Sugilanon sa Kinabuhi

Nag-alagad nga Malipayon Bisan pa sa mga Kaluyahon

SUMALA SA GIASOY NI VARNAVAS SPETSIOTIS

Niadtong 1990, sa edad nga 68, ako bug-os nga naparalisado. Apan, mga 15 ka tuig na sukad niadto, ako malipayong nag-alagad ingong bug-os-panahong ministro sa isla sa Cipro. Unsay nakahatag kanakog kusog sa pagpabiling aktibo sa pag-alagad kang Jehova bisan pa sa akong mga kaluyahon?

AKO natawo sa pamilya nga adunay siyam ka anak—upat ka lalaki ug lima ka babaye—sa Oktubre 11, 1922. Kami nagpuyo sa balangay sa Xylophagou, sa Cipro. Bisan tuod ang akong mga ginikanan maayog pagkabutang, ang pagbuhi ug ingon niana ka dako nga pamilya naglangkit ug dakong kakugi sa pagtrabaho sa uma.

Ang akong amahan nga si Antonis, sa kinaiyanhon hinuun ug tigpangutana. Wala madugay human ako matawo, samtang miduaw si Papa sa usa ka maestro sa balangay, nakakita siya ug tract nga nag-ulohang Peoples Pulpit, nga gipatik sa mga Estudyante sa Bibliya (nga maoy pagtawag kaniadto sa mga Saksi ni Jehova). Gibasa niya kini, ug giganahan siya sa mensahe niini. Ingong resulta, si Papa ug ang usa sa iyang mga higala, si Andreas Christou, nalakip sa unang mga molupyo sa among isla nga nakig-uban sa mga Saksi ni Jehova.

Pag-uswag Bisan pa sa Pagsupak

Sa ngadtongadto, silang duha nakakuha ug dugang binase-sa-Bibliya nga mga publikasyon gikan sa mga Saksi ni Jehova. Sa wala madugay, si Papa ug si Andreas natukmod sa pagpaambit ngadto sa mga tawo sa among balangay sa mga kamatuoran sa Bibliya nga ilang nakat-onan. Ang ilang pagsangyaw gisupak pag-ayo sa mga klero  sa Gregong Ortodokso ug sa uban nga nagtuo nga ang mga Saksi ni Jehova maoy makadaot nga impluwensiya.

Apan daghan sa mga taga-balangay ang nagtahod niining duha ka magtutudlo sa Bibliya. Ang akong amahan ilado kaayo sa iyang pagkamaluloton ug pagkamanggihatagon. Subsob kaayo niyang tabangan ang kabos nga mga pamilya. Usahay mohinok siya paggawas sa among balay sa lawom nang kagabhion ug magbilin ug trigo o tinapay diha sa pultahan sa kabos nga mga pamilya. Tungod sa dili-mahakogong Kristohanong panggawi, ang mensahe nga gisangyaw niining duha ka ministro nahimong labi pang makapadani.—Mateo 5:16.

Maoy hinungdan nga mga 12 ka tawo ang misanong sa mensahe sa Bibliya. Sa dihang mas nasabtan nila ang kamatuoran, ilang gibati ang panginahanglan nga magtigom diha sa lainlaing kabalayan aron magtuon sa Bibliya ingong grupo. Sa mga 1934, si Nikos Matheakis, usa ka bug-os-panahong ministro nga taga-Gresya, miabot sa Cipro ug nakigkita sa grupo sa Xylophagou. Uban ang pailob ug determinasyon, si Brader Matheakis mitabang sa pag-organisar sa grupo ug miabag kanila nga makabaton ug mas lawom nga pagsabot sa Kasulatan. Kining grupoha sa ulahi nahimong unang kongregasyon sa mga Saksi ni Jehova sa Cipro.

Samtang nagpadayon ang Kristohanong buluhaton ug nagkadaghang tawo ang midawat sa kamatuoran sa Bibliya, gibati sa mga igsoon nga gikinahanglan nila ang permanenteng dapit nga katigoman. Ang among kinamagulangang igsoon nga si George, ug ang iyang asawa nga si Eleni, nagtanyag nga ipagamit nila ang ilang kamalig. Kining maong propiedad, nga kanait sa ilang balay, giayo ug gihimong haom nga dapit alang sa mga tigom. Busa ang mga igsoon nakabaton sa ilang unang Kingdom Hall sa isla. Pagkamapasalamaton nila! Ug nakatabang gayod kini sa dugang pag-uswag!

Paghimo sa Kamatuoran nga Akoa

Sa 1938, sa edad nga 16, ako nakahukom nga magpanday. Busa, gipadala ko ni Papa sa kaulohan sa Cipro, sa Nicosia. Kay naglantaw sa akong kaayohan, iyang gihikay nga ako moestar uban kang Nikos Matheakis. Kining matinumanong igsoon mahinumdoman gihapon sa daghang tawo diha sa isla tungod sa iyang kasibot ug  pagkamaabiabihon. Ang iyang dayag nga pagkamadasigon ug kaisog maoy mga hiyas nga gikinahanglan ni bisan kinsang Kristohanon sa Cipro niadtong mga panahona.

Si Brader Matheakis dakog gikatabang kanako sa pagbaton ug lig-ong pundasyon sa kahibalo sa Bibliya ug sa pag-uswag sa espirituwal. Samtang nag-estar ko sa ila, ako mitambong sa tanang tigom nga gipahigayon sa iyang balay. Sa unang higayon, akong gibati nga nagkadako ang akong gugma kang Jehova. Naugmad nako ang determinasyon nga makabaton ug seryosong relasyon uban sa Diyos. Paglabay sa pipila ka bulan, akong gipangutana si Brader Matheakis kon mahimo ba akong mokuyog kaniya sa pagsangyaw. Kadto maoy sa 1939.

Paglabay sa pipila ka panahon, ako mipauli aron moduaw sa among pamilya. Ang taudtaod nga pagpakig-uban nako sa akong amahan nagpalalom pa gayod sa akong pagtuo nga ako nang nakaplagan ang kamatuoran ug ang kahulogan sa kinabuhi. Sa Septiyembre 1939, nagsugod ang Gubat sa Kalibotan II. Daghang batan-ong lalaki nga sama nakog pangedaron ang miboluntaryo sa pagsundalo, apan ingong pagsunod sa sugo sa Bibliya, ako nakahukom nga magpabiling neyutral. (Isaias 2:4; Juan 15:19) Nianang tuiga mismo, akong gipahinungod ang akong kaugalingon kang Jehova ug nabawtismohan sa 1940. Sa unang higayon, akong gibati nga ako wala na mahadlok sa tawo!

Sa 1948, ako naminyo kang Efprepia. Ngadtongadto, nakabaton kamig upat ka anak. Sa wala madugay among naamgohan nga kinahanglang maningkamot kami aron mamatuto sila “sa disiplina ug sa pagdumala-sa-kaisipan ni Jehova.” (Efeso 6:4) Ang among mga pag-ampo ug paningkamot nasentro sa pagpatisok diha sa among mga anak sa halalom nga gugma alang kang Jehova ug pagtahod sa iyang mga balaod ug mga prinsipyo.

Ang mga Suliran sa Panglawas Nahimong Hagit

Sa 1964, sa edad nga 42 anyos, gibati nako ang pagpaminhod sa akong tuong kamot ug tiil. Inanay kining mikanap sa pikas bahin sa akong lawas. Ako nadayagnos nga adunay muscle atrophy (inanay o kalit nga pagkaluya sa kaunoran), usa ka sakit nga walay pagkaayo nga sa ngadtongadto makaparalisar sa tibuok lawas. Naguol kaayo ko sa maong balita. Wala gayod nako damha nga mahitabo kini! Kay nasuko pag-ayo, ako naghunahuna: ‘Nganong nahitabo man kini kanako? Unsa may akong nahimo nga gisilotan man kog ingon niini?’ Apan, sa ngadtongadto akong nabuntog ang kaguol nga akong gibati pagkahibalo nako sa dayagnosis. Dayon gibati nako ang hilabihang  kabalaka ug kawalay-kasegurohan. Daghang pangutana ang misantop sa akong hunahuna. Maparalisado ba gayod ang tibuok nakong lawas ug magsalig na lang sa uban? Unsaon nako kini pagsagubang? Makatagana pa ba ako sa panginahanglan sa akong pamilya—sa akong asawa ug sa among upat ka anak? Gisakitan gyod ko nga naghunahuna niana.

Niining malisod nga yugto sa akong kinabuhi, labaw pa kay sukad masukad, gibati nako ang panginahanglan nga moampo kang Jehova ug isulti kaniya nga kinasingkasing ang tanan nakong mga problema ug mga kabalaka. Ako kanunayng mag-ampo nga maghilak. Sa wala madugay ako nahupayan. Ang makapahupayng mga pulong sa Filipos 4:6, 7 napamatud-ang tinuod sa akong bahin: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”

Pagsagubang sa Paralisis

Ang akong sakit nagkagrabe. Akong naamgohan nga kinahanglang mopasibo dayon ko sa akong bag-ong mga kahimtang. Tungod kay dili na man ko makapamanday, ako nakahukom nga mangitag trabaho nga dili kaayo hago ug mohaom sa kahimtang sa akong panglawas ug sa samang higayon makasuportar gihapon ako sa akong pamilya. Sa sinugdan, migamit ako ug usa ka gamay nga van aron mamaligyag sorbetes. Gihimo nako kini sulod sa mga unom ka tuig hangtod nga kinahanglan na akong mag-wheelchair tungod sa akong sakit. Dayon nagbalhinbalhin ko ug lainlaing gaan nga mga trabaho nga madala ra sa akong lawas.

Sukad sa 1990 ang akong sakit migrabe hangtod nga dili na gyod ko makatrabaho. Karon, bug-os na kong magsalig sa uban, bisan sa ordinaryong mga gimbuhaton sa himsog nga tawo. Nagkinahanglan kog tabang sa paghigda, pagkaligo, ug sa pag-ilis ug sinina. Aron makatambong sa Kristohanong mga tigom, kinahanglang itulod ang akong wheelchair paingon sa sakyanan ug dayon alsahon ko gikan sa wheelchair aron ipahiluna sa sakyanan. Sa Kingdom Hall, kinahanglang alsahon na sab ko gikan sa sakyanan ug ipahiluna sa wheelchair ug dayon itulod ang akong wheelchair paingon sa sulod. Samtang magtigom, duna koy electric heater sa tupad aron dili tugnawon ang akong tiil.

Apan, bisan pa sa paralisis, regular gihapon akong magtambongan sa mga tigom. Akong nasabtan nga dinhing dapita kita ginatudloan ni Jehova, ug ang pagpakig-uban sa akong mga igsoon sa pagtuo maoy tinuod nga panalipod ug tuboran sa tabang ug pagdasig. (Hebreohanon 10:24, 25) Ang regular nga pagduaw kanako sa hamtong sa espirituwal nga mga isigkamagtutuo nakatabang gayod kanako. Mibati gayod ako sama sa gibati ni David: “Ang akong kopa puno kaayo.”—Salmo 23:5.

Ang akong minahal nga asawa maoy maayo kaayong katimbang nako latas sa katuigan. Ang akong mga anak usab dakog gikatabang kanako. Sulod sa ubay-ubay nang katuigan, sila nakatabang kanako sa akong adlaw-adlaw nga mga panginahanglan. Dili sayon ang ilang ginabuhat, ug samtang nanglabay ang katuigan, nag-anam ka lisod ang pag-atiman kanako. Maayo gayod silang sulondan sa pagkamapailobon ug sa pagsakripisyo sa kaugalingon, ug ako nag-ampo nga si Jehova magpadayon sa pagpanalangin kanila.

Ang laing maayo kaayong tagana gikan kang Jehova aron mapalig-on ang iyang mga alagad mao ang pag-ampo. (Salmo 65:2) Agig tubag sa akong kinasingkasing nga mga pangamuyo, si Jehova naghatag kanako sa kusog nga makapabilin diha sa pagtuo latas sa katuigan. Ilabina sa dihang ako mahigawad, ang pag-ampo naghatag ug kahupayan ug nagtabang kanako nga magmalipayon. Ang kanunayng pagpakigsulti kang Jehova nagpalagsik kanako ug nagpalig-on sa akong determinasyon nga mopadayon. Kombinsido gayod ako nga si Jehova nagpatalinghog sa mga pag-ampo sa iyang mga alagad ug naghatag kanila sa kalinaw sa hunahuna nga ilang gikinahanglan.—Salmo 51:17; 1 Pedro 5:7.

Labaw sa tanan, ako napalagsik matag higayon nga akong mahinumdoman nga sa ngadtongadto ayohon sa Diyos ang tanan nga makadawat ug ganti nga kinabuhi sa Paraiso ilalom sa  pagmando sa Gingharian pinaagi sa iyang Anak, si Jesu-Kristo. Ang mga luha sa kalipay makadaghan nang nanaligdig sa akong mga aping sa dihang akong palandongon kanang maanindot nga paglaom.—Salmo 37:11, 29; Lucas 23:43; Pinadayag 21:3, 4.

Pag-alagad Ingong Bug-os-Panahong Ministro

Sa 1991, human nako matimbangtimbang ang akong kahimtang, akong naamgohan nga ang kinamaayohang paagi nga malikayan ang pagkaluoy sa kaugalingon mao ang pagkahimong puliki sa pagpaambit sa bililhong maayong balita sa Gingharian ngadto sa uban. Nianang tuiga, ako nagsugod sa pag-alagad ingong bug-os-panahong ministro.

Tungod kay baldado man ko, ang dakong bahin sa akong pagsangyaw gihimo pinaagi sa sulat. Apan, alang kanako, ang pagsulat dili sayon; kini nagkinahanglag dakong paningkamot. Maglisod ko pagkupot sa bolpen tungod kay wala nay umoy ang akong kamot. Apan, pinaagi sa paglahutay ug pag-ampo, ako nagsangyaw pinaagi sa sulat sulod na sa kapin sa 15 ka tuig. Mosangyaw usab ako gamit ang telepono. Wala gayod nako palabya ang kahigayonan nga mosulti bahin sa akong paglaom sa bag-ong kalibotan ug sa Paraisong yuta ngadto sa akong mga paryente, higala, ug mga silingan nga moduaw kanako sa akong balay.

Tungod niini, daghan kog makapadasig nga mga eksperyensiya. Nalipay kaayo ko nga makita ang usa sa akong mga apo, kinsa akong gitun-an sa Bibliya mga 12 ka tuig kanhi, nga miuswag sa espirituwal ug nagpakitag apresasyon sa kamatuoran sa Bibliya. Kay napalihok sa iyang nabansay-sa-Bibliya nga tanlag, siya nagpabiling maunongon ug lig-ong mibarog dapig sa isyu sa Kristohanong neyutralidad.

Ako ilabinang malipay sa dihang ang mga tawo nga akong gisulatan mokontak kanako ug mangayog dugang impormasyon bahin sa Bibliya. Usahay, ang uban mohangyo ug dugang literatura sa Bibliya. Pananglitan, usa ka ginang ang mitelepono ug nagpasalamat kanako sa makapadasig nga sulat nga akong gipadala sa iyang bana. Naikag siya sa mensahe sa maong sulat. Kini misangpot sa daghang panaghisgot sa Bibliya uban kaniya ug sa iyang bana dinhi sa akong balay.

Usa ka Masanag nga Panglantaw

Latas sa katuigan, akong nakita nga miuswag ang gidaghanon sa mga magmamantala sa Gingharian niining bahina sa kalibotan. Ang gamayng Kingdom Hall tupad sa balay sa akong igsoon nga si George gipadak-an ug gibag-o sa makadaghan. Kini usa ka maanindot nga dapit sa pagsimba, nga gigamit sa duha ka kongregasyon sa mga Saksi ni Jehova.

Si Papa namatay sa 1943, sa edad nga 52 anyos. Apan pagkanindot sa espirituwal nga panulondon nga iyang gibilin kanamo! Walo sa iyang mga anak ang midawat sa kamatuoran ug nag-alagad gihapon kang Jehova. Sa balangay sa Xylophagou, diin natawo si Papa, ug sa sikbit nga mga balangay, aduna nay tulo ka kongregasyon, nga may total nga 230 ka magmamantala sa Gingharian!

Kanang maayo kaayong mga resulta nakahatag kanako ug dakong kalipay. Karon, sa edad nga 83, ako masaligon sa gipamulong sa salmista: “Ang may-lambungay nga mga nating leyon nakulangan ug gigutom; apan silang nagapangita kang Jehova, dili sila makulangan ug bisan unsang butang nga maayo.” (Salmo 34:10) Ako mahinamong nagpaabot sa panahon nga ang tagna nga nasulat sa Isaias 35:6 matuman na: “Nianang panahona ang bakol mosaka ingon sa laking osa.” Samtang wala pa kana, ako determinado nga magpadayon sa pag-alagad kang Jehova nga malipayon bisan pa sa akong mga kaluyahon.

[Mapa sa panid 17]

(Alang sa aktuwal nga pagkahan-ay, tan-awa ang publikasyon)

TURKEY

SIRYA

LEBANON

CIPRO

Nicosia

Xylophagou

Dagat Mediteranyo

[Hulagway sa panid 17]

Ang unang Kingdom Hall sa Xylophagou, gigamit gihapon karon

[Mga hulagway sa panid 18]

Uban kang Efprepia sa 1946 ug karon

[Hulagway sa panid 20]

Ako malipay nga magsangyaw pinaagi sa telepono ug sa sulat