‘Pilia ang Kinabuhi Aron Magpadayong Buhi’

“Gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi aron ikaw magpadayong buhi.”—DEUTERONOMIO 30:19.

1, 2. Sa unsang mga paagi nga ang tawo gilalang sa larawan sa Diyos?

 “BUHATON nato ang tawo sumala sa atong larawan, sumala sa atong dagway.” Kana nga pahayag sa Diyos nasulat diha sa unang kapitulo sa Bibliya. Busa, “gilalang sa Diyos ang tawo sumala sa iyang larawan, sa larawan sa Diyos iyang gilalang siya,” nag-ingon ang Genesis 1:26, 27. Tungod niana, ang unang tawo lahi gayod sa ubang mga linalang sa yuta. Siya kaamgid sa iyang Maglalalang, nga makasundog sa paagi sa Diyos sa pagpangatarongan, sa pagpasundayag ug gugma, hustisya, kaalam, ug gahom. Siya adunay katakos sa tanlag nga motabang kaniya sa pagkab-ot sa mga desisyon nga makahatag kaniyag kaayohan ug makapahimuot sa iyang langitnong Amahan. (Roma 2:15) Sa laktod, si Adan may kagawasan sa pagpili. Sa pagtan-aw niya sa pagkagama sa iyang yutan-ong anak, gihubit ni Jehova ang iyang binuhat: “Tan-awa! Kadto maayo kaayo.”—Genesis 1:31; Salmo 95:6.

² Ingong mga kaliwat ni Adan, kita usab gihimo sa larawan ug dagway sa Diyos. Apan, makapili ba gayod kita kon unsay atong buhaton? Bisan tuod si Jehova adunay katakos sa pagkahibalong daan kon unsay mahitabo, wala niya tinoang daan ang atong tagsa-tagsa ka lihok ug dulnganan. Wala gayod niya tugoti nga ang iyang yutan-ong mga anak magamhan sa predestinasyon. Aron matabangan kita sa pagsabot sa kahinungdanon sa paggamit sa atong kagawasan sa paghimog hustong mga pagpili, una sa tanan  mokat-on kita gikan sa nahitabo sa nasod sa Israel.—Roma 15:4.

Ang Israel May Kagawasan sa Pagpili

3. Unsa ang una sa Napulo ka Sugo, ug sa unsang paagi ang matinumanong mga Israelinhon mipili sa pagtuman niana?

³ “Ako mao si Jehova nga imong Diyos, nga nagpagawas kanimo gikan sa yuta sa Ehipto, gikan sa balay sa mga ulipon,” miingon si Jehova ngadto sa mga Israelinhon. (Deuteronomio 5:6) Sa 1513 W.K.P., ang nasod sa Israel nakasinati ug milagrosong kaluwasan gikan sa pagkaulipon sa Ehipto ug busa walay katarongan nga magduhaduha nianang mga pulonga. Sa una sa Napulo ka Sugo, si Jehova miingon pinaagi sa iyang tigpamaba nga si Moises: “Dili ka magbaton ug laing mga diyos batok sa akong nawong.” (Exodo 20:1, 3) Nianang panahona, ang nasod sa Israel mipili sa pagtuman. Sila kinabubut-ong naghatag kang Jehova sa ilang bug-os nga pagkamahinalaron.—Exodo 20:5; Numeros 25:11.

4. (a) Unsang pagpili ang gipahinumdom ni Moises sa Israel? (b) Unsay atong kapilian karon?

⁴ Mga 40 ka tuig sa ulahi, si Moises puwersadong nagpahinumdom sa laing kaliwatan sa mga Israelinhon sa pagpili nga kinahanglan nilang himoon. “Himoon ko ang mga langit ug ang yuta ingong mga saksi batok kaninyo niining adlawa,” miingon siya, “nga gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat.” (Deuteronomio 30:19) Sa pagkakaron, kita usab makapili. Oo, kita makapili sa pag-alagad kang Jehova nga matinumanon nga may paglaom nga mabuhi sa walay kataposan, o kita makapili sa pagsupak kaniya ug mag-antos sa mga sangpotanan niini. Tagda ang duha ka pananglitan sa mga tawo nga mihimog managlahi nga mga pagpili.

5, 6. Unsang pagpili ang gihimo ni Josue, ug unsay resulta niana?

⁵ Sa 1473 W.K.P., gipangunahan ni Josue ang mga Israelinhon sa pagsulod sa Yutang Saad. Sa usa ka puwersadong pahimangno nga iyang gipamulong una siya mamatay, nangaliyupo si Josue sa tibuok nasod: “Karon kon daotan sa inyong mga mata nga moalagad kang Jehova, pagpili alang sa inyong kaugalingon karong adlawa kon kinsay inyong alagaran, kon sa mga diyos ba nga gialagaran sa inyong mga katigulangan didto sa pikas nga bahin sa Suba o sa mga diyos sa mga Amorihanon kang kansang yuta inyong gipuy-an.” Unya, nga nagtumong sa iyang pamilya, siya mipadayon: “Kon bahin kanako ug sa akong panimalay, kami mag-alagad kang Jehova.”—Josue 24:15.

⁶ Una pa niana, giawhag ni Jehova si Josue nga magmaisogon ug magmalig-on ug giingnan siya nga dili motipas sa pagsunod sa Balaod sa Diyos. Hinunoa, pinaagi sa pagbasa sa Balaod sa hinayng tingog adlaw ug gabii, si Josue magmalamposon sa iyang dalan. (Josue 1:7, 8) Ug mao gayod kanay nahitabo. Ang pagpili ni Josue miresulta ug mga panalangin. “Walay saad nga napakyas sa tanang maayong saad nga gisaad ni Jehova ngadto sa balay sa Israel,” miingon si Josue. “Kining tanan natuman.”—Josue 21:45.

7. Sa adlaw ni Isaias, unsang pagpili ang gihimo sa mga Israelinhon, ug unsay gisangpotan niana?

⁷ Sa kasukwahi, tagda ang situwasyon sa Israel paglabay sa mga 700 ka tuig. Nianang panahona, daghang Israelinhon ang nagsunod sa paganong mga kostumbre. Pananglitan, sa kataposang adlaw sa tuig, ang mga tawo mag-alirong sa lamesa nga puno sa nagkadaiyang lamiang pagkaon ug matam-is nga bino. Dili kini yanong salosalo sa pamilya. Usa kadto ka relihiyosong seremonyas nga nagpasidungog sa duha ka paganong mga diyos. Si manalagnang Isaias nagsulat kon unsay hunahuna sa Diyos sa ilang pagkamasinupakon: “Kamo mao kadtong namiya kang Jehova, kadtong nakalimot sa akong balaang bukid, kadtong nag-andam ug usa ka lamesa alang sa diyos sa Suwerte ug kadtong nagpuno ug sinagolan nga bino alang sa diyos sa Kapalaran.” Sila nagtuo nga ang tinuig nga ani nagdepende, dili sa pagpanalangin ni Jehova kanila, kondili sa pagpahimuot “sa diyos sa Suwerte” ug “sa diyos sa Kapalaran.” Apan, sa pagkatinuod, ang ilang pagkarebelyoso ug tinuyong pagpili mao ang nagtino sa ilang dulnganan. “Itagana ko kamo sa espada,” miingon si Jehova, “ug kamong tanan mangyukbo ingong mga gipamatay; tungod kay ako mitawag, apan kamo wala motubag; ako misulti, apan kamo wala mamati; ug kamo nagpadayon sa pagbuhat kon unsay daotan sa akong mga mata, ug inyong gipili ang butang nga ako walay kahimuot.” (Isaias 65:11, 12) Ang ilang dili-maalamong pagpili misangpot sa ilang kalaglagan, ug ang mga diyos sa Suwerte ug Kapalaran wala makapugong niana.

 Paghimo sa Hustong Pagpili

8. Sumala sa Deuteronomio 30:20, unsay nalangkit sa paghimo sa hustong pagpili?

⁸ Sa dihang giawhag ni Moises ang Israel nga pilion ang kinabuhi, iyang gipaila ang tulo ka lakang nga angay nilang himoon: “Pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya.” (Deuteronomio 30:20) Susihon nato ang matag usa niini aron kita makahimo sa hustong pagpili.

9. Sa unsang paagi ikapasundayag nato ang atong gugma kang Jehova?

⁹ Pinaagi sa paghigugma kang Jehova nga atong Diyos: Kita mipili sa pag-alagad kang Jehova tungod kay kita nahigugma kaniya. Agig pagpatalinghog sa pasidaang mga panig-ingnan sa panahon sa mga Israelinhon, kita mosukol sa tanang tentasyon sa paghimog imoralidad ug molikay sa mga estilo sa kinabuhi nga makapahitumpawak kanato sa lit-ag sa materyalismo. (1 Corinto 10:11; 1 Timoteo 6:6-10) Kita mounong kang Jehova ug motuman sa iyang mga regulasyon. (Josue 23:8; Salmo 119:5, 8) Sa wala pa mosulod ang mga Israelinhon sa Yutang Saad, giawhag sila ni Moises: “Tan-awa, ako nagtudlo kaninyog mga regulasyon ug hudisyal nga mga hukom, ingon sa gisugo kanako ni Jehova nga akong Diyos, aron mao ang inyong buhaton sa taliwala sa yuta nga inyong pagaadtoan aron mapanag-iya kini. Ug tumanon ug buhaton ninyo kini, kay kini inyong kaalam ug inyong pagsabot atubangan sa mga mata sa mga katawhan nga makadungog niining tanang regulasyon.” (Deuteronomio 4:5, 6) Karon na ang panahon sa pagpasundayag sa atong gugma kang Jehova pinaagi sa pag-una sa kabubut-on ni Jehova diha sa atong kinabuhi. Kita seguradong panalanginan kon kita mopili sa pagbuhat niana.—Mateo 6:33.

10-12. Unsang mga pagtulon-an ang atong makat-onan sa paghisgot bahin sa nahitabo sa mga adlaw ni Noe?

¹⁰ Pinaagi sa pagpamati sa tingog sa Diyos: Si Noe “usa ka magwawali sa pagkamatarong.” (2 Pedro 2:5) Halos tanang tawo, sa wala pa ang Lunop, nalinga ug ‘wala magtagad’ sa mga pasidaan ni Noe. Unsay sangpotanan? “Miabot ang baha ug gibanlas silang tanan.” Si Jesus nagpasidaan nga ang atong adlaw, panahon sa “presensiya sa Anak sa tawo,” susama niana. Ang nahitabo sa adlaw ni Noe magsilbing tataw nga pasidaan alang sa mga tawo karon nga mopili sa pagsalikway sa mensahe sa Diyos.—Mateo 24:39.

¹¹ Kadtong nagbiaybiay sa mga pasidaan sa Diyos nga gipalanog sa modernong-adlaw nga mga alagad sa Diyos angayng makaamgo kon unsay moresulta kon sila dili mamati sa maong mga pasidaan. Bahin sa maong mga mabiaybiayon, si apostol Pedro miingon: “Sumala sa ilang gitinguha, sila wala makamatikod niining butanga, nga dihay mga langit gikan sa kakaraanan ug usa ka yuta nga nagbarog nga lig-on gikan sa tubig ug sa taliwala sa tubig pinaagi sa pulong sa Diyos; ug pinaagi niini ang kalibotan niadtong panahona nakaagom sa kalaglagan sa dihang kini gilunopan sa tubig. Apan pinaagi sa mao gihapon nga pulong ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.”—2 Pedro 3:3-7.

¹² Itandi kini sa pagpili nga gihimo ni Noe ug sa iyang panimalay. “Tungod sa pagtuo si Noe, human hatagi sa Diyos ug pasidaan mahitungod sa mga butang nga wala pa makita, nagpakitag diyosnong kahadlok ug nagtukod ug arka.” Ang pagpatalinghog niya sa pasidaan misangpot sa kaluwasan sa iyang panimalay. (Hebreohanon 11:7) Hinaot nga kita magmaabtik sa pagpaminaw sa mensahe sa Diyos ug unya tumanon kana.—Santiago 1:19, 22-25.

13, 14. (a) Nganong ang ‘pag-unong kang Jehova’ hinungdanon? (b) Sa unsang paagi tugotan nato si Jehova, ‘ang atong Magkukulon,’ sa pag-umol kanato?

¹³ Pinaagi sa pag-unong kang Jehova: Aron ‘mapili ang kinabuhi ug magpadayong buhi,’ dili lamang nato higugmaon si Jehova ug pamatian siya kondili kinahanglan usab kitang ‘mounong kang Jehova,’ sa ato pa, mopadayon sa pagbuhat sa iyang kabubut-on. “Pinaagi sa paglahutay sa inyong bahin mabatonan ninyo ang inyong mga kalag,” miingon si Jesus. (Lucas 21:19) Sa pagkatinuod, ang pagpili nga atong himoon niining bahina magpadayag kon unsay anaa sa atong kasingkasing. “Malipayon ang tawo nga mahadlokon sa kanunay, apan siya nga nagapatig-a sa iyang kasingkasing mahitumpawak sa katalagman,” nag-ingon ang Proverbio 28:14. Si Paraon sa karaang Ehipto maoy pananglitan niini. Sa dihang ang matag usa sa Napulo ka Hampak gipadangat sa Ehipto, gipagahi ni Paraon ang iyang kasingkasing inay kay ipasundayag ang diyosnong kahadlok. Wala pugsa ni Jehova si Paraon nga mahimong  masinupakon kondili gitugotan niya ang maong garbosong magmamando sa pagpili. Bisan unsa pay gipili ni Paraon, ang kabubut-on ni Jehova natuman, ingon sa gipatin-aw ni apostol Pablo mahitungod sa panglantaw ni Jehova kang Paraon: “Kay tungod niini mismo nga hinungdan ako nagtugot nga ikaw magpabilin, aron nga labot kanimo akong ikapakita ang akong gahom, ug aron ang akong ngalan ikapahayag sa tibuok yuta.”—Roma 9:17.

¹⁴ Paglabay sa daghang siglo human sa pagkaluwas sa Israel gikan sa pagmando ni Paraon, ang manalagnang si Isaias miingon: “Oh Jehova, ikaw ang among Amahan. Kami ang yutang-kulonon, ug ikaw ang among Magkukulon; ug kaming tanan maoy buhat sa imong kamot.” (Isaias 64:8) Samtang tugotan nato si Jehova sa pag-umol kanato pinaagi sa atong personal nga pagtuon ug pagpadapat sa iyang Pulong, kita inanayng nagsul-ob sa bag-ong pagkatawo. Kita mahimong mas aghop ug mas daling umolon, nga makapasayon kanato sa pag-unong kang Jehova tungod kay kita nagtinguha gayod sa pagpahimuot kaniya.—Efeso 4:23, 24; Colosas 3:8-10.

“Ipahibalo Mo Kini”

15. Sumala sa Deuteronomio 4:9, gipahinumdoman ni Moises ang Israel sa unsang duhay-bahin nga responsibilidad?

¹⁵ Ngadto sa nagtigom nga nasod sa Israel nga talisulod na sa Yutang Saad, si Moises miingon: “Magmatngon ka lamang ug mag-amping sa imong kalag, aron dili ka mahikalimot sa mga butang nga nakita sa imong mga mata ug aron kini dili mahimulag sa imong kasingkasing sa tanang adlaw sa imong kinabuhi; ug ipahibalo mo kini sa imong mga anak ug sa imong mga apo.” (Deuteronomio 4:9) Aron mabatonan ang panalangin ni Jehova ug mouswag diha sa yuta nga ilang panundon, kinahanglang tumanon sa katawhan ang duhay-bahin nga responsibilidad nila kang Jehova nga ilang Diyos. Kinahanglang dili nila kalimtan ang kahibulongang mga butang nga nakita nila nga gihimo ni Jehova, ug kinahanglang itudlo nila kini sa umaabot nga mga kaliwatan. Ingong katawhan sa Diyos karon, kita kinahanglang mobuhat usab niana kon kita nagtinguha sa ‘pagpili sa kinabuhi ug magpadayong buhi.’ Unsa may atong nakita nga gihimo ni Jehova alang kanato?

16, 17. (a) Unsay napalampos sa mga misyonaryong nabansay sa Gilead diha sa buluhatong pagsangyaw sa Gingharian? (b) Unsang mga panig-ingnan sa walay-paglubad nga pagkamasiboton ang imong nahibaloan?

¹⁶ Nalipay kita nga makita kon giunsa pagpanalangin ni Jehova ang atong buluhatong pagsangyaw ug paghimog mga tinun-an. Sukad sa pagbukas sa Watchtower Bible School of Gilead sa 1943, ang mga misyonaryo maoy nanguna sa buluhatong paghimog mga tinun-an diha sa daghang kayutaan. Hangtod karon, ang unang mga graduwado niining maong tunghaan nagmasiboton gihapon sa pagsangyaw sa Gingharian, bisan pag sila tigulang na ug ang uban nalimitahan na sa ilang pisikal nga kahimtang. Ang usa ka maayong panig-ingnan mao si Mary Olson, kinsa migraduwar sa Gilead sa 1944. Nakaalagad siya ingong misyonarya una sa Uruguay, dayon sa Colombia, ug karon sa Puerto Rico. Bisan tuod medyo nalimitahan tungod sa mga suliran sa panglawas gumikan sa pagkatigulang, madasigon gihapon si Sister Olson sa pagsangyaw. Ginamit ang iyang kahibalo sa Kinatsila, siya nag-eskedyul ug panahon kada semana sa pagduyog sa lokal nga mga magmamantala diha sa ministeryo sa kanataran.

¹⁷ Ang nabiyuda na nga si Nancy Porter, kinsa migraduwar sa Tunghaang Gilead sa 1947,  nag-alagad gihapon sa Bahamas. Siya maoy lain pang misyonarya nga puliki sa buluhatong pagsangyaw. “Ang pagtudlo sa uban bahin sa kamatuoran sa Bibliya maoy linaing tuboran sa kalipay alang kanako,” nag-ingon si Sister Porter diha sa iyang sugilanon sa kinabuhi. a “Kini nagtabang kanako nga makabaton ug organisadong espirituwal nga rutina nga nakahatag ug kahapsay ug kalig-on sa akong kinabuhi.” Sa dihang si Sister Porter ug ang ubang matinumanong mga alagad mamalandong sa ilang kagahapon, sila wala malimot sa nahimo ni Jehova. Komosta kita? Mapasalamaton ba kita sa paagi nga si Jehova nagpanalangin sa buluhaton sa Gingharian diha sa atong palibot?— Salmo 68:11.

18. Unsay atong makat-onan gikan sa pagbasa sa mga sugilanon sa kinabuhi sa mga misyonaryo?

¹⁸ Kita nalipay sa nahimo ug ginahimo pa niining mga igsoon nga dugay nang nag-alagad kang Jehova. Ang pagbasa sa ilang mga sugilanon sa kinabuhi maoy atong tuboran sa pagdasig tungod kay sa dihang atong makita kon unsay nahimo ni Jehova alang niining matinumanong mga igsoon, mas mapalig-on ang atong determinasyon nga moalagad kang Jehova. Regular ba nimong ginabasa ug ginapalandong kanang makapalipayng mga asoy nga gipatik diha sa Ang Bantayanang Torre?

19. Sa unsang paagi mapahimuslan pag-ayo sa Kristohanong mga ginikanan ang mga sugilanon sa kinabuhi nga nasulat diha sa Ang Bantayanang Torre?

¹⁹ Gipahinumdoman ni Moises ang mga Israelinhon nga dili nila angayng kalimtan ang tanang butang nga nahimo ni Jehova alang kanila ug kining mga butanga kinahanglang dili mahimulag sa ilang kasingkasing sa tanang adlaw sa ilang kinabuhi. Dayon gidugang niya ang lain pang lakang: “Ipahibalo mo kini sa imong mga anak ug sa imong mga apo.” (Deuteronomio 4:9) Ang tinuod nga mga sugilanon ilabinang makapadasig. Ang nagtubo nga mga batan-on nagkinahanglan ug maayong mga panig-ingnan. Ang mga dalaga makakat-on ug panig-ingnan gikan sa matinumanong gulang-gulang nga mga igsoong babaye kansang mga sugilanon sa kinabuhi giasoy diha sa Ang Bantayanang Torre. Ang pag-alagad sa teritoryo nga langyaw ug pinulongan diha sa nasod nga ilang gipuy-an naghatag sa mga lalaki ug babaye ug dugang mga kahigayonan nga magmapuliki sa pagsangyaw sa maayong balita. Kristohanong mga ginikanan, nganong dili ninyo gamiton ang mga eksperyensiya sa matinumanong mga misyonaryo sa Gilead ug sa uban pa sa pagdasig sa inyong mga anak nga pilion ang bug-os-panahong pag-alagad?

20. Unsay atong buhaton aron ‘mapili ang kinabuhi’?

²⁰ Nan, sa unsang paagi ang matag usa kanato ‘makapili sa kinabuhi’? Pinaagi sa paggamit sa maanindot nga gasa nga kagawasan sa pagpili sa pagpakita kang Jehova nga kita nahigugma kaniya ug pinaagi sa paghimo sa atong kinamaayohan diha sa pag-alagad kaniya samtang kita gitugotan niya nga makabaton nianang pribilehiyoa. “Kay,” sumala sa giingon ni Moises, si Jehova “ang imong kinabuhi ug ang gitas-on sa imong mga adlaw.”—Deuteronomio 30:19, 20.

[Footnote]

Makahinumdom Ka Ba?

• Unsay imong nakat-onan gikan sa mga pananglitan sa managlahi nga mga pagpili nga atong nahisgotan?

• Unsang mga lakang ang kinahanglan natong himoon aron ‘mapili ang kinabuhi’?

• Unsang duhay-bahin nga responsibilidad ang giawhag kanato nga tumanon?

[Mga Pangutana sa Pagtuon]

[Hulagway sa panid 26]

“Gibutang ko ang kinabuhi ug ang kamatayon sa imong atubangan”

[Hulagway sa panid 29]

Ang pagpamati sa tingog sa Diyos misangpot sa kaluwasan ni Noe ug sa iyang pamilya

[Hulagway sa panid 30]

Si Mary Olson

[Hulagway sa panid 30]

Si Nancy Porter