Si Jehova Nagsulti “sa Kataposan Sukad sa Sinugdan”

“Ang Usa nga nagsulti sa kataposan sukad sa sinugdan, ug sa mga butang nga wala mahimo sukad sa kanhing panahon.”—ISAIAS 46:10.

1, 2. Unsay nakapatalagsaon sa mga hitabo nga nalangkit sa pagkapukan sa Babilonya, ug unsay gipaila niining kamatuorana bahin kang Jehova?

 SA KAGABHION, ang kaaway nga mga sundalo mihinok pag-asdang agi sa mabaw na nga tubig sa Suba sa Euprates, nga girumbo ang gamhanang siyudad sa Babilonya. Samtang nagkaduol sila sa entrada sa siyudad, natingala sila sa ilang nakita. Ang dagko kaayo, duhay-abli nga mga pultahan sa paril sa Babilonya wala masirhi! Sila mikawas gikan sa suba, dayon mikatkat, ug misulod sa siyudad. Dali ra kaayong nailog ang siyudad. Si Ciro, ang ilang lider, nagmando dayon sa nailog nga yuta ug sa ulahi nagpagula ug sugo nga buhian ang nabihag nga mga Israelinhon. Libolibong nadestiyero ang namalik aron ipasig-uli ang pagsimba kang Jehova sa Jerusalem.—2 Cronicas 36:22, 23; Esdras 1:1-4.

² Ang maong mga hitabo sa mga tuig 539-537 W.K.P. gipamatud-an pag-ayo karon sa mga historyano. Ang nakapatalagsaon niini mao nga ang mga hitabo nahibaloan nang daan mga 200 ka tuig una pa kini mahitabo. Giinspirar ni Jehova ang iyang manalagnang si Isaias sa paghubit nga abante kaayo sa pagkapukan sa Babilonya. (Isaias 44:24–45:7) Gipadayag sa Diyos dili lamang ang mga sirkumstansiya nga dakog kalabotan sa pagkapukan sa Babilonya kondili usab sa ngalan sa lider nga moilog niana. a Nakigsulti sa mga Israelinhon, nga iyang mga saksi niadtong panahona, si Jehova miingon: “Hinumdomi ang unang mga butang sa dugay nang panahon kanhi, nga ako ang Diyos ug wala nay laing Diyos, ni adunay sama kanako; ang Usa nga nagsulti sa kataposan sukad sa sinugdan, ug sa mga butang nga wala mahimo sukad sa kanhing panahon.” (Isaias 46:9, 10a) Si Jehova usa gayod ka Diyos nga makahibalong daan kon unsay mahitabo sa umaabot.

3. Hisgotan karon ang mga tubag sa unsang mga pangutana?

³ Unsa ka daghan ang mahibaloan sa Diyos bahin sa umaabot? Nahibalo bang daan si Jehova kon unsay buhaton sa matag usa kanato? Sa pagkatinuod, ang ato bang umaabot gimbut-an nang daan sa Diyos? Atong hisgotan niining  artikuloha ug sa sunod ang mga tubag sa Bibliya niining mga pangutanaha ug sa uban pa nga adunay kalabotan niini.

Si Jehova—Usa ka Diyos sa Tagna

4. Kinsa ang Tuboran sa mga tagna nga nasulat sa Bibliya?

⁴ Kay adunay katakos sa pagkahibalong daan sa umaabot, giinspirar ni Jehova ang iyang mga alagad sa kapanahonan sa Bibliya sa pagsulat ug daghang tagna, ug pinaagi niana atong mahibaloan daan kon unsay katuyoan ni Jehova. “Ang unang mga butang—ania, sila miabot na, apan akong ipahayag ang bag-ong mga butang,” miingon si Jehova. “Sa dili pa sila motungha, akong ipahinabo nga inyong madungog kini sila.” (Isaias 42:9) Pagkabulahan gayod sa katawhan sa Diyos!

5. Unsang responsibilidad ang nalangkit sa pagkahibalong daan sa pagabuhaton ni Jehova?

⁵ Ang manalagnang si Amos nagpasalig kanato: “Ang Soberanong Ginoong Jehova dili mobuhat sa usa ka butang gawas kon gikapadayag niya ang iyang kompidensiyal nga butang ngadto sa iyang mga alagad nga mga manalagna.” Ang pagkahibalong daan sa pagabuhaton ni Jehova naglangkit ug responsibilidad. Matikdi ang epektibong ilustrasyon nga gigamit ni Amos human niana: “Adunay leyon nga mingulob! Kinsay dili mahadlok?” Maingon nga ang pagngulob sa leyon mag-aghat sa tawo ug hayop nga anaa sa duol sa paglihok nga walay langan, ang mga manalagna sama kang Amos nagpahayag dayon sa gipamulong ni Jehova. “Ang Soberanong Ginoong Jehova misulti! Kinsay dili managna?”—Amos 3:7, 8.

Ang “Pulong” ni Jehova ‘Tinong Magmalamposon’

6. Sa unsang paagi ang “laraw” ni Jehova milampos maylabot sa pagkapukan sa Babilonya?

⁶ Pinaagi sa iyang manalagnang si Isaias, si Jehova miingon: “Ang akong kaugalingong laraw mobarog, ug ang tanang butang nga akong gikahimut-an akong pagabuhaton.” (Isaias 46:10b) Ang “laraw” sa Diyos, sa ato pa, ang iyang kabubut-on o katuyoan maylabot sa Babilonya, naglakip sa pagtawag kang Ciro gikan sa Persia aron pukanon ang Babilonya. Dugay nang gipahayag ni Jehova ang maong katuyoan. Ingon sa nahisgotan na, kini bug-os nga natuman sa tuig 539 W.K.P.

7. Nganong makaseguro kita nga ang “pulong” ni Jehova tinong magmalamposon?

⁷ Halos upat ka siglo una pa mailog ni Ciro ang Babilonya, si Haring Jehosapat sa Juda gisulong sa hiniusang mga kasundalohan sa Ammon ug Moab. Siya masaligong miampo: “Oh Jehova nga Diyos sa among mga katigulangan, dili ba ikaw Diyos nga anaa sa mga langit, ug dili ba ikaw nagagahom ibabaw sa tanang gingharian sa kanasoran, ug dili ba anaa sa imong kamot ang gahom ug pagkagamhanan, nga walay makabarog batok kanimo?” (2 Cronicas 20:6) Si Isaias nagpahayag ug susamang pagsalig sa dihang siya miingon: “Si Jehova sa mga panon maoy naglaraw, ug kinsa ang makabungkag niini? Ug ang iyang kamot mao ang gituy-od, ug kinsay makapahuyhoy niini?” (Isaias 14:27) Sa ulahi, sa dihang naulian sa iyang maayong panghunahuna human siya mabuang, si Haring Nabukodonosor sa Babilonya mapaubsanong miila: “Walay usa nga makapugong sa kamot [sa Diyos] o nga makaingon kaniya, ‘Unsa ang imong ginabuhat?’” (Daniel 4:35) Oo, gipasaligan ni Jehova ang iyang katawhan: “Ang akong pulong . . . dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong  magpalampos sa butang nga tungod niana kini akong gipadala.” (Isaias 55:11) Kita makaseguro nga ang “pulong” ni Jehova matuman gayod. Ang katuyoan sa Diyos tinong matuman.

Ang “Walay Kataposang Katuyoan” sa Diyos

8. Unsa man ang “walay kataposang katuyoan” sa Diyos?

⁸ Sa iyang sulat sa mga Kristohanon sa Efeso, si apostol Pablo naghisgot sa Diyos ingong adunay “walay kataposang katuyoan.” (Efeso 3:11) Kini dili gayod usa ka plano kon unsay iyang buhaton, nga morag ang Diyos kinahanglang magplano kon sa unsang paagi niya mapalampos ang usa ka butang. Hinunoa, kini nagtumong sa determinasyon ni Jehova nga tumanon ang iyang orihinal nga katuyoan alang sa katawhan ug sa yuta. (Genesis 1:28) Aron matabangan kita sa pagsabot nga tinong matuman ang iyang katuyoan, tagda ang unang tagna nga nasulat sa Bibliya.

9. Sa unsang paagi ang Genesis 3:15 nalangkit sa katuyoan sa Diyos?

⁹ Ang saad sa Genesis 3:15 nagpaila nga human gayod makasala si Adan ug Eva, gitino ni Jehova nga ang iyang simbolikong babaye magpatungha ug usa ka binhi, o anak. Nalantawng daan usab ni Jehova ang sangpotanan sa panag-away tali sa iyang babaye ug ni Satanas ug tali sa ilang magkaaway nga mga binhi. Bisan tuod tugotan ni Jehova ang Binhi sa babaye sa Diyos nga masamdan sa tikod, sa takdang panahon sa Diyos, ang Binhi magsamad sa serpente, o kang Satanas nga Yawa, diha sa ulo. Sa kasamtangan, ang katuyoan ni Jehova nagpadayon subay sa pinili nga linya sa mga kaliwat hangtod sa pagtungha ni Jesus ingong gisaad nga Mesiyas.—Lucas 3:15, 23-38; Galacia 4:4.

Kon Unsay Gimbut-ang Daan ni Jehova

10. Gitino bang daan ni Jehova sukad sa sinugdan nga makasala si Adan ug Eva? Ipatin-aw.

¹⁰ Naghisgot bahin sa papel ni Jesus diha sa katuyoan sa Diyos, si apostol Pedro misulat: “Siya [si Jesus] nahibaloan nang daan sa wala pa ang pagkatukod sa kalibotan, apan siya gipadayag sa kataposan sa mga panahon tungod kaninyo.” (1 Pedro 1:20) Gitino bang daan ni Jehova sukad sa sinugdan nga sila si Adan ug Eva makasala ug kinahanglanon ang halad lukat nga gitagana pinaagi ni Jesu-Kristo? Wala. Ang pulong “pagkatukod’ gihubad gikan sa usa ka Gregong termino nga sa literal nagkahulogang “pagpatungha sa binhi.” May nahitabo ba nga “pagpatungha sa binhi,” o pagsamkon ug tawhanong kaliwat, sa wala pa makasala si Adan ug Eva? Wala. Human lamang sa ilang pagsupak nga si Adan ug Eva nagpatunghag mga anak. (Genesis 4:1) Busa human sa rebelyon apan una pa gisamkon ang kaliwat nila ni Adan ug Eva, gimbut-ang daan ni Jehova ang pagpatungha sa “binhi.” Pinaagi sa kamatayon ug pagkabanhaw ni Jesus, gitagana ang mahigugmaong kahikayan sa lukat, diin ang napanunod nga sala ug ang tanang buhat ni Satanas pagawagtangon.—Mateo 20:28; Hebreohanon 2:14; 1 Juan 3:8.

11. Unsang kaugmaran ang gimbut-ang daan ni Jehova diha sa katumanan sa iyang katuyoan?

¹¹ Gimbut-ang daan sa Diyos ang laing kaugmaran diha sa katumanan sa iyang katuyoan.  Kini gipaila diha sa gisulat ni Pablo ngadto sa mga taga-Efeso, nga ang Diyos ‘magtigom pag-usab sa tanang butang diha kang Kristo, ang mga butang sa mga langit ug ang mga butang sa yuta.’ Unya, mahitungod sa “mga butang sa mga langit,” sa ato pa, kadtong napili ingong mga manununod uban kang Kristo, si Pablo nagpatin-aw: “Kita gimbut-an daan sumala sa katuyoan niya nga nagapalihok sa tanang butang sumala sa gilaraw sa iyang kabubut-on.” (Efeso 1:10, 11) Oo, gitinong daan ni Jehova nga ang usa ka limitadong gidaghanon sa mga tawo maglangkob sa ikaduhang bahin sa binhi sa babaye sa Diyos ug makig-uban kang Kristo sa pagpadapat sa mga benepisyo sa lukat. (Roma 8:28-30) Kini sila gitawag ni apostol Pedro nga “usa ka balaang nasod.” (1 Pedro 2:9) Si apostol Juan nakapribilehiyo sa pagkahibalo pinaagi sa panan-awon sa gidaghanon niadtong mahimong kaubang mga manununod ni Kristo—144,000. (Pinadayag 7:4-8; 14:1, 3) Nagpaluyo kang Kristo ingong Hari, sila nag-alagad ‘alang sa mahimayaong kadayeganan sa Diyos.’—Efeso 1:12-14.

12. Giunsa nato pagkahibalo nga ang indibiduwal nga mga sakop sa 144,000 wala tinoang daan?

¹² Ang pagkagimbut-ang daan sa 144,000 wala magpasabot nga ang pipila ka indibiduwal gitino nang daan nga mag-alagad sa Diyos nga matinumanon niining paagiha. Sa pagkatinuod, ang tambag diha sa Kristohanon Gregong Kasulatan sa panguna gisulat aron sa paggiya ug pagpalig-on sa mga dinihogan nga mahuptan ang ilang integridad ug mahimong takos sa ilang langitnong pagkatinawag. (Filipos 2:12; 2 Tesalonica 1:5, 11; 2 Pedro 1:10, 11) Si Jehova nahibalong daan nga 144,000 ka indibiduwal ang mokuwalipikar aron matuman ang iyang katuyoan. Kon kinsa unya kini sila nagdepende sa paagi sa pagkinabuhi sa tagsa-tagsa ka dinapit, usa ka desisyon nga kinahanglang personal nga himoon sa matag usa kanila.—Mateo 24:13.

Kon Unsay Nahibaloang Daan ni Jehova

13, 14. Sa unsa nga kinahanglang mahiuyon ang paggamit ni Jehova sa iyang katakos sa pagkahibalong daan sa tanang butang, ug ngano?

¹³ Sanglit si Jehova usa man ka Diyos sa tagna ug katuyoan, sa unsang paagi gamiton niya ang iyang katakos sa pagkahibalong daan sa tanang butang? Una, kita gipasaligan nga ang tanang dalan sa Diyos matinud-anon, matarong, ug mahigugmaon. Sa dihang misulat ngadto sa Hebreohanong mga Kristohanon sa unang siglo K.P., gipamatud-an ni apostol Pablo nga ang panumpa ug saad sa Diyos maoy “duha ka butang nga walay pagkausab nga niini dili gayod mahimo nga mamakak ang Diyos.” (Hebreohanon 6:17, 18) Sa iyang sulat ngadto sa tinun-an nga si Tito, gipahayag usab ni Pablo kining puntoha sa dihang siya misulat nga ang Diyos “dili makabakak.”—Tito 1:2.

¹⁴ Dugang pa, bisan tuod si Jehova nakabaton ug walay-kinutobang gahom, dili gayod siya mogawi nga dili makataronganon. Si Moises naghubit kang Jehova ingong “usa ka Diyos sa pagkamatinumanon, nga kaniya walay inhustisya; matarong ug matul-id siya.” (Deuteronomio 32:4) Bisan unsay buhaton ni Jehova, kini nahiuyon sa iyang hingpit nga personalidad. Ang iyang mga buhat magpasundayag sa hingpit nga panaghiusa sa iyang pangunang mga hiyas nga gugma, kaalam, hustisya, ug gahom.

15, 16. Unsang mga pagpili ang gipatin-aw ni Jehova kang Adan didto sa tanaman sa Eden?

¹⁵ Tagda kon sa unsang paagi kining tanan nadayag  diha sa panghitabo sa tanaman sa Eden. Ingong mahigugmaong Amahan, si Jehova nagtagana sa tanang gikinahanglan sa tawo. Iyang gihatagan si Adan ug katakos sa paghunahuna, pagpangatarongan labot sa usa ka butang, ug sa pagkab-ot ug usa ka konklusyon. Dili sama sa mga mananap, nga sa dakong bahin giniyahan sa kinaiyanhong mga hiyas, si Adan may katakos sa paghimog mga pagpili. Human lalanga si Adan, ang Diyos mitan-aw gikan sa iyang langitnong trono ug nakita “ang tanan nga iyang gibuhat ug, tan-awa! kadto maayo kaayo.”—Genesis 1:26-31; 2 Pedro 2:12.

¹⁶ Sa dihang gibaoran ni Jehova si Adan nga dili mokaon gikan sa “kahoy sa kahibalo sa maayo ug daotan,” Siya naghatag ug igong instruksiyon aron si Adan makahukom kon unsay iyang buhaton. Iyang gitugotan si Adan nga mokaon gikan “sa tanang kahoy sa tanaman” gawas sa usa ka kahoy ug iyang gihatag ang pasidaan nga ang pagkaon sa bunga sa gidili nga kahoy mosangpot sa kamatayon. (Genesis 2:16, 17) Iyang gipatin-aw kang Adan ang mga sangpotanan sa iyang mga lihok. Unsay buhaton ni Adan?

17. Nganong makaingon man kita nga ang paggamit ni Jehova sa iyang katakos sa pagkahibalong daan sa tanang butang maoy mapilion?

¹⁷ Dayag nga gipili ni Jehova nga dili lantawong daan kon unsay pagabuhaton ni Adan ug Eva bisan pag Siya may katakos sa pagkahibalong daan sa tanang butang. Busa ang isyu dinhi, dili kon si Jehova makahimo ba sa paglantawng daan sa umaabot, kondili kon siya mopili ba sa pagbuhat niana. Dugang pa, kita makapangatarongan nga si Jehova, ingong usa ka Diyos sa gugma, dili motuyo ug sa walay-kokaluoy magtinong daan nga mahitabo ang maong rebelyon uban ang tanang makapasubong mga sangpotanan niini. (Mateo 7:11; 1 Juan 4:8) Busa, kon bahin sa paggamit ni Jehova sa iyang katakos sa pagkahibalong daan sa tanang butang, kini mapilion.

18. Nganong ang mapiliong paggamit ni Jehova sa iyang katakos sa pagkahibalong daan sa tanang butang wala magpaila nga siya dili-hingpit?

¹⁸ Ang mapilion nga paggamit ni Jehova sa iyang katakos sa pagkahibalong daan sa tanang butang nagpasabot ba nga adunay nakulang o dili-hingpit kaniya? Wala. Si Moises naghubit kang Jehova ingong “Bato,” nga midugang: “Hingpit ang iyang kalihokan.” Dili siya ang responsable sa mga sangpotanan sa sala sa tawo. Ang malaglagong mga epekto nga naagoman nato karon nagsumikad nianang dili-matarong nga buhat sa pagsupak. Si apostol Pablo klarong nangatarongan nga “ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Deuteronomio 32:4, 5; Roma 5:12; Jeremias 10:23.

19. Unsang mga pangutana ang hisgotan sa sunod nga artikulo?

¹⁹ Sa ato nang nahisgotan, atong nakita nga walay inhustisya diha kang Jehova. (Salmo 33:5) Hinunoa, ang mga katakos, moral nga mga hiyas, ug mga sukdanan ni Jehova gigamit nga nahiuyon sa iyang katuyoan. (Roma 8:28) Ingong Diyos sa tagna, si Jehova “nagsulti sa kataposan sukad sa sinugdan, ug sa mga butang nga wala mahimo sukad sa kanhing panahon.” (Isaias 46:9, 10) Nasabtan usab nato nga ang paggamit niya sa iyang katakos sa pagkahibalong daan sa tanang butang maoy mapilion. Nan, sa unsang paagi kita naapektahan? Sa unsang paagi makaseguro kita nga ang atong mga desisyon nahiuyon sa mahigugmaong katuyoan sa Diyos? Ug unsang mga panalangin ang atong madawat gumikan sa pagbuhat niana? Ang sunod nga artikulo maghisgot nianang mga pangutanaha.

[Footnote]

Makapatin-aw Ka Ba?

• Unsang karaang mga pananglitan ang nagpamatuod nga ang “pulong” sa Diyos ‘tinong magmalamposon’?

• Unsay gimbut-ang daan ni Jehova maylabot sa iyang “walay kataposang” katuyoan?

• Sa unsang paagi si Jehova naggamit sa iyang katakos sa pagkahibalong daan sa tanang butang?

[Mga Pangutana sa Pagtuon]

[Hulagway sa panid 22]

Si Jehosapat nagsalig kang Jehova

[Hulagway sa panid 23]

Gitagna sa Diyos ang kamatayon ug pagkabanhaw ni Jesus

[Hulagway sa panid 24]

Gimbut-an bang daan ni Jehova kon unsay pagabuhaton ni Adan ug Eva?