“Gikalipayan Ko ang Imong mga Pahinumdom”

“Ang tanang butang nga gisulat kanhi gisulat alang sa pagtudlo kanato.”—ROMA 15:4.

1. Sa unsang paagi gihatagan kita ni Jehova ug mga pahinumdom, ug nganong atong gikinahanglan kana?

 SI Jehova nagtagana sa iyang katawhan ug mga pahinumdom aron matabangan sila sa pagsagubang sa mga kalisdanan niining lisod nga mga panahon. Madayag ang pipila sa maong mga pahinumdom sa panahon sa personal nga pagbasa sa Bibliya, samtang tingali madayag ang uban ingon nga impormasyon o mga komento nga ipahayag panahon sa Kristohanong mga tigom. Dili bag-o kanato ang kadaghanan sa atong mabasa o madungog sa maong mga okasyon. Lagmit nga ato nang nahisgotan ang susamang impormasyon sa nangagi. Apan, sanglit duna kitay tendensiya nga mahikalimot, kinahanglang ipadayon nato ang pagpukaw sa atong panumdoman bahin sa mga katuyoan, mga balaod, ug mga pahimangno ni Jehova. Angay gayong pabilhan nato ang mga pahinumdom sa Diyos. Makapalunhaw kana sa atong panghunahuna pinaagi sa pagtabang kanato nga mapunting ang atong hunahuna diha sa mga katarongan nga nagtukmod kanato sa pagsubay sa diyosnong pagkinabuhi. Busa, ang salmista miawit kang Jehova: “Gikalipayan ko ang imong mga pahinumdom.”—Salmo 119:24.

2, 3. (a) Nganong gipreserbar ni Jehova ang mga sugilanon sa kinabuhi sa mga tawo sa kapanahonan sa Bibliya? (b) Unsang mga asoy gikan sa Kasulatan ang hisgotan niining artikuloha?

² Bisag gisulat daghang siglo kanhi, ang Pulong sa Diyos maoy gamhanan. (Hebreohanon 4:12) Kini nagpadayag ug tinuod nga mga sugilanon sa kinabuhi sa mga tawo sa panahon sa Bibliya. Bisan pag daghan nag kausaban ang mga batasan ug mga punto-debista sukad sa kapanahonan sa Bibliya, ang mga sulirang atong giatubang kasagarang sama ra sa mga suliran niadtong panahona. Ang daghang sugilanon nga nahisulat sa Bibliya alang sa atong kaayohan naghatag kanatog makapadasig nga mga panig-ingnan sa mga tawo nga nahigugma kang Jehova ug nag-alagad kaniyang matinumanon bisan pa sa lisod nga mga kahimtang. Ang ubang mga asoy nagpaila sa matang sa panggawi nga gidumtan sa Diyos. Gipasulat ni Jehova kanang tanang personal nga mga kasaysayan, maayo man ug daotan, diha sa Bibliya ingon nga mga pahinumdom. Sumala kini sa gisulat ni apostol Pablo: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.”—Roma 15:4.

³ Atong ipunting ang atong pagtagad sa tulo ka asoy gikan sa Kasulatan: ang asoy bahin sa mga pakiglabot ni David kang Saul, ang asoy bahin ni Ananias ug Sapira, ug ang asoy bahin sa panggawi ni Jose may kalabotan sa asawa ni Potipar. Ang matag usa niini nagtudlo kanatog hinungdanong mga pagtulon-an.

Pagkamaunongon Ngadto sa mga Kahikayan sa Diyos

4, 5. (a) Unsang kahimtang ang naglungtad taliwala ni Haring Saul ug ni David? (b) Unsay sanong ni David sa pagbatok ni Saul kaniya?

⁴ Si Haring Saul wala magmatinumanon kang Jehova ug nahimong dili takos sa pagmando sa Iyang katawhan. Mao nga gisalikway siya sa Diyos ug gisugo ang manalagnang si Samuel sa pagdihog kang David ingon nga umaabot nga hari sa Israel. Sa dihang nagpakita si David ug kahanas ingon nga manggugubat ug gidayeg siya sa katawhan, giisip ni Saul si David nga iyang kaindig. Daghang higayon nga si Saul misulay pagpatay kaniya. Sa matag higayon si David naluwas kay si Jehova nag-uban man kaniya.—1 Samuel 18:6-12, 25; 19:10, 11.

⁵ Sa daghang katuigan, nagkinabuhi si David ingon nga usa ka kagiw. Sa dihang mitungha ang  kahigayonan sa pagpatay kang Saul, giagda si David sa iyang mga kauban sa paghimo niana, nga miingon nga ang kaaway ni David gitugyan ni Jehova ngadto sa iyang kamot. Bisan pa niana, midumili si David. Ang iyang pagkamaunongon kang Jehova ug ang iyang pagtahod alang sa katungdanan ni Saul ingon nga dinihogang hari sa katawhan sa Diyos mao ang nagtukmod kaniya sa dili pagpatay kaniya. Si Saul gitudlo ni Jehova ingon nga hari sa Israel, dili ba? Si Jehova maoy magtangtang usab kaniya sa iyang gitakdang panahon. Si David nangatarongan nga siya walay katungod sa pagpanghilabot. Human sa paghimo sa iyang tanang maarangan ubos sa maong mga kahimtang aron mahupay ang pagbatok ni Saul kaniya, si David miingon: “Si Jehova ang maghampak kaniya; o ang iyang adlaw moabot ug siya mamatay, o moadto siya sa gubat, ug siya malaglag. Halayo ra alang kanako, gikan sa panglantaw ni Jehova, nga ako mobakyaw sa akong kamot batok sa dinihogan ni Jehova!”—1 Samuel 24:3-15; 26:7-20.

6. Nganong makapaikag kanato ang asoy bahin ni David ug Saul?

⁶ May usa ka hinungdanon kaayong pagtulon-an kining asoya. Natingala ka ba sukad kon nganong motungha ang pipila ka suliran diha sa Kristohanong kongregasyon? Tingali dili haom ang panggawi sa usa ka igsoon. Mahimong dili seryoso ang iyang panggawi, apan napikal ka niana. Unsay imong sanong? Tungod kay ikaw interesado sa maong tawo ingon nga ikaw Kristohanon man ug tungod sa pagkamaunongon kang Jehova, mahimong modesisyon ka nga makigsulti kaniya sa malulotong paagi, nga ang katuyoan mao ang paghusay sa suliran. Apan, komosta kon magpadayon ang suliran? Human nimo mahimo ang tanang maarangan, basin gusto nimong itugyan kana sa mga kamot ni Jehova. Kanay gihimo ni David.

7. Sa pagsundog kang David, unsay angay natong sanong kon kita makasinatig inhustisya o pagkamapihigon?

⁷ O ikaw nag-atubang tingali ug mga suliran bahin sa inhustisya o relihiyosong pagkamapihigon. Basin gamay lang o wala kay mahimo bahin niini sa pagkakaron. Kanang kahimtanga tingali lisod kaayo nga maantos, apan ang sanong ni David bahin sa inhustisya nagtudlo kanatog usa ka pagtulon-an. Ang mga salmo nga gisulat ni David maoy makapatandog nga talaan dili lamang bahin sa iyang kinasingkasing nga mga pag-ampo nga ipahilayo unta siya sa Diyos gikan sa gahom ni Saul kondili bahin usab sa iyang pagkamaunongon kang Jehova ug sa iyang kabalaka alang sa kadayeganan sa ngalan sa Diyos. (Salmo 18:1-6, 25-27, 30-32, 48-50; 57:1-11) Si David nagpabiling maunongon kang Jehova bisan pag si Saul nagpadayon sa paggawi sa dili-makataronganong paagi sulod sa daghang katuigan. Kita angay usab nga magpabiling matinumanon kang Jehova ug sa iyang organisasyon bisan pa sa mga inhustisya nga atong giantos ug bisan kon unsay ginabuhat sa uban. Makasalig kita nga si Jehova bug-os nga nahibalo sa kahimtang.—Salmo 86:2.

8. Unsay sanong sa mga Saksi ni Jehova sa Mozambique sa dihang gisulayan ang ilang pagkamaunongon kang Jehova?

⁸ Ang mga Kristohanon sa Mozambique maoy modernong-adlaw nga panig-ingnan bahin sa pipila nga nagmaunongon kang Jehova panahon sa pagsulay. Niadtong 1984 ang ilang mga balangay  balikbalik nga giatake sa armadong mga sakop sa usa ka rebeldeng grupo, nga nanulis, nanunog ug mga balay, ug mipatayg mga tawo. Ang matuod nga mga Kristohanon daw walay mahimo sa pagdepensa sa ilang kaugalingon. Girekluta ang mga molupyo sa maong dapit aron mosulod sa usa ka samag-militar nga organisasyon o mosuportar niana sa ubang mga paagi. Giisip sa mga Saksi ni Jehova nga ang paghimo niana nahasupak sa ilang baroganan sa pagkaneyutral ingon nga mga Kristohanon. Ang pagdumili nila nakapasuko pag-ayo sa samag-militar nga organisasyon. Mga 30 ka Saksi ang gipatay sulod nianang gubot nga yugto, apan bisan ang kapeligrohan nga mamatay wala makabungkag sa pagkamaunongon sa katawhan sa Diyos. a Sama kang David, sila nag-antos ug mga inhustisya apan sa kadugayan sila nagmadaogon.

Mapasidan-ong Pahinumdom

9, 10. (a) Sa unsang paagi makakuha kitag kaayohan sa pipila ka panig-ingnan sa Kasulatan? (b) Unsay nakadaot sa mga gibuhat ni Ananias ug Sapira?

⁹ Ang pipila ka tawo nga gihisgotan diha sa Kasulatan nahimong mapasidan-ong mga pahinumdom bahin sa panggawi nga pagalikayan. Sa pagkatinuod, ang Bibliya adunay daghang asoy bahin sa mga tawo, bisan taliwala sa mga alagad sa Diyos, kinsa nagbuhat ug daotan ug nag-antos sa mga sangpotanan niana. (1 Corinto 10:11) Ang usa ka asoy mao ang kang Ananias ug Sapira, usa ka magtiayon nga mga membro sa Kristohanong kongregasyon sa Jerusalem sa unang siglo.

¹⁰ Human sa Pentekostes 33 K.P., mitungha ang panginahanglan nga matabangan sa materyal nga paagi ang bag-ong mga magtutuo nga nagpabilin sa Jerusalem aron makapahimulos sila sa pagpakig-uban sa mga apostoles. Namaligyag yuta ang pipila ka membro sa kongregasyon aron maseguro nga walay usa ang manginahanglan. (Buhat 2:41-45) Gibaligya ni Ananias ug Sapira ang usa ka uma ug bahin lang sa halin ang ilang gidala ngadto sa mga apostoles, ug sila nag-ingon nga ang ilang gasa mao ang tibuok nilang halin. Itugot nato, may katungod si Ananias ug Sapira sa paghatag ug dako o gamay bang kantidad sumala sa gusto nila, apan ang ilang motibo maoy daotan ug ang ilang mga gibuhat malimbongon. Gusto nilang dayegon ug tan-awon nga labaw ang ilang gibuhat kay sa tinuod nilang gibuhat. Si apostol Pedro, ubos sa inspirasyon sa balaang espiritu, nagbutyag sa ilang pagkamalimbongon ug pagkasalingkapaw, ug gipatay sila ni Jehova.—Buhat 5:1-10.

11, 12. (a) Unsa ang pipila ka pahinumdom bahin sa pagkamatinud-anon? (b) Unsang mga kaayohan ang motungha tungod sa pagkamatinud-anon?

¹¹ Kon may panahong matental kita sa pagtuis sa kamatuoran sa tinguha nga dayegon kita sa mga tawo, hinaot ang sugilanon ni Ananias  ug Sapira mahimong makapahinuklog nga pahinumdom. Tingali makalimbong kita sa mga isigkatawo, apan dili kita makalimbong kang Jehova. (Hebreohanon 4:13) Ang Kasulatan nagbalikbalik sa pag-awhag kanato nga kita magmaminatud-on sa usag usa, kay ang mga bakakon walay dapit sa yuta nga nahinloan na sa pagkadili-matarong. (Proverbio 14:2; Pinadayag 21:8; 22:15) Tin-aw gayod ang hinungdan niana. Ang tigpasiugda sa tanang kabakakan walay lain kondili si Satanas nga Yawa.—Juan 8:44.

¹² Daghang kaayohan ang motungha kon magmatinud-anon kita sa atong pagkinabuhi. Nalakip niana ang hinlong tanlag ug ang katagbawan kay mosalig man ang uban kanato. Sa daghang kahimtang, tungod kay sila matinud-anon man, ang mga Kristohanon nakabaton ug trabaho o nagpabilin sa ilang trabaho. Hinuon, ang labing hinungdanong kaayohan mao nga mahimo kitang higala sa Diyos nga Labing Gamhanan tungod sa pagkamatinud-anon.—Salmo 15:1, 2.

Paghupot sa Kaputli

13. Unsang kahimtang ang nasum-okan ni Jose, ug unsay iyang sanong?

¹³ Si Jose, usa ka anak nga lalaki sa patriarkang si Jacob, gibaligya ingon nga ulipon sa edad nga 17. Nakaabot siya sa kadugayan sa panimalay ni Potipar, usa ka opisyal sa palasyo sa Ehipto, diin si Jose naibgan sa asawa sa iyang agalon. Siya gustong makigsekso kang Jose, nga usa ka ambongan nga batan-ong lalaki ug sa adlaw-adlaw nag-awhag siya kaniya: “Dulog kanako.” Layo si Jose sa iyang pamilya ug siya didto sa usa ka nasod nga walay nakaila kaniya. Sayon ra untang makigsekso siya niadtong bayhana nga walay laing tawo ang mahibalo. Bisan pa niana, sa dihang siya gihawiran sa asawa ni Potipar, si Jose mikalagiw.—Genesis 37:2, 18-28; 39:1-12.

14, 15. (a) Nganong ang sugilanon ni Jose makapaikag kanato? (b) Nganong ang usa ka Kristohanong babaye mapasalamaton nga siya namati sa mga pahinumdom sa Diyos?

¹⁴ Si Jose nagdako sa usa ka pamilya nga may kahadlok sa Diyos, ug iyang nasabtan nga sala ang pagpakigsekso tali sa dili bana ug asawa. “Unsaon ko pagbuhat kining dakong pagkadaotan ug makasala gayod batok sa Diyos?” siya nangutana. Ang iyang pangatarongan lagmit nagiyahan sa kahibalo bahin sa sukdanan sa Diyos alang sa mga tawo sumala sa gipahayag sa Eden, nga mao ang monogamiya. (Genesis 2:24) Ang katawhan sa Diyos karon makabatog kaayohan gikan sa pagpalandong sa paagi sa pagsanong ni Jose sa maong kahimtang. Sa pipila ka dapit, ang mga tinamdan bahin sa pagpakigsekso dili gayod seryoso mao nga ang mga batan-on nga dili mohimo sa imoralidad biaybiayon sa ilang mga katalirongan. Ordinaryo na ang pagkadunay kabit taliwala sa mga tawong hingkod. Busa, ang sugilanon ni Jose maoy tukma-sa-panahon nga pahinumdom kanato. Ang sukdanan sa Diyos mao nga ang pagpakighilawas ug pagpanapaw maoy  mga sala gihapon. (Hebreohanon 13:4) Ang daghang natental sa supak-sa-balaod nga pagpakigsekso mouyon nga adunay lig-ong katarongan nga dili kana himoon. Nalakip sa dili-maayong mga resulta tingali mao ang kaulawan, gihasol nga tanlag, mga pangabugho, pagmabdos, ug sakit nga gitakod sa pagpakigsekso. Sumala sa gipahinumdom kanato sa Kasulatan, ang tawo nga nagabatasan sa pagpakighilawas “nagapakasala batok sa iyang kaugalingong lawas.”—1 Corinto 5:9-12; 6:18; Proverbio 6:23-29, 32.

¹⁵ Si Jenny, b usa ka dalagang Saksi ni Jehova, may katarongan nga magmapasalamaton sa mga pahinumdom sa Diyos. Sa trabahoan, ang usa ka guwapo nga kauban sa trabaho nagpakitag interes kaniya. Sa dihang wala kadto tagda ni Jenny, gipaspasan niya ang iyang pagpangulitawo. “Gilisdan ako sa pagpabilin nga putli,” siya miangkon, “kay makapahimuot man kon adunay lalaki nga maibog kanimo.” Ugaling lang, siya nakaamgo nga ang tinguha sa ulitawo mao lamang ang pagdugang kaniya sa daghang babaye nga iya nang gikarelasyon. Sa dihang iyang gibati nga nagkahuyang ang iyang determinasyon sa pagbalibad, siya nangaliyupo kang Jehova nga tabangan siya sa pagpabiling matinumanon Kaniya. Nakaamgo si Jenny nga ang mga butang nga iyang nakat-onan gikan sa iyang pagdukiduki sa Bibliya ug sa Kristohanong mga basahon nahisamag mga pahinumdom nga nagpalig-on sa iyang pagkamabinantayon. Usa sa maong mga pahinumdom mao ang sugilanon ni Jose ug sa asawa ni Potipar. “Basta kanunay nakong pahinumdoman ang akong kaugalingon nga gihigugma ko gayod si Jehova,” siya mihinapos, “dili gayod ako mahadlok nga mabuhat ko kining dakong pagkadaotan ug makasala batok kaniya.”

Pamati sa mga Pahinumdom sa Diyos!

16. Sa unsang paagi makabenepisyo kita kon atong sublion pagbasa ug palandongon ang mga kinabuhi sa mga tawong gihisgotan diha sa Bibliya?

¹⁶ Kitang tanan makapauswag sa atong pagpabili alang sa mga sukdanan ni Jehova pinaagi sa pagpaningkamot nato nga masabtan kon nganong ang pipila ka asoy gipreserbar diha sa Kasulatan alang kanato. Unsay gitudlo niana? Unsang mga hiyas o mga kiling nga gipasundayag sa mga tawong gihisgotan sa Bibliya ang kinahanglan natong sundon o likayan? Ginatos gayod ka tawo ang gihisgotan sa Pulong sa Diyos. Ang tanan nga nahigugma sa pahimangno sa Diyos makabenepisyo kon ilang ugmaron ang tinguha alang sa nagahatag-ug-kinabuhi nga kaalam, lakip na ang mga pagtulon-an nga atong makat-onan gikan sa mga panig-ingnan nga gipreserbar pag-ayo ni Jehova. Kining magasina kanunayng nagpatik ug mga artikulo bahin sa mga tawo kansang mga sugilanon adunay pagtulon-an alang kanato. Nganong dili mogugol ug panahon aron sublion kana sa pagbasa?

17. Unsay imong pagbati bahin sa mga pahinumdom ni Jehova, ug ngano?

¹⁷ Pagkamapasalamaton nato sa mahigugmaong pagtagad nga gipadayag ni Jehova alang sa mga nanlimbasog sa pagbuhat sa iyang kabubut-on! Kita dili gayod hingpit, sama ra sa mga lalaki ug mga babayeng gihisgotan sa Bibliya. Bisan pa niana, ang nahisulat nga talaan bahin sa ilang mga gibuhat makatabang pag-ayo kanato. Pinaagi sa pagpamati sa mga pahinumdom ni Jehova, makalikay kitag seryosong mga sayop, ug makasundog kita sa maayong mga panig-ingnan niadtong naglakaw sa mga dalan sa pagkamatarong. Kon himoon nato kana, makaawit kita sama sa salmista: “Malipayon ang mga nagasunod sa . . . mga pahinumdom [ni Jehova]; sila nagpadayon pagpangita kaniya sa bug-os nga kasingkasing. Ang akong kalag nagbantay sa imong mga pahinumdom, ug gihigugma ko sila sa hilabihan gayod.”—Salmo 119:2, 167.

[Mga footnote]

Unsay Imong Tubag?

• Unsay makat-onan nato gikan sa tinamdan ni David bahin kang Saul?

• Unsay gitudlo kanato sa asoy bahin ni Ananias ug Sapira?

• Nganong ilabinang makapaikag kanato ang sugilanon sa kinabuhi ni Jose?

[Mga Pangutana sa Pagtuon]

[Hulagway sa panid 26]

Nganong midumili si David nga patyon si Saul?

[Hulagway sa panid 27]

Unsay makat-onan nato gikan sa asoy bahin ni Ananias ug Sapira?

[Hulagway sa panid 28]

Unsay nagpahinabo nga si Jose misalikway sa imoral nga mga tentasyon?