo 5:9, 10.

[Footnote]

[Hulagway sa panid 5]

Gimahal ni Dorcas ang kabos nga mga babayeng balo.—Buhat 9:36-39