Mga Pangutana Gikan sa mga Magbabasa

Sa Moisesnong Balaod, nganong ang pipila ka kinaiyanhong seksuwal nga mga buhat giisip nga ‘makapahugaw’ sa usa ka tawo?

Gimugna sa Diyos ang sekso aron mosanay ang tawhanong rasa ug aron mahimong tuboran sa kalipay sa mga magtiayon. (Genesis 1:28; Proverbio 5:15-18) Apan, sa mga kapitulo 12 ug 15 sa Levitico atong mabasa ang detalyadong mga balaod mahitungod sa kahugawan gumikan sa paggawas sa binhi sa lalaki, pagregla, ug pagpanganak. (Levitico 12:1-6; 15:16-24) Ang maong mga balaod nga gihatag ngadto sa karaang Israel nagpatungha ug himsog nga estilo sa kinabuhi, nagbayaw sa hataas nga moral nga mga prinsipyo, ug nagpasiugda sa pagkabalaan sa dugo ug sa panginahanglan sa pagtabon sa mga sala.

Ang mga kinahanglanon sa Moisesnong Balaod maylabot sa seksuwal nga mga buhat nagpaarang-arang, lakip sa ubang mga butang, sa katibuk-ang panglawas sa Israelinhong komunidad. Ang librong The Bible and Modern Medicine nag-ingon: “Ang lagda bahin sa pagdili sa seksuwal nga relasyon panahon sa pagregla napamatud-an ingong epektibong proteksiyon batok sa pipila ka sakit nga mapasa sa pagpakigsekso . . . ug manalipod usab batok sa kanser sa cervix.” Ang maong mga balaod nanalipod sa katawhan sa Diyos batok sa mga sakit nga lagmit wala nila mahibaloi o posibleng wala gayod nila mamatikdi. Ang seksuwal nga kahinlo nagpauswag sa pagkamasanayon sa nasod nga gisaaran sa Diyos nga padaghanon ug mahimong adunahan. (Genesis 15:5; 22:17) Nanalipod usab kana sa emosyonal nga kahimsog sa katawhan sa Diyos. Pinaagi sa pagtuman niining maong mga balaod, ang mga bana ug mga asawa nakakat-on sa pagkontrolar sa ilang seksuwal nga gana.

Apan, ang pangunang isyu nga nalangkit sa mga matang sa kahugawan nga moresulta gumikan sa seksuwal nga mga buhat mao ang pag-agay sa dugo. Ang mga balaod ni Jehova mahitungod sa dugo nagpatisok diha sa hunahuna sa mga Israelinhon dili lamang sa pagkabalaan sa dugo kondili usab sa linaing papel sa dugo diha sa pagsimba kang Jehova, sa espesipiko, diha sa mga halad ug sa pagtabon sa mga sala.—Levitico 17:11; Deuteronomio 12:23, 24, 27.

Busa, ang detalyadong mga kinahanglanon sa Balaod niining bahina dakog kalabotan sa pagkadili-hingpit sa tawo. Ang mga Israelinhon nahibalo nga si Adan ug Eva—human sila makasala—dili na makapatungha ug hingpit nga mga anak. Ang tanan nilang mga kaliwat mag-antos gumikan sa mga epekto sa napanunod nga sala—pagkadili-hingpit ug kamatayon. (Roma 5:12) Tungod niini, ang mga ginikanan makapasa lamang ug dili-hingpit ug makasasala nga kinabuhi, bisan tuod nga sa sinugdan ang tawhanong mga organo sa pagsanay gidisenyo aron mopasa ug hingpit nga kinabuhi pinaagi sa kahikayan sa kaminyoon.

Busa ang mga kinahanglanon sa paglunsay ilalom sa Balaod magpahinumdom sa mga Israelinhon dili lamang sa ilang napanunod nga pagkamakasasala kondili usab sa panginahanglan sa usa ka halad lukat nga motabon sa mga sala ug magpasig-uli sa tawhanong kahingpitan. Siyempre, ang mga mananap nga ilang gihalad wala magpasig-uli sa tawhanong kahingpitan. (Hebreohanon 10:3, 4) Ang katuyoan sa Moisesnong Balaod mao ang pag-agak kanila ngadto kang Kristo ug sa pagtabang kanila sa pagsabot nga pinaagi lamang sa hingpit nga tawhanong halad ni Jesus nga mahimong posible ang tinuod nga kapasayloan, nga magbukas sa dalan ngadto sa kinabuhing walay kataposan alang sa mga matinumanon.—Galacia 3:24; Hebreohanon 9:13, 14.