Malipayon Ka ba Gayod?

OO, mangutana ka tingali sa imong kaugalingon, ‘Malipayon ba gayod ako?’ Ang mga nagtuon bahin sa relasyon sa mga tawo diha sa katilingban naningkamot gayod sa pagsusi kon unsay imong tubag o tubag sa uban, apan dili sayon ang ilang trabaho. Ang pagsukod sa kalipay sa mga tawo mahimong ipakasama sa pagsukod kon unsa ka dako ang gugma sa usa ka bana alang sa iyang asawa o kon unsa ka dako ang kaguol tungod sa pagkamatay sa usa ka membro sa pamilya. Dili kita makahatag ug tukmang sukod sa emosyon. Hinuon, ang maong mga tawo nga nagtuon miila sa usa ka paninugdang kamatuoran: Ang tanang tawo adunay katakos nga malipay.

Bisan pa sa atong kinaiyanhong katakos nga malipay, ang seryosong mga problema nakahatag ug grabeng kagul-anan. Tagda kini nga pananglitan: Diha sa pipila ka siyudad, ang mga nangamatay sa AIDS nakapuno sa mga menteryo. Gipangablihan sa mga awtoridad ang karaang mga panteyon aron didto ilubong ang bag-ong nangamatay. Sa mga dapit sa Aprika, ang pagpanghimog lungon maoy usa sa pangunang mga trabaho. Ug bisan diin ka pa nagpuyo, makakita kag daghang masulub-ong mga tawo nga nag-antos sa grabeng mga sakit o namatyag mga paryente ug mga higala.

Komosta diha sa adunahang mga dapit? Ang kalit nga pagkausab sa mga kahimtang makapawala dayon sa pinansiyal nga kasegurohan niadtong wala makapangandam niana. Sa Tinipong Bansa, daghang retiradong mga tawo ang kinahanglang motrabaho pag-usab kay wala na sila makadawat sa ilang mga pensiyon. Ang mga bayranan sa ospital ug tambal kasagarang makahurot sa tinigom nga salapi sa pamilya. “Makita nimo kining mga tawhana nga moduol kanimo nga may dagkong mga balayranan ug mga problema sa panglawas ug kini makapaguol kanimo,” matod sa usa ka magtatambag labot sa balaod. “Sa daghang higayon kinahanglang imo silang sultihan, ‘Kinahanglan nimong ibaligya ang imong balay aron masuportahan nimo ang imong kaugalingon.’” Apan komosta ang mga tawo nga walay problema bahin sa kuwarta? Maguol ba usab kaha sila?

Ang pipila ka tawo maoy sama sa iladong kompositor nga si Richard Rodgers. Kini ang giingon bahin kaniya: “Pipila lang ka tawo ang nakahatag ug dakong kalipay ngadto sa daghang tawo.” Bisan tuod ang iyang mga awit nakapalipay sa uban, siya nag-antos sa grabeng depresyon. Nakab-ot niya ang duha ka tumong nga gipangandoy sa daghang tawo—salapi ug kabantog—apan naangkon ba niya ang kalipay? Usa ka biograpo miingon: “[Si Rodgers] nagmalamposon gayod sa iyang trabaho, nagpahimulos ug maluho nga pagkinabuhi, ug gipasidunggan ug duha ka Pulitzer Prize. Siya dili usab malipayon ug magul-anon kaayo halos sa tanang panahon.”

Sama sa imo tingaling mamatikdan, ang pagsalig sa bahandi aron magmalipayon kanunayng malimbongon. Ang usa ka reporter bahin sa pagpamuhunan sa The Globe and Mail sa Toronto, Canada, nagbatbat sa “kamingaw ug kahaw-ang” nga giantos sa mga adunahan. Sumala sa usa ka tigtambag bahin sa panalapi, sa dihang hatagan sa datong mga ginikanan ug daghang kuwarta o regalong mga butang ang ilang mga anak, “kini kasagarang mag-ani ug kagul-anan sa ulahi.”

 Aduna bay Lig-ong Pasikaranan nga Magmalipayon?

Aron molambo, ang usa ka tanom nga bulak nagkinahanglag maayong yuta, tubig, ug hustong klima. Sa susama, giila sa mga tigpanukiduki nga ang pipila ka butang makatabang aron magmalipayon. Kini naglakip sa maayong panglawas; maayong trabaho; igong pagkaon, puy-anan, ug besti; katumanan sa mga tinguha sa pagmugna; ug tinuod nga mga higala.

Lagmit mouyon ka gayod nga ang maong mga butang makapalipay sa usa ka tawo. Apan aduna pay mas hinungdanong bahin. Kini mao ang kahibalo bahin sa “malipayong Diyos,” kansang ngalan maoy Jehova. (1 Timoteo 1:11) Sa unsang paagi makatabang ang maong kahibalo? Si Jehova mao ang atong Maglalalang, ug siya naghatag kanato sa katakos nga malipay. Makataronganon nga siya nahibalo kon unsay makapalipay gayod kanato. Ang mosunod nga artikulo maghisgot sa iyang paagi sa paggiya sa mga tawo sa bisan diin o sa bisan unsang kahimtang ngadto sa kinabuhi nga may dumalayong kalipay.

[Hulagway sa panid 4]

Sama sa usa ka tanom nga bulak, ang kalipay nagkinahanglag hustong mga kahimtang aron molambo

[Picture Credit Line sa panid 3]

© Gideon Mendel/CORBIS